1. Ang’o momiyo iheroga joma hore?

 WADUTO waheroga joma hore. Nikech ang’o? En nikech wagenoga ahinya joma nyalo rito gimoro ka gikuwe mos. Bende, wamorga ahinya ka jomamoko hore kodwa sama wachwanyogi. Kendo wamor ahinya ni Janeno mar Jehova ma nopuonjowa Muma nohore kodwa sama ne ok yotnwa winjo tiend puonj moro manie Muma, yie gi puonjno, kata tiyo kode e ngimawa. To moloyo duto, wamor ahinya ni Jehova Nyasaye osebedo ka hore kodwa!​—Rumi 2:4.

2. Gin kinde mage ma nyalo bedonwa matek nyiso horuok?

² Kata obedo ni wamorga sama jomamoko hore kodwa, ok yotnwaga kinde duto bedo joma hore. Kuom ranyisi, nyalo bedonwa matek hore sama walewo, to wamoko e jam. Iwa nyalo wang’ sama jomoko timo gik ma chwanyowa. Bende, nitie kinde moko ma nyalo bedonwa matek rito piny manyien ma Jehova osingonwa. Be diher medo nyiso kido mar horuok? E sulani, wabiro nono tiend horuok kod gimomiyo en kido ma dwarore ahinya ni wabedgo. Bende, wabiro nono gik ma nyalo konyowa mondo wadhi nyime nyiso horuok.

3. Ng’at ma hore timoga ang’o sama ochwanye?

³ Ne ane yore moko ang’wen ma wanyalo nyisogo horuok. Mokwongo, ng’at ma hore iye ok wang’ piyo. Otemoga matek mondo okuwe mos kendo ok ochul kuor sama ochwanye kata sama weche tek. Weche motigo e Muma ni, “iye ok wang’ piyo,” nokwong tigo kiwuoyo kuom Jehova ma en  “Nyasaye mang’won kendo ma kecho ji, ma iye ok wang’ piyo, kendo mogundho gi hera mosiko kod adiera.”​—Wuok 34:6.

4. Ang’o ma ng’at ma hore timoga sama dwarore ni orit gimoro?

⁴ Mar ariyo, ng’at ma hore kuwe mos sama dwarore ni orit gimoro. Otemoga mondo kik odang’ni ahinya sama gimoro morito odeko moloyo kaka noparo. (Mat. 18:26, 27) Waromoga gi chal mopogore opogore ma nyalo dwaro ni wanyisie horuok. Kuom ranyisi, nyalo dwarore ni wahore kendo wachik itwa maber sama ng’at machielo wuoyo ma ok wang’ade. (Ayub 36:2) Bende, dwarore ni wahore sama wapuonjo ng’ato Muma mondo owinj tiend puonj moro kata owe tim moro marach.

5. En yo mane machielo ma wanyalo nyisogo horuok?

⁵ Mar adek, ng’at ma hore ok rikniga sama otimo gimoro. En adier ni kinde moko nyalo dwarore ni watim gik moko piyo. Kata kamano, sama ng’at ma hore nigi tich moro maduong’ monego otim, ok orikni timo tijno mana ni mondo otieke piyo. Oketo thuolo moromo tenge mondo ochan kaka obiro timo tijno. Kae to omiyo tijno thuolo moromo.

6. Ang’o ma ng’at ma hore timoga sama oromo gi tembe kata chandruoge?

⁶ Mar ang’wen, ng’at ma hore temoga nyagore gi tembe ma ok ong’ur. Mano e momiyo kido mar horuok otudore gi kido mar nano. Ok rach nyiso osiepwa moro kaka wawinjo e chunywa sama wakalo e tem moro. Kata kamano, ng’at ma hore biro timo duto monyalo mondo onan ma ok oywagore. (Kol. 1:11) Wan Jokristo, dwarore ni wanyis horuok e weche ma wasewuoyego. Nikech ang’o? We wane ane gimomiyo.

7. Ka luwore gi Jakobo 5:7, 8, ang’o momiyo horuok en kido ma dwarore ahinya? (Ne picha bende.)

⁷ Horuok en kido ma nyalo reso ngimawa. Mana kaka jotich Jehova machon, dwarore ni wahore ka warito mondo Jehova ochop singoge duto. (Hib. 6:11, 12) Muma pimowa gi japur. (Som Jakobo 5:7, 8.) Japur tiyoga matek mondo opidh cham kendo oolnegi pi, kata kamano, ok ong’eyo ni gibiro twi karang’o. Mano e momiyo japur biro hore kogeno ni obiro kayo cham. E yo ma kamano, wan bende wabedoga modich e weche Nyasaye kata obedo ni ‘ok wang’eyo odiechieng’ ma Ruodhwa nobie.’ (Mat. 24:42) Warito ka wahore ka wan gadier chuth ni Jehova biro chopo singoge duto e kinde moseketo. Ka ok wahore, wanyalo weyo rito Jehova ma wajwang’ adiera. Wanyalo chako lawore gi gik ma waparo ni nyalo miyowa mor e kindegi. Kata kamano, ka wan joma hore, wabiro nano nyaka giko kendo ibiro reswa.​—Mika 7:7; Mat. 24:13.

