SULA MAR PUONJRUOK 31
WER 12 Jehova e Nyasaye Maduong’
Gima Jehova Osetimo Mondo Ores Dhano ma Joricho
“Nyasaye nohero piny ahinya mi nochiwo Wuode ma miderma.”—JOH. 3:16.
GIMA SULANI WUOYE
Sulani biro konyowa neno okenge ma Jehova osebedo ka kawo mondo okonywa kedo gi richo, kod gima osetimo mondo wayud ngima ma nyaka chieng’ ma onge richo.
1-2. (a) Richo en ang’o, to ang’o ma nyalo konyowa kedo gi richo ma waloye? (Ne bende “Weche Moler.”) (b) Ang’o ma wabiro puonjore e sulani kod sula mamoko ma yudore e gasedni? (Ne bende kama wacho ni, “Ne Josombwa.”)
Be igombo ng’eyo okang’ ma Jehova oherigo? Inyalo yudo dwoko mar penjono kuom nono gik mosetimo mondo oreswa kuom richo kod tho. Richo a en jasigu maduong’ ma ok wanyal loyo kendwa. Waduto warem kendo watimoga richo pile, to mano e momiyo watho. (Rumi 5:12) Kata kamano, gima ber en ni Jehova konyowa mondo walo richo, kendo wan gadier gi wachno.
2 Jehova Nyasaye osebedo ka konyo dhano kedo gi richo kuom higni 6,000 kama. Nikech ang’o? En nikech oherowa. Jehova osebedo kohero dhano are chakruok, kendo mano e momiyo osetimo gik mang’eny mondo okonygi kedo gi richo. Jehova ong’eyo ni richo kelo tho, kata kamano, ok odwar ni watho, to odwaro ni wadag nyaka chieng’. (Rumi 6:23) Mano bende e gima odwaro ni otimni. E sulani, wadwaro nono penjo moko adek: (1) Ere kaka Jehova nomiyo dhano ma joricho geno? (2) Ang’o ma dhano ma joricho ma nodak e kinde ma nindikoe Muma notimo mondo Jehova oyie kodgi? (3) Ang’o ma Yesu notimo mondo ores dhano ma joricho?
ERE KAKA JEHOVA NOMIYO DHANO MA JORICHO GENO?
3. Ere kaka jonyuolwa mokwongo nodonjo e richo?
3 Ka ne Jehova ochueyo dichwo gi dhako mokwongo, nodwaro ni gibed mamor. Noketogi e puodho ma jaber, nomiyogi mich mar kend, kendo nomiyogi migawo moro maduong’. Nonego ginyuolre mondo gipong’ piny kendo gilos piny duto obed ma jaber kaka puodho mar Eden. To nitie chik moro achiel ma nomiyogi. Jehova nonyisogi ni ka gitamore luwo chikno goyiem, ne gidhi bedo joricho kendo mano ne dhi miyo githo. Wang’eyo gima notimorenegi. Chuech moro mar roho ma ne ok ohero Nyasaye kendo ne ok oherogi, nobiro irgi kendo nyisogi ni gitim gima Nyasaye nosekwerogi. Adam gi Hawa noyie kode ma gitimo richo, kendo mano nonyiso ni ok ne gigeno Wuon-gi ma noherogi. Gima Jehova nowacho e ma notimorenegi. Chakre chieng’no ka dhi nyime, ngima nochako bedonegi matek: ne gibedo moti, gituore, kendo gikone ne githo.—Cha. 1:28, 29; 2:8, 9, 16-18; 3:1-6, 17-19, 24; 5:5.
