1. Jehova omiyo jatichne ka jatichne thuolo mane?

NIKECH Jehova ohero jotichne, osemiyo ng’ato ka ng’ato kuomgi thuolo mar bedo e kanyaklane. Kata obedo ni migepe ma watimo e kanyakla opogore opogore, waduto wamako kama duong’ kendo onge ng’at ma dwawach ni ok wadwar e kanyakla. Jaote Paulo konyowa fwenyo puonj maduong’no. E yo mane?

2. Ka luwore gi Jo-Efeso 4:16, ang’o momiyo dwarore ni wagen jowetewa kendo wati kanyachiel kodgi?

² Mana kaka onyis e ndiko ma tayo sulani, Paulo nowacho ni onge ng’ato ang’ata kuomwa ma nyalo ng’iyo jatich Jehova wadgi mi owachne ni: “Ok adwari.” (1 Kor. 12:21) Mondo kanyakla obed gi kue, nyaka wagen jowetewa kendo wati kanyachiel kodgi. (Som Jo-Efeso 4:16.) Sama wan gi winjruok e kindwa, kanyakla dhi maber kendo obedo kama hera madier opotoe.

3. Ang’o ma wadwaro puonjore e sulani?

³ Gin yore mage ma wanyalo nyisogo ni wachiwo luor ne Jokristo ma wan-go e kanyakla? E sulani, wabiro neno kaka jodong-kanyakla nyalo nyiso ni gichiwo luor ne jodongo wetegi. Kae to wabiro neno yore ma waduto wanyalo nyisogo ni wageno owetewa gi nyiminewa ma ok ni e kend. Kae to mogik, wabiro puonjore kaka wanyalo nyiso ni wamor gi joma ni e kanyaklawa to ok gilony e dhok ma watiyogo.

4. En puonj mane ma Paulo nochiwo e Jo-Rumi 12:10 ma jodongo onego oluw?

⁴ Roho maler mar Jehova e ma ketoga jodong-kanyakla duto. Kata kamano, moro ka moro kuomgi nigi mich kod nyalo mopogore opogore. (1 Kor. 12:17, 18) Moko kuomgi yande e ka obedo jodongo kendo pok gilony ahinya e migawono. Jodongo moko bende ok nyal timo mathoth nikech hikgi oseniang’ kata midekre chandogi. Kata kamano, onge jaduong’ moro amora monego ong’i jaduong’ wadgi ka en gi paro moro e chunye ni, “Ok adwari.” Kar mano, jaduong’ ka jaduong’ onego oluw puonj ma jaote Paulo nochiwo e Jo-Rumi 12:10.​—Som.

5. Ere kaka jodongo nyalo nyiso ni gichiwo luor ne jodongo wetegi, to ang’o momiyo mano en gima dwarore?

⁵ Achiel kuom yore ma jodongo nyisogo ni gichiwo luor ne jodongo wetegi en chikonegi itgi maber sama giwuoyo. Mano dwarore ahinya sama jodongo oromo mondo giwuo e weche moko mapek. Nikech ang’o? Ne ane gima nowach e Watchtower ma Oktoba 1, 1988: “Jodongo onego ong’e ni Kristo nyalo tiyo gi roho maler e tayo jaduong’ moro amora e kindgi mondo oparnegi puonj moro e Muma ma nyalo tayogi e wach moro mapek ma gidwaro ng’ado. (Tich 15:6-15) Onge jaduong’ ma nigi roho mang’eny moloyo jowetene.”

6. Ang’o ma nyalo konyo jodongo tiyo kanyachiel, to mano kelo ber mane ne kanyakla?

⁶ Jaduong’ momiyo jodongo wetene luor temoga mondo kinde mang’eny kik owuo mokwongo sama ginono wach moro e romo mar jodongo. Ok otem chiko mbaka, kata ramo ni gima osewacho e ma nyaka tigo. Kar mano, ochiwo pache gi muolo kod bolruok. Ochiko ite maber sama jodongo wetene chiwo paro. To maduong’ moloyo, otemo mondo oti gi puonj ma ni e Ndiko sama ochiwo pache, kendo oluwo weche mowuok kuom “jatich mogen kendo mariek.” (Mat. 24:45-47) Sama jodongo wuoyo e  romo margi e yor hera kendo ka gimiyore luor, roho mar Nyasaye bet kodgi kendo tayogi mondo ging’ad paro makare ma biro konyo kanyakla.​—Jak. 3:17, 18.