8. Ere kaka horuok konyowa sama wan gi jomamoko? (Jo-Kolosai 3:12, 13)

⁸ Horuok konyowa sama wan gi jomamoko. Okonyowaga chiko itwa adimba sama jomamoko wuoyo. (Jak. 1:19) Horuok jiwo kuwe e kindwa. Okonyowa mondo kik wamwomre kata wawach gimoro marach sama iwa owang’. Ka wan joma hore, iwa ok bi wang’ piyo sama ng’ato ochwanyowa. Kar chulo kuor, wabiro ‘nano gi jowetewa kendo weyonegi kethogi gi chuny man thuolo.’​—Som Jo-Kolosai 3:12, 13.

9. Ere kaka horuok konyowa sama dwarore ni watim yiero? (Ngeche 21:5)

⁹ Horuok nyalo konyowa timo yiero mabeyo. Kar mondo warikni ng’ado paro, wabiro kawo thuolowa mondo watim nonro, kae to e ka watim yiero. (Som Ngeche 21:5.) Kuom ranyisi, sama wamanyo tich, nyalo bedonwa mayot yie gi tich moro amora ma wakwongo yudo, ma ok wanono ka be tijno biro chocho chenrowa mag lamo Jehova kata ooyo. Kata kamano, ka wan joma hore, wabiro kawo thuolowa mondo wanon weche moko, kuom ranyisi, kama tijno nitie, thuolo ma tijno biro kawo, kod kaka tijno biro mulo ngima joodwa kod winjruokwa gi Jehova. Horuok nyalo konyowa mondo kik watim yiero maricho.

10. Ere kaka Jakristo nyalo nyago kido mar horuok kendo siko gi kidono?

¹⁰ Lem mondo imed nyiso horuok. Horuok en achiel kuom olembe ma roho nyago. (Gal. 5:22, 23) Omiyo, wanyalo kwayo Jehova rohone maler mondo okonywa nyago olembe mag roho. Sama wakalo e chal moro matek, dwarore ni ‘wasik ka wakwayo’ Jehova roho maler mondo okonywa bedo joma hore. (Luka 11:9, 13) Bende, wanyalo kwayo Jehova mondo okonywa neno gik moko kaka onenogi. Kae to bang’ lemo, dwarore ni watim kinda mondo wanyis kidono pile ka pile. Kaka wamedo kwayo Jehova mondo okonywa bedo gi kidono, e kaka wabiro medo nyiso kidono e okang’ malach.

11-12. Ere kaka Jehova osebedo ka nyiso horuok?

¹¹ Par matut kuom ranyisi manie Muma. Muma oting’o ranyisi mang’eny mag joma nonyiso horuok. Sama waparo matut kuom ranyisigo, wanyalo puonjore yore mang’eny ma wanyalo nyisogo horuok. Ka pok wanono ranyisi moko, we wane ane kaka Jehova osenyiso horuok e yo maberie moloyo.

¹² E puodho mar Eden, Satan noketho  nying Jehova kendo nohangone ni en Jaloch ma onge hera. Jehova ne ok oketho Satan gikanyono, kar mano, nonyiso horuok kod ritruok nikech nong’eyo ni ne dhi kawo kinde malach mondo onyis ni lochne e loch maberie moloyo. Bende, osehore kata obedo ni oneno ka iketho nyinge. E wi mano, Jehova osebedo ka hore mondo ji mang’eny oyud thuolo mar yudo ngima mochwere. (2 Pet. 3:9, 15) Mano osemiyo ji tara gi tara oyudo thuolo mar ng’eye. Ka waketo pachwa kuom ber ma waseyudo nikech horuok mar Jehova, biro bedonwa mayot rito nyaka giko.

13. Ere kaka Yesu osenyiso kido mar horuok e yo makare chuth mana kaka Wuon-gi? (Ne picha bende.)

¹³ Yesu osebedo ka nyiso horuok mana kaka Wuon-gi, kendo ka ne en e piny kae nonyiso kidono. Nitie kinde moko ma ne ok yotga ne Yesu nyiso horuok, to ahinya-ahinya sama nowuoyo gi Jondiko kod Jo-Farisai ma ne gin joma wuondore. (Joh. 8:25-27) Mana kaka Wuon-gi, Yesu bende iye ne ok wang’ piyo. Ne ok ochulo kuor sama ne iyanye. (1 Pet. 2:23) Yesu nonano e tembe ma ok ong’ur. Mano e momiyo Muma nyisowa ni ‘wapar ahinya kuom jal mosenano e weche ma joricho ne kwedego.’ (Hib. 12:2, 3) Wan bende, Jehova nyalo konyowa mondo wanan e bwo tem moro amora ma nyalo yudowa.

