1. Ang’o momiyo batiso en okang’ ma dwarore ahinya? (Ne picha man malo.)

HIGA ka higa, ibatiso jopuonjre Muma alufe gi alufe. Thoth jopuonjrego gin rowere kod nyithindo. Nyalo bedo ni jonyuolgi gin Joneno mag Jehova. Be dibed ni in achiel kuomgi? Ka dibed ni osebatisi to wapwoyi ahinya. Batiso en okang’ mochuno mondo ng’ato obed Jakristo, kendo en gima dwarore ahinya mondo ng’ato oyud warruok.​—Mat. 28:19, 20; 1 Pet. 3:21.

2. Ang’o momiyo ng’ato ok onego obadhre kata oluor chiwore ne Jehova?

² Kata obedo ni batiso miyo ng’ato yudo gueth mang’eny, omiyo ng’ato bedo gi ting’ moko. E yo mane? E odiechieng’ ma ne obatisi, ne openji penjo ma luwoni ma idwoko ni ee, “Kokalo kuom misango mar Yesu Kristo, be iseloko chunyi kuom richoni michiwo ngimani ne Jehova mondo itim dwaro mare?” Batiso mari en gima nyiso ni isechiwori ne Jehova. Ne isingori ne Jehova ni ibiro here kendo ibiro keto dwache obed motelo e ngimani. Mano en singo mapek. Be onego iywag ang’e  nikech ne itimo singono? Ooyo, ok onego iywag ang’e kata matin. Ok ibi ywago ang’e ka iyie mondo Jehova ota ngimani. Mopogore gi mano, ng’at ma Jehova ok ta ngimane en ng’at ma Satan e ma chiko. Satan ok dwar ni mondo iyud warruok. Obiro bedo mamor ka ok iyudo ngima mochwere nikech ne iriwe lwedo e kwedo loch mar Jehova.

3. Gin gueth mage ma ibiro yudo ka ichiwori ne Jehova?

³ Paro gueth ma ibiro yudo ka ichiwori ne Jehova ma obatisi nyalo konyi mondo ikwed Satan. Nikech koro isechiwori ne Jehova, inyalo wacho gi chir duto niya: “Jehova osedokna; ok analuor: dhano dinyal tima ang’o?” (Zab. 118:6) Onge gima ber maloyo bedo kor Jehova kendo ng’eyo ni oyie kodi.

4, 5. (a) Ang’o momiyo chiwruok ne Jehova en ting’ mar ng’ato owuon? (b) Gik pek mage ma Jokristo duto romogo?

⁴ Ka osebatisi, winjruok mari gi Jehova ok otenore kuom jonyuolni. Mopogore gi mano, sani in gi ting’ mar tiyo matek ne warruokni iwuon kata obedo ni pod idak gi jonyuolni. Ang’o momiyo ber paro wachno? Mano en nikech ok inyal ng’eyo ni ibiro romo gi gik mage ma nyalo temo yieni e kinde ma biro. Kuom ranyisi, kapo ni nobatisi ka ne pok ibedo rawera, onge kiawa ni ibiro romo gi pek moko ma yudoga rowere sama gichako pong’. Nyako moro ma jahigni 18 wacho niya: “Nyathi matin ok bi neno marach ka otamore chamo kek ma imiyo nyithindo mamoko e skul sama itimonegi nyasi mag paro chieng’ nyuolgi mana nikech en Janeno mar Jehova. Kata kamano, e kinde ma osebedo rawera kendo obedo gi gombo mag nindruok, nyaka obed gadier chuth ni luwo chike mag Jehova e gima ber.”

⁵ Rowere kende ok e ma romga gi pek mopogore opogore. Kata mana joma obatis ka gin joma dongo bende romo gi gik ma nyalo temo yiegi. Gigo oriwo gik moko kaka chandruoge mag kend, tuoche, kata yore mag tich. Waduto wabiro romo gi gik ma temo yiewa kata wabed johigni adi.​—Jak. 1:12-14.

6. (a) Ang’o momiyo inyalo wach ni chiwruokni ne Jehova en yiero mari iwuon? (b) En ang’o ma wanyalo puonjore e Jo-Filipi 4:11-13?