7. Yesu ne nigi paro mane kuom joma ok ni e kend?

⁷ Kanyakla mar Jehova nigi joma okendore, kaachiel gi joot mopogore opogore. To e iye kanyo bende nitie owete gi nyimine ma ok ni e kend. Onego wabed gi paro mane kuom joma ok ni e kendgo? Ne ane paro ma Yesu ne nigo e wi joma ok ni e kend. En owuon ne ok okendo ka ne en e piny ka. Mano nomiyo oketo pache duto e tich ma nokele. Yesu ne ok owacho ni kend kata weyo donjo e kend en gima ochuno. Kata kamano, nowacho ni nitie Jokristo moko ma nyalo yiero weyo ma ok gidonjo e kend. (Mat. 19:11, 12) Yesu nochiwo luor ne joma ne ok ni e kend. Ne ok ochayogi kata nenogi ka joma oremo gimoro.

8. Ka luwore gi 1 Jo-Korintho 7:7-9, ang’o ma Paulo nojiwo Jokristo mondo opar?

⁸ Mana kaka Yesu, jaote Paulo bende ne onge dhako e kinde ma notimo migepene. Paulo ne ok opuonjo ni rach ka Jakristo odonjo e kend. Nong’eyo ni mano yiero ma ng’ato owuon e ma onego otim. Kata kamano, ne ojiwo Jokristo mondo gipar ka ginyalo tiyo ne Jehova ma ok gidonjo e kend. (Som 1 Jo-Korintho 7:7-9.) Kuom adier, Paulo ne ok ochayo joma ok ni e kend. Mano e momiyo noyiero Timotheo mondo otim migepe makende kata obedo ni ne oonge dhako. * (Fil. 2:19-22) Kuom mano, nyalo bedo marach ahinya ka waparo ni owadwa moro owinjore gi migawo moro kata ni ok owinjorego mana nikech osekendo kata pok okendo.​—1 Kor. 7:32-35, 38.

9. Dwawach ang’o e wi donjo e kend kata weyo timo kamano?

⁹ Yesu gi Paulo ne ok opuonjo ni Jokristo nyaka donj e kend kata ni nyaka gisik ma ok gidonjo e kend. Kare dwawach ang’o e wi donjo e kend kata weyo timo kamano? Mnara wa Mlinzi ma Oktoba 1, 2012 noketo wachno maler kama: “Kuom adier, donjo e kend kata weyo ma ok idonjo e kend, duto gin mich mowuok kuom Nyasaye. . . . Jehova ok nega  joma ok ni e kend ka joma nigi wich-kuot kata kuyo.” Wachno onego ojiwwa mondo wachiw luor ne owete gi nyimine ma ok ni e kend.

10. Ere kaka wanyalo nyiso luor ne owete gi nyimine ma ok ni e kend?

¹⁰ Wanyalo nyiso nade ni wadewo chal mar owetewa gi nyiminewa ma ok ni e kend kod kaka giwinjo e chunygi? Onego wang’e ni nitie moko kuomgi ma oseng’ado ni gibiro siko ma ok gidonjo e kend. Moko kuomgi to diher donjo e kend, en mana ni pok giyudo ng’at ma owinjore kodgi. Moko bende ne niga e kend to joutegi notho. Bed ni gin e chal mane kata mane, be en gima kare mondo jomamoko e kanyakla openjgi gimomiyo ok gin e kend kata temo tudogi gi ng’ato? En adier ni moko kuomgi nyalo kwayo mondo okonygi manyo ng’ato. Kata kamano, ka po ni ok gikwayi mondo itim kamano, iparo ni ginyalo winjo nade e chunygi ka ibukori ichako achaka menyonegi? (1 The. 4:11; 1 Tim. 5:13) Wane ane gima moko kuomgi osewacho.

11-12. Ang’o ma ka watimo to wanyalo nyoso chuny owete gi nyimine ma ok ni e kend?

