1. Ang’o momiyo jaote Paulo nonyiso Jokristo ma Jo-Hibrania mondo ojiwre?

ANG’O momiyo dwarore ni wamed kinda e jiwo jomamoko? Jaote Paulo nyisowa gimomiyo onego watim kamano e barua ma nondiko ne Jokristo ma Jo-Hibrania. Nonyisogi niya: “Wadewreuru e kindwa mondo wajiw hera kod timbe mabeyo ma ok wajwang’ bedo e chokruogewa kanyachiel mana kaka jomoko osebet gi timno, to wajiwreuru, to moloyo sama uneno ni chieng’no medo sudo machiegni.” (Hib. 10:24, 25) Higni abich bang’ yudo baruano, Jokristo ma nodak Jerusalem nofwenyo ni odiechieng Jehova chiegni kendo ne gineno ranyisi ma Yesu nowachonegi ni ka gineno to giring gia e dalano. (Tich 2:19, 20; Luka 21:20-22) Odiechiengno nochopo e higa mar 70 ka ne Jehova otiyo gi Jo-Rumi mondo oketh Jerusalem.

2. Ang’o momiyo onego wamed jiwore moloyo e kindegi?

² E kindegi, nitie gik mathoth ma miyo wabedo gadier ni odiechieng’ maduong’ kendo malich mar Jehova koro chiegni. (Joel 2:11) Janabi Zefania nowacho niya: “Ndalo maduong’ mar Jehova ochiegini, ochiegini kendo oruyore  piyo.” (Zef. 1:14) Wach ma nokorno otudore gi kindewagi bende. Nikech odiechieng Jehova chiegni ahinya, Paulo nyisowa ni ‘wadewre e kindwa mondo wajiw hera kod timbe mabeyo.’ (Hib. 10:24) Kuom mano, onego wamed hero owetewa mondo wajiwgi sa asaya ma mano dwarore.

3. Jaote Paulo nowacho ang’o e wi jiwo jomoko? (Ne picha manie chak sulani.)

³ “Weche mapek manie chuny dhano omiyo dhano ol; to kitwak kode maber omiye mor.” (Nge. 12:25) Mano en adier. Waduto wadwaroga ni ojiwwa kinde ka kinde. Paulo nowacho ni kata ng’at ma nigi ting’ mar jiwo jomoko bende owinjore ojiw. Nondiko ne Jokristo ma nodak Rumi kowacho niya: “An gi siso mar nenou mondo amiue moko kuom mich mag chuny eka ubed motegno; kendo mondo jiwruok obedie e kindwa ka ng’ato jiwo yie mar nyawadgi, maru kod mara.” (Rumi 1:11, 12) Nenore maler ni kata mana Paulo ma ne jiwoga jomoko bende ne dwarore ni mondo ojiw.—Som Jo-Rumi 15:30-32.

4, 5. Gin jomage monego wajiw e kindegi, to nikech ang’o?

⁴ Joma ochiwore mondo oti ne Jehova gi thuologi duto owinjore opwo. Moko kuom owete gi nyiminego gin jopainia. Thothgi oseweyo gik mathoth e ngimagi mondo giyud thuolo mar bedo jopainia. To mano bende e gima jomisonari, Jo-Bethel, jorit-alwora kod mondegi, kaachiel gi owete gi nyimine ma tiyo e ofise milokoe dhok bende osetimo. Nitie gik ma gisechiwore weyo e ngimagi mondo giyud thuolo momedore mar tiyo ne Jehova. Omiyo, owinjore ojiwgi. Joma gombo tiyo ne Jehova gi thuologi duto to nitie gik ma monogi timo kamano bende owinjore ojiw.

⁵ Owete gi nyimine ma pok odonjo e kend nikech gidwaro ni gikendi kata okendgi “mana kuom Ruoth” kende bende onego ojiw. (1 Kor. 7:39) E yo ma kamano, mon ma jokinda bende bedoga ma mor sama chwogi ojiwogi gi weche mamit. (Nge. 31:28, 31) E wi mano, Jokristo ma dhi nyime tiyo ne Jehova bed ni isandogi kata gituwore bende onego ojiw. (2 The. 1:3-5) Jehova gi Kristo hoyo Jokristogo duto.—Som 2 Jo-Thesalonika 2:16, 17.

6. Jodongo nigi migawo mane ka luwore gi Isaiah 32:1, 2?

⁶ Som Isaiah 32:1, 2. Yesu Kristo tiyo gi owete ma gin Jokristo mowal kod jodongo manie kweth mar rombe ma moko mondo ojiw kendo oho Jokristo ma chunygi onyosore e kindewagi. To mano e kaka onego obed nikech jodongo ok gin “ruodhi” e wi yie mar jomamoko, to gin “jotich kanyachiel” mondo Jokristo wetegi obed mamor.—2 Kor. 1:24.

