1. En ang’o ma waduto nyaka watim?

SAMA ituo kata iol, be diher piem e ng’wech ma ing’eyo maber ni tek? Ok yot. Kata kamano, jaote Paulo nowacho ni Jokristo duto ni e ng’wech. (Hib. 12:1) Bende, waduto, bed ni wan joma tindo kata joma dongo, joma roteke kata joma tekogi odok piny, nyaka wanan e ng’wech ma ni e nyimwa mondo wabi wayud mich ma Jehova osingonwa.​—Mat. 24:13.

2. Ka luwore gi 2 Timotheo 4:7, 8, ang’o momiyo Paulo ne wuoyo gi chir?

² Paulo ne nyalo wuoyo gi chir nikech en ‘nosetieko ng’weye.’ (Som 2 Timotheo 4:7, 8.) Kata kamano, en ng’wech mane ma Paulo ne wuoye?

3. Ng’wech ma Paulo ne wuoye en mane?

³ Nitie kinde ma Paulo ne tiyoga gi ranyisi mag tuke ma ne timore e piny Grik sama nopuonjo. (1 Kor. 9:25-27; 2 Tim. 2:5) Notiyo gi ranyisi mar ng’wech nyading’eny kowuoyo kuom ngima mar Jokristo. (1 Kor. 9:24; Gal. 2:2; Fil. 2:16) Ng’ato chako ng’wejno sama ochiwore ne Jehova mi obatise. (1 Pet. 3:21) Ochopo e tol sama Jehova omiye mich mar ngima mochwere.​—Mat. 25:31-34, 46; 2 Tim. 4:8.

4. Ang’o ma wadwaro nono e sulani?

⁴ Nitie gik mang’eny ma ng’wej marathon chalie gi ngima mar Jokristo. We wanon ane adek kuomgi. Mokwongo, onego waring e yo sie moketnwa; mar ariyo, onego  waket pachwa duto e ng’wech mondo wachop e tol mogik; kod mar adek, onego walo pek moro amora ma waromogo e yo sama waringo.

5. En yo mane ma nyaka waringie, to nikech ang’o?

⁵ E ng’wech ma pile, joma ringo nyaka luw yo sie ma joma ochano ng’wejno oketo. Kamano bende, ka wadwaro yudo mich mar ngima mochwere, nyaka waring e yo ma terowa e ngimano. (Tich 20:24; 1 Pet. 2:21) Kata kamano, Satan kod lange dwaro ni waluw yo mopogore; gidwaro ni ‘wadhi nyime wuotho kodgi.’ (1 Pet. 4:4) Gijaro yo ma waluwo, kendo ginyisowa ni yo ma giringoe e ma ber nikech gineno ni yorno miyo gibedo thuolo. To mano doko miriambo maduong’!​—2 Pet. 2:19.

6. Ranyisi mar Brian puonjowa ang’o?

⁶ Ng’ato ang’ata moyiero ringo e yor piny Satanni fwenyoga mapiyo ni yorno ok kete thuolo, to kar mano, okete mana misumba. (Rumi 6:16) Ne ane ranyisi mar Brian. Jonyuolne nojiwe mondo oluw yor Jokristo. Kata kamano, ka ne en jahigni apar gi wiye, nochako bedo gi kiawa ka be yorno ne dhi miyo obed ma mor. Omiyo, Brian nochako luwo yor Satan. Owacho kama: “Ne ok ang’eyo ni thuolo ma ne agombono ne dhi loka misumba. . . . Mapiyo nono, ne achako tiyo gi yedhe mamero koda kong’o, kendo ne achako dak e ngima mar anjawo. Kaka higini ne kadho, e kaka ne amedo tiyo gi yedhe mamero ma tekogi ng’eny moloyo kendo ne abedo misumbagi. Bedo misumba yedhego nomiyo achako usogi mondo ayud pesa mang’iewogo yedhena awuon.” Bang’e, Brian nochako loko yorene kendo luwo chike Jehova. Nobatise e higa mar 2001, kendo sani omor gadier nikech oringo e yor ngima. *

7. Ka luwore gi Mathayo 7:13, 14, gin yore mage ariyo ma wanyalo yiero ringoe?

⁷ Nenore maler ni onego wayier luwo yor ngima. Satan dwaro ni wawe ringo e yo madiny ma “tero ji e ngima,” to waring e yo malach ma ji mang’eny e pinyni luwo. Yo malachno ji ohero kendo oyot ringoe. Kata kamano, en yo “ma tero ji e kethruok.” (Som Mathayo 7:13, 14.) Mondo wasik e yor ngima kendo kik wagalre, nyaka wagen kuom Jehova kendo wawinje.

