SULA MAR PUONJRUOK 35
WER 123 Bolruok ne Chenro ma Nyasaye Oketo
Kaka Jodongo Nyalo Konyo Joma Ogol e Kanyakla
“Mor mang’eny bedo e polo nikech jaricho achiel moloko chunye, moloyo jo ma kare 99 ma ok dwarre ni olok chunygi.”—LUKA 15:7.
GIMA SULANI WUOYE
E sulani, wabiro neno gimomiyo onego ogol joricho moko e kanyakla kod kaka jodongo nyalo konyogi ma gilok chunygi gia e richo kendo gilos winjruokgi gi Jehova.
1-2. (a) Ere kaka Jehova neno joma otimo richo madongo to ok dwar loko chunygi? (b) En ang’o ma Jehova geno ni joricho biro timo?
JEHOVA osin gi joma timo gik maricho. (Zab. 5:4-6) Odwaro ni waluw puonjge makare ma yudore e Muma. En adier ni Jehova ong’eyo ni ok wan joma kare, omiyo ok ogen ni wabiro luwo puonjgo e yo ma kare chuth. (Zab. 130:3, 4) Bende, ok oyie gi joma ok oluore, ‘ma tiyo gi ng’wonone mogundho kaka gima girendorego mondo gitim timbe mag wang’-teko.’ (Juda 4) Muma wuoyo e wi “chieng’ mibiro kethie joma ok oluoro Nyasaye” ma en chieng’ lweny mar Har–Magedon.—2 Pet. 3:7; Fwe. 16:16.
2 Kata kamano, Jehova ok dwar ni oketh ng’ato ang’ata. Mana kaka ne wasenono e sula moko motelo, Muma nyiso maler ni Jehova “dwaro ni ji duto ochop kama gilokoe chunygi gia e richo.” (2 Pet. 3:9) Jodongo luwoga ranyisi mar Jehova ka gihore gi joma otimo richo sama gikonyogi mondo giwe yoregi maricho kendo gilos winjruokgi gi Jehova. Kata kamano, nitie joma ok yiega gi kony ma kamano. (Isa. 6:9) Jomoko dhiga nyime timo richo kata bed ni jodongo osekonyogi nyading’eny mondo gilok chunygi. Jodongo onego otim ang’o e chal ma kamano?
“GOLURU NG’AT MARACHNO”
3. (a) En ang’o ma Muma wacho ni onego otim ne joricho modagi loko chunygi? (b) Ang’o momiyo wanyalo wacho ni jarichono e moyiero mondo ogole e kanyakla?
3 Ka ng’ato odagi loko chunye kendo weyo richo, jodongo biro luwo chik ma yudore e 1 Jo-Korintho 5:13 ma wacho niya: “Goluru ng’at marachno e kindu.” Ng’at motimo richo ong’eyo ni ka ok oloko chunye kendo rieyo yorene, to ibiro gole e kanyakla. Omiyo sama ogole e kanyakla, wanyalo wacho ni mano en yierone owuon kendo okayo mana gima nochuoyo. (Gal. 6:7) Ang’o momiyo wawacho kamano? En nikech jodongo osebedo ka konye to otamore rwako kony ma kamano. (2 Ru. 17:12-15) Timbene nyiso maler ni odagi luwo chike Jehova.—Rap. 30:19, 20.
4. Ang’o momiyo sama ng’ato odagi loko chunye, ilandoga ni ogole e kanyakla?
4 Sama ogol jaricho motamore loko chunye e kanyakla, ibiro land ne kanyakla ni koro ok en achiel kuom Joneno mag Jehova. a Lendono ok en mar kuodo wiye. To en mar konyo kanyakla ng’eyo ni ok onego ‘gibed kanyachiel’ gi ng’at ma kamano ‘kata chiemo kode.’ (1 Kor. 5:9-11) Nitiere ber ma wayudo sama waluwo chikno. Jaote Paulo nondiko kama: “Thowi manok yienyo mogo duto.” (1 Kor. 5:6) Ka ok ogol ng’at motimo richo e kanyakla, jomoko nyalo chako paro ni kare onge tiende luwo chike Jehova.—Nge. 13:20; 1 Kor. 15:33.
