SULA MAR PUONJRUOK 33
WER 130 Wawe ne Ji Kethogi
Kaka Kanyakla Luwo Ranyisi mar Jehova e Yo Monenogo Joricho
“Ka ng’ato otimo richo, wan gi jakony.”—1 JOH. 2:1.
GIMA SULANI WUOYE
Puonj ma wayudo kuom gima kanyakla ma Korintho notimo ne ng’at moro ma notimo richo maduong’.
1. En ang’o ma Jehova dwaro ni ji duto otim?
JEHOVA nochueyo dhano gi nyalo mar timo yiero. Watiyoga gi nyalono pile ka pile seche ma wadwaro timo yiero. Yiero maduong’ie moloyo ma ng’ato ka ng’ato kuomwa nyaka tim en chiwruok ne Jehova kendo bedo achiel kuom jotichne ma lame. Jehova dwaro ni ng’ato ka ng’ato otim yierono. Nikech ang’o? En nikech oherowa kendo odwaronwa ber. Odwaro ni wabed osiepene kendo wadag nyaka chieng’.—Rap. 30:19, 20; Gal. 6:7, 8.
2. Ere kaka Jehova neno joma otimo richo madongo? (1 Johana 2:1)
2 Jehova ok chunwa ni watine kendo omiyo ng’ato ka ng’ato thuolo mar yiero gima odwaro timo. To nade ka Jakristo mosebatisi otimo richo moro maduong’? Ka ok oloko chunye moa e richo, nyaka gole e kanyakla. (1 Kor. 5:13) Kata kamano, Jehova pod geno ni jarichono nyalo loko chunye ma duog ire. Mano e momiyo nochiwo rawar ma miyo iweyo ne joma oloko chunygi richogi. (Som 1 Johana 2:1.) Nyasachwa ma jahera kwayo joricho mondo gilok chunygi kendo giduog ire.—Zek. 1:3; Rumi 2:4; Jak. 4:8.
3. Ang’o ma wabiro nono e sulani?
3 Jehova dwaro ni wane richo kod joma otimo richo kaka onenogi. Sulani biro konyowa ng’eyo kaka wanyalo timo mano. Wabiro puonjore (1) gima jaote Paulo nonyiso kanyakla ma Korintho mondo otim ne Jakristo moro ma notimo richo maduong’, (2) gima nonyiso kanyaklano ni otim bang’ ka jarichono noseloko chunye, kod (3) gima wachno puonjowa e wi yo ma Jehova nenogo Jakristo motimo richo maduong’.
GIMA NITIMOGA NE JAKRISTO MA NOTIMO RICHO MADUONG’
4. En chal mane ma ne nie kanyakla ma Korintho? (1 Jo-Korintho 5:1, 2)
4 Som 1 Jo-Korintho 5:1, 2. Ka ne Paulo nie wuodhe mar adek kaka jamisonari, nowinjo wach moro marach ma ne timore e kanyakla manyien ma ne ni Korintho. Ne nitie ng’at moro e kanyaklano ma ne terore gi chi wuon mare. Mano ne en tim marach ahinya ma ne “ok yudre kata mana e kind ogendni”! Kanyakla ne ok ne rach mar timneno, kendo ne giyie mondo odhi nyime bedo e kindgi. Nyalo bedo ni jomoko e kanyakla ne neno ni weyo ng’atno odhi nyime bedo e kindgi ne en yo ma ne ginyisego ng’wono. Kata kamano, Jehova ok dwar ni jaricho moro amora motamore loko chunye obed e kind joge. Tim marachno nomiyo joma ne ok lam Jehova owuoyo marach e wi kanyaklano. Nonyalo miyo Jokristo mamoko bende e kanyakla ochak luwo timne marachno. Omiyo, Paulo nochiko kanyakla mondo otim ang’o?
5. Paulo nonyiso kanyakla ni gitim ang’o, to mano noriwo timo ang’o? (1 Jo-Korintho 5:13) (Ne picha bende.)
5 Som 1 Jo-Korintho 5:13. Jehova notiyo gi roho mare e tayo Paulo mondo ondik barua kochiko ni ogol ng’at ma notimo richono e kanyakla. Jokristo ma nomakore gi Jehova nonego one ng’atno e yo mane? Paulo nonyisogi ni ‘giwe bedo kanyachiel’ gi ng’atno. Mano noriwo timo ang’o? Paulo nolero ni ‘kik gichiem kata gi ng’at ma kamano.’ (1 Kor. 5:11) Bedo kanyachiel ka uchiemo gi ng’ato nyalo miyo ugo mbaka ahinya. To nenore ni mano e momiyo Paulo nonyiso kanyakla ma Korintho ni giwe bedo kanyachiel gi ng’atno. Mano ne dhi miyo kanyakla osik ka ler. (1 Kor. 5:5-7) E wi mano, weyo bedo kanyachiel gi ng’atno ne nyalo miyo ofweny ni osechwanyo Jehova, kendo otem matek mondo olok chunye oduog ire.
