1. En ang’o ma jotich Nyasaye duto diher ni gitim, to nikech ang’o? (Ne picha manie nyim gaset.)

KRISTO YESU nonyiso jolupne ni ‘gidhi e ogendni duto mondo gilok ji obed jopuonjrene.’ (Mat. 28:19) Jotich Nyasaye duto diher ni ging’e kaka ginyalo timo migawono “e yo maber chuth.” (2 Tim. 4:5) Kuom adier, mano e tich maduong’ moloyo tich moro amora, kendo okelo ber mathoth ma ok nyal pim gi tich machielo. En tich monego tim mapiyo ahinya. Kata obedo ni wang’eyo mano, pod waromoga gi pek moko ma miyo seche moko ok wati tij Nyasaye kuom thuolo malach kaka dwaher.

2. Gin pek mage ma waromogo sama watimo tich ma Nyasaye omiyowa?

² Nitie tijewa wawegi ma dwaro thuolo malach kod teko mang’eny. Kuom ranyisi, samoro nyalo dwarore ni wati kuom seche mang’eny e odiechieng’ mondo wayud pesa ma wasirogo ngimawa kod joodwa. Samoro wanyagore gi weche mamoko kaka ting’ mag joot, midekre, tuo mar depression, kata rem kod chandruoge ma ng’ato bedogo koseti. Ere kaka wanyalo timo tich momiwa e yo maber chuth kata bed ni waromo gi pek ma kamago?

3. Weche Yesu ma yudore e Mathayo 13:23 miyo wabedo gi paro mane ka po ni ok wati ne Jehova gi thuolo mang’eny kaka dwaher?

³ Ka po ni gik ma timore e ngimawa monowa tiyo ne Jehova gi thuolo mang’eny kaka dwaher, chunywa ok onego onyosre. Yesu nong’eyo ni ne ok wadhi nyago olemo mag Pinyruoth e okang’ marom. (Som Mathayo 13:23.) Jehova mor ahinya gi kinda ma watimo e tich momiyowa, tek mana ni watimo duto ma wanyalo. (Hib. 6:10-12) Nitie joma bende neno ni kit ngimagi nyalo yienegi timo mathoth moloyo ma gitimo sani. E sulani, wadwa nono kaka  wanyalo keto tij Nyasaye obed motelo e ngimawa, kaka wanyalo keto ngimawa obed mayot, kod kaka wanyalo medo lony e tijwa mar yalo gi puonjo. Ka pok wanono wechego, wakwong wanon penjoni: Timo tich ma Nyasaye omiyowa e yo maber chuth tiende en ang’o?

4. Timo tich ma Nyasaye omiyowa e yo maber chuth tiende en ang’o?

⁴ Kokete e yo mayot, timo tich ma Nyasaye omiyowa e yo maber chuth tiende en timo duto ma wanyalo e tij yalo kod puonjo. Kata kamano, oriwo gik mathoth moloyo mana tiyo gi seche mang’eny e yalo kod puonjo. Gima Jehova morgo moloyo en gima chwalowa mondo watim tich momiyowa, ma en hera. Nikech wahero Jehova kod dhano wetewa, watimo tijno gi chunywa duto. * (Mar. 12:30, 31; Kol. 3:23) Tiyo ne Nyasaye gi chunywa duto tiende en tiyo gi tekowa kod nyalowa duto e timo gik modwaro ni watim. Ka wakawo mapek tich makende momiwa, wabiro temo matek mondo wayal wach maber ne ji mang’eny kaka nyalore.

5-6. Chiw ane ranyisi ma nyiso kaka ng’at ma nigi thuolo matin nyalo keto tij yalo obed tich maduong’ e ngimane.

⁵ Par ane ranyisi mar rawera moro mohero goyo gita. Ogoyo gita e thuolo moro amora moyudo. Bang’e oyudo tich mar goyo ne kastembe gita e otel moro e giko juma ka juma. Kata kamano, osara michule kanyo ok rome siro ngimane. Omiyo, omanyo tich machielo mar uso ne ng’ato e duka Wuok Tich nyaka Tich Abich. Kata obedo ni otiyo gi thuolone mang’eny e uso e dukano, chunye to ni e goyo gita. Ogombo ni obed jagita ma thiring’inyi mondo chieng’ moro obed jathum mang’ula. Kata kamano, pod ogoyoga gita e thuolo moro amora moyudo kata bed ni thuolo tin marom nade.