5. Ere kaka onego wane ng’at mogol e kanyakla, to nikech ang’o?
5 Sama ogol ng’ato e kanyakla, ere kaka onego wanene? Kata obedo ni ok wabi riwore kode, ok onego wanene kaka ng’at ma onge geno moro amora. Kar mano, onego wanene kaka rombo molal. Par ni rombo molal nyaloga duogo kama jowetene nitie. Ber ng’eyo ni ng’atno bende nochiwore ne Jehova. Kata kamano, gima lit en ni ok odak ka luwore gi chiwruokne, to mano ok en gima ber kata matin. (Eze. 18:31) Nikech Jehova pod dhi nyime nyiso ng’wonone, nitie geno ni ng’at motimo richo nyalo loko chunye ma duog ire. Ere kaka jodongo nyalo nyiso ni gin gi geno ni jaricho mogol e kanyakla nyalo duogo ir Jehova?
KAKA JODONGO KONYOGA NG’AT MOGOL E KANYAKLA
6. Gin okenge mage ma jodongo biro kawo mondo gikony ng’at mogol e kanyakla?
6 Sama ogol ng’ato e kanyakla, be mano nyiso ni ojwang’e ma ok nyal konye mondo oduog ir Jehova? Ooyo! Sama komiti mar jodongo nyiso ng’ato ni ogole e kanyakla, ginyisega bende okenge monego okaw mondo odwoke e kanyakla. Nitie gik mamoko ma jodongo biro timo. Samoro ginyalo nyiso ng’at mogol e kanyakla ni de giher romo kode bang’ dweche moko matin, mondo gine ka be oseloko chunye kendo oweyo yorene maricho. Koyie, jodongogo biro romo kode kendo gibiro konye mondo olok chunye oduog ir Jehova. Kata ka ok onyiso ni oloko chunye, jodongo pod biro lime kinde ka kinde mondo gikonye.
7. Ere kaka jodongo luwo ranyisi mar Jehova sama gikonyo ng’at ma ogol e kanyakla? (Jeremia 3:12)
7 Jodong-kanyakla temoga matek mondo ginyis ng’at ma ogol e kanyakla ng’wono mana kaka Jehova timoga. Kuom ranyisi, Jehova ne ok orito mondo Jo-Israel e ma okaw okang’ mar duogo ire. Kar mano, en e ma nokawo okang’ mokwongo mar oro jonabine irgi kata ka pok ne ginyiso ni giloko chunygi. Mana kaka ne waneno e sula mar ariyo e gasedni, Jehova nopimo ng’wono monyiso joricho gi ng’wono ma janabi Hosea nonyiso jaode ma ne pod dhi nyime timo richo. (Hos. 3:1; Mal. 3:7) Jodongo bende luwo ranyisi mar Jehova. Gin bende gidwaro ni jaricho oduog ir Jehova, kendo ok gibi timo gik ma biro miyo obedne matek duogo ire.—Som Jeremia 3:12.
8. Ere kaka ngero ma Yesu nogoyo e wi wuoyi ma nolal nyiso hera kod ng’wono ma Jehova nigo? (Luka 15:7)
8 Par ane ngero ma Yesu nogoyo e wi wuoyi ma nolal ma ne wawuoye e sula motelo ne mae. Ka ne wuon-gi onene koduogo, ‘noringo mokwake kendo nonyodhe gi mor.’ (Luka 15:20) Par ni wuorono ne ok orito mondo wuodeno okwaye ng’wono. Kar mano, en e ma nokawo okang’ mokwongo mar dhi romone nikech nohere. Jodong-kanyakla bende temo matek mondo ginyis chuny ma kamano ne rombe mosebayo yo. Gidwaro ni rombe molalgo oduog pacho. (Luka 15:22-24, 32) Mor bedoga e polo kod e piny sama jaricho oloko chunye moduogo ir Jehova!—Som Luka 15:7.
