1-2. Ang’o momiyo chuny Yesu ne chandore?

CHIENG’ mogik ma Yesu ne ni e piny kae ka pok onege, chunye ne chandore ahinya. Ne odhi tho tho ma lit e lwet joricho. To nitie gima ne chande moloyo mana thone. Nohero Jehova ahinya kendo nodwaro more. Yesu nong’eyo ni ka nonyalo siko komakore gi Jehova e tembe matek ma nochomego, ne odhi konyo e keto nying Jehova obed maler. Bende, nohero dhano ahinya kendo nong’eyo ni ka otho komakore gi Jehova, dhano ne dhi bedo gi geno mar yudo ngima ma nyaka chieng’.

² Kata obedo ni chuny Yesu ne chandore kamano, ne okue mos. Noseganyiso jootene niya: “Amiyou kuwe mara.” (Joh. 14:27) Ne en gi “kuwe mar Nyasaye” ma en chuny mokue ma ng’ato bedogo nikech winjruok maber ma en-go gi Nyasaye. Kue ma kamano e ma nomiyo Yesu opie mos e bwo tembe mager.​—Fil. 4:6, 7.

3. Ang’o ma wadwaro puonjore e sulani?

³ Onge ng’ato ang’ata kuomwa ma chunye biro chandore e okang’ ma chuny Yesu nochandorego sama noromo gi tembe, kata kamano, ji duto ma luwo Yesu nyaka rom gi tembe. (Mat. 16:24, 25; Joh. 15:20) Mana kaka Yesu, tembe nyalo miyo wabed gi parruok. Ang’o ma wanyalo timo mondo kik wabed gi parruok mokalo tong’ ma chop kama koro waonge gi kue e chunywa? We wane ane gik moko adek ma Yesu notimo e kinde ma noyalo e piny ka,  kod kaka wanyalo luwo ranyisi mare sama waromo gi tembe.

4. Kaka ijiwo e 1 Jo-Thesalonika 5:17, chiw ane ranyisi ma nyiso ni Yesu nolemo nyading’eny e odiechienge mogik ka pok otho.

⁴ Som 1 Jo-Thesalonika 5:17. E odiechieng Yesu mogik ka pok nonege, nosiko kolemo. Kuom ranyisi, ka ne ochako nyasi mar paro thone, nolemo ne makati kod divai. (1 Kor. 11:23-25) Ka ne pok giwuok kama ne gitimoe Pasaka, nolemo gi jopuonjrene. (Joh. 17:1-26) Ka nochopo gi jopuonjrene Gethsemane gotieno, nolemo nyadinwoya. (Mat. 26:36-39, 42, 44) E wi mano, weche ma nowacho mogik ka ne pok otho nowacho e yor lamo. (Luka 23:46) Yesu nonyiso Jehova gik moko duto ma ne timorene e odiechieng’ makendeno.

5. Ang’o momiyo joote ne ok obedo gi chir ma dwarore sama ne tem ochopo?

⁵ Achiel kuom gik ma nokonyo Yesu nano e tembe mager en ni nolamo Jehova nyading’eny kokwaye mondo okonye. Jootene to ne ok otimo kamano e otienono. Mano nomiyo chir margi odok chien ka ne tem ochopo. (Mat. 26:40, 41, 43, 45, 56) Wabiro siko ka wachung’ motegno sama waromo gi tembe mana ka waluwo ranyisi mar Yesu kendo wasiko ka ‘walemo kinde duto.’ Ang’o ma wanyalo kwayo sama walemo?

6. Ere kaka bedo gi yie miyo wasiko ka wan gi kue e chunywa?

⁶ Wanyalo kwayo Jehova mondo ‘omiwa yie momedore.’ (Luka 17:5; Joh. 14:1)  Dwarore ni wabed gi yie nikech Satan biro temo ng’ato ang’ata ma luwo Yesu. (Luka 22:31) Ere kaka bedo gi yie miyo wasiko ka wan gi kue e chunywa kata mana sama tembe bironwa moluwore oluwore? Ka wasetimo duto ma wanyalo mondo wanyagre gi temno, yie ma wan-go biro miyo wawe weche e lwet Jehova. To nikech wang’eyo ni onyalo loso weche e yo maber moloyowa, mano miyo pachwa kod chunywa bedo mokue.​—1 Pet. 5:6, 7.

7. Weche ma Robert wacho puonji ang’o?

⁷ Lamo konyowa mondo wasik gi chuny mokue kata bed ni waromo gi tembe ma chalo nade. Ne ane ranyisi mar Robert ma en jaduong’-kanyakla ma jahigni 80 gi wiye. Owacho kama: “Weche ma yudore e Jo-Filipi 4:6, 7 osekonya mondo anyagra gi tembe ma aromogo e ngimana. Nitie kinde ma weche yuto ne chanda ahinya. Bende, kinde moro ne ochuno ni awe migawo mar bedo jaduong’-kanyakla.” Ang’o ma konyoga Robert mondo osik ka en gi chuny mokue? Owacho niya: “Sa asaya ma awinjoga ka achako bedo gi parruok, alemoga mana gikanyono. Ang’eyo ni kaka amedo lemo gi kinda, e kaka amedo bedo gi chuny mokue.”

