1. Ka wadwaro mako osiep gi ng’ato, ang’o ma watimoga?

THOTHNE, ka wadwaro mako osiep gi ng’ato, gima wakwongoga timo en kawo kinde mondo wago mbaka kode. Kaka wamedo goyo mbaka e wi weche mopogore opogore, e kaka wamedo ng’iyo kode, to mano miyo wabedo osiepe. Kata kamano, mako osiep gi Yesu to bet opogore matin. Ang’o momiyo wawacho kamano?

2. Wach mokwongo ma nyalo miyo kik bed ma yotnwa mako osiep gi Yesu en ang’o?

² Mokwongo, pok wanenoga Yesu wang’ gi wang’. Thoth Jokristo mokwongo bende ne ok oneno Yesu wang’ gi wang’. To e ma jaote Petro nondikonegi niya: “Kata obedo ni ne ok unene, to uhere. Kata obedo ni wang’u ok nene gie sani, pod uyie kuome.” (1 Pet. 1:8) Mano nyiso ni nyalore mondo wabed osiepe Yesu kata obedo ni pok wanene gi wang’wa.

3. Wach mar ariyo ma nyalo miyo kik bed ma yotnwa mako osiep gi Yesu en ang’o?

³ Mar ariyo, ok wanyal wuoyo gi Yesu achiel kachiel. En adier ni wateroga lamowa ir Jehova kokalo kuom nying Yesu; kata kamano, mano ok nyis ni en e ma wawuoyo  kode. Yesu owuon ok dwar ni walame. Nikech ang’o? En nikech Jehova kende e monego walam. (Mat. 4:10) Kata kamano, pod wanyalo timo gik ma nyiso ni wahero Yesu.

4. Wach mar adek ma nyalo miyo kik bed ma yotnwa mako osiep gi Yesu en ang’o, to ang’o ma wadwaro nono?

⁴ Mar adek, Yesu odak e polo, omiyo, ok wanyal bedo bute ma wawuo kode aching’. To mano ok monwa ng’eye. Wadwaro nono okenge moko ang’wen ma wanyalo kawo mondo wateg osiep ma ni e kindwa gi Yesu. We wakwong wanon gimomiyo dwarore ni wabed osiepe Yesu.

5. Ang’o momiyo dwarore ni wabed osiepe Yesu? (Ne bende sanduk ma wiye wacho ni, “ Bedo Osiepe Yesu Miyo Wabedo Osiepe Jehova” kod ma wiye wacho ni, “ Her Yesu e Okang’ Mowinjore Kode.”)

⁵ Bedo osiepe Yesu e ma miyo wabedo osiepe Jehova. Ang’o momiyo wawacho kamano? Ne ane weche moko ariyo. Mokwongo, Yesu nonyiso jopuonjrene niya: “Wuoro oherou, nikech usehera kendo useyie ni ne abiro tiyo e lo Nyasaye.” (Joh. 16:27) Nowacho bende niya: “Onge ng’at ma biro ir Wuora mak mana kokalo kuoma.” (Joh. 14:6) Temo bedo osiepe Jehova ka ok wan osiepe Yesu chalo gi temo donjo e ot moro ma ok wakalo e dhoot. Yesu notiyo gi ranyisi ma dwa chalo gi mano ka nowacho ni en e “dhood rombe.” (Joh. 10:7) Wach mar ariyo en ni Yesu nonyiso kido mag Wuon-gi e yo ma kare chuth. Nonyiso jopuonjrene niya: “Ng’at ma osenena, oseneno Wuoro bende.” (Joh. 14:9)  Omiyo, achiel kuom yore madongo ma nyalo konyowa ng’eyo Jehova en puonjruok e wi ngima Yesu. Kaka wamedo puonjore e wi Yesu, e kaka wamedo here. To kaka wamedo hero Yesu, e kaka wamedo hero Jehova Wuon-gi.