8. Ka jang’wech moro oduodore mi opodho, ang’o motimoga?

⁸ Joma ringo ng’wej marathon ketoga pachgi duto e yo ma giringoe mondo kik giduodre. Kata kamano, jong’wech wetegi nyaloga duodogi, kata ginyalo po ka gichwanyore e buche ma ni e ndara. Ka mano otimore mi gipodho, gichung’ga kendo gidhi nyime gi ng’wech. Ok giket pachgi kuom gima oduodogi kata mochwanyogi, to giketo pachgi duto kuom tol mogik kod mich ma gidhi yudo.

9. Ka po ni wachwanyore mi wapodho, ang’o monego watim?

⁹ E ng’wejwa mar ngima, wanyaloga duodore nyading’eny, samoro e wechewa kata timbewa. Bende, jong’wech wetewa nyalo chwanyowa. Gik ma kamago ok onego obwogwa. Waduto warem kendo waduto waringo e yo madiny ma dhi e ngima. Omiyo, wanyaloga tuomore wawegi. Paulo nowacho ni nitie kinde ma ng’ato kuomwa nyalo bedo gi “wach moro gi nyawadgi.” (Kol. 3:13) Kata kamano, ok onego waket pachwa kuom gima ochwanyowa; kar mano, ber mondo waket pachwa kuom mich ma wageno yudo. Ka po ni wachwanyore mi wapodho, onego watem matek mondo wachung’ ma piyo kendo dhi nyime gi ng’wech. Ka wayie ich-wang’ omi wamak sadha, mano biro monowa dhi nyime tiyo ne Jehova, kendo ok wabi yudo mich mokan ne joma onano nyaka giko. Bende, sadha biro miyo waduod joma waringogo e yo madiny ma dhi e ngima.

10. Ang’o ma wanyalo timo mondo kik wachwany joma waringogo?

¹⁰ Gima chielo ma wanyalo timo mondo kik wachwany joma waringogo en yie winjo pachgi, ma ok warido ni dwachwa e ma nyaka giluw seche te. (Rumi 14:13, 19-21; 1 Kor. 8:9, 13) Mae to wapogoree gi jong’wech ma jong’wech. Gin gipiemga gi jowetegi kendo ng’ato ka ng’ato kuomgi dwaro ni en kende e moyud mich. Dwachgi e ma giketo motelo. Omiyo, ng’ato nyalo larore gi jowetene mondo en e motel. Mopogore  kodgi, wan ok wapiem gi jowetewa. (Gal. 5:26; 6:4) Gombowa maduong’ en konyo ji mang’eny kaka nyalore mondo ginan kodwa e ng’wech nyaka giko kendo wayud mich kanyachiel kodgi. Nikech mano, watemo ahinya mondo waluw puonj ma jaote Paulo nochiwo niya: “Kik ung’i mana gik ma kelonu ber un uwegi, to ung’i bende gik ma kelo ber ne jomamoko.”​—Fil. 2:4.

11. Jong’wech ma pile ketoga pachgi kuom ang’o, to nikech ang’o?

¹¹ Jong’wech ma pile ok ng’i mana yo ma giringoe kende. Giketoga pachgi e tol mogik. Kata mana sama pod ok ginyal neno tolno gi wang’gi, gitemoga paro kaka gidhi kale mi giyud mich. Mano miyogi mijing’o mar dhi nyime gi ng’wech.

