1. En thuolo mane ma jaber ma wan-go?

WAMOR ahinya gi thuolo ma wan-go mar bedo e kanyakla mar Jehova. Wan gi kue, wamor, kendo wan gi winjruok maber e kindwa. Be nitie kama in iwuon imako e kanyakla mar Jehova?

2. En ranyisi mane ma Paulo notiyogo nyading’eny e barupene?

² Nitie gik mang’eny ma wanyalo puonjore e wi wachni ka wanono ranyisi moro ma jaote Paulo notiyogo nyading’eny e barupene. E moro ka moro kuom barupego, Paulo nopimo kanyakla gi dend dhano. Bende, nopimo jo kanyakla gi fuonni mag del.​—Rumi 12:4-8; 1 Kor. 12:12-27; Efe. 4:16.

3. Gin puonj mage adek ma wadwaro nono e sulani?

³ E sulani, wadwaro nono puonj moko adek ma wanyalo yudo e ranyisi ma Paulo notiyogono. Puonj mokwongo en ni ng’ato ka ng’ato kuomwa nigi kama omako * e kanyakla mar Jehova. Mar ariyo, wabiro neno gima wanyalo timo sama wachako paro ni onge gima wakonyogo kanyakla. Kae to mar adek, wabiro neno gimomiyo onego wasik ka wadich sama watimo migawo momiwa e kanyakla mar Jehova.

4. Ang’o ma Jo-Rumi 12:4, 5 puonjowa?

⁴ Puonj mokwongo ma wayudo e ranyisi ma Paulo notiyogo en ni ng’ato ka ng’ato kuomwa nigi kama omako kata mokonyogo kanyakla mar Jehova. Paulo nochako ranyisineno kowacho kama: “Mana kaka ringruok achiel nigi fuonni mang’eny, to fuonnigo duto ok ti tich achiel, e kaka wan bende, kata obedo ni wang’eny, wan ringruok achiel e winjruok gi Kristo, kendo waduto wan fuonni moriw kanyachiel.” (Rumi 12:4, 5) Ang’o ma Paulo ne temo wacho? Ni kata obedo ni wan gi migepe mopogore opogore e kanyakla, ng’ato ka ng’ato kuomwa nigi nengo maduong’.

5. Gin “mich” mage ma Jehova ochiwo ne kanyakla?

⁵ Sama wawuoyo kuom joma omako kamoro e kanyakla, samoro pachi kwongo ringo kuom owete ma tayo. (1 The. 5:12; Hib. 13:17) En adier ni kokalo kuom Kristo, Jehova osechiwo owete ma gin “kaka mich” mondo ota kanyaklane. (Efe. 4:8) ‘Michgo’ oriwo owete ma ni e Bura Matayo, jokony maggi, owete ma ni e Komiti mar Bad Ofis, jorit-alwora, owete ma puonjo skunde mag tij Nyasaye, jodong-kanyakla, kod jokony-tich. Roho maler e ma ketoga owetego duto mondo ota rombe mag Jehova kendo giteg kanyakla.​—1 Pet. 5:2, 3.

6. Ka luwore gi 1 Jo-Thesalonika 2:6-8, ang’o ma owete moket gi roho maler temoga matek mondo otim?

⁶ Roho maler ketoga owete mondo gitim tije mopogore opogore. Mana kaka fuonni mopogore opogore mag del, kaka lwedo gi tielo, konyorega mondo del duto oti maber, e kaka owete ma roho oketo e migepe mopogore opogorego tiyo matek mondo kanyakla odhi maber. Ok gimany duong’. Kar mano, gitemoga matek mondo giger owete gi nyimine kendo tegogi. (Som 1 Jo-Thesalonika 2:6-8.) Wadwoko ne Jehova erokamano maduong’ kuom miyowa owete ma dewowago!