⁶ E yo machalo kamano, samoro in bende iyudoga mana thuolo matin mar dhi e tij yalo. Kata kamano, mano e tich ma iheroga ahinya. Itimo kinda mondo imed  lony mari e chopo e chuny ji gi wach maber. Nikech nitie gi mathoth monego itim, samoro igombo ng’eyo gima inyalo timo mondo tij yalo e ma obed tich maduong’ e ngimani.

7-8. Ere kaka wanyalo luwo ranyisi mar Yesu sama wayalo wach maber?

⁷ Ranyisi maber ma Yesu noketo konyowa ng’eyo paro monego wabedgo sama watimo tij Nyasaye. Yalo wach Pinyruodh Nyasaye e gima noketo motelo e ngimane. (Joh. 4:34, 35) Nowuotho kuonde maboyo mondo oyal ne ji mang’eny kaka nyalore. Noyalo ne ji kamoro amora ma ne oyudogie, bed ni ne gin e ndara, e miechgi, kata kuonde mamoko. Gimoro amora ma Yesu ne timo notudore gi tiyo ne Nyasaye.

⁸ Wanyalo luwo ranyisi mar Kristo kuom manyo thuolo mag yalo ne ji wach maber kamoro amora ma ginyalo yudore kendo e thuolo moro amora moneno. Waikore tuonore gik ma wahero mondo wayud thuolo mar dhi yalo. (Mar. 6:31-34; 1 Pet. 2:21) Owete gi nyimine moko e kanyakla gin jopainia makende, mapile, kata ma konyo. Jomoko osepuonjore wacho dhok mamoko mondo giyal ne joma wacho dhokgo. Moko bende osedhi e alwora ma jolendo dwaroree ahinya. Kata kamano, jolendo mamoko ma ok nyal timo migepego pod omako kama duong’ e tij yalo wach Pinyruoth. Bed ni walendo e okang’ marom nade, wang’eyo ni Jehova ok nyal kwayowa ni watim mathoth mokalo tekrewa. Odwaro ni waduto wabed ma mor sama wayalo “wach maber ma nigi duong’ moa kuom Nyasaye mamor.”​—1 Tim. 1:11; Rap. 30:11.

9. (a) Ere kaka Paulo noketo tij yalo obed gima duong’ e ngimane kata obedo ni seche moko notimoga tich ma nosirogo ngimane? (b) Tich Joote 28:16, 30, 31 nyiso nade kaka Paulo ne neno tije mar yalo?

⁹ Jaote Paulo bende noketo ranyisi maber. Tij yalo e ma ne okawo kaka gima duong’ e ngimane. Ka ne en Korintho e wuodhe mar ariyo kaka jamisonari, nitie kinde ma pesa norumone ma ochako loso hema mondo oyud kaka nonyalo konyore. Kata kamano, tij hema ok e ma noketo motelo. Notime mana mondo oyud kaka nonyalo konyore sama noyalo mondo kik omi Jokristo wetene ting’ mapek. (2 Kor. 11:7) Omiyo, gima duong’ ma nodhi nyime timo ne en yalo, kendo notimo kamano chieng’ Sabato ka Sabato. Kata kamano, ka ne weche ochako bedo ma berberie, nomedo thuolo ma ne otiyogo e yalo. “Nochako bedo modich ahinya gi yalo wach Nyasaye, kochiwo neno ne Jo-Yahudi kendo kosiro gadier ni Yesu e Kristo.” (Tich 18:3-5; 2 Kor. 11:9) Bang’e ka ne en e tuech e ot ma ne odakie Rumi kuom higni ariyo, ne oyalo ne welo ma ne dhiga lime kendo nondiko barupe ne kanyakla mopogore opogore. (Som Tich Joote 28:16, 30, 31.) Paulo ne ok odwar ni gimoro amora omone yalo. Nondiko kama: “Nikech osemiwa tijni . . . , ok waol.” (2 Kor. 4:1) Mana kaka Paulo, wan be onego waket tij yalo e ma obed gima duong’ ahinya e ngimawa kata obedo ni seche moko wanyalo tiyo gi thuolowa mang’eny e timo tije mamoko.

