1. Paradiso mar ranyisi en ang’o, to ang’o monego wang’ad e chunywa ni wabiro timo?

 NITIE paradiso moro e piny kae ma joma odak e iye odich ka gitimo tije mabeyo mopogore opogore. Opong’ gi ji man gi mor kod kuwe madier. Jogo oseng’ado e chunygi ni ok gibi wuok e paradisono. Bende, gidwaro ni gikony ji mang’eny kaka nyalore mondo obi e paradisono. Mano en paradiso mane? En paradiso mar ranyisi! a

2. En wach mane miwuoro motudore gi paradiso mar ranyisi?

² En gima iwuoro ni Jehova oselosonwa alwora moro ma jaber e piny Satan marachni mopong’ gi sigu, timbe maricho, kendo ma onge arita maber. (1 Joh. 5:19; Fwe. 12:12) Nyasachwa ma jahera neno kaka pinyni en kama rach ahinya, kendo osemiyowa arita maber kod gik ma nyalo miyo wasik ka wan gi winjruok maber kode. Wach Nyasaye pimo paradiso mar ranyisi gi ‘kar bwok’ kod “soko ma pige ok duon.” (Isa. 4:6; 58:11) Nikech Jehova guedho joma nie paradiso mar ranyisino, gin gi mor kod kuwe madier kata obedo ni gidak e kinde matek.—Isa. 54:14; 2 Tim. 3:1.

3. Ere kaka weche ma yudore e Isaya 65 nokwongo ochopo?

³ Kokalo kuom janabi Isaya, Jehova nolero kaka ngima  mar joma ne dhi dak e paradiso mar ranyisino ne dhi chalo. Inyalo yudo weche ma lero paradiso mar ranyisino e Isaya 65, kendo wechego nokwongo chopo e higa mar 537 Ka Kristo Podi. E kindego, Jo-Yahudi ma noloko chunygi nogony e tuech e piny Babulon kendo ne gidok thurgi. Jehova noguedho joge, kendo nokonyogi loso dala mar Jerusalem ma nosejwang’ mondo obed kama ber kaka ne en chon kendo dwoko lamo madier e piny Israel.—Isa. 51:11; Zek. 8:3.

4. Ere kaka weche ma nokor e Isaya 65 chopo e kindewagi?

⁴ Weche ma nokor e bug Isayago nochako chopo kendo e higa mar 1919 Bang’ Kristo ka nogol jotich Jehova ma kindewagi e tuech mar Babulon Maduong’. Bang’ mano, paradiso mar ranyisi nochako landore mosmos e piny ngima. Kanyakla mang’eny nochaki kendo jolendo mang’eny ma jokinda notimo dongruok e winjruokgi gi Nyasaye. Mon kod chwo ma nigi kido maricho notimo lokruok ma girwako “kit dhano manyien ma ne ochue kuom dwaro mar Nyasaye.” (Efe. 4:24) En adier ni thoth gueth ma Isaya nokoro biro chopo e kinde mabiro ka koro wan e piny manyien. To kata mana e kindewagi, nitie gueth mang’eny ma pod wayudo. Wane ane kaka paradiso mar ranyisi konyowa kata mulo ngimawa, kod gimomiyo ok onego wawuog e paradisono.

KAKA NGIMA MAR JOMA ODAK E PARADISO MAR RANYISI CHALO

5. Mana kaka osingi e Isaya 65:13, gin gueth mage ma wayudo ka wan e paradiso mar ranyisi?

⁵ Gin gi chiemb chuny mathoth kendo ngimagi ber. Weche ma Isaya nokoro nyiso maler pogruok mantie e kind ngima joma odak e paradiso mar ranyisi kod mar joma ok odak e paradisono. (Som Isaya 65:13.) Jehova osemiyo jotichne gik mang’eny ma konyogi sudo machiegni kode. Omiyowa rohone maler, Wachne manie Muma, kod chiemb chuny modhuro mondo ‘wachiem, wamethi, kendo wabed mamor.’ (Pim gi Fweny 22:17.) Mopogore gi mano, joma ok odak e paradiso mar ranyisi nigi “kech . . . , riyo . . . , [kod] wich-kuot.” Ok giyud chiemb chuny moromo kendo gionge winjruok maber gi Nyasaye.—Amos 8:11.