4. Ang’o momiyo Jehova osin gi richo kendo okonyowa mondo walo richo? (Jo-Rumi 8:20, 21)
4 Jehova noneno ni ondik wechego mondo gipuonjwa e kindewagi. Gikonyowa ng’eyo gimomiyo Jehova osin gi richo. Richo pogowa kode kendo kelonwa tho. (Isa. 59:2) Mano e momiyo Satan ma en malaika ma nong’anyo notemo Adam gi Hawa mi gidonjo e richo kendo wan bende pod odhi nyime temowa. Satan ne paro ni koro oseketho chenro ma Jehova ne nigo ne dhano. Kata kamano, ne ok ong’eyo okang’ ma Jehova oherogo dhano. Dwach Jehova ne ok olokore ne nyikwa Adam gi Hawa ma ne gidhi nyuolo bang’e. Jehova nohero dhano ahinya to mano e momiyo nochiwonegi geno kanyo gi kanyo. (Som Jo-Rumi 8:20, 21.) Jehova nong’eyo ni nitie nyikwa Adam moko ma ne dhi here kendo ma ne dhi kedo matek mondo gilo richo. Bende, kaka Wuoro kendo Jachuech, nodhi yawonegi yo mar resogi kuom richo kendo konyogi mondo gisud machiegni kode. Ang’o ma Jehova ne dhi timo mondo wechego duto ochop kare?
5. En karang’o ma Jehova nohango chiwoe geno ne dhano ma joricho? Ler ane. (Chakruok 3:15)
5 Som Chakruok 3:15. Jehova nohango chiwo geno ka nochiwo kum ne Satan. Nyasaye nokoro ni nitie ‘kodhi’ ma ne dhi kelo ne dhano geno. Kodhino gikone ne dhi toyo wi Satan, kendo golo richo ma Satan nosekelo e puodho mar Eden. (1 Joh. 3:8) Kata kamano, nidhi sand kodhino. Satan ne dhi kayo ofunj tiende kendo mano ne dhi miyo otho. To mano kaka wachno ne dhi bedo malit ne Jehova. Kata kamano, Jehova noyie mondo kodhino osandre mondo ores dhano kuom richo kod tho.
ANG’O MA DHANO MA JORICHO MA NODAK E KINDE MA NINDIKOE MUMA NOTIMO MONDO JEHOVA OYIE KODGI?
6. Ang’o ma chwo moko ma ne nigi yie kaka Habil gi Noa notimo mondo gisud machiegni gi Jehova?
6 Kaka kinde ne medo kalo, e kaka Jehova nomedo lero mosmos kaka dhano ma joricho ne nyalo sudo machiegni kode. Habil ma ne en wuod Adam gi Hawa mar ariyo, e ng’at ma nokwongo keto yie kuom Jehova bang’ ng’anyo ma notimore e puodho mar Eden. Nikech Habil nohero Jehova, nodwaro more kendo bedo machiegni kode, to mano nomiyo ochiwone misango. Habil ne en japith rombe, kendo nokawo moko kuomgi mochiwo ne Jehova kaka misango. Jehova noneno nade misangoneno? “[Nomor] gi Habil kod chiwo ma nokelone.” (Cha. 4:4) Nitie jomamoko ma bende nohero Jehova, kuom ranyisi, Noa. Nochiwo ne Jehova misengni kendo Jehova noyie gi misengnigo. (Cha. 8:20, 21) Jehova nonyiso ni dhano ma joricho ne nyalo timo gik ma more kendo sudo machiegni kode kuom yie gi misengni ma ne gichiwone. b
7. Ang’o ma wapuonjore kuom yo ma Ibrahim noikorego chiwo wuode kaka misango?
7 Jehova nokwayo Ibrahim, ng’at ma bende ne nigi yie motegno mondo otim gimoro matek ahinya. Nokwaye ni ochiw Isaka wuode kaka misango. Nyaka bed ni mano nomiyo Ibrahim owinjo malit ahinya e chunye. Kata kamano, noyie timo kaka nonyise. Ka nochiegni nego wuode, Jehova nogeng’e. Ranyisi mar Ibrahim puonjowa adiera moro makende. Jehova ne dhi yie chiwo Wuode mohero kaka misango. To mano kaka Jehova nonyiso ni ohero dhano ahinya!—Cha. 22:1-18.
