BE NITIE migawo moro ma igombo ahinya timo e kanyakla to ok inyal time sani? Samoro Jakristo wadu machielo e ma timo migawono gie sani. Samoro en migawo ma ne isegatimo chon. Kata kamano, bedo moti, midekre, chandruoge mag yuto, kata ting’ mar rito joodu nyalo moni timo migawono. Nyalo bedo ni en migawo ma isetimo kuom higni mang’eny to samoro lokruok ma timore e riwruok mar oganda Jehova miyo koro ok inyal dhi nyime time. Kata bed ni en ang’o ma moni timo migawo moro, pod inyalo winjo e chunyi ni ok itim duto ma diher timo e tij Nyasaye. E kinde kaka mago, ng’ato nyalo winjo marach ahinya. Kata kamano, ere kaka inyalo tang’ mondo kik chunyi nyosre, kik iyi wang’, kata kik imak sadha gi ng’ato ang’ata? To ere kaka inyalo siko ka imor?

Ranyisi mar Johana Jabatiso nyalo konyowa ng’eyo kaka wanyalo siko ka wamor e migawo ma wan-go. Johana ne nigi migepe makende ahinya. Kata kamano, nyalo bedo ni lokruok ma notimorene ne en gima ne pok oparoga. Ne ok opar ni ne odhi bedo e jela kuom kinde malach moloyo kinde ma ne osebedo kolendogo. To e ma pod nodhi nyime bedo ma mor e ngimane duto. Ang’o ma ne okonye? To ere kaka wanyalo siko ka wamor kata mana sama weche ok dhinwa kaka dwaher?

E higa mar 29, Johana nochako migawone mar iko yo ne Mesia kowacho niya: “Lokuru chunyu ua e richo nimar Pinyruodh polo osekayo machiegni.” (Mat. 3:2; Luka 1:12-17) Ji mang’eny nowinjo wach. Ne giaga nyaka kuonde maboyo ka gibiro winjo wach ma nolando kendo thothgi noloko chunygi mi nobatisgi. Nosiemo jotend dinde ma ne kawore kaka joma kare ahinya konyisogi kum ma noritogi ka ok gilokore. (Mat. 3:5-12) Dweche auchiel bang’e, Johana notiso Yesu ma ne en gima kende ahinya e migawone. Chakre kindeno ka dhi nyime, Johana nochako nyiso ji ni mondo giluw Yesu ma e Mesia ma nosingi.​—Joh. 1:32-37.

Johana ne nigi migawo makende ahinya to mano e momiyo Yesu nowacho niya: “Kuom joma mon onyuolo, onge ng’at mosebetie maduong’ moloyo Johana Jabatiso.” (Mat. 11:11) Onge kiawa ni Johana ne mor ahinya gi gueth ma ne oyudo. Mana kaka Johana, nitie Jokristo  mathoth ma oseyudo gueth mang’eny e kindegi. Ne ane ranyisi mar Owadwa Terry. Gisetiyo ne Nyasaye gi thuologi duto kuom higni mokalo 50 kanyachiel gi Sandra jaode. Terry wacho kama: “Ne ayudo gueth mathoth. Asebedo painia, ja Bethel, painia makende, jarit-alwora, jarit-distrikt, kendo sani an painia makende kendo.” Wabedoga ma mor sama wayudo migepe mopogore opogore, kata kamano, ranyisi mar Johana konyowa ng’eyo ni mondo wasik ka wamor e migepewa, kinda dwarore, to ahinya-ahinya sama lokruok otimore e ngimawa.

Gima duong’ ma ne okonyo Johana Jabatiso siko ka omor en ni ne ogeno ahinya migepe ma ne Jehova omiye. Ne ane ranyisi ma luwoni. Ka ne Johana osetiso Yesu, kwan mag joma ne luwo Johana nochako bedo matin, to kwan mag joma ne luwo Yesu ne odhi nyime medore. Nikech wachno ne chando jopuonjre Johana, ne gidhi ire ma ginyise niya: “Ne, ng’atno batiso ji kendo ji duto dhi ire.” (Joh. 3:26) Johana nodwokogi kama: “Ng’at ma nigi miaha e wuon kisera. To ka osiep wuon kisera ochung’ kendo winje, obedo gi ilo ahinya nikech dwond wuon kisera. Omiyo, morna osebedo mopong’ chuth.” (Joh. 3:29) Johana ne ok opiem gi Yesu, to bende ne ok ochako paro ni koro migawo ma ne en-go ne ok lich ahinya nikech Yesu ne nigi migawo maduong’ moloye. Kar mano, ne odhi nyime bedo ma mor nikech ne ogeno ahinya migawo ma ne en-go kaka “osiep wuon kisera.”

Paro maber ma ne en-go nomiyo odhi nyime bedo ma mor kata obedo ni migawo ma ne en-go ne ok yot. Kuom ranyisi, nikech ne en Ja-Nazir chakre nyuolne, ne ok yiene madho divai. (Luka 1:15) Yesu nowuoyo e wi ngima ma yot ma Johana nodakie ka owacho kama: “Johana nobiro ka ok ochiem kendo ka ok ometh.” To komachielo, Yesu gi jopuonjrene ne ok gin Jo-Nazir, omiyo ne ginyalo dak mana kaka jomamoko ne odak. (Mat. 11:18, 19) Kata obedo ni Johana ne ok otimo hono moro amora, ne ong’eyo ni jopuonjre Yesu, moriwo nyaka jopuonjrene ma ne koro luwo Yesu, nomi teko mar timo honni. (Mat. 10:1; Joh. 10:41) Kar keto pache ahinya kuom pogruok ma ne nitie e kind jopuonjrene kod jopuonjre Yesu, ne odhi nyime bedo modich e migawo ma Jehova nomiye.