12. En ang’o ma Jehova oikonwa?

¹² E ng’wejwa mar ngima, Jehova oiko ne ng’ato ang’ata motieko ng’wech mich, ma en ngima mochwere e polo kata e paradiso e piny. Muma nyisowa kaka ngimano biro chalo, mondo okonywa neno motelo kaka wabiro dak. Ka waguro geno ma jaberno e pachwa kod e chunywa, ok bi bedo ma yot mondo gimoro oduodwa mi wawe ng’wech.

13. En ang’o ma waloyogo jong’wech ma pile?

¹³ Nitie pek mang’eny ma jong’wech ma Jo-Grik ne nyaka nyagrego, kuom ranyisi, jony kata winjo rem e dendgi. Kata kamano, tiegruok ma sa ka sa kod tekogi giwegi ne konyogi. Wan be wachalo kodgi nikech itiegowa pile pile mondo wang’e kaka wanyalo ringo e ng’wej ngima. Kata kamano, nitie gima waloyogigo. Wan tekowa a kuom Jehova ma e Wuon teko duto. Ka wageno kuome, osingonwa ni obiro tiegowa, to ok mana mano kende; obiro tegowa be!​—1 Pet. 5:10.

14. Ere kaka 2 Jo-Korintho 12:9, 10 nyalo konyowa nyagore gi pek ma waromogo?

¹⁴ Jaote Paulo ne romoga gi pek mang’eny. Nitie joma ne yanye kendo sande. Mopogore gi mago, ne en gi ‘kudho moro ma ne chuoyo ringrene.’ (2 Kor. 12:7) Ne ok oneno pek ma ne okaloego kaka gik ma ne nyalo mone dhi nyime tiyo ne Jehova; kar mano, nonenogi kaka thuolo mar nyiso ni ogeno kuom Jehova. (Som 2 Jo-Korintho 12:9, 10.) Neno gik moko e yo ma kamano nomiyo Jehova okonye nyagore gi tembenego.

15. Ka waluwo ranyisi mar Paulo, ang’o ma wabiro timo?

¹⁵ Wan be ji nyalo yanyowa kendo sandowa. Bende, wanyaloga tuore. Kata kamano, ka waluwo ranyisi mar Paulo, wanyalo neno chandruogego kaka thuolo ma wanyisogo Jehova ni wageno kuome.

16. Ka po ni sani tekoni tin, ang’o ma pod inyalo timo?

¹⁶ Dibed ni midekre oketi e otanda koso in e wheelchair? Koso chongeni osechako jony kata wengeni osechako neno ma mirimiri? Ka en kamano, be pod nyalore mondo iring e ng’wech gi joma pod tindo kendo ma ok tuore? Ee, nyalore! Nitie ji mang’eny ma hikgi oniang’ kendo ma midekre oketo ka gi ka, to pod gidhi nyime gi ng’wech mar ngima. Ok gitim mano gi tekregi giwegi. Kar mano, giyudo teko moa kuom Jehova kokalo kuom chokruoge, bed ni itudogi gi simu kata gineno vidio miketo e intanet mag  chokruoge mosemaki. Bende, gilendo ne lakteche, joma rito jotuo, kod wedegi.

17. Jehova neno nade jotichne ma tekogi odok piny?

¹⁷ Kik iyie mondo chuny monyosore kata nyawo moko ma in-go omoni dhi nyime ringo e ng’wej ngima. Jehova oheri malich nikech yieni kod sinani mari. Magi e kinde ma dwarore ni igen kuome moloyo kinde moro amora mosekalo, kendo ok obi jwang’i. (Zab. 9:10) Obiro medo sudo machiegni ahinya kodi. Ne ane gima nyaminwa moro ma tuore nowacho: “Kaka tuonani medo keta piny, e kaka thuolo ma an-go mag lando ne ji adiera bende medo dok piny. Kata kamano, an gadier ni kinda matin ma atimoga miyo chuny Jehova mor, kendo an be abedo ma mor.” Sama iwinjo ka chunyi onyosore, ng’e ni ok in kendi. Par ranyisi mar jaote Paulo, kod weche ma nowacho niya: “Abedo mamor e nyawo, . . . nikech sa ma anyap, eka abedo gi teko.”​—2 Kor. 12:10.