6. Ere kaka Joel 2:21-24 lero chiemb chuny mimiyowa, to ere kaka chiemb chunygo konyowa?

⁶ E weche ma Joel nokoro, nowuoyo e wi chiemo mapile ma ji chamoga kaka cham, divai, kod mo konyisogo kaka Jehova chiwoga ne joge gik ma gidwaro e okang’ malach, moriwo nyaka chiemb chuny. (Joel 2:21-24) Otimo kamano kokalo kuom Muma, bugewa ma lero Muma, websaitwa, chokruogewa mag kanyakla, mag alwora, kod chokruogewa madongo. Ka wachamo chiemogo pile, wabiro bedo gi ngima maber kendo winjruokwa gi Jehova biro bedo motegno.

7. Gin ang’o ma miyo wabedo gi ‘chuny mokuwe’? (Isaya 65:14)

⁷ Gimor kendo onge gima giremo. Jotich Jehova nyalo “kok gi mor” nikech chunygi opong’ gi mor kendo gigoyo ne Jehova erokamano kuom gik mosetimonegi. (Som Isaya 65:14.) Adiera ma wasepuonjore, singo ma yudore e Wach Nyasaye, kaachiel gi geno ma wan-go motenore kuom misango mar Yesu Kristo miyo wabedo gi ‘chuny mokuwe.’ Sama wawuoyo e wi wechego gi owetewa gi nyiminewa, wabedo mamor ahinya!—Zab. 34:8; 133:1-3.

8. Gin kido mage ariyo madongo ma jotich Jehova manie paradiso mar ranyisi nigo?

 ⁸ Nitie kido ariyo moko madongo ma jotich Jehova manie paradiso mar ranyisi nigo. Gin gi hera kod winjruok e kindgi. Herano ‘tueyowa’ kanyachiel kendo okonyowa ng’eyo kaka jotich Jehova biro dak gi kuwe e okang’ malach ka koro gin e piny manyien. (Kol. 3:14) Nyaminwa moro lero gima noneno e kind jotich Jehova ka nohango romo kodgi. Owacho kama: “Ne ok ang’eyo gik ma nanyalo timo mondo abed mamor kata mana sama ne an gi joodwa. Nahango neno hera madier e kind Joneno mag Jehova.” Ng’ato ang’ata ma dwaro bedo mamor gadier nyaka bi e paradiso mar ranyisi. Kata bed ni jopiny paro ang’o kata giwacho ang’o e wi jotich Jehova, adiera en ni jotich Jehova nigi nying maber kod winjruok maber e kindgi kendo gi Nyasachgi.—Isa. 65:15.

9. Gin ang’o ma Isaya 65:16, 17 singonwa e wi gik ma kelonwa lit kod kuyo?

⁹ Gikuwe mos kendo onge gima chando chunygi. Isaya 65:14 wacho ni joma otamore donjo e paradiso mar ranyisi “[ywagore] nikech chuny malit [kendo] goyo nduru nikech nyosruok mar chuny.” To nade gik mosekelo lit kod kuyo ne jotich Jehova? Gikone, ‘wich biro wil kodgi, kendo ginilal nono e wang’ Nyasaye.’ (Som Isaya 65:16, 17.) Jehova biro tieko chandruogewa duto kaachiel gi lit ma gikelonwa kendo biro chopo kama ok wanachak wapargi kendo.

10. Ang’o momiyo ineno ni en gueth bedo e riwruok mar oganda Jehova? (Ne picha bende.)

¹⁰ Kata mana e kindewagi, sama wan e chokruogewa, wawinjoga ka chunywa oyueyo kendo ok waketga pachwa kuom chandruoge ma wayudo e piny marachni. Sama wanyiso olembe mag roho kaka hera, mor, kuwe, ng’wono, kod muolo, wajiwo winjruok manie kindwa. (Gal. 5:22, 23) To mano kaka en gueth makende bedo e riwruok mar oganda Jehova! Joma osiko e paradiso mar ranyisi biro neno ka weche mokor e wi “polo manyien gi piny manyien” chopo kare chuth.