⁶ Gima nyalo konyi mondo isik ka imakori gi Jehova en paro ni in e ma ne iyiero mar chiwori ne Jehova ma ok ochuni. Mano tiende ni ne inyiso jaloch mar piny gi polo ni ibiro dhi nyime tiyone kata bed ni osiepeni kata jonyuolni oweyo tiyone. (Zab. 27:10) E weche duto, Jehova biro miyi teko mar dhi nyime tiyone.​—Som Jo-Filipi 4:11-13.

7. Tiyo matek ne warruokni iwuon gi “luoro kod kirni” tiende ang’o?

⁷ Jehova dwaro ni ibed osiepne. Kata kamano, rito osiepno kendo tiyo matek mondo iyud warruok en gima dwaro kinda. Ndiko mar Jo-Filipi 2:12 wacho niya: “Sikuru ka utiyo matek ne warruok maru uwegi, kutimo kamano gi luoro kod kirni.” Wechego nyiso maler ni nyaka ing’e kaka ibiro rito osiep manie kindi gi Jehova kod kaka ibiro dhi nyime tiyone kata sama iromo gi pek moko e ngimani. Kik ipar ni ok inyal kier. Kata moko kuom joma osetiyo ne Nyasaye kuom higni mathoth oseboth. Kuom mano, gin ang’o ma inyalo timo mondo idhi nyime tiyo matek ne warruokni?

8. Puonjruok Muma oriwo timo ang’o, to ang’o momiyo odwarore?

⁸ Mako osiep gi Jehova oriwo timo gik moko ariyo, ma gin chiko itwa kod  wuoyo. Puonjruok Muma e yo maduong’ ma wawinjogo Jehova. Watimo kamano sama wasomo Muma kaachiel gi bugewa ma lero Muma kendo paro matut kuom gik ma wasomo. Par ni puonjruok Muma ok en kaka penj ma nyithindo timo e skul. Gimomiyo ipuonjori Muma ok en ni mondo imak weche mathoth e wiyi mana kaka nyithi skul timo sama gidwa timo penj moro. Kar mano, puonjruok Muma inyalo pim gi ng’at ma dhi e wuoth ma neno gik mabeyo ma pok nonega. E yo ma kamano, sama ipuonjori Muma, ifwenyo kido ma beyo ma Jehova nigo ma samoro pok nifwenyoga. Mano biro miyo isud machiegni gi Nyasaye, kendo en bende obiro sudo machiegni kodi.​—Jak. 4:8.

9. Gin gik mage ma osekonyi e puonjruok mari?

⁹ Riwruok mar oganda Jehova oselosonwa gik mang’eny ma inyalo tiyogo mondo ibed gi chenro maber mar puonjruok Muma. Kuom ranyisi, pej ma wiye wacho ni “Mazoezi ya Kujifunza Biblia” ma yudore e kare mar “Matineja” e jw.org/sw oting’o weche ma nyalo konyi ng’eyo kaka inyalo tiyo gi puonj ma yudore e Muma. E jw.org/sw, nitie weche manie bwo wich ma wacho ni “Biblia Inafundisha Nini Hasa?,” ma nyalo konyi mondo ibed gadier gi gik ma ipuonjori e Muma kendo lerogi ne jomamoko. Paro mamoko ma nyalo konyi e puonjruok ma mari iwuon yudore e Amkeni! ma April 2009 e sula ma wiye wacho ni “Vijana Huuliza . . . Ninaweza Kufanya Nini ili Nifurahie Kusoma Biblia?” Puonjruok kod paro matut e wi gik mipuonjori gin gik ma dwarore mondo iti matek ne warruokni iwuon.​—Som Zaburi 119:105.

10. Ang’o momiyo Jakristo mosebatisi nyaka lem?

¹⁰ Sama wapuonjore Muma, Jehova wuoyo kodwa, kata kamano, sama walemo to wawuoyo kode. Jakristo ok onego olem mana mar kamano kendo ok onego one lamo kaka gima ng’ato kwayogo hawi maber. Kar mano, lamo en yo ma wawuoyogo gi Jachuechwa. Jehova oikore winji. (Som Jo-Filipi 4:6.) Omiyo, sama in gi parruok, Muma wacho ni “ket ting’ mari kuom Jehova.” (Zab. 55:22) Be iyie gi wachno? Nitie owete gi nyimine  mathoth ma nyalo nyisi ni timo kamano osekonyogi ahinya. In bende lamo nyalo konyi!

