1-3. Gin gik mage ma nyalo miyo migawo olokre ne Jokristo ma tiyo ne Nyasaye gi thuologi duto?

ROBERT JO gi Mary jaode wacho kama: “Bang’ bedo jomisonari kuom higni 21, jonyuolwa duto nochako tuore mochopo kama koro tuo noketogi piny. Ne nyaka koro waritgi, kendo ne watimo mano gi chunywa te. Kata kamano, ne wawinjo malit ka ne ochuno ni wawe migawo ma ne wahero ahinya mondo wadog pacho wadhi warit jonyuolwa.”

² William gi Terrie wacho kama: “Ka ne wafwenyo ni midekre ma ne chandowa ne ok nyal yienwa dok e migapwa, ne waywak ahinya. Gombo ma ne wan-go mar tiyo ne Jehova e piny machielo norumo mana kamano.”

³ Aleksey wacho kama: “Ne wang’eyo ni joma ne sandowa ne dwaro loro Bethel ma ne antieree. Kata kamano, ne wabwok ahinya ka ne olor Bethel kendo koro ne chunowa ni mondo wawuogi.”

4. Gin penjo mage ma wadwaro nono e sulani?

⁴ Mopogore gi ranyisi ma wawachogo, nitiere jo Bethel mathoth kaachiel gi Jokristo mamoko ma bende migepegi oselokore. * Owete gi nyiminego nyalo yudo ka litnegi ahinya weyo migawo ma ne gigeno kendo gihero. Ang’o ma nyalo konyogi mondo ginyagre maber gi lokruok moseyudogi? To in iwuon, ere kaka inyalo konyogi? Dwoko mag penjogo nyalo konyowa mondo wanyagre gi lokruoge ma wayudo e ngimawa.

5. Gin pek mage ma nyalo bedoe sama migawo olokore?

⁵ Kata bed ni watiyo ne Jehova e Bethel kata kuonde mamoko, wanyalo hero joma wan-go pile kod alwora ma watiyonee Jehova. Ka ochopo kama koro chuno ni nyaka wawuog, mano nyalo miyo wawinj malit. Wabedo gi kuyo nikech waweyo owete gi nyimine ma ne wan-go to ahinya-ahinya ka po ni wawuok nikech sand. (Mat. 10:23; 2 Kor. 11:28, 29) E wi mano, wanyalo yudo ka ng’iyo gi alwora manyien sama migawo olokore bedo matek. Mano bende e gima timore kata ng’ato odok dala ka owuok e migawo ma ne entiere. Robert gi Mary Jo wacho niya: “Ne ok wadak thurwa kuom higni mang’eny nikech migawo ma ne wan-go, to mano nomiyo wiwa owil gi timbe kod kit ogandawa. Kata mana lendo gi dhowa wawegi ne ok yot. Ne wachalo joma welo e kind ogandawa.” Pek machielo ma moko kuom joma migapgi olokore romogago en yudo pesa ma gikonyorego. Mano nyalo miyo gibed gi parruok mang’eny. Ang’o ma nyalo konyogi?

6. Ere kaka wanyalo siko machiegni gi Jehova?

⁶ Sik machiegni gi Jehova. (Jak. 4:8) Ere kaka wanyalo timo mano? Onego watenre kuom Jehova nikech en e ‘jawinj kwayo mar ji.’ (Zab. 65:2) Zaburi 62:8 wacho niya: “Goluru weche me i chunyu e nyime.” Jehova nyalo “timo weche duto mokadho ma wakwayo kata ma waparo.” (Efe. 3:20) Jehova ok miwaga mana gik ma wakwayo kende, to otimo mokalo kanyo. Onyalo konyowa loyo chandruok ma wan-go e yo ma ne ok wapar kata matin.

7. (a) Mondo wasik machiegni gi Jehova, ang’o monego watim? (b) Ka luwore gi Jo-Hibrania 6:10-12, en ang’o ma Jehova singonwa ka wadhi nyime tiyone gi chunywa duto?

⁷ Mondo isik machiegni gi Jehova, som Muma pile kendo ipar matut weche misomo. Owadwa moro ma chon ne en jamisonari wacho niya: “Dhiuru nyime timo lamo mar joot kendo iko chokruoge mana kaka ne utimoga ka ne un e migapu machon.” Bende, dhi nyime lando wach maber gi kinda e kanyakla ma intiere sani. Jehova paro joma dhi nyime tiyone gi chunygi duto kata ka po ni sani ok ginyal timo duto ma ne gitimoga chon.​—Som Jo-Hibrania 6:10-12.

8. Ere kaka weche ma ni e 1 Johana 2:15-17 nyalo konyi mondo iket ngimani obed mayot?

 ⁸ Ket ngimani obed mayot. Kik iyie mondo parruok ma piny Satanni kelo ne ji omoni dhi nyime tiyo ne Jehova. (Mat. 13:22) Kik iyie mondo joma ok ti ne Jehova, wedeni, kata osiepeni othung’i gi wach manyo pesa mokalo tong’. (Som 1 Johana 2:15-17.) Tenri kuom Jehova nikech osingo ni obiro konyi “e kinde mowinjore.” Obiro konyi mondo ibed gi yie motegno, ibed gi chuny mokue, kendo obiro miyi gik mochuno e ngima.​—Hib. 4:16; 13:5, 6.