11. Ka luwore gi Isaya 65:18, 19, paradiso mar ranyisi onego omi wawinj nade?

¹¹ Gin gi chuny mar goyo erokamano kendo giil. Isaya dhi nyime lero gimomiyo onego wabed “mamor kendo moil” sama wan e paradiso mar ranyisi. Jehova e ma oloso paradiso mar ranyisino. (Som Isaya 65:18, 19.) Mano e momiyo Jehova tiyo kodwa e ywayo ji mondo owuog e piny marach motimo mudhoni  kendo gibi e paradiso ma jaber mar ranyisi. Wail nikech gueth ma adiera osekelonwa, kendo mano e momiyo wanyiso jomamoko adierago.—Jer. 31:12.

12. Singo ma yudore e Isaya 65:20-24 miyo iwinjo nade, to nikech ang’o?

¹² Wail kendo wagoyo erokamano nikech wan e paradiso mar ranyisi. Temie paro gik ma wabiro neno kendo timo e piny manyien mar Nyasaye! Muma singonwa kama: “Onge nyathi ma biro dak mana kuom ndalo matin, kata jaduong’ moti ma ok bi chopo ndalone.” Wabiro “gero ute kendo [wanadagie]. Wabiro “pidho puothe mzabibu kendo chamo olembegi.” “Ok [wanati] matek kayiem nono” nikech ‘Jehova biro guedhowa.’ Osingonwa ngima man gi kuwe kod mor madier. “Kata ka pok [waluonge],” biro yudo ka oseng’eyo gik ma wadwaro kendo ‘miyowa gigo.’—Isa. 65:20-24; Zab. 145:16.

13. Ere kaka Isaya 65:25 lero lokruoge ma ji timoga e ngimagi sama gichako tiyo ne Jehova?

¹³ Gin gi kuwe kendo onge gima miyogi luoro. Kokalo kuom roho maler ma Nyasaye chiwo, ji mathoth ma ne nigi kido maricho oseloko ngimagi ma gibedo joma beyo. (Som Isaya 65:25.) Gisetimo kinda ahinya mondo gilony kido maricho ma ne gin-go. (Rumi 12:2; Efe. 4:22-24) En adier ni jotich Nyasaye gin joma orem, omiyo, pod wanyaloga timo richo. Kata kamano, kokalo kuom hera kod kuwe ma wan-go e kindwa, Jehova oseriwowa kanyachiel kata obedo ni waa e ogendni “mopogore opogore.” (Tito 2:11) Mano en hono ma Nyasaye manyalo duto kende e ma nyalo timo!

14. Ere kaka weche ma yudore e Isaya 65:25 nochopo e ngima mar owadwa moro?

¹⁴ Be en adier ni ji nyalo loko kit ngimagi? Wane ane ranyisini. Nitie dichwo moro ma nitueyoga nyading’eny e jela chakre ka ne en jahigni 20 nikech timbe mochido kod mahundu. Moko kuom gik ma ne miyo itueyega ne gin kuo mtokni, turo ute ji, kod timbe moko mag mahundu. Noikorega dhawo gi ng’ato ang’ata. Ka nohango puonjore Muma kendo biro e chokruoge mag Joneno mag Jehova, ne en gadier ni noseyudo gima ber, ma en paradiso mar ranyisi. Bang’ ka nosebatise mobedo Janeno mar Jehova, nojaparo matut kaka weche ma yudore Isaya 65:25 mulo ngimane. Noweyo bedo mager ka sibuor mobedo mamuol ka rombo.

15. Ang’o momiyo dwarore ni wagwel ji mathoth kaka nyalore mondo obi e paradiso mar ranyisi, to ere kaka wanyalo timo kamano?