11. Ang’o momiyo onego wago ne Jehova erokamano kinde duto?

¹¹ Lamo miyi thuolo mar nyiso Jehova gik mathoth moloyo mana kwaye gik miremo. Muma wacho niya: “Nyisuru ni un gi chuny mar goyo erokamano.” (Kol. 3:15) Seche moko chandruoge ma wan-go nyalo miyo waparre mokalo tong’ ma wiwa wil gi gueth ma waseyudo. Donge odiechieng’ kodiechieng’ inyalo paro gik moko adek ma Jehova osetimoni ma diher goyonee erokamano? Bang’ paro gigo, gone ne Jehova erokamano sama ilemo. Rawera moro miluongo ni Abigail ma nobatisi ka en jahigni 12 wacho niya: “Aneno ni Jehova kende e ma owinjore ogone erokamano moloyo ng’ato ang’ata e piny mangima. Onego wagone erokamano kinde duto nikech gik mabeyo ma osemiyowa. Ne ajawachoga kama chunya: Kapo ni wachiewo okinyi ma wayudo ka gik ma Jehova nomiyowa koro onge, wabiro timo nang’o?” *

12, 13. Ang’o momiyo ber paro kaka Jehova osekonyi e ngimani iwuon?

¹² Ruoth Daudi ma Jehova noreso e tembe mang’eny kendo malich nowero kama: “Rang kendo ne ka Jehova ber: Jali ojahawi mogeno kuome.” (Zab. 34:8) Ndikono nyiso gimomiyo ber yawo wang’i mondo ine yore ma Jehova konyigo. Sama isomo Muma gi bugewa kendo idhi e chokruogewa, iyudo weche ma jiwi sama Jokristo weteni wacho kaka Jehova osekonyogi mondo gidhi nyime tiyone. Kata kamano, kaka imedo timo dongruok, dwarore ni ine kaka Jehova konyi e ngimani iwuon. Be iseneno kaka Jehova konyi e ngimani iwuon?

¹³ Nitie yo achiel ma Jokristo duto osenenogo ber mar Jehova. Jehova oseywayo Jokristo duto ire kod ir Wuode. Yesu nowacho niya: “Onge ng’at ma nyalo biro ira mak mana ka Wuora ma noora e ma oywaye.” (Joh. 6:44) Be in iwuon ineno ni Jehova noywayi ire? Rawera nyalo wacho e chunye niya, ‘Jehova noywayo mana jonyuolna kae to an naluwogi.’ Kata kamano, ka ne ichiwori ne Jehova mobatisi, ne inyiso ni in gi winjruok maber gi Jehova. Sani koro Jehova ong’eyi iwuon. Muma singonwa kama: “Ka ng’ato ohero Nyasaye, ng’atno en ng’at ma Nyasaye ong’eyo.” (1 Kor. 8:3) Tem ahinya mondo imak matek thuolo ma Jehova osemiyi e riwruok mar ogandane.

14, 15. Ere kaka tij lendo nyalo konyi mondo ibed gi yie motegno?

¹⁴ Yo machielo mar neno ber mar Jehova en paro kaka okonyi sama iwuoyo gi jomoko e wi gik ma isepuonjori e Muma. Inyalo timo kamano sama in e tij lendo kata sama in e skul. Jomoko yudo ka lendo ne joskul wetegi teknegi. Samoro inyalo ng’eyo gimomiyo mano tek. Ok ing’eyo ni gibiro nyisi ang’o sama gineni. To nyalo bedo matek ahinya wuoyo gi nyithindo weteni mochokore kanyachiel moloyo sama iwuoyo gi ng’ato achiel. En ang’o ma nyalo konyi?

¹⁵ Mokwongo, par ane gimomiyo iyie ni gik ma isepuonjori e Muma gin adier. Sula ma yudore e bwo wich ma wacho ni Miongozo ya Kujifunza e jw.org/sw nyalo konyi. Ti kodgi maber. Olosgi mondo gikonyi nono puonj ma iyiego, gimomiyo  iyie kodgi, kod kaka inyalo lero ne jomoko puonjgo. Ka in gadier chuth gi gik ma iyiego kendo iikori maber, mano biro miyo ibed gi siso ma wuoyo gi jomoko e wi Jehova.​—Yer. 20:8, 9.