9. Ka luwore gi Ngeche 22:3, 7, ang’o momiyo ber tang’ gi gope ma ok ochuno, to ang’o ma nyalo konyowa ng’ado paro maber?

⁹ Kik idonj e gope ma ok ochuno. (Som Ngeche 22:3, 7.) Dar kawoga pesa mang’eny, to mano nyalo miyo ng’ato odonj e gowi e yo mayot. Mondo kik idonj e gope, kik ihol pesa king’iewogo gik ma ok ochuno. Sama wan gi parruok mang’eny, ng’eyo ni wabiro holo gowi ma rom nade nyalo bedo matek. Kuom ranyisi, gima kamano nyalo timore sama ng’ato nigi jatuo moro. E weche kaka mago, kik wiyi wil ni ‘lamo kod sayo’ nyalo konyi mondo ing’ad paro e yo maber. Jehova biro dwoko lamoni kuom miyi kue ma biro ‘rito chunyi kod pachi,’ mondo ing’ad paro mowinjore.​—Fil. 4:6, 7; 1 Pet. 5:7.

10. Wanyalo timo ang’o mondo wayud osiepe manyien?

¹⁰ Bed machiegni gi joma nyalo konyi gadier. Pim ne osiepeni gik misekaloe kod gik ma chandi, to ahinya-ahinya osiepe mosekalo e pek mikaloe sani. Timo kamano nyalo duogo chunyi. (Ekl. 4:9, 10) Osiepe ma ne in-go ka ne pod in e migawo machon pod gin mana osiepeni. Sama iyudo migawo manyien, biro bedo maber ka ibedo gi osiepe ka midhiyeno. Ka idwaro bedo gi osiepe, in be nyaka ibed osiep maber. Inyalo timo ang’o mondo iyud osiepe manyien? Pim ne jomamoko gik mabeyo ma Jehova notimoni ka ne migawo pok olokore mondo gine gadier ni pod imor gi tiyo ne Jehova. Kata obedo ni jomoko nyalo wuoro gimomiyo tiyo ne Jehova gi thuoloni duto pod en gima mori, ranyisi miketo nyalo moro jomamoko to mano nyalo miyo gibed osiepeni. Kata kamano, tang’ mondo kik ichak pakori e wi gik mabeyo misetimo e tij Jehova, kendo kik iwuo marach e wi gik ma ok mori.

11. Ere kaka unyalo dhi nyime bedo ma mor e kend maru?

¹¹ Ka po ni nochuno ni uwe migawo nikech jaodi tuore, kik iket ketho kuome. Komachielo, ka in iwuon e ma ituori, kik iwinj malit kichako paro ni in e ma nigolo jaodi e migawo. Kik wiyi wil ni un “ringruok  achiel” kendo ni ne isingori e nyim Jehova ni ibiro rito jaodi e chal moro amora. (Mat. 19:5, 6) Ka po ni ne uwuok e migawo nikech ne uyudo nyathi apoya, konyuru nyathiuno mondo ong’e ni uhere moloyo kata kaka nuhero migawo ma ne un-go. Konyeuru mondo ong’e ni unene kaka mich ma Nyasaye omiyou. (Zab. 127:3-5) Bende, nyiseuru gueth kod gik mamoko mabeyo ma ne omorou ka ne un e migawo. Timo kamano nyalo jiwe mondo en bende obi oti ne Jehova gi thuolone duto mana kaka un be ne utimo.

12. (a) Ere kaka wanyalo konyo Jokristo ma tiyo ne Nyasaye gi thuologi duto mondo gidhi nyime gi migapgi? (b) Ere kaka wanyalo miyogi tich mayot ka migapgi olokore?

¹² Kanyakla mang’eny kanyachiel gi owete gi nyimine mamoko timoga maber ahinya sama gikonyo owete gi nyimine ma tiyo ne Nyasaye gi thuologi duto mondo gidhi nyime gi migawo. Gitimo kamano kuom jiwogi mondo gidhi nyime gi migapgi, konyogi gi gige ringruok kod pesa ka mano dwarore, kata konyogi e rito jonyuolgi man pacho. (Gal. 6:2) Ka joma tiyo ne Nyasaye gi thuologi duto odar mobiro e kanyaklau nikech migapgi olokore, kik uchak paro ni lokruok notimore nikech migawo notamogi timo kata ni ne gitimo richo moro. * Kar mano, konygiuru mondo tich obednegi mayot. Rwakgiuru gi mor kendo pwogiuru kuom tich maber ma gisetimo kata ka po ni gie sani ok ginyal timo mathoth nikech tuoche. Ng’egiuru maber. Sumuru rieko kod lony ma gin-go.