7. Gin gueth mage ma joma tiyo ne Nyasaye kuom thuologi duto yudoga?

⁷ E kanyakla, nitie jomoko miketoga mondo obed jomisonari, jopainia makende, kata jopainia mapile. Kuom adier, owete gi nyimine modhuro e piny mangima oseyiero mondo giti tij lendo kod puonjo ji kuom thuologi duto. Kuom timo kamano, gisekonyo ji mang’eny mondo obed jopuonjre Yesu Kristo. Kata obedo ni thoth joma tiyo ne Nyasaye kuom thuologi dutogo onge gi mwandu mang’eny, Jehova oseolonegi gueth mang’eny. (Mar. 10:29, 30) Wamor kodgi ahinya kendo wagoyonegi erokamano kuom kama gimako e kanyakla!

8. Ang’o momiyo Jehova ogeno jalendo ka jalendo e kanyakla?

⁸ Be owete ma tayo kod joma tiyo ne Nyasaye kuom thuologi duto kende e ma omako kamoro e kanyakla? Ok en kamano! Jehova kod kanyaklane ogeno jalendo ka jalendo. (Rumi 10:15; 1 Kor. 3:6-9) Donge tich maduong’ ma wan-go e kanyakla en loko ji obed jopuonjre Ruodhwa Yesu Kristo? (Mat. 28:19, 20; 1 Tim. 2:4) To mano e gima waduto e kanyakla waketo mokwongo, bed ni wan jolendo mosebatisi kata ma pok obatisi.​—Mat. 24:14.

9. Ang’o momiyo wamor gi nyiminewa ma Jokristo?

 ⁹ Jehova omiyo nyiminewa migawo maduong’ ahinya e kanyakla. Omor gi kaka gitiyone gi chunygi duto, bed ni gin mon, mine, mond liete, kata nyimine ma ok ni e kend. Muma wuoyo nyading’eny kuom mon ma Jehova ne morgo ahinya, kopwoyogi nikech riekogi, yiegi, kindagi, chir, chuny mar konyo ji, kod gik mamoko mabeyo ma ne gitimo. (Luka 8:2, 3; Tich 16:14, 15; Rumi 16:3, 6; Fil. 4:3; Hib. 11:11, 31, 35) To mano kaka wagoyo ne Jehova erokamano kuom miyowa nyimine ma Jokristo e kanyaklawa ma nigi kido mabeyo kaka mago!

10. Ang’o momiyo wamor gi owetewa gi nyiminewa moti?

¹⁰ Wamor bende ni wan gi joma hikgi oniang’ e kanyakla. Kanyakla moko nigi owete gi nyimine ma sani oti to gisetiyo ne Jehova e ngimagi duto. Nitie bende jomoko moti ma yande e ka opuonjore adiera. Bed ni owetewa gi nyiminewa ma hikgi oniang’go osebudho e adiera kata ooyo, wang’eyo ni nitie pek ma gikaloe nikech bedo moti, kuom ranyisi, tuoche. Pek kaka mago nyalo miyo kik gitim mathoth e kanyakla kod e tij lendo. Kata kamano, gitimo duto ma ginyalo e tij lendo, kendo gitemo kar nyalogi mondo gijiw kanyakla kendo tiego jomamoko! Lony ma gin-go konyowaga ahinya. Gibeyo ahinya e wang’ Jehova, kendo wan bende gibeyonwa.​—Nge. 16:31.

11-12. Rowere ma ni e kanyaklau osegajiwi nade?

¹¹ Par ane bende rowerewa. Giromo gi weche mapek sama gidongo e piny ma Satan Jachien osewuondoe ji mang’enyni. (1 Joh. 5:19) Kata kamano, donge wamorga ahinya sama wawinjo ka rowerego chiwo paro e chokruogewa, gidhi e tij lendo, kendo ginyiso chir sama gikedo ne yiegi? Ee, un rowerewa, umako kama duong’ ahinya e kanyakla mar Jehova!​—Zab. 8:2.

¹² Kata kamano, nitie owetewa gi nyiminewa moko ma samoro nyalo chayore  ka giparo ni onge gima gikonyogo kanyakla. Ang’o ma nyalo konyo ng’ato ka ng’ato kuomwa mondo ong’e ni en gi kama omako e kanyakla? Wane ane.

13-14. Ang’o ma nyalo miyo jomoko opar ni gin joma nono e kanyakla?