8. Misengni mang’eny ma ne ichiwo chon ka luwore gi Chik Musa ne gin ranyisi mar ang’o? (Tim Jo-Lawi:27-29; 17:11)
8 Higni moko bang’e, chik ma nomi Jo-Israel ne dwaro ni gichiw misengni nyading’eny mondo opwodhgigo kuom richogi. (Som Tim Jo-Lawi 4:27-29; 17:11.) Misengnigo ne gin ranyisi mar misango moro maduong’ ma ne idhi chiw bang’e kendo ma ne dhi reso dhano kuom richo chuth. Jonabi mag Nyasaye nokoro ni kodhi ma nosingi ne dhi bedo Wuod Nyasaye, kendo ni ne idhi sande ma nege. Nidhi nege mana kaka rombo ma ne inegoga kitimogo misango. (Isa. 53:1-12) Parie wachni: Jehova noyie mondo Wuode mohero ochiw kaka misango kendo ores dhano duto kuom richo kod tho, to mano oriwo nyaka in!
ANG’O MA YESU NOTIMO MONDO ORES DHANO?
9. Ang’o ma Johana Jabatiso nowacho e wi Yesu? (Jo-Hibrania 9:22; 10:1-4, 12)
9 E higa mar 29, Johana Jabatiso noneno Yesu Ja-Nazareth kendo nowacho kama kuome: “Neuru, Nyarombo mar Nyasaye ma golo richo mar piny!” (Joh. 1:29) Wechego nonyiso ni Yesu e ma ne en kodhi ma nokor. En e ma nodhi chiwo misango ma nosingi. Koro ne nitie geno ne dhano ma joricho, tiende ni ne idhi resgi kuom richo chuth.—Som Jo-Hibrania 9:22; 10:1-4, 12.
10. Ere kaka Yesu nonyiso ni nobiro luongo joricho?
10 Yesu noketo pache kuom konyo joma chunygi nonyosore nikech richo kendo nodwaro ni gibed jolupne. Nong’eyo ni richo e ma nomiyo dhano chandore, to mano e momiyo nokonyogi. Nowacho kama: “Jo mangima ok dwar laktar, to jo matuo e ma dwaro.” Kae to nomedo kama: “Ne abiro luongo joricho, to ok jo makare.” (Mat. 9:12, 13) Mano e gima Yesu notimo. Kuom ranyisi, noweyo ne dhako moro ma nolwoko tiendene gi pi wang’e richone. (Luka 7:37-50) Nopuonjo dhako moro ma Nya-Samaria ma nodhi umbo e soko adiera moko madongo kata obedo ni nong’eyo ni dhakono nodak e ngima mar anjawo. (Joh. 4:7, 17-19, 25, 26) E wi mago, Nyasaye nomiyo Yesu teko mar golo gik moko duto ma richo kelo moriwo nyaka tho. E yo mane? Yesu nochiero ji duto, gibed chwo kata mon, nyithindo kata joma dongo.—Mat. 11:5.
11. Ang’o momiyo joricho nohero bedo but Yesu?
11 Wanyalo neno gimomiyo kata mana joricho nohero Yesu. Nonyisogi ng’wono kendo nokechogi. Ne giwinjo ka gin thuolo bedo gi Yesu. (Luka 15:1, 2) Yesu nopwoyo joma nonyiso yie kuome kendo noguedhogi. (Luka 19:1-10) Gik ma notimogo nonyiso kaka Wuon-gi en Jang’wono. (Joh. 14:9) Kokalo kuom weche ma nowacho kod gik ma notimo, Yesu nonyiso ni Wuon-gi en jang’wono, ohero ji duto, kendo oikore konyogi mondo gilo richo. Yesu konyo joricho mondo gitim kinda gilok yoregi kendo giluwe.—Luka 5:27, 28.
