SULA MAR PUONJRUOK 15
WER 124 Wabed Machiegni gi Jehova Ndalo Duto
Dhi Nyime Geno Riwruok mar Oganda Jehova
“Paruru jo ma tayou, ma gin jo mosewachonu wach Nyasaye.”—HIB. 13:7.
GIMA SULANI WUOYE
Kaka wanyalo nyiso ni wamiyo riwruok mar oganda Jehova luor kendo ni wagene.
1. Ere kaka Jehova nochano joge e kinde Jokristo mokwongo?
KINDE duto ka Jehova omiyo jotichne migawo moro, odwaro ni gitime e yo mochanore. (1 Kor. 14:33) Kuom ranyisi, Nyasaye dwaro ni oland wach maber e piny mangima. (Mat. 24:14) Jehova oseketo Yesu mondo ota tijno. Nitie gik ma Yesu osetimo mondo one ni tijno otimore e yo mochanore. E kinde Jokristo mokwongo ka ne ichako kanyakla mopogore opogore, ne iketoga jodong-kanyakla mondo ota weche kendo opuonj ji. (Tich 14:23) Joote kod jodongo ma ne ni Jerusalem ne ng’adoga paro e wi weche moko ma kanyakla mopogore opogore nonego oluw. (Tich 15:2; 16:4) Nikech Jokristo mokwongogo noyie winjo kaka nichikogi, “kanyakla man kuondego nomedo gurore e yie kendo kwan-gi ne medore pile ka pile.”—Tich 16:5.
2. Chakre higa mar 1919, ere kaka Jehova osebedo ka tayo joge kendo miyogi chiemb chuny?
2 Jehova pod dhi nyime tayo joge e yo mochanore kata mana e kindewagi. Chakre higa mar 1919, Yesu nochako tiyo gi grup moro matin ma gin chwo mowal, e tayo tij lendo kendo chiwo chiemb chuny ne jolupne. a (Luka 12:42) Nenore maler ni Jehova guedho tich ma joma nie grubno timo.—Isa. 60:22; 65:13, 14.
3-4. (a) Chiw ane ranyisi ma nyiso kaka wayudo ber nikech itayowa e yo mochanore. (b) Ang’o ma wabiro nono e sulani?
3 Ka ok ochanwa e yo maber, nyalo bedo matek chopo migawo ma Yesu nomiyowa. (Mat. 28:19, 20) Kuom ranyisi, ka ok omiwa alwora ma walendee, ng’ato nyalo lendo kamoro amora modwaro. Ka gima kamano otimore, mano nyiso ni nitie alwora moko minyalo lendee nyadinwoya, to moko inyalo jwang’. Be inyalo paro ber mamoko ma wayudo nikech itayowa e yo mochanore?
4 Mana kaka Yesu notayo jolupne e yo mochanore e kinde mokalo, e kaka pod odhi nyime tayo Jokristo e yo mochanore e kindewagi. E sulani, wabiro nono ranyisi ma Yesu noketonwa kod kaka riwruogwa luwo ranyisine. Wabiro nono bende kaka wanyalo nyiso ni wageno riwruok mar oganda Jehova.
RIWRUOK MAR OGANDA JEHOVA LUWO RANYISI MAR YESU
5. Achiel kuom yore ma waluwogo ranyisi mar Yesu en mane? (Johana 8:28)
5 Yesu nopuonjore kuom Wuon-gi manie polo mondo ong’e gik ma nonego otim kod ma nonego owachi. Riwruok mar oganda Jehova bende luwo ranyisi mar Yesu kuom siro puonjgi ka gitiyo gi Wach Nyasaye kendo tayo jotich Jehova ka gitiyo gi Wachno. (Som Johana 8:28; 2 Tim. 3:16, 17) Kinde ka kinde, iparonwaga ni wasom Wach Nyasaye kendo wati gi puonj ma wayudo e ngimawa. Gin ber mage ma wayudoga sama watimo kamano?