16. Ang’o ma nyalo konyi mondo ibed gi chir mar wuoyo e wi gik ma iyiego?

¹⁶ Samoro pod inyalo winjo ka iluor lendo ne jomoko kata bed ni iikori maber machalo nade. Nyaminwa moro ma sani jahigni 18 ma nobatis ka jahigni 13 wacho niya: “Ang’eyo puonj ma ayiego, kata kamano, lerogi ne jomoko bedoga matekna.” Ere kaka onyagore gi pekno? Owacho kama: “Achakoga mana gi mbaka mapile. Joklaswa ohero wuoyo e wi gik ma gitimoga. An bende onego abed thuolo wuoyo e wi gik ma ahero. Omiyo, achakoga wuoyo kodgi ka awacho kama: ‘Nyoro ne apuonjo ng’ato Muma, kae to . . .’ Bang’ mano, adhi nyime gi wacho gima ne adwa nyisogi. Kata obedo ni ok ochuno ni wawuo e wi weche manie Muma, jomoko kuomgi dwaroga ng’eyo gima atimoga sama apuonjo ji Muma. Seche moko gipenja penjo moko motudore gi wachno. Kaka amedo tiyo gi yorno e kaka lendo bedona mayot. Bang’ timo kamano, abedoga mamor sipwap!”

17. Ere kaka paro ma in-go e wi puonj mag Muma ma iyiego nyalo konyi mondo ilend ne jomoko?

¹⁷ Sama imiyo jomoko luor kendo inyiso ni idewogi, gin bende gibiro miyi luor. Nyaminwa moro miluongo ni Olivia ma ne obatis ka pod tin to sani jahigni 17 wacho niya: “Asebedo ka aparoga ni ka achako wuoyo gi ji e wi Muma to gibiro nena kaka ng’at mofuwo.” Kae to nochako bedo gi paro mopogore. Kar paro mana gik ma ne miye luoro, Olivia nochako wacho e chunye niya: “Rowere mathoth ok ong’eyo gimoro amora e wi Joneno mag Jehova. Wan kende e Joneno ma ging’eyo. Omiyo, gik ma watimo nyalo miyo giyie kata gitamre winjo puonj mag Muma. To nade ka wiwa kuot, wabedo maluor, kata wayudo ka chako wuoyo gi jomoko teknwa, kata ok wawuo gi chir sama walendo? Mano nyalo miyo rowere mamoko ochak paro ni ok wamor ni wan Joneno mag Jehova. Ginyalo kata dwokowa marach nikech ok wawuo gi chir. Kata kamano, ka wawuoyo gi chir kendo e yo ma nyiso ni wan gadier gi gik ma wawacho, mana kaka wanyalo wuoyo ka wagoyo mbaka mapile, mano biro miyo gimiwa luor.

18. Tiyo matek mondo iyud warruok oriwo timo ang’o?

¹⁸ Mana kaka waseneno, tiyo matek mondo ng’ato oyud warruok en ting’ monego okaw mapek. Moko kuom gik ma nyalo konyi oriwo somo Muma kendo paro matut, lemo, kod paro yore ma Jehova oseguedhigo in iwuon. Timo gigo biro miyo imed hero thuolo ma jaber ma in-go mar bedo osiep Jehova. Mano biro chwali mondo iwuo gi jomoko e wi gik ma isepuonjori.​—Som Zaburi 73:28.

19. Ang’o momiyo kinda mitimo mondo iyud warruok ok en kayiem?

¹⁹ Yesu nowacho niya: “Ka ng’ato ang’ata dwaro luwa, to mondo okwerre owuon kendo oting’ yadh-sandne, kae to odhi nyime luwa.” (Mat. 16:24) Nenore maler ni mondo ng’ato obed jalup Yesu, nyaka ochiwre ma batise. Timo kamano kelo gueth modhuro sani kod ngima mochwere e piny manyien ma Nyasaye osingo. Omiyo, tim duto minyalo mondo idhi nyime tiyo matek mondo iyud warruok!