7, 8. Mopogore gi jiwo Jokristo wetegi, ang’o kendo ma jodongo nyalo timo mondo giteggi?

⁷ Jaote Paulo noketo ranyisi maber monego waluw. Nondiko ne Jokristo ma ne isando e Thesalonika konyisogi kama: “Nikech hera matut ma waherougo, ne wang’ado ni mondo wayalnu, ok mana wach maber mar Nyasaye kende, to bende wamiu nyaka ngimawa wawegi nikech ne waherou ahinya.”—1 The. 2:8.

⁸ Nikech Paulo nong’eyo ni wacho awacha weche ma jiwo jomoko kende ok oromo, nonyiso jodongo ma Efeso  niya: “Nyaka ukony joma yomyom, kendo nyaka usik ka uparo weche Ruoth Yesu owuon ma nowacho kama: ‘Chiwo kelo mor mogundho moloyo kawo.’” (Tich 20:35) Paulo noikore jiwo owetene, to mano e momiyo ‘nochiwore kendo notiyo’ matek nikech gin. (2 Kor. 12:15) E yo machalo kamano, jodongo onego ojiw kendo oho owetegi gi weche mabeyo kendo onego giteggi kuom nyiso ni gidewogi gadier.—1 Kor. 14:3.

9. Ere kaka jodongo nyalo chiwo siem e yo ma jiwo Jokristo wetegi?

⁹ Tego jomoko bende oriwo miyogi siem, to Muma nyalo konyo jodongo mondo gichiw siem e yo ma jiwo Jokristo wetegi. Yesu noketo ranyisi maber ahinya e wachno ka ne osechiere. Ne ane gima notimo ka ne odwaro miyo kanyakla moko ma ne ni Asia siem motegno. Ka ne pok ochiwo siem ne kanyakla ma Efeso, Pagamam, kod Thiatira, nokwong opwoyogi. (Fwe. 2:1-5, 12, 13, 18, 19) Nonyiso kanyakla ma ne ni Laodikia kama: “Ji duto ma ahero akwerogi kendo arieyogi. Omiyo, bed gi kinda kendo ilok chunyi ia e richo.” (Fwe. 3:19) Jodongo timo maber ka giluwo ranyisi mar Kristo sama gichiwo siem.

10. Ere kaka waduto wanyalo gero jomamoko?

¹⁰ Jiwo jomoko ok en ting’ mar jodongo kende. Paulo nonyiso Jokristo duto ni giwach ‘wach malong’o ma gero jomamoko kaka owinjore, mondo wachno obed ma konyogi.’ (Efe. 4:29) Ng’ato ka ng’ato kuomwa onego opar gima onyalo timo mondo okony jomamoko. Paulo nonyiso Jokristo ma Jo-Hibrania kama: “Teguru bede mobengore kod chonge monyosore, kendo sikuru ka uloso ne tiendeu nderni moriere tir, mondo rang’ol kik wil, to kar mano ochang.” (Hib. 12:12, 13) Waduto, moriwo  nyaka nyithindo, wanyalo gero jomamoko kuom nyisogi weche ma jiwogi.

11. Ere kaka nyaminwa moro nokonyo Marthe e kinde ma ne en gi depression?

¹¹ Nyaminwa moro miluongo ni Marthe, * ma ne nigi tuwo mar depression nondiko niya: “Chieng’ moro nalemo mondo ng’ato ojiwaa. Naromo gi nyaminwa moro moseti ma nonyisa kaka ohera kendo nong’won koda, to mano e gima nadwaro gie sechego. Nonyisa kaka nosebedo konyagore gi chandruok ma chal gi marano, to mano nomiyo awinjo ni kare ok an kenda.” Nyalo bedo ni nyaminwano ne ok ong’eyo kaka weche ma nonyiso Marthe ne ojiwe.

12, 13. Ere kaka wanyalo tiyo gi weche ma yudore e Jo-Filipi 2:1-4?

¹² Paulo nonyiso Jokristo duto ma ne ni e kanyakla ma Filipi niya: “Ka e kindu nitie jip moro amora e Kristo, gi hoch mar hera, gi chuny mar dewo jomamoko, gi hera kod kech, miuru morna opong’ chuth ka ubedo gi paro achiel kendo gi hera achiel, ka ubedo e winjruok achiel chuth kuom paro achiel. Kik utim gimoro amora nikech chuny mar himruok kata nikech paro ni ubeyo moloyo jomamoko, to bolreuru ka ukwano ni jomamoko oloyou gi ber. Kik ung’i mana gik ma kelonu ber un uwegi, to ung’i bende gik ma kelo ber ne jomamoko.”—Fil. 2:1-4.