8. Ka luwore gi Johana 8:29, en wach mane machielo ma ne miyo Yesu bedo gi chuny mokue?

⁸ Som Johana 8:29. Yesu ne nigi chuny mokue kata mana sama ne isande nikech nong’eyo ni nano ma nonanogo  ne moro chuny Jehova. Nodhi nyime winjo Wuon-gi e kinde ma timo kamano ne ok yot. Nohero Wuon-gi ahinya kendo timo dwach Wuon-gi e ma nokawo kaka gima duong’ e ngimane. Ka ne pok obiro e piny, ne en “jatich molony” ma tiyo kanyachiel gi Nyasaye. (Nge. 8:30) Kendo ka ne en e piny kae, nopuonjo ji gi kinda e wi Jehova. (Mat. 6:9; Joh. 5:17) Yesu ne mor gi tijno ahinya.​—Joh. 4:34-36.

9. Ere kaka bedo modich e tij yalo miyo wasiko ka wan gi chuny mokue?

⁹ Wanyalo luwo ranyisi mar Yesu kuom winjo Jehova kendo ‘bedo modich kinde duto e tij Ruodhwa.’ (1 Kor. 15:58) Ka wabedo modich e tij yalo, mano konyowa mondo kik waket pachwa ahinya e chandruoge ma wan-go. (Tich 18:5) Kuom ranyisi, thoth joma waromogo sama wayalo niga gi chandruok mapek moloyo kata ma wan wawegi wan-go. To ka gisechako puonjore yore Jehova kendo tiyo gi gik ma gipuonjore, ngimagi chako bedo ma berberie kendo gibedo ma mor. Kinde duto ma waneno ka gima kamano timore, wamedo bedo gadier ni Jehova ok bi jwang’owa. To mano miyo wasiko ka wan gi kue e chunywa. Mano e gima notimore ne nyaminwa moro ma nigi tuo mar depression kendo ma nosebedo kochayore e ngimane duto. Owacho niya: “Sama adich e tij yalo, mano miyo ok abed gi parruok mang’eny kendo awinjo ka amor. Aparo ni mano timore nikech sama ayalo, awinjoga ka achiegni gi Jehova ahinya.”

10. Weche ma Brenda wacho puonji ang’o?

¹⁰ Ne ane ranyisi mar nyaminwa machielo ma nyinge Brenda. En kaachiel gi nyare gin gi tuo moro ma miyo lumbru bedo ma yomyom kendo tiende ng’ato chako bengore mosmos (multiple sclerosis). Brenda osikoga mana e wheelchair kendo oonge teko. Oyaloga ot ka ot sama onyalo, kata kamano, thothne ondikoga ne ji barupe. Owacho niya: “Ka ne afwenyo ni tuonani ok nyal thiedh ma changi e piny marachni, nachako keto pacha duto e tij yalo. Tijno miyo ok asik ka aparora. Kar mano, omiyo abedo modich e puonjo ji Muma e alworawa. Bende, sama ayalo, geno ma jaber ma an-go medo gurore e pacha.”

11-13. (a) Ere kaka joote Yesu kod jomamoko nonyiso ni ne gin osiepene madier? (b) Osiepe Yesu nomiyo owinjo nade e chunye?

¹¹ E thuolo duto ma Yesu noyalogo e piny ka, jootene ma nomakore kode nobedo osiepene gadier. Ne ginyiso maler ni ne gin osiepe madier mana kaka Muma wacho niya: “Nitie osiep ma makore gi nyawadgi moloyo kata owadgi monyuolgigo.” (Nge. 18:24, NW) Yesu nogeno osiepe ma kamago ahinya. Ka ne en e piny ka, onge owadgi moro amora ma nonyuolego ma noketo yie kuome. (Joh. 7:3-5) Nitie kata kinde ma wedene noparo ni ne en janeko. (Mar. 3:21) Jootene ma nomakore kode to ne gin osiepene madier. Mano e momiyo e otieno mogik ka ne Yesu pok otho, nonyisogi kama: “Un e joma osemakore koda e masichena.”​—Luka 22:28.

¹² En adier ni nitie kinde ma jootego ne ok tim gik ma moro Yesu, kata kamano, ne ok oketo pache kuom bothgi matindo tindo; kar mano, noneno mana gik ma ne nyiso ni jogo noketo yie kuome. (Mat. 26:40; Mar. 10:13, 14; Joh. 6:66-69) E otieno mogik ma ne enie kodgi, nonyisogi kama: “Aseluongou  ni osiepena, nimar asemiyo ung’eyo gik moko duto ma asewinjo kuom Wuora.” (Joh. 15:15) Onge kiawa ni osiepe Yesugo nojiwe ahinya. Yo ma ne gikonyogo Yesu e tij yalo nomiyo Yesu obedo ma mor sidang’.​—Luka 10:17, 21.