9. Jehova jiwo joricho mondo otim ang’o?
9 Chop sani, waseneno maler ni Jehova ok mor gi jaricho motamore loko chunye. Kata kamano, otemo matek mondo okonygi. Odwaro ni giduog ire. Ndiko mar Hosea 14:4 nyiso paro ma Jehova nigo sama joricho oloko chunygi. Owacho kama: “Abiro chango timgi mar andhoga. Abiro herogi gi chunya duto.” Ka jodongo ong’eyo wachno, mano biro miyo gikony jaricho mosechako timo gik ma nyiso ni oloko chunye. Bende, paro weche manie ndikono nyalo konyo jaricho mondo otim matek oduog ir Jehova.
10-11. Ere kaka jodongo biro konyo ng’at ma nogol e kanyakla higni moko mokalo?
10 Ere kaka jodongo nyalo konyo joma ne ogol e kanyakla higni moko mokalo? Samoro sani koro ok gitim gima nomiyo ogolgi e kanyakla. Kata, samoro ok gipar gimomiyo nogolgi. Bed ni gin e chal mane, jodongo pod biro temo matek mondo ging’e kama gidakie kendo gilimgi. Sama gilimo ng’at mogol e kanyakla, gibiro lemo kanyachiel kode kendo jiwe mondo oduog e kanyakla. Ka po ni ng’ato osekawo higni mang’eny ka pok obiro e chokruoge, biro dwarore ni okonye tego winjruokne gi Jehova. Kuom mano, konyiso ni odwaro duogo e kanyakla, jodongo nyalo timo chenro mondo opuonje Muma, kata ka pok odwoke. Ber ng’eyo ni jodongo e monego otim chenro mondo opuonje Muma.
11 Jodongo luwo ranyisi mar Jehova e nyiso ng’wono, to mano e momiyo gitemo matek mondo gimany joma ogol e kanyakla kendo nyisogi ni pod gin thuolo duogo ir Jehova. Bang’ ka ng’ato osenyiso ni oloko chunye kendo oweyo yorene maricho, ibiro dwoke e kanyakla mapiyo.—2 Kor. 2:6-8.
12. (a) Gin chal mage ma dwarore ni jodongo obedie motang’? (b) Ang’o momiyo ok onego wabed gi paro ni nitie richo moko ma ka ng’ato otimo to ok owinjore yudo ng’wono mar Jehova? (Ne bende weche moler piny.)
12 Nitie chal moko ma biro dwarore ni jodongo obedie motang’ ka pok gidwoko ng’ato e kanyakla. Kuom ranyisi, ka ng’ato nonjawo nyathi kata ka nong’anyo moweyo adiera kata ka nochano mondo oketh kend chuth, biro dwarore ni jodongo ong’e ka be oloko chunye gadier. (Mal. 2:14; 2 Tim. 3:6) Jodongo nyaka rit rombe manie kanyakla. Kata kamano, ber ng’eyo ni Jehova biro rwako jaricho moro amora moloko chunye gadier kendo moweyo yorene maricho. Omiyo, kata obedo ni jodongo onego obed motang’ sama girito kanyakla, ok onego gitam ng’ato yudo ng’wono ma Jehova chiwo. b—1 Pet. 2:10.
GIK MA KANYAKLA NYALO TIMO
13. En pogruok mane ma nitie e kind ng’at momi siem kod ng’at mogol e kanyakla?
13 Mana kaka ne waneno e sula mokalo, ka oland ne kanyakla ni omi ng’ato siem, pod wanyalo dhi nyime timo gik moko kanyachiel kode nikech wang’eyo ni noloko chunye morieyo yorene. (1 Tim. 5:20) Pod ikwane kaka achiel kuom jo kanyakla kendo odwaro jip mowuok kuom owete gi nyimine. (Hib. 10:24, 25) Kata kamano, mano opogore ahinya gi kogol ng’ato e kanyakla. Sama ogol ng’ato e kanyakla, wabiro ‘weyo bedo kanyachiel’ kode, kata ‘chiemo’ kode.—1 Kor. 5:11.