¹¹ Jarit-alwora moro ma pok okendo neno ni timo migawono yotne ahinya nikech oonge dhako. Kata kamano, owacho ni chunye janyosorega sama owete gi nyimine moko openje ni: “Ang’o momiyo pok ikendo, owadwa?” Owadwa machielo ma ja Bethel ma bende pok okendo wacho niya: “Nitie seche ma owete gi nyimine moko tiyoga gi weche moko ma nyalo miyo ng’at ma pok okendo opar ni nitie gimoro malich moremo. Mano nyalo miyo ng’ato opar ni weyo ma ok odonjo e kend en richo kar nene kaka mich.”

¹² Nyaminwa moro ma pok okendi ma tiyo e Bethel nowacho kama: “Nitie jolendo moko ma paroga ni ng’ato ang’ata ma ni kende manyoga ng’at ma dodonjgo e kend. Moko bende paroga ni kamoro amora ma ji ochokoree, joma ok ni e kend menyoega. Nitie kinde ma ne adhi timo migawo moro e alwora moro. Nachopo chieng’ chokruok. Nyaminwa ma ne adhi nindo e ode nonyisa ni e kanyaklagi nitie owete ariyo ma mbesena. Ne onyisa ni kik apar ni otemo tuda gi ng’ato. To ka ne wachopo achopa e Od Romo ni i, noywaya tenge mondo amos owete ariyogo. Ne oketowa e akerekeke.”

13. En ranyisi mag jomage ma nojiwo nyaminwa moro ma pok okendi?

¹³ Nyaminwa moro ma pok okend ma bende tiyo e Bethel nowacho kama: “Ang’eyo jopainia modhuro ma hikgi ng’eny to pok gidonjo e kend, kendo gin Jokristo motegno, gichiwore ahinya e tij Jehova, ok gine ni nitie gimoro amora ma giremo, kendo gikonyo kanyakla ahinya. Ok gine ni giloyo jomamoko mana nikech ok gin e kend, to bende ok giwinj marach ni gionge joutegi kata nyithindo.” Mano e momiyo ber bedo e kanyakla ma ji omiyie luor kendo gigeni. Onge ng’at ma nenoni lit kata nyiego; bende, onge ng’at mochayi kata ma ting’i malo mokalo tong’. Gima in-go gadier en ni giduto giheri.

14. Ere kaka wanyalo nyiso ni wachiwo luor ne Jokristo ma ok ni e kend?

¹⁴ Owetewa gi nyiminewa ma pok odonjo e kend morga ahinya sama gineno ni wagenogi nikech kido mabeyo ma gin-go, to ok nikech pok gidonjo e kend. Kar nenonegi lit ka gima nitie gima giremo, ber mondo wamor kodgi nikech  gimakore gi Jehova. Mano biro miyo kik giwinj e chunygi ka gima wanyisogi ni: ‘Ok wadwaru.’ (1 Kor. 12:21) Gibiro ng’eyo ni wamiyogi luor kendo wamor gi kama gimakonwa e kanyakla.

15. Gin lokruok mage ma jolendo moko osetimo mondo gisir tij Pinyruoth e okang’ momedore?

¹⁵ E higni ma sanigi, jolendo mang’eny osebedo ka keto chenro mar puonjore dhok ma wendo mondo gilend ne joma wacho dhokgo. Mano dwaro lokruok mang’eny e ngimagi. Owete gi nyiminego oyie weyo kanyakla miwachoe dhok ma ne gipon-go kendo dhi e kanyakla mamoko mitiyoe gi dhok machielo ma jolendo dwaroree ahinya. (Tich 16:9) Gitimo yiero ma kamano mondo gisir tij Pinyruoth e okang’ momedore. Kata obedo ni higni mang’eny nyalo kalo ka pok gilony gi dhok mitiyogo e kanyakla ma gidhiyego, pod gikonyo kama duong’ ahinya. Ranyisi maber ma giketo kod lony ma gin-go miyo kanyakla medo gurore motegno. Wamor kodgi ahinya nikech chuny mar chiwruok ma ginyiso!

16. Ang’o ma jodongo onego ong’i sama gidwaro pwodho owadwa moro mondo obed jaduong’-kanyakla kata jakony-tich?

¹⁶ Jodong-kanyakla ok onego ong’ad ni owadwa moro ok nyal bedo jaduong’ kata jakony-tich mana nikech ok olony e dhok mitiyogo e kanyakla. Gima jodongo onego ong’i sama gidwaro pwodho owadwa ne migawo en gik ma Ndiko wacho, to ok ka be olony kata ok olony e dhok mitiyogo e kanyakla.​—1 Tim. 3:1-10, 12, 13; Tito 1:5-9.

