Ang’o momiyo Yesu nowacho weche Daudi ma yudore e Zaburi 22:1 matin nono ka pok otho?

Moko kuom weche mogik ogik ma Yesu nowacho ka pok otho yudore e Mathayo 27:46 ma wacho niya: “Nyasacha, Nyasacha, iweya nang’o?” Kuom wacho wechegi, Yesu nochopo weche Daudi ma yudore e Zaburi 22:1. (Mar. 15:34) Ok en gima owinjore wacho ni Yesu nowacho wechegi nikech iye nowang’ gi Jehova kata nikech yiene nodok chien sama koro notho. Yesu nong’eyo maler gimomiyo ne dwarore ni nyaka otho kendo noikore timo mano. (Mat. 16:21; 20:28) Nong’eyo bende ni ka nochopo sama nonego othoe, Jehova ne dhi golo “chiel molwore” ma ne rite. (Ayub 1:10) Omiyo, Jehova nomiyo Yesu thuolo mar nyiso ni ne odhi makore kode kata bed ni nodhi tho tho manade.​—Mar. 14:35, 36.

To kare ang’o momiyo Yesu nowacho weche ma ni e Zaburino? Kata obedo ni ok wanyal bedo gadier gi gimomiyo Yesu nowacho wechego, wadwa neno ane moko kuom gik ma ne nyalo miyo owach wechego. *

Be dibed ni Yesu ne temo wacho ni Jehova ne ok dhi geng’one tho kuom wacho wechego? Ne dwarore ni Yesu ochiw rawar ma Jehova ok okonye. Yesu ne en dhano,  omiyo, ne dwarore ni otho mondo “obil tho ne ji duto.”​—Hib. 2:9.

Be dibed ni Yesu ne wuoyo e wi weche ma ni e zaburino duto kuom wacho mana weche matin ma yudore e ndikono? Kinde ma ne Yesu odak e piny, Jo-Yahudi nong’iyo gi tim mar mako weche ma ni e zaburi e wigi. Omiyo, ka ng’ato ne nyalo paronegi wes achiel e zaburi moro, ne ginyalo paro weche ma ni e zaburino duto e yo mayot. Kuom mano, ka po ni mano e gima Yesu ne nigo e paro, nonyalo konyo Jo-Yahudi mang’eny ma ne luwe mondo opar weche mokor ma yudore e zaburino ma notudore gi thone. (Zab. 22:7, 8, 15, 16, 18, 24) Bende, weche mogik ogik ma yudore e zaburino pako Jehova kendo nyiso ka koro en Ruoth e wi piny duto.​—Zab. 22:27-31.

Be dibed ni Yesu ne temo nyiso kaka ne en ng’at makare ma onge ketho moro amora kuom wacho weche Daudigo? Ka pok ne Yesu otho, Sanhedrin noyale e yo mopogore gi chik, kendo ne ging’adone bura ni oyanyo Nyasaye. (Mat. 26:65, 66) Noyale gotieno to mano nopogore ahinya gi gima ne chik wacho. (Mat. 26:59; Mar. 14:56-59) Omiyo, ka ne Yesu openjo ni, “Nyasacha Nyasacha, iweya nang’o?” notemo nyiso ayanga ni nokume ne ketho ma ne ok otimo.

Be dibed ni Yesu ne paro ne jomamoko ni Jehova noyie mondo Daudi ma nondiko weche ma ni e zaburini osandre nikech koro ne ok oyie kode? Penjo ma ne Daudi openjono ok nyis ni noonge yie. Bang’ penjo penjono, Daudi nodhi nyime nyiso ni nogeno kuom teko Jehova mar reso joge kendo Jehova nodhi nyime guedhe. (Zab. 22:23, 24, 27) E yo ma chalo kamano, kata obedo ni Yesu ma en “Wuod Daudi” nosandore e yadh-sand, mano ne ok nyis ni Jehova ne ok oyie kode.​—Mat. 21:9.

Be weche Yesugo ne nyiso kuyo malit ma ne en-go nikech Jehova ne ok dhi rite mondo e ka onyis e yo makare chuth ni omakore kode? E chakruok, Jehova ne ok ochano mondo Wuode osandre mi otho. Wach thone nobiro mana bang’ jonyuolwa mokwongo ng’anyo ne Nyasaye. Onge gima rach ma ne Yesu otimo, kata kamano, ne dwarore ni osandre motho e ka ochiw dwoko e wi penjo moko ma ne Satan openjo kendo ochiw nengo mar rawar ma ne dwarore mondo dhano oyud gima ne giselalo. (Mar. 8:31; 1 Pet. 2:21-24) Mano ne dhi nyalore mana ka Jehova oweyo rito Yesu kuom kinde to mano e kinde ma nohangoe timo kamano e ngima Yesu.

Be dibed ni Yesu ne temo konyo jopuonjrene mondo giket pachgi kuom gimomiyo Jehova noyie mondo otho kit tho ma kamano? * Yesu nong’eyo ni kit tho ma nodhi thogo kaka jaketh chik e wi yadh-sand ne dhi chwanyo ji mang’eny. (1 Kor. 1:23) Ka jolupne ne nyalo keto pachgi e wi gimomiyo notho, mano ne dhi konyogi bedo gi paro mowinjore e wi thoneno. (Gal. 3:13, 14) Ne gidhi neno Yesu kaka Jawar to ok kaka jaketh chik.

Bed ni Yesu nowacho wechego nikech wach mane, nong’eyo ni tho ma nothogo ne chopo dwach Jehova. Matin nono bang’ wacho weche ma ni e zaburino, Yesu nowacho niya: “Duto oserumo!” (Joh. 19:30; Luka 22:37) Bedo ni Jehova noweyo ma ok orito Yesu kuom kinde, mano nomiyo Yesu thuolo mar timo gik moko duto ma Jehova noore e piny kae mondo otim. Bende, mano nomiyo ochopo gik moko duto ma nondik kuome “e Chik Musa kod weche Jonabi gi Zaburi.”​—Luka 24:44.