¹³ Ne ane puonj mar ariyo ma wanyalo yudo e ranyisi ma Paulo notiyogo. Nowuoyo kuom chandruok moro ma jomoko nigo kata mana e ndalowagi​—teknegi yie ni gin be nitie kama gimako e kanyakla. Paulo nondiko niya: “Ka di po ni tielo nyalo wacho ni, ‘Nikech ok an lwedo, ok an fuoni mar ringruok,’ mano ok mone bedo fuoni mar ringruok. To ka di po ni it nyalo wacho ni, ‘Nikech ok an wang’, ok an fuoni mar ringruok,’ mano ok mone bedo fuoni mar ringruok.” (1 Kor. 12:15, 16) En puonj mane ma Paulo ne chiwo kae?

¹⁴ Kipimori gi jomamoko e kanyakla, inyalo chako paro ni in ng’ama nono. E kanyakla, jomoko nigi mich mar puonjo, moko to ong’eyo chano gik moko, to moko be olony e tij kwath. Samoro ineno ni joma kamago oloyi. Mano nyiso mana ni ibolori, kendo ing’eyo ni nitie kama iremie. (Fil. 2:3) Kata kamano, ber tang’! Ka po ni kinde duto ipimoriga mana gi joma nigi nyalo makende, chunyi biro jok. Inyalo kata paro ni onge gima inyalo konyogo kanyakla kata matin, to mano e ma Paulo nokwero. Ang’o ma nyalo konyi kedo gi paro ma kamago?

15. Ka luwore gi 1 Jo-Korintho 12:4-11, en ang’o monego wang’e e wi mich moro amora ma wan-go?

¹⁵ Par ane wachni: E kinde Jokristo mokwongo, Jehova nomiyo Jokristogo mich mag roho maler, kata kamano, ne ok omiyogi mich ma chalre. (Som 1 Jo-Korintho 12:4-11.) To kata obedo ni Jehova nomiyogi mich mopogore opogore, ng’ato ka ng’ato kuomgi ne konyo kanyakla e yo moro. E kindewagi, ok miwa mich mag roho maler e yor hono.  Kata kamano, puonj ma wayudo e wachno to pod chal achala: Kata obedo ni wan gi nyalo mopogore opogore, Jehova ogenowa waduto.

16. En puonj mane ma jaote Paulo nochiwo ma ber ka watiyogo?

¹⁶ Kar pimore gi Jokristo wetewa, nyalo bedo maber ka watiyo gi puonj ma jaote Paulo nochiwo niya: “Ng’ato ka ng’ato mondo onon timbene owuon, eka dobed gi gima dimi obed mamor, to ok kopimore gi ng’at machielo.”​—Gal. 6:4.

17. Gin ber mage ma wayudo ka waluwo puonj ma Paulo nochiwo?

¹⁷ Ka watiyo gi puonj ma Paulo nochiwo, kae to wanonore maber, wanyalo chako fwenyo ni kare wan be wan gi mich kod nyalo moko makende. Kuom ranyisi, nyalo bedo ni jaduong’ moro ok golga twege mong’ith, to tij lendo to oberie ahinya. Kata, nyalo bedo ni ok ong’eyo chano gik moko kaka jodongo wetene, kata kamano, en jakwath ma jahera ma jolendo duto e kanyakla niga thuolo wuoyo kode sama gidwaro ni okonygi ng’ado rieko e wach moro. Kata, nyalo bedo ni ober ahinya e rwako welo. (Hib. 13:2, 16) Sama wafwenyo kuonde ma waberie kod mich ma wan-go, wabiro mor gi gimoro amora ma wanyalo timo e konyo kanyakla. Bende, mano biro konyowa mondo kik wabed gi nyiego sama waneno nyalo ma owetewa mamoko nigo.

18. Ere kaka wanyalo medo lony e tij Nyasaye?

¹⁸ Bed ni wan gi migawo mane kata mane e kanyakla, waduto nyaka wabed gi gombo mar dhi nyime timo dongruok e tij Nyasaye kendo medo bero nyalo ma wan-go. Jehova tiegowa kokalo kuom riwruokne mondo wamed timo dongruok. Kuom ranyisi, e chokruogewa ma kor juma, itiegowaga mondo wamed lony e tij lendo. Be itiyoga gi gik mipuonjowaga e chokruogno?