14. Ang’o ma wapuonjore kuom horuok mar Ibrahim? (Jo-Hibrania 6:15) (Ne picha bende.)

¹⁴ To nade ka waneno ni waserito giko kuom higni mang’eny? Samoro ne waparo ni giko dhi biro mapiyo. Wanyalo chako neno ni giko biro chopo mana bang’ ka wasetho. Ang’o ma nyalo konyowa dhi nyime  rito ka wahore? Par ane ranyisi mar Ibrahim. Kata obedo ni Ibrahim ne en jahigni 75 kendo noonge gi nyathi, Jehova nosingone niya: “Anami ibed oganda maduong’.” (Cha. 12:1-4) Be Ibrahim noneno kaka singono nochopo? Ne ok oneno kaka wechego duto nochopo. Bang’ kalo Aora Yufrate kendo rito kuom higni 25, noneno wuode ma Isaka ma nonyuol e yor hono, kendo bang’ higni moko 60, noneno nyikwaye ma ne gin Esau kod Jakobo. (Som Jo-Hibrania 6:15.) Kata kamano, Ibrahim ne ok oneno kaka kothe nobedo oganda maduong’ kod kaka ne gikawo Piny Manosingi. Kata obedo ni ne ok oneno gigo duto, pod ne en gi winjruok maber gi Jachuechne. (Jak. 2:23) E kinde mibiro chierie Ibrahim, obiro bedo mamor ng’eyo ni yie kod horuok ma nonyiso nokelo gueth ne ogendni duto. (Cha. 22:18) Wachno puonjowa ang’o? Samoro wan wawegi ok wabi neno kaka singo duto mag Jehova chopo. Kata kamano, ka wadhi nyime hore mos mana kaka Ibrahim, wanyalo bedo gadier ni Jehova biro guedhowa e kindegi, kendo obiro guedhowa e okang’ malach e piny manyien.​—Mar. 10:29, 30.

15. Gin ang’o ma wanyalo nono sama watimo puonjruokwa wawegi?

¹⁵ Muma oting’o ranyisi mang’eny mag joma nohore. (Jak. 5:10) Donge inyalo keto chenro mar nono ranyisigo e puonjruokni iwuon? b Kuom ranyisi, kata obedo ni nowal Daudi ka pod notin mondo obed ruodh  Israel, ne nyaka orit kuom higni mang’eny ka pok ochako locho. Simeon kod Ana nodhi nyime makore gi Jehova sama ne girito neno Mesia ma nosingi. (Luka 2:25, 36-38) Sama inono ranyisigo, tem ane manyo dwoko mag penjogi: Ang’o ma nokonyo ng’ama iwuoyo kuomeno nyiso horuok? Gin ber mage ma noyudo nikech nohore? Ere kaka anyalo luwo ranyisine? Bende, inyalo puonjori kuom nono ranyisi mag joma ne ok ohore. (1 Sa. 13:8-14) Inyalo penjori kama: ‘Ang’o momiyo ne ok ginyiso horuok? Ang’o ma noyudogi nikech ne ok gihore?’

16. Gin ber mage mwayudo sama wahore?

¹⁶ Par ber ma wayudo sama wahore. Sama wahore, wabedoga mamor kendo chunywa bedo mokuwe. Omiyo, horuok nyalo geng’onwa tuoche kod parruok mang’eny. Sama wanyiso horuok, wabedo gi winjruok maber gi jomamoko. Kanyakla bende bedo gi kuwe kod winjruok. Bende, wanyalo geng’o ywaruok nikech iwa ok bi wang’ piyo sama ng’ato ochwanyowa. (Zab. 37:8, weche moler piny; Nge. 14:29) To maduong’ie moloyo, sama wahore, waluwo ranyisi mar Wuonwa manie polo kendo wamedo sudo machiegni kode.

17. Ang’o monego wang’ad e chunywa ni wabiro timo?

¹⁷ To mano kaka horuok en kido maber ahinya! Kata obedo ni seche moko ok yotnwaga hore, Jehova nyalo konyowa mondo wamed nyiso kidono. Sama ‘wahore ka warito’ piny manyien, wanyalo bedo gadier chuth ni Jehova biro dhi nyime konyowa. (Mika 7:7) Omiyo, wang’aduru e chunywa ni wabiro dhi nyime nyiso kido mar horuok.