13. Ere kaka wanyalo konyo joma migapgi olokore?

 ¹³ Joma migapgi olokore nyalo dwaro ni okonygi yudo ot ma ginyalo dakie, ng’eyo yore mag wuoth, manyo tich, kod gik mamoko mochuno. Ginyalo dwaro bende ni okonygi ng’eyo gik ma chik dwaro e wi weche kaka chulo osuru kod insuarens. Gima duong’ moloyo ma nyalo konyogi en ng’eyo chal ma gintie, to ok nenogi lit kende. Nyalo bedo ni ginyagore gi wach tuo ma chandogi giwegi kata ma chando watgi moro. Samoro gin gi kuyo nikech watgi moro otho. * Kata, nyalo bedo ni gikuyo nikech gin mabor gi osiepegi ma ne gin-go chon ka ne gin e migawo. En gima kawoga kinde mondo ng’ato ong’i gi weche kaka mago.

14. Ere kaka jo kanyakla moro nokonyo nyaminwa moro mondo ong’i gi migawo manyien ma noyudo?

¹⁴ Sama ilendo kodgi kendo ijiwogi kokalo kuom ranyisi maber miketonegi, mano nyalo konyogi mondo ging’i gi lokruok. Nyaminwa moro ma ne osebedo ka tiyo ne Jehova kuom higni mang’eny e piny machielo wacho niya: “E migapa machon, ne atayoga puonjruok mag Muma pile ka pile. To e migapa manyien, ne ok yot somo ne ng’ato Muma kata mana nyiso vidio. Kata kamano, jolendo ma ne wan-go e kanyakla manyien ne dhiga koda e dok timo limbe kod tayo puonjruok mag Muma ma ne gin-go. Neno kaka owete gi nyiminego ne timo kinda kendo nyiso chir mang’eny e tayo jopuonjre ma ne timo dongruok nokonya ng’eyo ni nitie joma ne nyalo puonjore e alworano. Napuonjora kaka nanyalo chako lendo ne ji. Gigo duto nomiyo abedo ma mor kendo.”

15. Ang’o minyalo timo mondo ibed gi nyak e migapi manyien?

¹⁵ En gima nyalore mondo ibed gi nyak e migawo manyien ma in-go. Kik ipar ni migawo nolokore nikech ne ok itimga migawo mari maber. Bende, mano kik mi ichak neno ni in ng’at ma ok nyal konyo ahinya. Tem neno kaka Jehova guedhi e yore mathoth  e migawo ma in-go sani kendo med mana dhi nyime lendo. Luw ranyisi mar Jokristo mokwongo. ‘Ne gilando wach maber mar Nyasaye’ kamoro amora ma ne gidhiye. (Tich 8:1, 4) Kinda mitimo mondo idhi nyime lendo nyalo kelo nyak mathoth. Kuom ranyisi, jopainia moko ma ne oriemb e piny moro nodhi e piny machielo ma bende jolendo ma ne wacho dhoggi ne dwaroree ahinya. Mana kuom dweche matin kende, nochak grube ma ne dhi maber.

16. Ere kaka inyalo bedo ma mor e migapi manyien?

¹⁶ Mor ma Jehova chiwo e ma miyowa teko. (Neh. 8:10) Gima duong’ monego omiwa mor en ni wan gi winjruok maber gi Jehova, to ok migawo ma wan-go kata bed ni wahero migawono ma romo nade. Omiyo, dhi nyime wuotho gi Jehova kendo ikwaye mondo omiyi rieko, otayi, kendo osiri. Par kinde duto ni nihero migawo ma ne in-go motelo nikech niketo chunyi duto e konyo jomamoko kuno. Ket chunyi kuom migawo ma in-go sani kendo yaw wang’i mondo ine kaka Jehova konyi mondo iher migawono bende.​—Ekl. 7:10.

17. Ang’o monego wapar e wi migepe ma wan-go sani?

¹⁷ Gima onego wapar kinde duto en ni tiyo ne Jehova osiko; migawo to en gima nyalo lokore sa asaya. E piny manyien, migepe ma wabiro timo biro lokorega. Aleksey ma ne wawuoyo kuome e chak sulani wacho ni lokruok mosegayudo e migape konye mondo oikre ne lokruok ma biroga bedo e piny manyien. Owacho niya: “Nang’eyoga ni Jehova nitie adier kendo piny manyien bende en gima biro betie gadier, en mana ni ne ok an machiegni gi Jehova ahinya kendo naneno ni piny manyien pod ne ni mabor. Sani aneno Jehova mana kaka ng’at ma ni e batha kendo aneno ni piny manyien ni mana e dhoot.” (Tich 2:25) Kata bed ni wan gi migawo mane, wadhiuru adhiya nyime wuotho gi Jehova. Ok obi weyowa ngang’, kendo obiro dhi nyime konyowa mondo wabed ma mor e migawo moro amora ma watimo kamoro amora ma wantie.​—Isa. 41:13.