14. Gin ang’o ma Jakristo nyalo yiero timo ne ng’at mogol e kanyakla? (Ne picha bende.)
14 Be gik ma wasepuonjore chop sani nyiso ni ok wabi dewo chuth ng’at mogol e kanyakla? Ooyo. En adier ni ok wabi riwore kode. Kata kamano, wanyalo tiyo gi chunywa motieg gi Muma e yiero ka be wabiro gwele e chokruoge ka en watwa kata ka ne en osiepwa. To nade ka obiro e chokruoge? Chon ne ok wamosga ng’at ma kamano. Kata kamano, tinde ng’ato ka ng’ato onego oti gi chunye motieg gi Muma e wachni. Jomoko nyalo yiero mose kendo rwake e chokruok. Kata kamano, ok wabi bedo gi mbaka malach kode kata timo kode gik mamoko.
Jakristo biro tiyo gi chunye motieg gi Muma e ng’ado ka be obiro gwelo ng’at mogol e kanyakla e chokruok kata mose kobiro e chokruok (Ne paragraf mar 14)
15. Gin joricho mage ma iwuoyo kuomgi e 2 Johana 9-11? (Ne sanduk ma wiye wacho ni, “ Be Johana gi Paulo ne Wuoyo e Wi Richo Machal?”)
15 Jomoko nyalo wacho ni, ‘Donge Muma wacho ni sama wamoso ng’at ma kamano, mano nyiso ni wariwore kode e timbene maricho?’ (Som 2 Johana 9-11.) Weche molworo ndikono nyiso ni joma iwuoyo kuomgi gin joma ong’anyo moweyo adiera kata joma temo jiwo jomamoko mondo otim gik ma Muma kwero. (Fwe. 2:20) Kuom mano, ka en ng’at mong’anyo moweyo adiera kata ma jiwo puonj mag miriambo kata timbe maricho, jodongo ok bi chano lime. Wageno ni chieng’ moro pachgi nyalo duogo ma giwe yoregi maricho. To ka mano pok otimore, ok wabi mosogi kata gwelogi e chokruoge mag kanyakla.
LUWO RANYISI MAR JEHOVA MAR KECHO JI KENDO NYISOGI NG’WONO
16-17. (a) Jehova dwaro ni joricho otim ang’o? (Ezekiel 18:32) (b) Ere kaka jodongo nyalo nyiso ni gitiyo kanyachiel gi Jehova sama gitemo konyo ng’at motimo richo?
16 Gin ang’o ma wasepuonjore e sula abich ma yudore e gasedni? Jehova ok dwar ni oketh ng’ato ang’ata! (Som Ezekiel 18:32.) Odwaro ni joricho olos winjruok kode. (2 Kor. 5:20) Mano e momiyo osebedo kojiwo joma noweyo tiyone mondo oduog ire. Jodong-kanyakla tiyo matek kanyachiel gi Jehova mondo gikony ng’at motimo richo olok chunye oa e richo.—Rumi 2:4; 1 Kor. 3:9.
17 Tem ane paro mor ma bedoga e polo sama jaricho oloko chunye! Jehova bedoga mamor sama achiel kuom rombege molal oduogo e kueth mar kanyakla. Wamedo hero Jehova sama waparo matut kaka okechowa kod kaka onyisowa ng’wono.—Luka 1:78.
Wer 111 Gik ma Miyo Wabedo Mamor
a Koro ok wabi tiyo gi wach mitiyogago e dho Swahili ni “mtengwa” kata wacho ni “ng’at motengi” sama wawuoyo kuom joma kamago. Ka luwore gi weche ma Paulo nowacho e 1 Jo-Korintho 5:13 e Muma mar Dho-Luo, wabiro wacho ni gin joma ogol e kanyakla.
b Muma wacho ni nitie richo moko ma ok nyal we ne ng’ato. Joma timo richo kaka mago gin joma ong’ado mar bedo wasik Nyasaye. Jehova gi Yesu kende e ma nyalo ng’ado ka be inyalo ng’won ne joma kamago.—Mar. 3:29; Hib. 10:26, 27.