Roho maler notayo Paulo mondo ondik ne kanyakla ma Korintho ni gigol jaricho ma notamore loko chunye e kanyakla (Ne paragraf mar 5)
6. Ang’o ma kanyakla notimo bang’ yudo barua ma Paulo nondikonegi, to mano nomiyo jaricho ma ne nie kindgi otimo ang’o?
6 Bang’ ka Paulo noseoro barua ne kanyakla ma Korintho, nochako paro kaka ne gidhi rwako weche ma ne nie baruano. Gikone, Tito nokelone wach moro ma nomore ahinya. Kanyakla norwako wechego. (2 Kor. 7:6, 7) Ne gitimo mana kaka nonyisogi. To mano nomiyo jarichono oloko chunye mana bang’ dweche moko. Noloko timbene mi ochako luwo yore makare mag Jehova. (2 Kor. 7:8-11) Ang’o ma Paulo nonyiso kanyakla ni otim bang’ mano?
KAKA KANYAKLA NONEGO ONE JARICHO BANG’ KA OSELOKO CHUNYE
7. Ang’o ma jaricho ma ne nie kanyakla ma Korintho notimo bang’ ka nosegole e kanyakla? (2 Jo-Korintho 2:5-8)
7 Som 2 Jo-Korintho 2:5-8. Paulo nowacho ni ‘kum ma nosemi ng’atno gi ji mathoth koro noserome.’ E yo machielo, wanyalo wacho ni kumno nochopo tije. Tich mane? Kumno nomiyo jarichono oloko chunye.—Hib. 12:11.
8. En ang’o machielo ma Paulo nonyiso kanyakla ma Korintho ni otim?
8 Paulo nochiko kanyakla ma Korintho kama: “Onego uwene kethone e yo mang’won,” kendo “unyise herau.” Ne ni Paulo ne dwaro ni kanyaklano otim momedore, mopogore mana gi dwoko ng’atno e kanyakla. Paulo ne dwaro ni ginyis ni ging’wono ne ng’atno kokalo kuom wechegi kod timbegi. Mano ne dhi nyiso maler ni girwako ng’atno kendo e kanyakla.
9. Ang’o momiyo jomoko ne neno ka teknegi ng’wono ne jaricho ma noseloko chunye?
9 Be nitie joma ne neno ka teknegi rwako ng’atno e kanyakla? Nenore ni mano e gima notimore, kata kamano, Muma ok nyiswa. En adier ni jarichono nokelo chandruoge moko e kanyaklano kendo timneno nokuodo wi jomamoko. Nitie joma ne nyalo neno ni ne gisebedo ka gitimo duto ma ginyalo mondo giluw chike Jehova. Omiyo, ne gineno ni ok en gima kare dwoko ng’at ma notimo richono e kanyakla. (Pim gi Luka 15:28-30.) Kata kamano, ang’o momiyo ne dwarore ni kanyakla onyis ng’at ma ne dwaro duogono hera madier?
10-11. Ang’o ma ne nyalo timore ka jodong-kanyakla ne nyalo tamore ng’wono ne jaricho ma noloko chunye?
10 Tem ane paro gima ne nyalo timore ka jodongo otamore rwako ng’at ma noloko chunyeno e kanyakla, kata ka kanyakla ne nyalo tamore nyise hera bang’ kosedwoke. Mano ne nyalo miyo “kuyo mokadho oloye.” Nonyalo chako paro ni oonge geno moro amora mar tiyo ne Jehova kendo. Chunye ne nyalo jok mowe timo kinda e loso winjruokne gi Nyasaye.
11 Gima rach moloyo en ni ka owete gi nyimine e kanyakla ne nyalo tamore ng’wono ne jaricho moloko chunyeno, mano ne nyalo ketho winjruokgi gi Jehova. Nikech ang’o? En nikech mano ne dhi nyiso ni giluwo ranyisi mar Satan ma en ng’at mager kendo ma ok ng’won, kar luwo ranyisi mar Jehova ma en Nyasaye moikore ng’wono ne joma oloko chunygi. Mano ne dhi miyo Jachien thuolo mar tiyo kodgi e nyoso chuny ng’atno mondo owe tiyo ne Jehova.—2 Kor. 2:10, 11; Efe. 4:27.
