HIGA mokalo, owete mang’eny ahinya nobedo jodong-kanyakla kod jokony-tich e riwruok mar oganda Jehova e piny ma ngima. Kapo ni in achiel kuom owetego, onge kiawa ni imor ahinya gi migawo manyien ma niyudono.

Kata kamano, nyalo bedo ni iwinjo ka iluor luor matin. Jason ma noket jaduong’-kanyakla ka pod en rawera wacho niya: “Ka nomiya migawono, naneno ni tijego ng’eny ma ne ok adhi nyalo.” Musa gi Jeremia bende noneno ni ok giwinjore timo migepe ma Jehova nomiyogi. (Wuok 4:10; Yer. 1:6) Kapo ni in bende iwinjo kamano, ang’o ma nyalo konyi loyo luoro ma kamano mondo idhi nyime timo dongruok? Wane ane ranyisi mar Timotheo.—Tich 16:1-3.

Nyalo bedo ni Timotheo ne en jahigni 19 kata 20 gi wiye ka ne jaote Paulo okawe mondo odhi kode e wuodhene mag misonari. Nyalo bedo ni Timotheo samoro ne onge gi chir kendo samoro ne oluor timo migawono nikech ne pod otin. (1 Tim. 4:11, 12; 2 Tim. 1:1, 2, 7) Kata kamano, higni apar bang’e, Paulo nonyiso kanyakla ma Filipi kama: “An gi geno kuom Ruodhwa Yesu ni achiegni oronu Timotheo . . . Nimar aonge gi ng’at machielo ma nigi chuny kaka ma en-go.”—Fil. 2:19, 20.

Ang’o momiyo Timotheo nobedo jaduong’-kanyakla maber kamano? Wane ane weche auchiel ma wanyalo puonjore kuom ranyisi mar Timotheo.

1. Ne odewo ji gadier. Paulo nonyiso Jokristo ma Filipi niya: “[Timotheo] biro dewo wecheu gadier.” (Fil. 2:20) Kuom adier, Timotheo ne dewo ji. Ne odwaro ni gibed gi winjruok maber gi Jehova kendo nochiwore e okang’ malach mondo okonygi.

Kik ibed kaka dereba modich mana gi sa monego owuog e stend to ok odich gi rito jowuoth monego bed ni idho mtoka. William, mosebedo jaduong’-kanyakla kuom higni 20 wacho kama ne owete ma pod nyien e migepegi: “Her owete gi nyimine. Ket pachi kuom gik ma chandogi to ok kuom migawo ma in-go.”

2. Tij lendo e gima noketo mokwongo e ngimane. Ka ne Paulo pimo kaka Timotheo ne nigi chuny mopogore gi jomoko, nowacho niya: “Jomamokogo duto manyo mana dwachgi giwegi, to ok mag Yesu Kristo.” (Fil. 2:21) Paulo nondiko barupeno ka en Rumi. Nofwenyo ni owete ma ne ni Rumi nodich ahinya mana gi gik ma konyogi giwegi. Nenore ni owetego ne ok tim kinda e tij lendo e okang’ ma ne dwarore. Timotheo to ne opogore kodgi! Ka noyudo thuolo moro amora mar lando wach maber e okang’ momedore, ne obedo gi chuny kaka mar Isaya ma nowacho niya: “An ka; ora.”—Isa. 6:8.

Ang’o ma nyalo konyi mondo itim tijeni iwuon kod mag Pinyruoth e yo maber? Mokwongo, ng’e gik monego iket motelo. Paulo nojiwo Jokristo niya: “[Yanguru] gadier gik ma dwarore moloyo.” (Fil. 1:10) Ket weche Nyasaye obed motelo e ngimani. Mar ariyo, ket ngimani obed mayot. Weri gi gik manono ma  kethoni seche kod teko mang’eny. Paulo nojiwo Timotheo niya: “Ring ia kuom gombo mag rowere, to law tim makare, gi yie, gi hera, kod kuwe.”—2 Tim. 2:22.