17. Gin penjo mage ma joot modar odhi e piny machielo nyalo bedogo?

¹⁷ Nitie joot moko ma osedar modhi e piny machielo nikech weche okethore e pinygi kata mondo gimany tich. Mano nyalo miyo nyithindgi odhi e skunde mipuonjogie kitiyo gi dhok miwacho e pinyno. Samoro jonyuolgi bende nyalo puonjore dhokno e ka inyalo ndikgi tich. To nade ka nitie kanyakla kata grup miwachoe dhok ma ne gipon-go? Joot kaka mago onego odhi e kanyakla mitiyoe gi dhok mane? Be onego giyier dhi e kanyakla miwachoe dhok ma ne gipon-go koso kanyakla miwachoe dhok mitiyogo e pinyno?

18. Ka luwore gi Jo-Galatia 6:5, ere kaka wanyalo chiwo luor ne yiero ma wi ot otimo?

¹⁸ Wi ot e ma nyaka yier kanyakla ma joode biro dhiye. To nikech mano ting’ mare, onego oyier gima biro kelo ne joode duto ber. (Som Jo-Galatia 6:5.) Ok onego wacha yiero motimo. Bed ni otimo yiero mane kata mane, ting’ ma wan-go en rwake gi joode e kanyaklawa gi mor.​—Rumi 15:7.

19. En ang’o ma nyalo dwarore ni wiye udi oparie matut kendo olem?

 ¹⁹ Nitie kuonde moko ma joot nyalo bedo e kanyakla miwachoe dhok ma jonyuol nopon-go, to nyithindo to ok olony e dhokno. Ka po ni kanyaklano ni e alwora miwachoe dhok mitiyogo e pinyno, nyalo bedo matek ne nyithindo yudo ber e chokruoge kendo timo dongruok e weche Nyasaye. Nikech ang’o? En nikech samoro dhok mitiyogo e skul opogore gi dhok ma jonyuol wacho kodgi e ot. E chal ma kamago, wiye udi onego okwa Jehova mondo okonygi ng’eyo kaka ginyalo konyo nyithindgi sudo machiegni kode kod joge. Samoro nyalo dwarore ni gipuonj nyithindgi dhoggi kata gidar gidhi e kanyakla mitiyoe gi dho pinyno, ma nyithindogo winjo maber. Kanyakla ok onego ocha yiero moro amora ma wi ot moro otimo, kar mano, onego gimiye luor kendo gimi one ni nitie kama en gi joode gimako e kanyakla ma giyiero betie.

20. Ere kaka wanyalo nyiso ni wachiwo luor ne owetewa gi nyiminewa ma puonjore dhok manyien?

²⁰ Nikech gik ma wasewuoyoego, pod wabiro bedo gi owete gi nyimine ma ok olony e dhok mitiyogo e kanyakla ma gintieree. Samoro nyalo bedonegi matek chano weche e dhokno mi winjre maler. Kata kamano, ka ok waketo pachwa ahinya kuom yo ma giwachogo dhokno, wabiro neno kaka gihero Jehova kendo gitiyone gi chunygi duto. Sama waneno kido mabeyo kaka mago kuomgi, wabiro medo genogi kendo herogi. Ok wabi wachonegi ni, ‘Ok wadwaru’ mana nikech ok gilony e dhok ma wawacho.

21-22. En thuolo mane makende ma wan-go?

²¹ Jehova osemiyowa thuolo makende mar bedo e kanyaklane. Bed ni wan chwo kata mon, wan e kend kata ooyo, watindo kata wadongo, walony e dhok moro kata wakia dhokno chuth, waduto wan gi nengo maduong’ e wang’ Jehova kod Jokristo wetewa.​—Rumi 12:4, 5; Kol. 3:10, 11.

²² Weuru wadhi nyime tiyo gi puonj mang’eny ma wayudo e ranyisi ma Paulo notiyogo mar dend dhano. Ka watimo kamano, wabiro medo manyo yore ma wanyalo jiwogo jowetewa kod wan wawegi mondo wasik ka wageno karwa e kanyakla mar Jehova.