¹³ Adier, waduto onego watem matek mondo wajiw owete gi nyiminewa ka ‘wahogi e yor hera,’ ‘wadewogi,’ kendo ‘wakechogi.’

14. En ang’o ma nyalo jiwowa?

¹⁴ Winjo ni joma ne wakonyo mong’eyo adiera pod dhi nyime wuotho e adiera en gima nyalo jiwowa mana kaka nojiwo jaote Johana. Nondiko niya: “Onge gima duong’ ma dimi abed gi mor ma loyo wachni: ni asik ka awinjo ni nyithinda dhi nyime wuotho e adiera.” (3 Joh. 4) Jopainia mathoth bedoga ma mor neno ka joma ne gipuonjo adiera higni mang’eny mosekalo pod dhi nyime tiyo ne Jehova kendo moko kuomgi bende gin jopainia. Paro ne painia ma chunye onyosore gik mabeyo mosetimo nyalo jiwe ahinya.

15. En ang’o ma wanyalo timo mondo wajiw owete gi nyimine ma tiyo ne Jehova e migepe makende?

¹⁵ Jorit-alwora mang’eny gi mondegi wacho kaka barupe machuok ma owete gi nyimine ndiko ka goyonegigo erokamano bang’ limo kanyakla en gima jiwogi. E yo ma kamano, jodong-kanyakla, jomisonari, jopainia, kod jo Bethel bende bedo ma mor sama wandikonegi barupe ma jiwogi.

16. Gima yot ma wanyalo timo mondo wajiw ng’ato en ang’o?

¹⁶ Nyalo bedo gima rach paro ni ok wanyal jiwo jomamoko nikech ok wan joma wuoyo ahinya. Ok ochuno ni nyaka itim gimoro malich ahinya e ka ijiw ng’ato, samoro gima dwarore en mana bwonjo kode sama imose. Ka dipo ni ok obwonjo kodi, mano nyalo nyiso ni nitie chandruok moro, kendo chiko iti mos sama owuoyo kodi nyalo jiwe ndi.—Jak. 1:19.

17. Ere kaka jarit-alwora nokonyo owadwa moro ma rawera ma chunye nonyosore?

¹⁷ Owadwa moro ma rawera miluongo ni Henri ne chunye onyosore ahinya ka  ne joodgi moko moriwo nyaka wuon-gi ma ne en jaduong’-kanyakla noweyo adiera. Jarit-alwora moro nofwenyo ni Henri okuyo, omiyo nokawe mondo gidhi gigo mbaka e otel moro ka gimadho chai. Nochiko ite mos ka ne Henri wachone gik ma ne chando chunye kendo nojiwe ahinya. Henri nofwenyo ni yo ma nonyalo konyogo joodgi mondo oduog e adiera en mana nano kotiyo ne Jehova. Somo ndiko kaka Zaburi 46; Zefania 3:17; kod Mariko 10:29, 30 nojiwe ahinya.

18. (a) Ruoth Solomon nowacho ang’o e wach jiwo jomoko? (b) Jaote Paulo nochiwo paro mane?

¹⁸ Gima notimore ne Marthe kod Henri nyiso ni waduto wanyalo jiwo owadwa kata nyaminwa moro ma dwarore ni ojiw. Ruoth Solomon nowacho niya: “Wach mohul e ndalo mowinjore, ber ahinya. Gi moromo wang’ dhano omiyo chuny mor; kendo weche mabeyo mokow omiyo choke bedo motegno.” (Nge. 15:23, 30) E wi mano, somo sula ma yudore e Ohinga mar Jarito kata e websaitwa nyalo jiwo ng’at ma chunye onyosore. Paulo nowacho ni wero wende mag Pinyruoth gi jomamoko bende nyalo jiwowa. Nondiko niya: “Sikuru ka upuonjoru e kindu kendo ka ujiworu gi zaburi gi wende pak ne Nyasaye kod wende mag lemo miwero gi erokamano, ka uwer ne Jehova gi chunyu duto.”—Kol. 3:16; Tich 16:25.

19. Ang’o momiyo biro dwarore ni wamed jiwore e kinde ma biro, to onego watim ang’o?

¹⁹ Biro dwarore ni wamed jiwore e kindwa sama waneno ka odiechieng Jehova “medo sudo machiegni.” (Hib. 10:25) Mana kaka Paulo nonyiso Jokristo ma ndalone, wan bende onego ‘wadhi nyime jiwore e kindwa kendo gerore ng’ato gi ng’ato mana kaka adier sani watimo.’—1 The. 5:11.