¹³ Mopogore gi joote, Yesu ne nigi osiepe mamoko​—moriwo chwo kod mon​—ma nokonye e tij yalo kod e yore mamoko. Moko kuomgi ne rwakega e gago e utegi. (Luka 10:38-42; Joh. 12:1, 2) Moko to ne dhi kode kuonde ma nodhiyee kendo ne gimiye gik ma nonyalo konyorego. (Luka 8:3) Yesu ne nigi osiepe mabeyo nikech en bende ne en osiep maber. Notimo ne osiepenego gik mabeyo kendo ne ok odwar ni gitim gik mohewogi. Kata obedo ni Yesu ne onge richo kata matin, noyie mondo osiepene ma ne gin dhano monyuol e richo okonye. Onge kiawa ni ne gijiwe mondo osik ka en gi chuny mokue.

14-15. Ere kaka wanyalo yudo osiepe mabeyo, to ginyalo konyowa nade?

¹⁴ Osiepe mabeyo biro jiwowa mondo wasik ka wamakore gi Jehova. To yo maber mar yudo osiepe mabeyo en bedo osiep maber. (Mat. 7:12) Kuom ranyisi, Muma jiwowa ni watim matek e konyo jomamoko, to ahinya-ahinya jo mochando gik moko. (Efe. 4:28) Be inyalo temo rango i kanyaklau mondo ine nyaminwa kata owadwa moro minyalo konyo? Be inyalo dhi ng’iewo gik moko e chiro ne jalendo moro ma ok nyal wuok e ot nikech otuo kata oti? Be inyalo gwelo joot moro ma yutogi ni piny mondo uchiem kodgi? Ka ilony e tiyo gi jw.org^®  kod JW Library^®, donge inyalo tiego jomamoko e kanyaklau mondo gin be ging’e tiyo gi gigo? Sama wadich gi konyo jomamoko, wabedo ma mor.​—Tich 20:35.

¹⁵ Osiepe ma waloso gie sani biro sirowa e kinde ma waromo gi tembe, to mano biro konyowa mondo wasik ka wan gi chuny mokue. Mana kaka Elihu nochiko ite maber sama Ayub ne wuoyo e wi tembe ma nokalee, e kaka osiepewa bende chikonwa itgi sama waleronegi gik ma chandowa. (Ayub 32:4) Ok onego wapar ni osiepewa biro timonwa yiero; kata kamano, ber ka wawinjo paro ma gichiwonwa ka gitiyo gi Muma. (Nge. 15:22) Bende, mana kaka Daudi noyie mondo osiepene okonye kata obedo ni ne en ruoth, wan be ok onego wayie mondo ng’ayi omonwa rwako kony ma osiepewa miyowa sama wan e chandruok. (2 Sa. 17:27-29) Kuom adier, osiepe mabeyo kamano gin mich mowuok kuom Jehova.​—Jak. 1:17.

16. Ka luwore gi Jo-Filipi 4:6, 7, en yo mane kende ma wanyalo yudogo kue? Ler ane

¹⁶ Som Jo-Filipi 4:6, 7. Ang’o momiyo Jehova nyisowa ni wanyalo yudo kue mare mana “kokalo kuom Kristo Yesu”? En nikech wanyalo yudo kue mosiko mana ka wang’eyo migawo ma Yesu nigo e chopo dwach Nyasaye, kendo ka waketo yie kuome. Kuom ranyisi, kokalo kuom misango ma Yesu nochiwo, inyalo wenwa richowa duto. (1 Joh. 2:12) Ng’eyo wachno hoyo chunywa ahinya, donge! Nikech Yesu osebedo Ruoth e Pinyruodh Nyasaye, obiro tieko gik maricho duto ma Satan kod pinye marachni osekelonwa. (Isa. 65:17; 1 Joh. 3:8; Fwe. 21:3, 4) To mano doko wach ma miyowa geno! Kendo kata obedo ni Yesu osemiyowa migawo ma ok yot, en kodwa ka osirowa e ndalo mag gikogi. (Mat. 28:19, 20) Donge ng’eyo mano miyo wabedo gi chir? Kuom adier, hoch, geno, kod chir gin moko kuom gik ma konyowa mondo wabed gi chuny mokue.

17. (a) Ere kaka Jakristo nyalo siko ka en gi chuny mokue? (b) Mana kaka osing e Johana 16:33, wabiro bedo gi nyalo mar timo ang’o?

¹⁷ Kuom mano, ere kaka inyalo siko ka in gi chuny mokue sama iromo gi tembe mager? Inyalo siko ka in gi chuny mokue mana kitimo gik ma Yesu notimo. Mokwongo, lemga, kendo idhi nyime lemo kata bed ni ang’o ma timore. Mar ariyo, winj Jehova kendo iyal wach maber kata mana sama timo mano ok yot. Mar adek, yie mondo osiepeni okonyi sama iromo gi tembe. Ka watimo kamano, kue mar Nyasaye biro rito pachwa kod chunywa. Mana kaka Yesu, in be ibiro loyo tem moro amora ma inyalo romogo.​—Som Johana 16:33.