6. Wach machielo momiyo dwarore ni wabed osiepe Yesu en mane? Ler ane.

⁶ Bedo osiepe Yesu e ma biro miyo Jehova odwok lamo magwa. Mano oriwo timo gik mang’eny moloyo mana wacho ni, “E nying Yesu” e giko lamo magwa. Nyaka wang’e gimomiyo Jehova tiyo gi Yesu e dwoko lamowa. Yesu nonyiso jootene kama: “Gima ukwayo e nyinga, abiro timonu.” (Joh. 14:13) Kata obedo ni Jehova e ma winjo lamowa kendo miyowa gik ma wakwaye, osemiyo Yesu teko mar timonwa gigo. (Mat. 28:18) Kuom mano, ka pok Jehova odwoko lamowa, okwongo ong’iyo ka be watiyo gi weche ma Yesu nopuonjo. Kuom ranyisi, Yesu nowacho niya: “Kuweyo ne ji kethogi, Wuonu manie polo bende nowenu kethou; to ka ok uwe ne ji kethogi, Wuonu bende ok bi weyonu kethou.” (Mat. 6:14, 15) Kare dwarore ahinya ni watim ne jowetewa gik ma Jehova kod Yesu bende timonwa!

7. Misango mar Yesu konyo jomage?

⁷ Osiepe Yesu kende e ma biro yudo ber ma misangone kelo. Wang’eyo mano nade? Yesu nowacho ni ne odhi “chiwo ngimane nikech osiepene.” (Joh. 15:13) Joma notiyo ne Jehova chon ka ne pok Yesu obiro e piny biro puonjore e wi Yesu mondo gin be gihere. Ji kaka Ibrahim, Sara, Musa, gi Rahab ibiro chier, kendo gin bende biro dwarore ni gibed osiepe Yesu e ka giyud ngima ma nyaka chieng’.​—Joh. 17:3; Tich 24:15; Hib. 11:8-12, 24-26, 31.

8-9. Kaka oler e Johana 15:4, 5, bedo osiepe Yesu miyo watimo ang’o, to ang’o momiyo mano en wach maduong’?

⁸ Wamor tiyo kanyachiel gi Yesu e tij lendo kod puonjo ji wach maber mar Pinyruoth. Ka ne Yesu ni e piny, nopuonjo ji. To nyaka nodog e polo, osebedo wi kanyakla, kendo odhi nyime tayo tij lendo gi puonjo. Omor ahinya gi kinda ma watimo mondo wakony ji ong’eye kendo ong’e Wuon-gi. Kuom adier, wanyalo yudo nyak e tij lendo gi puonjo mana ka Jehova gi Yesu okonyowa.​—Som Johana 15:4, 5.

⁹ Muma puonjo ni ka wadwaro ni wamor Jehova, nyaka wasik ka wahero Yesu. Kuom mano, we wane ane gik moko ang’wen ma wanyalo timo mondo wabed osiepe Yesu.

10. Okang’ mokwongo ma onego wakaw ka wadwaro bedo osiepe Yesu en mane?

¹⁰ (1) Ng’e Yesu. Wanyalo ng’eyo Yesu maber ka wasomo bug Mathayo, Mariko, Luka, kod Johana. Sama wasomo bugego kendo paro matut kuom yo ma Yesu ne kechogo ji, hera ma waherego kod luor ma wamiye biro medore. Kuom ranyisi, kata obedo ni ne en Ruoth, ne oneno jopuonjrene kaka osiepene. Ne onyisogi nyaka pache kod kaka nonenogi. (Joh. 15:15) Ka ne giwinjo lit, Yesu bende ne winjo lit kodgi, ka ne giywak, en bende noywak kodgi. (Joh. 11:32-36) Kata mana joma ne kwedo Yesu nowacho ni osiepene ne gin joma ne rwako  ote ma nolando. (Mat. 11:19) Sama watimo ne jomoko gik ma Yesu ne timo ne jopuonjrene, winjruok ma wan-go kodgi medo bedo motegno, wabedo ma mor, kendo wamedo hero Yesu ahinya.

11. Okang’ mar ariyo ma onego wakaw ka wadwaro bedo osiepe Yesu en mane, to ang’o momiyo odwarore ahinya?

¹¹ (2) Ne gik moko kaka Yesu ne nenogi kendo itim gik moko kaka notimo. Kaka wamedo ng’eyo yo ma Yesu ne nenogo gik moko kendo luwo ranyisine, e kaka osiep ma ni e kindwa kode biro medo bedo motegno. (1 Kor. 2:16) Ere kaka wanyalo luwo ranyisi mar Yesu? Ne ane ranyisi achiel. Yesu nohero konyo ji moloyo timo mana gik ma ne more en owuon. (Mat. 20:28; Rumi 15:1-3) Mano nomiyo oikore tuonore gik mohero mondo jomamoko oyud ber, kendo noweyo ne ji kethogi. Ne ok ochwanyre mapiyo ka ne jomoko wuoyo marach kuome. (Joh. 1:46, 47) Ne ok omak sadha kata neno ni jomoko ok nyal lokore chuth-chuth. (1 Tim. 1:12-14) Nowacho kama: ‘Ji duto nong’e ni un jopuonjrena ka un gi hera e kindu uwegi.’ (Joh. 13:35) Penjri ane kama: “Be aluwo ranyisi mar Yesu kuom timo duto ma anyalo mondo arit kue e kinda gi owete gi nyimine?”