19. Ang’o minyalo timo mondo idhi e Skul mar Joland-Injili mar Pinyruoth?

¹⁹ Yo machielo mitiegowago en Skul mar Joland-Injili mar Pinyruoth. Joma nyalo dhi e skundno gin owete gi nyimine ma tiyo ne Nyasaye kuom thuologi duto, to hikgi nie kind 23 gi 65. Samoro inyalo chayori ni ok dinyal dhi e skundno. Kar kwano gik ma nyalo moni dhi e skundno, ok item ane kwano gik momiyo igombo dhi e skundno? Kae to los chenro ma biro konyi timo gik ma dwarore mondo idhi e skundno. Kinda mitimo kod kony ma Jehova chiwo biro miyo ifweny ni kare inyalo timo gima iparoga ni ok inyal.

20. En puonj mane ma wayudo e Jo-Rumi 12:6-8?

²⁰ Puonj mar adek ma wayudo e ranyisi ma Paulo notiyogo ni e Jo-Rumi 12:6-8. (Som.) Kanyo bende Paulo nonwoyoe ni joma ni e kanyakla nigi mich mopogore opogore. En mana ni koro to nojiwo ni onego wati gi mich ma wan-gogo e gero kanyakla kendo tege.

21-22. En puonj mane ma wanyalo yudo kuom Robert gi Felice?

²¹ Ne ane gima notimore ne Owadwa Robert. * Bang’ tiyo ne Jehova e piny machielo kuom kinde malach, nomiye migawo e Bethel ma thurgi. Kata obedo ni ne onyise ni lokruogno ne ok otim nikech nyawo moro ma ne en-go, pod wachno nochande. Owacho kama: “Nakuyo kuom dweche mang’eny ka aparo  ni nyaka bed ni nitie gimoro marach ma natimo ma nomiyo owilna migawo. Nitie seche ma naparoga kata weyo Bethel chuth.” Ang’o ma nokonye mondo ochak bedo ma mor kendo? Jaduong’ wadgi moro noparone ni sama wan e migawo moro, Jehova miyowa tiegruok ma nyalo konyowa e migepe ma kinde ma biro. Robert nofwenyo ni ne dwarore ni owe keto pache kuom gik mosekalo, to kar mano, oket pache e gik monyalo timo sani.

²² Owadwa Felice Episcopo be noromo gi pek ma chalo kamano. En kaachiel gi jaode ne gidhi e Skul mar Gilead e higa mar 1956, kendo bang’e owadwano nobedo jarit-alwora e piny Bolivia. E higa mar 1964 ne giyudo nyathi. Felice wacho kama: “Ne ok yotnwa weyo migawo ma ne wahero ahinya. Naparora ahinya kuom higa achiel kama. Kata kamano, Jehova nokonya mi aweyo parora kendo bedo gi paro makare kuom migapa manyien kaka janyuol.” Be gima notimore ne Robert kata Felice osetimoreni? Dibed ni chunyi onyosore nikech sani ionge gi migepe ma ne in-go chon? Ka en kamano, ibiro bedo ma mor mana ka iketo pachi kuom gik mabeyo minyalo timo sani ne Jehova kod oweteni. Bed modich e tij Nyasaye kitiyo gi mich ma in-go e konyo jomamoko. Kitimo kamano, ibiro bedo ma mor nikech ikonyo e gero kanyakla.

23. En wach mane monego wapar matut, to ang’o ma wabiro nono e sula ma luwo?

²³ Jehova ogeno ng’ato ka ng’ato kuomwa. Odwaro ni wasik e kind joge. Ka waparo matut kuom yore ma wanyalo jiwogo owetewa gi nyiminewa, kae to waluwo yorego, wabiro bedo ma mor, kendo ok wabi chayore ka waparo ni onge kama wamako e kanyakla! To, wanenoga nade jomamoko ma wan-go e kanyakla? Ere kaka wanyalo nyiso ni wagenogi? Wabiro nono wachno e sula ma luwo.