18. En pek mane makende ma jong’wech wetewa moko romogo?

¹⁸ Nitie pek moro machielo ma jong’wech wetewa moko romogo. Ginyagore gi gik ma jomoko ok nyal neno gi wang’gi kata fwenyo ma yot. Kuom ranyisi, moko nigi tuo mar depression kod parruok mang’eny. Ang’o momiyo mago gin pek makende? Par ane: Sama bad ng’ado otur kata otiyo gi wheelchair, ji duto nyalo neno mano, kendo ginyalo konye. Kata kamano, ok yot fwenyo ni ng’ato nigi tuo mar depression kata tuoche mamoko ma chocho obwongo. To gin be gin gi pek ma chalo gi mar joma otur kata ma ni e wheelchair, en mana ni nyalo bedo matek mondo ng’ato ofweny ni gidwaro kony.

19. Ranyisi mar Mefibosheth puonjowa ang’o?

¹⁹ Ka po ni nitie gik ma koro ok inyal timo kaka yande itimoga, kendo ineno ni ji kawi marach, ranyisi mar Mefibosheth nyalo jiwi. (2 Sa. 4:4) Ne en rang’ol, kendo Ruoth Daudi nong’adone bura ang’aya. Onge gima rach ma Mefibosheth notimo ma nomiyo oyudo chandruogego. To e ma ne ok oyie mondo ginyos chunye. Nomor gi ng’wono duto ma Ruoth Daudi nosetimone. (2 Sa. 9:6-10) Omiyo, ka ne Daudi okawe marach, ne ok omako wachno. Ne ok oyie mondo gima Daudi notimone marachno onyos chunye kata wang’o iye. Bende, ne ok oketo ketho kuom Jehova. Mefibosheth noketo pache kuom gik ma  nonyalo timo mondo osirgo ruoth ma Jehova nosewalo. (2 Sa. 16:1-4; 19:24-30) Jehova noyie mondo ondik sigand Mefibosheth e Muma mondo opuonjwa weche moko.​—Rumi 15:4.

20. Parruok mag ngima nyalo hinyo jomoko nade, to en ang’o ma ginyalo bedogo gadier?

²⁰ Parruok mag ngima osemiyo owete gi nyimine moko obedo ma luor-luor kata ma tang’-tang’ sama gin e kind ji. Kata obedo ni ok gin-ga thuolo kama ji ng’enyie, pod gitemo matek mondo gidhi e chokruoge mag kanyakla, mag alwora, kod madongo mag ndalo adek. Bende, kata obedo ni ok yotnegi wuoyo gi joma ok ging’eyo, pod gichukore ma gidhi e tij lendo. Ka po ni in e chal ma kamago, kik iluor! Ok in kendi. Nitie jong’wech weteni mang’eny ma bende nyagore gi weche ma chalo kamago. Ng’e ni Jehova mor ahinya gi kinda moro amora mitimo mondo itine gi chunyi duto. Bedo ni pok iol gi ng’wech nyiso ni Jehova guedhi kendo omiyi teko. * (Fil. 4:6, 7; 1 Pet. 5:7) Ka po ni itimo duto minyalo e tij Jehova kata obedo ni in gi ng’ol moro kata parruok, bed gadier ni imoro chuny Jehova.

21. Jehova biro konyowa timo ang’o?

²¹ Wamor ni nitie pogruok e kind ng’wech ma pile kod ng’wech ma jaote Paulo nowuoye. E ng’wech ma pile e kinde Muma, ng’ato achiel kende e ma ne yudo mich. E ng’wejwa mar ngima to ng’ato ang’ata monano nyaka e giko biro yudo mich mar ngima mochwere. (Joh. 3:16) Bende, e ng’wech ma pile, jong’wech duto nyaka bed gi teko moromo e ka ginyalo locho. E ng’wejwa mar ngima, kata mana joma ong’ol, moti, kod ma tuore nyalo ringo nyaka e giko. (2 Kor. 4:16) Kuom adier, Jehova biro dhi nyime konyowa mondo waduto watiek ng’wech!