¹⁵ Isaya 65:13 chako gi wechegi: “Jehova Wuon Loch Duto wacho kama.” Kae to kwan matindo 25 tieko kama: “Jehova owacho.” Mano nyiso ni weche mowacho nyaka chopga kare. (Isa. 55:10, 11) Wechego nyiso ni paradiso mar ranyisi en gima nitie adier. Jehova oseloso riwruok mar owete gi nyimine ma en riwruok makende ahinya. Sama wan e kind jotich Jehova, wan gi kuwe kendo onge ng’ama miyowa luoro e piny marachni. (Zab. 72:7) Mano e momiyo wadwaro ni wakony ji mathoth kaka nyalore mondo gidonj e riwruok mar oganda Jehova. Wanyalo timo kamano ka waketo pachwa kuom loko ji obed jopuonjre.—Mat. 28:19, 20.

KAKA WANYALO YWAYO JOMAMOKO MONDO GIBI E PARADISO MAR RANYISI

16. Ang’o ma nyaloga ywayo ji mondo gibi e paradiso mar ranyisi?

¹⁶ Ng’ato ka ng’ato kuomwa nigi ting’ mar neno ni omiyo paradiso mar ranyisi obed kama ber ma nyalo lombo jomamoko.  Wanyalo timo kamano ka waluwo ranyisi mar Jehova. Ok ochun ji mondo obi e riwruok mare. Kar mano, ‘oywayogi’ e paradiso mar ranyisi e yor hera. (Joh. 6:44; Jer. 31:3) Joma chunygi ni kare ma puonjorega e wi hera mar Jehova kod kido mabeyo ma en-go biroga mana ire kendgi. Ere kaka kido kod timbe mabeyo ma wan-go nyalo ywayo ji e paradiso mar ranyisi?

17. Ere kaka wanyalo ywayo jomamoko mondo gibi e paradiso mar ranyisi?

¹⁷ Achiel kuom yore ma wanyalo ywayogo ji e paradiso mar ranyisi en nyisogi hera kod ng’wono. Sama joma nyien obiro e chokruogewa, wadwaro ni gibed gi paro ma chal gi mar jomoko ma ne ok gin Jokristo, ma nodhi e kanyakla mar Korintho. Ne giwacho kama: “Adier, Nyasaye ni e kindu.” (1 Kor. 14:24, 25; Zek. 8:23) Omiyo, nyaka wadhi nyime luwo kaka ijiwowa ni wabed “jo ma loso kuwe” e kindwa.—1 The. 5:13.

18. Ang’o ma nyalo ywayo ji e riwruogwa?

¹⁸ Kinde duto onego wane owetewa gi nyiminewa mana kaka Jehova nenogi. Watimo kamano kuom keto pachwa e kido mabeyo ma gin-go kar keto pachwa e nyawogi, ma gin gik ma biro rumo. Wanyalo tieko ywaruok ma nyalo bedo e kindwa e yor hera ka ‘wabedo mang’won, wakechore e yo mamuol, kendo ka waweyore ketho gi chuny man thuolo.’ (Efe. 4:32) Kae to gik mabeyo ma watimo ne Jokristo wetewa biro ywayo joma dwaro biro e paradiso mar ranyisi, ma gombo mondo gin bende onyisgi kido kaka mago. b

 SIK E PARADISO MAR RANYISI

19. (a) Mana kaka onyiswa e sanduk ma wiye wacho ni “ Ne Giwuok ma Giduogo Kendo,” ang’o ma jomoko osewacho bang’ duogo e paradiso mar ranyisi? (b) Onego wang’ad mar timo ang’o? (Ne picha bende.)

¹⁹ Wamor ahinya gi paradisowa mar ranyisi! Omedo mana bedo maber kendo opong’ gi joma pako Jehova e okang’ ma pok nopakego nyaka nene. Mad wadhi nyime goyo erokamano nikech paradiso mar ranyisi ma Jehova osemiyowani. Ng’ato ang’ata ma dwaro bedo mamor ma onge gima oremo, kendo ma dwaro bedo gi chuny mokuwe ma onge gima miye luoro, nyaka bi e paradiso mar ranyisi kendo kik owuog kanyo. Kata kamano, nyaka wabed motang’ nikech Satan timo duto monyalo mondo ogolwa e paradiso mar ranyisi. (1 Pet. 5:8; Fwe. 12:9) Kik wayiene mondo ogolwa kanyo. Mad watim kinda duto mondo warit ber, ler, kod kuwe manie paradiso mar ranyisi.