6. Achiel kuom ber ma wayudo sama wapuonjore Muma en mane?
6 Wayudoga ber mathoth sama wapuonjore Muma ka watiyo gi bugewa ma lero Muma. Kuom ranyisi, wanyalo pimo puonj mag Muma gi puonj ma riwruogwa miyowa mondo otawa. Sama waneno kaka riwruok mar oganda Jehova tayowa kotiyo gi Ndiko, wamedo geno riwruogwano.—Rumi 12:2.
7. En wach mane ma Yesu ne lando, to ere kaka riwruok mar oganda Jehova luwo ranyisine?
7 Yesu nolando “wach maber mar Pinyruodh Nyasaye.” (Luka 4:43, 44) Yesu nochiko jopuonjrene bende mondo giland wach Pinyruoth. (Luka 9:1, 2; 10:8, 9) E kindewagi, ji duto manie oganda mar Jehova lando wach Pinyruoth, bed ni gia kanye kata gin gi migawo mane.
8. En thuolo mane makende mosemiwa?
8 Jehova odhialowa ahinya kuom miyowa thuolo mar lando wach Pinyruoth ne jomamoko. Mano ok en migawo minyalo mi ng’ato ang’ata. Kuom ranyisi, ka ne Yesu nie piny kae, ne ok oyie ne jochiende mondo ochiw neno kuome. (Luka 4:41) E kindewagi, ka pok ng’ato ochako lendo gi Joneno mag Jehova, nyaka odag ka luwore gi puonj mag Muma. Wanyiso ni wamor gi thuolo makende momiwano kuom chiwo neno kamoro amora kendo sa asaya. Mana kaka Yesu, dwachwa maduong’ en pidho kodhi mag adiera e chuny ji kendo olonegi pi.—Mat. 13:3, 23; 1 Kor. 3:6.
9. Ere kaka riwruok mar oganda Jehova osetimo duto ma ginyalo mondo gimi nying Nyasaye ong’ere?
9 Yesu nomiyo nying Nyasaye ong’ere. Ka ne Yesu wuoyo gi Wuon-gi me polo e lamo, nowachone kama: “Asemiyo ging’eyo nyingi.” (Joh. 17:26) Riwruok mar oganda Jehova luwo ranyisi mar Yesu kuom timo duto ma ginyalo mondo gimi ji ong’e nying Nyasaye. Muma mar Loko mar Piny Manyien osekonyo ahinya e chopo wachni kuom dwoko nying Nyasaye kuonde duto ma noyudoree e kitepe machon. Mumano sani yudore oduto, kata buge moko e dhok mokalo 270. E Apendiks A4 kod A5 e Mumano, ibiro yudo weche ma lero gimomiyo nodwok nying Nyasaye kuondego. Apendiks C ma yudore e Study Bible lero e yo matut gimomiyo nying Nyasaye onego oyudre bende e Ndiko mag Dho-Grik mag Jokristo nyadi 237.
10. Ang’o mipuonjori kuom weche ma miyo moro ma wuok Myanmar nowacho?
10 Mana kaka Yesu, wadwaro konyo ji mathoth kaka nyalore mondo ging’e nying Nyasaye. Miyo moro ma jahigni 67 ma wuok Myanmar pi wang’e nochuer bang’ ng’eyo nying Nyasaye, kendo nowacho kama: “Ma e hangona ng’eyo nying Nyasaye nyaka ne nyuola. . . . Usepuonja wach maduong’ ahinya ma pok nang’eyo nyaka nene.” Ranyisi mar miyono konyowa fwenyo ni ng’eyo nying Nyasaye nyalo mulo joma chunygi ni kare e okang’ malach.
DHI NYIME GENO RIWRUOK MAR OGANDA JEHOVA
11. Ere kaka jodong-kanyakla nyalo nyiso ni gigeno riwruok mar oganda Jehova? (Ne picha bende.)
11 Achiel kuom yore ma jodong-kanyakla nyalo nyisogo ni gigeno riwruok mar oganda Jehova en mane? Ka giyudo weche ma tayogi koa e riwruogwa, onego gisom wechego adimba kendo gitim duto ma ginyalo mondo giti kodgi. Kuom ranyisi, giyudoga weche ma tayogi e yo monego otimgo chokruoge kod kaka ginyalo lemo e lo kanyakla kendo rito rombe Yesu. Sama jodongo oluwo kaka riwruogwa tayogi, mano miyo owete gi nyimine winjo ni oritgi maber kendo ohergi.