10-11. Ere kaka pod wanyalo timo tich ma Nyasaye omiyowa e yo maber chuth kata ka po ni watuore?

¹⁰ Ka po ni ok wanyal yalo ahinya e ot ka ot nikech samoro waseti kata watuore, pod wanyalo yalo ka watiyo gi yore mamoko. Jokristo mokwongo ne yalo ne ji kamoro amora ma ne giyudogie. Ne gitiyo gi  thuolo moro amora mondo giwuo gi ji e wi adiera kamoro amora ma jogo ne yudoree, bed ni ne gin e utegi, e chirni, kata mana sama ne gin e dijegi. (Tich 17:17; 20:20) Ka po ni ok wanyal wuotho ahinya, wanyalo bet kuonde ma ji yudoreega mang’eny mondo walend ne joma kalo. Kata wanyalo lendo sama wan e dijewa, wanyalo ndiko barupe, kata wanyalo lendo ka watiyo gi simu. Jolendo mang’eny ma ok nyal wuotho ahinya yudoga mor mogundho kuom tiyo gi yorego e tij yalo.

¹¹ Kata bed ni ituori, pod inyalo timo tich ma Nyasaye omiyi e yo maber chuth. Ne ane ranyisi mar jaote Paulo kendo. Nowacho kama: “E weche duto, an gi nyalo kokalo kuom jalno ma miya teko.” (Fil. 4:13) Teko ma kamano e ma Paulo ne dwaro e kinde moro ma tuo nogoye ka ne en e achiel kuom wuodhene mag misonari. Nonyiso Jo-Galatia kama: “Tuo moro mar ringruok e ma ne omiya thuolo mokwongo mar yalonu wach maber.” (Gal. 4:13) E yo ma chalo kamano, in bende sama ituo, pod inyalo yalo wach maber ne lakteche kod jomamoko ma riti. Kinde mang’eny jogo ok yudrega e utegi sama jolendo yalo ot ka ot.

12. Bedo gi wang’ ma “ochomo kamoro achiel” tiende en ang’o?

¹² Yesu nowacho kama: “Taya mar del en wang’. Omiyo, ka wang’i ochomo kamoro achiel, dendi duto biro bet gi ler.” (Mat. 6:22) Yesu ne temo wacho ang’o? Gima nowacho kanyo en ni ok onego wagaj ngimawa gi gik mang’eny ma nyalo monowa keto pachwa duto kuom tich maduong’ ma Nyasaye omiyowa. Yesu owuon noketo ranyisi maber kuom keto pache kod ngimane duto e tij yalo, kendo nonyiso jopuonjrene mondo giket  pachgi e tiyo ne Jehova kod Pinyruodhe. Wan bende dwaher luwo ranyisi mar Yesu kuom bedo modich e tij Nyasaye. Gima onego waket mokwongo en “Pinyruoth kod gik makare mag Nyasaye.”​—Mat. 6:33.

13. Ang’o ma nyalo konyowa keto pachwa e tich ma Nyasaye omiyowa?

¹³ Achiel kuom yore ma nyalo konyowa keto pachwa e tich ma Nyasaye omiyowa en keto ngimawa obed mayot. Timo kamano biro miyowa thuolo moromo mar konyo jomamoko ong’e Jehova kendo ohere. * Kuom ranyisi, be wanyalo timo lokruok moko e seche ma watiyogo e tij yuto mondo wayud thuolo mar yalo e kor juma? Be wanyalo duoko chien thuolo ma watiyogo e bayo kata budho moko ma chamo achama sa?

