Wach ma yudore e dho-Hibrania ma notigo kanyo inyalo lok e yore ariyogo duto. Weche ma luwogi e ma notayo joloko mondo ondik wachno kaka oyudore e loko ma 2013:

1. Wach manyien motigono nyiso kaka ji ne wacho wachno ka giwuoyo kod kaka ne indike. Tudruok ma nitie e kind Zaburi 144:12-15 kod kwan matindo 11 ka dok chien otenore kuom wach motigo e chakruok mar kwan matindo 12. Wachno en asher e dho-Hibrania. Asher inyalo loki e yore mang’eny. Kuom ranyisi, inyalo loke ni “joma.” Loko machon notiyo gi “joma.” Kuom mano, ne chal ka gima joma richo ma osewuo kuomgi e kwan matindo 11 kadok chien e ma ne yudo gik ma beyo mowach e kwan matindo 12 nyaka 14. Kata kamano, inyalo ti gi asher mondo onyis gima timore nikech gima chielo kitiyo gi weche kaka “mano e momiyo,” “mondo omi,” kata “e ka.” “E ka” e ma otigo e loko mar Muma ma 2013 kendo mano bende e ma otigo e loko mamoko mag Muma.

2. Wach manyien motigono winjore maber gi weche mamoko ma yudore e sulano duto. Wach motigo ni “e ka” e chakruok mar kwan matindo 12 nyiso ni gueth miwuoye e kwan matindo 12 nyaka 14 gin mag joma kare ma kwayo ni oresgi e lwet joma richo (kwan matindo 11). Notim lokruok mowinjore bende e kwan matindo 15 kama otiye gi wach mar “joma mor” nyadiriyo e yo machal. Nikech mano, e kuonde ariyogo duto joma bedo ma mor gin joma “Nyasachgi en Jehova!” Gima onego wapar en ni dho-Hibrania ma nokwong ndikgo Muma ne onge gi alama mag somo. Omiyo, joma ne loko Muma nyaka ne ng’e tiend wach e yo maber, kaka ne indiko shairi mag dho-Hibrania, weche molworo ndiko moro, kod ndiko mamoko motudore gi wachno.

3. Wach manyien motigono winjore maber gi ndiko mamoko e Muma ma wuoyo kuom singo mag Nyasaye ne jotichne mohere. Ka luwore gi kaka olok tiend asher e yo manyienno, weche manie ndikono sani koro nyiso e yo maler geno ma Daudi ne nigo ni Nyasaye ne dhi reso Jo-Israel kuom jowasikgi, nodhi guedhogi, kendo miyogi ngima maber. (Lawi 26:9, 10; Rap. 7:13; Zab. 128:1-6) Kuom ranyisi, Rapar mar Chik 28:4 wacho kama: “Nogwedh nyak mar ringri, kod nyak mar lopi, kod nyak mar jambi madongo, gi medruok mar dhogi, kod nyithi rombe magi.” Kuom adier, e kinde loch mar wuod Daudi ma Solomon, Jo-Israel nobedo gi kuwe kod ngima maber. E wi mano, loch mar Solomon ne nyiso kaka loch mar Mesia ne dhi chalo.—1 Ru. 4:20, 21; Zab. 72:1-20.

E yo machuok, wach manyien motigo e Zaburi 144 ok lok puonj mag Muma ma wasebedo ka wang’eyo. Kata kamano, sulano duto konyowa neno geno ma jaber ma jotich Nyasaye nigo ma en bedo gi kuwe ma nyaka chieng’ kod ngima maber ka osetiek joma richo.—Zab. 37:10, 11.