Jodong-kanyakla konyowa mondo wagen yo ma riwruok mar oganda Jehova tayowago (Ne paragraf mar 11-12) b
12. (a) Ang’o momiyo dwarore ni wariw lwedo joma tayowa? (Jo-Hibrania 13:7, 17) (b) Ang’o momiyo onego waket pachwa kuom kido mabeyo ma joma tayowa nigo?
12 Sama jodong-kanyakla okwayowa ni watim gimoro, onego waikre luwo kaka gichikowa. Ka watimo kamano, biro bedo mayot ne joma tayowa chopo migawo ma Jehova omiyogi. Muma jiwowa ni wawinj joma tayowa kendo wabolrenegi. (Som Jo-Hibrania 13:7, 17.) Ang’o momiyo seche moko mano en-ga gima tek timo? En nikech joma tayowa gin joma orem. Kata kamano, ka waketo pachwa mana kuom nyawogi, kar keto pachwa kuom kido mabeyo ma gin-go, wabiro chalo joma riwo lwedo jowasik Nyasaye. E yo mane? Mano biro nyiso ni waketo kiawa e yo ma riwruok mar oganda Jehova tayowago, to mano e paro ma jowasik Jehova dwaro ni wabedgo. Gin ang’o sie ma wanyalo timo ma nyalo konyowa fwenyo wuond mag jowasikwa kendo kwedogi?
KIK IYIE JOMAMOKO OMI IWE GENO RIWRUOK MAR OGANDA JEHOVA
13. Ere kaka jowasik Nyasaye osetemo wuoyo marach e wi riwruok mar oganda Jehova?
13 Joma kwedo Nyasaye temoga wuoyo marach e wi riwruok mar ogandane. Wasepuonjore e Ndiko ni Jehova dwaro ni joma lame obed maler e dendgi, timbegi, kod e chunygi. Odwaro ni ng’ato ang’ata motimo richo kendo motamore loko chunye ogol oko e kanyakla. (1 Kor. 5:11-13; 6:9, 10) Waluwo mana kaka Ndiko chikowa. Kata kamano, sama watimo kamano, joma kwedo Nyasaye wacho ni wachayo joma nigi paro mopogore gi marwa, wang’ado ne ji bura ma ok kare, kendo ni ok wahero ji.
14. En ng’ano ma chwaloga ji mondo owach miriambo e wi riwruok mar oganda Jehova?
14 Ng’e kuma monj ae. Satan Jachien e ma chwaloga ji mondo owach miriambo e wi riwruok mar oganda Jehova. En e “wuon miriambo” duto. (Joh. 8:44; Cha. 3:1-5) Kuom mano, ok kawwa gi wuoro ka waneno ka joma riwo Satan lwedo wacho miriambo e wi riwruok mar oganda Jehova. Mano e gima notimore e ndalo Yesu kendo e kinde Jokristo mokwongo.
15. Ang’o ma jotend dinde notimo ne Yesu kod jolupne?
15 E ndalo Yesu, joma riwo Satan lwedo nowacho miriambo mang’eny e wi honni ma Yesu Wuod Nyasaye, kendo jal makare chuth ne timo. Kuom ranyisi, jotend dinde ne nyiso ji ni teko ma Yesu ne gologo jochiende noyudo kowuok kuom “jatend jochiende.” (Mar. 3:22) Ka ne Yesu ni e nyim jong’ad bura, jotend dinde nowacho ni oyanyo Nyasaye kendo ne gisiayo oganda mondo owach ni onege. (Mat. 27:20) Bang’e ka jolup Kristo nochako yalo wach maber, joma ne kwedogi ‘nothuwo wach kendo ne gimiyo ji’ ochako sando Jokristogo. (Tich 14:2, 19) Gaset mar Mnara wa Mlinzi ma Desemba 1, higa 1998, nolero weche moko e wi ndiko mar Tich Joote 14:2. Nowacho kama: “Jo-Yahudi ma ne kwedo Jokristo ne ok otamore atama wach ma Jokristogo ne lando, to ne gitemo semo oganda bende mondo kik yie gi wechegigo ka giwacho weche maricho kuomgi.”