14. Owadwa moro gi jaode notimo lokruoge mage mondo giyud thuolo momedore mar yalo?

¹⁴ Ne ane gima jaduong’-kanyakla miluongo ni Elias gi jaode notimo. Elias wacho niya: “Nitie kinde ma ne ok wanyal bedo jopainia mapile, kata kamano, nitie gik ma ne wanyalo timo mondo wayud thuolo momedore mar yalo. Ne wachako mana gi timo gik matindo tindo mondo wayud thuolo. Kuom ranyisi, ne waduoko bajedwa piny, ne waduoko chien thuolo ma ne watiyogo e bayo kod yueyo, kendo ne wakwayo joma nondikowa tich mondo gitimnwa lokruok moko e ka wayud thuolo momedore mar yalo. Timo lokruogego nomiyo wachako lendo godhiambo, wabedo gi ji mathoth ma wapuonjo Muma, kendo koro ne wanyalo kata mana yalo e kor juma diriyo e dwe. Mano mor manade!”

15-16. Ka luwore gi 1 Timotheo 4:13, 15, ere kaka wanyalo medo lony e tij yalo? (Ne bende sanduk ma wiye wacho ni “ Gik ma Nyalo Konya Mondo Atim Tich Momiya e Yo Maber Chuth.”)

¹⁵ Gima chielo ma dwarore mondo watim tich ma Nyasaye omiyowa e yo maber chuth en medo lony e yalo kod puonjo. Par ane ranyisini: Nitie tije moko ma dwaroga tiegruok kod somo mang’eny kinde ka kinde mondo ng’ato osik ka medo lony ma en-go. Mano e gima dwarore bende kuom joma yalo wach Pinyruoth. Dwarore ni wadhi nyime puonjore kaka wanyalo medo lony e tij yalo.​—Nge. 1:5; som 1 Timotheo 4:13, 15.

¹⁶ To ere kaka wanyalo timo kamano? Onego waket pachwa gi chunywa duto e gik mipuonjowa e Chokruok mar Ngimawa kod Tijwa juma ka juma. Tiegruok ma wayudo e chokruogno konyowa mondo wadhi nyime bedo molony e tij yalo. Kuom ranyisi, sama jakom wuoyo gi jopuonjre ka en e ndiri, nyalo bedo maber ka wan be wachiko itwa mondo wafweny kuonde ma wanyalo timoe dongruok e yalo kod puonjo. Kae to wanyalo tiyo gi weche ma wasumogo sama wayalo ne ng’ato wach maber. Bende, wanyalo kwayo jomamoko mondo walend kodgi, kuom ranyisi, jarit grubwa mar lendo, jolendo mamoko molony, jopainia, kata jarit-alwora. Kaka wamedo yudo lony e tiyo gi Gik Mwatiyogo e Puonjo Ji Muma, e kaka tij yalo kod puonjo biro medo bedonwa mamit.

17. Kitimo tich ma Nyasaye omiyi e yo maber chuth, weche biro dhini nade?

¹⁷ To mano kaka wamor ni Jehova odhialowa gi migawo mar “tiyo kanyachiel” kode! (1 Kor. 3:9) Sama watimo kinda mondo ‘wayang gadier gik ma dwarore moloyo’ kendo keto pachwa duto e tich ma Nyasaye omiyowa, ‘watiyo ne Jehova ka wamor.’ (Fil. 1:10; Zab. 100:2) Ka in achiel kuom jotich Nyasaye, bed gadier ni obiro miyi teko mondo itim tich momiyi e yo maber chuth kata bed ni iti, ituori, kata in gi pek mamoko. (2 Kor. 4:1, 7; 6:4) Bed ni in gi nyalo mar timo matin kata mathoth e tij Nyasaye, ng’e ni ka itimo tij yalo gi chunyi duto, ibiro ‘bedo ma mor.’ (Gal. 6:4) Sama itimo tich ma Nyasaye omiyi e yo maber chuth, inyiso ni ihero Jehova kod dhano weteni. “Kuom timo kamano, iniresri iwuon kendo inires joma winjo weche mipuonjo.”​—1 Tim. 4:16.