12. Ang’o ma Yesu nopuonjo e wi thone?
12 Yesu nong’eyo gima norite nyime. Nonyiso jopuonjrene nyadinwoya ni ne idhi ndhoge mi gure e yath. (Mat. 17:22; 20:18, 19) Nong’eyo ni misango ma nodhi chiwo ne dhi golo richo mag dhano, mana kaka Johana nosewacho kaachiel gi jonabi mamoko. Yesu nopuonjo bende ni bang’ kosechiwo ringrene kaka misango, nodhi “ywayo kit ji duto” ire. (Joh. 12:32) Dhano ma joricho ne nyalo moro Jehova ka giyie mondo Yesu obed Ruodhgi kendo luwo ranyisine. Ka ne gitimo kamano, gikone ne idhi “gonygi e richo.” (Rumi 6:14, 18, 22; Joh. 8:32) Kuom mano, Yesu ne nigi chir kendo noyie tho, tho malit mondo ores dhano.—Joh. 10:17, 18.
13. Yesu notho tho machal nade, to thoneno puonjowa ang’o e wi Jehova? (Ne picha bende.)
13 Nondhog Yesu, nomake, noyanye, noketh nyinge, notueye, kendo nosande malit. Jolweny nokawe motere nyaka kama ne gigure e yath. Sama Yesu ne kalo e litgo duto, nitie Ng’at machielo ma ne winjo lit moloyo. Mano ne en Jehova Nyasaye. Kata obedo ni Jehova ne nigi nyalo kod teko mar geng’o ne Wuode chandruogego duto, ne ok otimo kamano. Nikech ang’o? Ang’o ma ne nyalo miyo Wuoro ma jahera owe Wuode osandre malit kamano? Ne en hera. Yesu nowacho kama: “Nyasaye nohero piny ahinya mi nochiwo Wuode ma miderma, mondo ng’at ma nyiso yie kuome kik kethi, to obed gi ngima ma nyaka chieng’.”—Joh. 3:16.
Jehova nowinjo malit ahinya ka noyie mondo Wuode onegi mondo oreswa kuom richo kod tho (Ne paragraf mar 13)
14. Ang’o ma wapuonjore kuom misango ma Yesu nochiwo?
14 Misango ma Yesu nochiwo e yo maduong’ ma Jehova nyisogo ni ohero nyikwa Adam gi Hawa. Misangono nyiso okang’ ma Jehova oherigo. Jehova noyie mondo Wuode osandre malit kamano, mana ni mondo oresi kuom richo kod tho. (1 Joh. 4:9, 10) Kuom adier, odwaro konyowa mondo waked gi richo kendo waloye!
15. Ang’o ma nyaka watim mondo wayud ber kuom mich mar rawar ma Jehova nochiwo kokalo kuom misango mar Yesu?
15 Mich ma Nyasaye nochiwo kokalo kuom misango ma Wuode ma miderma nochiwo, miyo iweyonwa richowa. Kata kamano, mondo Nyasaye owenwa richowa, nitie gima nyaka watim. Mano en ang’o? Johana Jabatiso kaachiel gi Yesu owuon nomiyowa dwoko mar penjono. Ne giwacho kama: “Lokuru chunyu ua e richo nimar Pinyruodh polo osekayo machiegni.” (Mat. 3:1, 2; 4:17) Ka wadwaro ni waked gi richo kendo wasud machiegni gi Wuonwa manie polo, nyaka walok chunywa. To kuom adier, loko chunywa oriwo ang’o, to ere kaka timo mano biro konyowa loyo richo? Wabiro yudo dwoko mar penjono e sula ma luwo.
WER 18 Wagoyo Erokamano Kuom Rawar
a WECHE MOLER: E Muma, inyalo ti gi “richo” kiwuoyo kuom gik maricho ma watimo, tiende ni sama ok wadak ka luwore gi dwach Jehova kata timo gik ma ok more. Bende, inyalo ti kode kiwuoyo kuom chal ma wantie kaka dhano morem, ma en chal ma ne wayudo kowuok kuom Adam. Richo ma ne wayudo kuom Adam e ma miyo watho.