Wan bende ka wageno migepe ma Jehova omiyowa gie sani, wabiro bedo ma mor. Terry ma ne wasewuoyecha wacho kama: “Naketo pacha e migawo ka migawo ma ne omiya.” Sani koro koparo kaka nosebedo kotiyo ne Nyasaye gi thuolone duto, owacho kama: “Ok aywag ang’e kata matin. Aparo mana gueth ma aseyudo.”

Wanyalo medo bedo ma mor e tij Nyasaye mana ka waparo matut kuom gimomiyo migepe ma watimoga gin-ga migepe makende. Gibedoga migepe makende nikech gimiyowa thuolo mar bedo “jotich ma tiyo kanyachiel gi Nyasaye.” (1 Kor. 3:9) Ka po ni wan gi gimoro maber ma wageno ahinya, gino nyalo dhi nyime bedo maber mana ka warite kinde duto. Kamano bende, wabiro siko ka wamor e migawowa mana ka wadhi nyime paro kaka migawono miyowa thuolo makende mar tiyo kanyachiel gi Jehova. Ok wabi pimo kinda ma jomamoko timo gi kinda ma watimo. Ok wabi neno migawo ma watimo kaka migawo matin kopim gi migepe ma jomamoko timo.​—Gal. 6:4.

Johana nong’eyo ni migawo ma ne omiye ne ok dhi kawo kinde malach, kata kamano, samoro ne ok ong’eyo ni migawono ne nyalo rumo apoya nono. (Joh. 3:30) E higa mar 30 bang’ dweche auchiel kama, ka ne Johana osetiso Yesu, Ruoth Herode notueyo Johana e jela. Kata kamano, Johana notimo duto ma ne onyalo mondo odhi nyime chiwo neno. (Mar. 6:17-20) Ang’o ma ne nyalo konye mondo osik ka omor kata obedo ni lokruogego noyude? Nodhi nyime keto pache duto e weche motudore gi lamo Jehova.

Ka ne Johana ni e jela, noyudo ripot ni tich ma Yesu ne tiyo ne medo landore. (Mat. 11:2; Luka 7:18) Johana ne ni gadier chuth ni Yesu e ma ne en Mesia, kata kamano, samoro ne oparore ka be Yesu ne dhi chopo weche duto ma Ndiko nowacho ni Mesia ne dhi timo. To nikech nosekor ni bang’e Mesia ne dhi bedo Ruoth, Johana nopenjore  penjo moko e chunye; kuom ranyisi, Be loch Mesia ne chiegni chakore? Be lochneno ne dhi miyo gole e jela? Mondo oyud dwoko moriere e wi migawo mar Yesu, nooro jopuonjrene moko ariyo mondo gidhi gipenj Yesu niya: “Be in e Jal Mabiro, koso onego warit ng’at machielo mopogore?” (Luka 7:19) Ka ne gidok ir Johana, nyaka bed ni Johana nochikonegi ite adimba seche ma ne gilerone kaka Yesu ne chango ji e yor hono kendo kaka Yesu noorogi mondo gidhi ginyise ni “muofni koro neno, pudhe wuotho, jodhoho bedo maler, joma itgi odino winjo, joma otho ichiero, kendo joma odhier iwachonegi wach maber.”​—Luka 7:20-22.

En adier ni wechego nojiwo Johana. Mano nomiyo obedo gadier ni Yesu ne chopo weche ma nokor e wi Mesia. Kata obedo ni Yesu ne ok ogolo Johana e jela, Johana nong’eyo ni tich ma notimo ne ok odhi nono. Nodhi nyime bedo ma mor kata obedo ni ne en e jela.

Mana kaka Johana, wan bende ka waketo pachwa duto e weche motudore gi lamo Jehova, wabiro nano ka wamor kendo ka wan gi horuok. (Kol. 1:9-11) Wanyalo nano gi mor ka wasomo Muma kendo paro matut kuom gik ma wasomo nikech mano biro paronwa ni migawo ma watimo e tij Nyasaye ok bi dhi nono. (1 Kor. 15:58) Sandra wacho niya: “Somo sula achiel e Muma pile ka pile osekonya mondo amed sudo machiegni gi Jehova. Mano konya mondo aket pacha kuome, to ok kuoma awuon.” Bende, chiko itwa ne ripode ma nyiso gik ma owete gi nyimine timo e tij Jehova en gima ber nikech mano nyalo konyowa mondo kik wapar mana gik ma timorenwa wan wawegi, to kar mano, waket pachwa kuom gik ma Jehova timo. Sandra wacho niya: “JW Broadcasting^® ma wanenoga dwe ka dwe konyowa ng’eyo ni wan machiegni gi riwruok mar oganda Jehova kendo konyowa mondo wasik ka wamor gi migepe ma wan-go.”

Kuom kinde machuok ma Johana Jabatiso notimogo tij lendo, nolendo ka en gi “chuny kod teko mar Elija,” kendo mana kaka Elija, Johana bende ne en mana “dhano ma chal kaka wan.” (Luka 1:17; Jak. 5:17) Ka waluwo ranyisi mar Johana kuom geno migepe ma wan-go kendo keto pachwa duto e tiyo ne Jehova, wabiro siko ka wamor e migepewa kata ang’o ma timre.