16. Ang’o monego wapar sama wawinjo weche mag miriambo miwacho e wi riwruogwa?
16 Satan pod dhi nyime wacho miriambo kata e kindewagi bende. Pod odhi nyime “wuondo piny mangima.” (Fwe. 12:9) Kiwinjo ka ji wuoyo marach e wi riwruogwa kata e wi owete ma tayowa, ber paro kaka jowasik Nyasaye notimo ne Yesu kod jolupne ma nodak e kind Jokristo mokwongo. E kindewagi bende, jotich Jehova isando kendo iwacho miriambo e wigi mana kaka Muma nokoro chon. (Mat. 5:11, 12) Ok wabi yie gi weche mag miriambo ka wang’eyo kuma giae, kendo wabiro kwedo weche ma kamago. Ere kaka wanyalo timo mano?
17. Ere kaka wanyalo kwedo sigendni mag miriambo miwacho e wi riwruogwa? (2 Timotheo 1:13) (Ne bende sanduk ma wiye wacho ni, “ Gima Wanyalo Timo Sama Wawinjo Sigendni mag Miriambo.”)
17 Kwed miriambo miwacho e wi riwruogwa. Jaote Paulo nowacho gima onego watim sama wawinjo kiwacho miriambo e wi jotich Jehova. Nonyiso Timotheo ‘mondo ochik jomoko kik giket chunygi kuom sigendni mag miriambo’ kendo ‘gitamre sigendnigo.’ (1 Tim. 1:3, 4; 4:7) Kata obedo ni nyathi matin nyalo kwanyo gimoro piny kae to oketo e dhoge, ng’ama duong’ to ok nyal timo kamano nikech ong’eyo hinyruok ma mano nyalo kelone. Wakwedo weche mag miriambo ma ji nyalo wacho e wi riwruogwa nikech wang’eyo kuma giae. Bende, wamakore gi “weche mangima” mag adiera.—Som 2 Timotheo 1:13.
18. Ere kaka wanyalo nyiso ni wageno riwruok mar oganda Jehova?
18 Waseneno yore moko adek ma riwruok mar oganda Jehova luwogo ranyisi mar Yesu. Sama ipuonjori Muma, tem ane nono yore mamoko ma riwruok mar oganda Jehova luwogo ranyisi mar Yesu. Kony jomamoko e kanyaklau mondo gigen riwruok mar oganda Jehova. E wi mano, dhi nyime geno riwruok mar oganda Jehova kuom tiyo ne Jehova gi chunyi duto kendo makori gi riwruogno nikech en e ma Jehova tiyo kode e chopo dwache. (Zab. 37:28) Mad wadhi nyime geno thuolo ma wan-go mar bedo e riwruok mar oganda Jehova moting’o jo momakore kode kendo moherore.
INYALO DWOKO NADE?
-
Gin yore mage ma jotich Jehova luwogo ranyisi mar Yesu?
-
Ere kaka wanyalo dhi nyime nyiso ni wageno riwruok mar oganda Jehova?
-
Ang’o monego watim sama wawinjo kiwacho miriambo e wi riwruok mar oganda Jehova?
WER 103 Jokwath Gin Mich Momiwa
a Ne sanduk ma wiye wacho ni, “Kwa Nini 1919?” e bug Hatimaye Ibada Safi ya Yehova Yarudishwa!, ite mar 102-103.
b WECHE MA LERO PICHNI: Bang’ ka jodong-kanyakla moko osewuoyo e wi chenro mar lendo gi troli e alworagi, owadwa ma en jarit tij lendo nyiso jolendo moko paro ma giseng’ado ni sama gilendo gi troli, to onego gichung’ machiegni gi kor ot.