3. Notiyo matek e tij Nyasaye. Paulo nonyiso Jokristo ma Filipi niya: “Ung’eyo kaka [Timotheo] owuon nosenyiso kite, ni kaka nyathi ma tiyo gi wuon mare, notiyo koda matek e miyo wach maber olandre.” (Fil. 2:22) Timotheo ne ok en jasamwoyo. Notiyo matek kanyachiel gi Paulo kendo mano nomiyo hera manie kindgi omedore.

E kindegi, tich ng’eny ahinya e riwruok mar oganda Jehova. Tijego kelo mor kendo miyo ng’ato bedo gi winjruok maber gi owete kod nyimine. Omiyo tim kinda mondo kinde duto ibed “modich e tij Ruodhwa.”—1 Kor. 15:58.

4. Notiyo gi gik ma nopuonjore. Paulo nondiko ne Timotheo niya: “Iseluwori machiegni gi puonjna, gi kit ngimana, gi dwarona, gi yiena, gi horuokna, gi herana, gi sinanina.” (2 Tim. 3:10) Nikech Timotheo notiyo gi gik ma nopuonjore, mano nomiyo oyudo migepe momedore.—1 Kor. 4:17.

Be nitie Jakristo moro motegno ma iluwo ranyisine? Ka iongego, be inyalo manyo? Tom ma osebedo jaduong’-kanyakla kuom higni mang’eny wacho kama: “Jaduong’-kanyakla moro molony nomako koda osiep motiega maber. Najadhiga ire mondo okonya gi paro kendo natimoga kaka owachona. Mano nomiyo abedo gi chir ahinya.”

5. Nodhi nyime tiegore. Paulo nojiwo Timotheo niya: “Tiegri iwuon ka dwachi maduong’ en chiwruok chuth ne Nyasaye.” (1 Tim. 4:7) Kata obedo ni jatugo nyalo bedo gi ng’at ma tiege, pod nyaka otiegre owuon. Mano e momiyo Paulo nomedo jiwo Timotheo niya: “Dhi nyime keto chunyi kuom somo weche ne ji e lela, kuom sayo ji, kod kuom puonjo. . . . Par matut kuom wechegi; ket chunyi duto kuomgi, mondo dongruok mari onenre ayanga ne ji duto.”—1 Tim. 4:13-15.

Onego idhi nyime medo lony mari. Dhi nyime puonjori Wach Nyasaye gi kinda kendo dhi riat kitiyo gi weche manyien ma riwruok mar oganda Jehova miyowa. E wi mano, kik igenri mokalo tong’ ka iparo ni iseyudo lony mathoth ma inyalo loyo wach moro amora ka ok itimo nonro matut. Luw ranyisi mar Timotheo kuom ‘siko ka inonori iwuon kendo ka inono weche ma ipuonjo.’—1 Tim. 4:16.

6. Ne oyie mondo roho mar Jehova otaye. Paulo nonyiso Timotheo kama e wi tije mar lendo: “Rit mwandu maberno kokalo kuom roho maler ma odak e iwa.” (2 Tim. 1:14) Mondo Timotheo ne dhi nyime bedo gi kinda e tij lendo, nyaka noyie mondo roho mar Jehova otaye.

Donald ma osebedo jaduong’-kanyakla kuom higni mogwaro wacho kama: “Jodongo kaachiel gi jokony-tich nyaka kaw mapek winjruok ma gin-go gi Jehova. Joma timo kamano ‘tekregi nomedre ameda pile.’ Ka gikwayo Nyasaye rohone maler kendo ginyago olembe mag rohono, gibiro konyo owete.”—Zab. 84:7; 1 Pet. 4:11.

En gima jiwowa ahinya neno ka owete mang’eny ma nyocha oket jodong-kanyakla gi jokony-tich timo dongruok. Jason ma ne osewuo kuome e chak sulani wacho niya: “Kuom kinde ma asebedogo jaduong’-kanyakla, asepuonjora gik mathoth kendo chir ma an-go osemedore. Sani koro amor ahinya ni an jaduong’-kanyakla kendo anene kaka migawo makende!”

Be ibiro dhi nyime timo dongruok? Tem matek mondo ipuonjri kuom ranyisi mar Timotheo. Kitimo kamano, to ibiro konyo owete gi nyimine ahinya.