12. Ere kaka kanyakla ne nyalo nyiso ni giluwo ranyisi mar Jehova?
12 Ere kaka kanyakla ma Korintho ne nyalo nyiso ni giluwo ranyisi mar Jehova, to ok mar Satan? En kuom ng’wono ne joricho ma noloko chunygi, mana kaka Jehova be timo. Ne ane gima moko kuom jondik Muma nowacho e wi Jehova. Daudi nondiko kama: “Iber kendo iikori weyo ne ji richogi.” (Zab. 86:5) Mika nondiko kama: “Be nitie Nyasaye ma chalo kodi, ma weyo richo?” (Mika 7:18) Isaya bende nondiko kama: “Ng’at marach mondo owe yorene kendo jaricho owe parone; oduog ir Jehova mi nokeche, ee, oduog ir Nyasachwa, mi nong’wonne e yo malach.”—Isa. 55:7.
13. Ang’o momiyo ne dwarore ni odwok jaricho ma noloko chunye e kanyakla? (Ne sanduk ma wiye wacho ni, “ Nodwok Jaricho ma ne nie Kanyakla ma Korintho Bang’ Kinde ma Romo Nade?”)
13 Nonego giluw ranyisi mar Jehova kuom rwako jaricho ma noloko chunyeno e kanyakla kendo timo gik ma ne nyiso ni gihere. Jokristogo nonyiso ni ‘giluwo weche duto ma nochikgi’ kuom rwako jaricho ma noloko chunyeno e kanyakla. (2 Kor. 2:9) Kata obedo ni dweche moko nokalo bang’ ka nosegol ng’atno e kanyakla, kum ma noyudo nomiyo oloko chunye moa e richo. Omiyo, ne onge tiende mondo jodongo okaw kinde ka pok gidwoke e kanyakla.
LUWO RANYISI MAR JEHOVA MAR NG’WONO KOD NG’ADO BURA KARE
14-15. Ang’o ma wanyalo puonjore kuom gik ma notimore e kanyakla ma Korintho? (2 Petro 3:9) (Ne picha bende.)
14 Gik ma notimore e kanyakla ma Korintho nondik e Muma “mondo gipuonjwa.” (Rumi 15:4) Wechego konyowa ng’eyo ni Jehova ok dwar ni joricho modagi loko chunygi odhi nyime bedo e kanyakla. Jomoko nyalo paro ni nikech Jehova en jang’wono, koro obiro yie ayie mondo jaricho motamore loko chunye odhi nyime bedo e kanyakla. En adier ni ong’won, kata kamano, ok onyal yie mondo gima kamano otimre nikech mano biro nyiso ni ombeko chikege. (Juda 4) Kuom adier, ka Jehova oyie ne jaricho motamore loko chunye dhi nyime bedo e kanyakla, mano ok bi nyiso ni ong’won nikech gima kamano nyalo chido kanyakla.—Nge. 13:20; 1 Kor. 15:33.
15 Kata kamano, wapuonjore bende ni Jehova ok dwar ni oketh ng’ato ang’ata. Ogombo reso dhano ka mano nyalore. Onyiso ng’wono ne joma oloko chunygi kendo ma temo matek mondo olos osiep kode kendo. (Eze. 33:11; som 2 Petro 3:9.) Omiyo, ka ne jaricho ma ne nie kanyakla ma Korintho oloko chunye kendo oweyo yorene maricho, Jehova notiyo gi Paulo e lero ne kanyaklano ni nonego ging’won ne ng’atno kendo rwake e kanyakla.
Waluwo ranyisi mar Jehova e nyiso hera kod ng’wono kuom rwako joma odwok e kanyakla (Ne paragraf mar 14-15)
16. Yo ma nolosgo wach jaricho ma ne nie kanyakla ma Korintho miyo iwinjo nade?
16 Ranyisi mar gima notimore e kanyakla ma Korintho konyowa ng’eyo kaka Jehova oherowa, ohero tim makare, kod kaka ong’ado bura kare. (Zab. 33:5) Donge mano chwali mondo imed pako Nyasachwa? Waduto wan joricho kendo wadwaro ni Jehova owenwa richowa. Wagoyone erokamano nikech nochiwo rawar ma miyo iweyonwa richowa. Donge wechego jiwowa kendo miyo wabedo gadier ni Jehova oherowa kendo odwaronwa ber?
17. Ang’o ma wabiro nono e sula ma luwo?
17 Ere kaka onego okony joma otimo richo e kindewagi? Ere kaka jodong-kanyakla nyalo luwo ranyisi mar Jehova e konyo joricho mondo gilok chunygi? Ang’o ma kanyakla onego otim sama jodongo ong’ado ni ogol ng’ato e kanyakla kata odwoke? Wabiro nono dwoko mag penjogo e sula ma luwo.
WER 109 Waherreuru Koa e Chunywa