12. Okang’ mar adek ma onego wakaw ka wadwaro bedo osiepe Yesu en mane, to wanyalo timo mano e yo mane?

¹² (3) Kony owete Yesu. Yesu neno gik ma watimo ne owetene mowal ka gima en e ma watimonegi. (Mat. 25:34-40) Yo maduong’ ma wakonyogo Jokristo mowal en lando wach Pinyruoth kendo loko ji obed jopuonjre Yesu kaka nochiko. (Mat. 28:19, 20; Tich 10:42) Mondo owete Kristo otim tij lendo e piny ma ngima, dwarore ni “rombe mamoko” okonygi. (Joh. 10:16) Ka po ni in achiel kuom rombe mamoko, ng’e ni sa asaya mitimo tij lendo, inyiso ni ihero Yesu kod owetene mowal.

13. Ere kaka wanyalo tiyo gi puonj ma ne Yesu ochiwo e Luka 16:9?

¹³ Wanyiso bende ni wadwaro mako osiep gi Jehova gi Yesu ka wagolo pesa misirogo tij Pinyruoth. (Som Luka 16:9.) Kuom ranyisi, wanyalo golo chiwo mitiyogo e siro tij piny ma ngima moriwo lendo e alwora mosokore, gero utewa mag lamo kendo ritogi, kod konyo Jokristo wetewa sama giyudo masira. Bende, wanyalo golo pesa ma siro tije mag kanyakla kendo konyo joma nie kanyaklawa ma samoro wang’eyo ni chandore. (Nge. 19:17) Magi gin moko kuom yore ma wanyalo riwogo owete Yesu lwedo.

14. Kaka ilero e Jo-Efeso 4:15, 16, okang’ mar ang’wen ma onego wakaw ka wadwaro bedo osiepe Yesu en mane?

¹⁴ (4) Riw lwedo chenro mag kanyakla mar Jokristo. Watego osiep ma wan-go gi Yesu ma en wi kanyakla, sama wawinjo joma oket mondo otawa. (Som Jo-Efeso 4:15, 16.) Kuom ranyisi, tinde watemo mondo oti gi Ute Romo magwa e yo maber chuth. Mano osemiyo oriw kanyakla moko, kendo alworagi mag lendo bende osetimne lokruok moko. Chenroni osemiyo watiyo maber gi chiwo ma owetewa gi nyiminewa gologa. Lokruogego osemiyo owete gi nyimine ma ni e alworago otimo kinda momedore mondo ging’i gi chenro manyien-go. Nyalo  bedo ni moko kuomgi osebedo e kanyakla moro kuom higni mang’eny mi ging’iyo gi owete gi nyimine ma ni e kanyaklano, to koro inyisogi ni gidhi e kanyakla machielo. Nyaka bed ni Yesu mor ahinya sama oneno ka jolupnego oikore luwo chenro manyienno!

15. Ere kaka osiep ma ni e kindwa gi Yesu biro medo bedo motegno e kinde ma biro?

¹⁵ Joma owal gi roho nigi geno mar dhi dak gi Yesu e polo ka gilocho kode e Pinyruodh Nyasaye. Gibiro neno Yesu wang’ gi wang’, goyo kode mbaka, kendo budho kode. (Joh. 14:2, 3) Joma biro dak e piny bende biro neno ka Yesu timo gik ma nyiso ni oherogi. Kata obedo ni ok gibi neno Yesu wang’ gi wang’, osiep ma ni e kindgi kode biro siko ka medo bedo motegno sama giyudo pok ma Jehova gi Yesu biro miyogi.​—Isa. 9:6, 7.

16. Bedo osiepe Yesu kelonwa gueth mage?

¹⁶ Sama wayie bedo osiepe Yesu, wayudo gueth mang’eny. Kuom ranyisi, waneno kaka osirowa sani kendo otimo gik ma nyiso ni oherowa. Wayudo thuolo mar dak nyaka chieng’. To maduong’ moloyo, osiep ma ni e kindwa gi Yesu miyo wabedo osiepe Jehova Wuon-gi. To mano kaka bedo osiepe Yesu en dhialro makende!