Be isesomo adimba gocho mosekalo mag Ohinga mar Jarito? Ka en kamano, ne ane ka be inyalo dwoko penjo ma luwogi:

Gin weche mage ma ni e Muma ma miyo wabedo gadier ni Nyasaye nenonwa lit sama wachandore?

Ka ne Jo-Israel thagore e kinde ma ne gin wasumbni e piny Misri, Nyasaye nong’eyo ni ne gichandore kendo en be nowinjo malit. (Wuok 3:7; Isa. 63:9) Nikech Nyasaye nochueyowa e kite owuon, mano nyiso ni wan be wanyalo neno ne jomamoko lit sama gichandore. Onenonwa lit kata e seche ma chunywa nyalo nyisowa ni ok oherowa.​—wp18.3, ite mag 8-9.

Ere kaka puonj mag Yesu nokonyo ji mondo ogol achaya e chunygi?

Jo-Yahudi mang’eny e ndalo Yesu ne ochayo jomamoko. Yesu nojiwo gimomiyo bedo gi bolruok dwarore, kendo nokwedo ahinya wach chayo ogendni mamoko. Nojiwo jolupne mondo one jowetegi kaka owete gi nyimine.​—w18.06, ite mag 9-10.

Bedo ni Nyasaye ne ok oyie ne Musa donjo e Piny ma Nosingi puonjowa ang’o?

Musa ne nigi winjruok maber gi Jehova. (Rap. 34:10) Ka ne Jo-Israel chiegni tieko higni 40 e thim, ji nochako ng’ur kendo ne wach pi. Nyasaye nonyiso Musa ni owuo gi lwanda. Musa to nogoyo lwandano. Nenore ni i Jehova ne owang’ nikech Musa ne ok otimo kaka nonyise kata nikech Musa ne ok omiye duong’ nikech honono. (Kwan 20:6-12) Mano puonjowa ni onego wawinj Jehova kendo wamiye duong’.​—w18.07, ite mag 13-14.

Ang’o momiyo chandruok nyalo betie ka po ni wang’ado ne ji bura ka luwore gi kaka ginenore gi oko?

Nitie weche moko adek momiyo ji ohero ng’ado ne jowetegi bura ka luwore gi kaka ginenore gi oko. Gigo gin: Oganda ma ng’ato ae, mwandu ma en-go, kod hike. Dwarore ni watem matek mondo wane jomoko kaka Jehova Nyasachwa ma ok buon ji nenogi! (Tich 10:34, 35)​—w18.08, ite mag 8-12.

Gin yore mage ma Jokristo ma hikgi oniang’ nyalo konyogo jomamoko?

Jokristo ma oweyo migepe moko nikech hikgi oniang’ onego obed gadier ni Jehova oherogi ahinya kendo pod ginyalo timo mathoth e konyo jomamoko. Ginyalo pidho kodhi mag adiera e chuny chwo ma mondegi gin Joneno, ginyalo chiero jolendo modok chien kod puonjo ji Muma, kendo ginyalo lendo e okang’ momedore.​—w18.09, ite mag 8-11.

Gin gik mage mwatiyogo e puonjo ji Muma?

Nitie kad mag JW.ORG kod kalatese mag gwelo ji e chokruok. Nitie trakt aboro molos e yo ma tiyogo yot to kod gasede mag Ohinga mar Jarito kod Amkeni! Nitie bende brosua moko kod buge ariyo ma watayogo puonjruok Muma, kaachiel gi vidio ang’wen ma achiel kuomgi en Ang’o Momiyo Onego Ipuonjri Muma?​—w18.10, ite mar 16.

Ere kaka Jakristo nyalo ‘ng’iewo adiera’ kaka ijiwo e Ngeche 23:23, NW?

Onge pesa ma wachulo mondo wayud adiera. Kata kamano, nyaka wati gi thuolowa mang’eny kendo watim kinda malach mondo wayud adiera.​—w18.11, ite mar 4.

Gik ma notimore e ngima Hosea gi Gomer jaode nyalo puonjowa ang’o?

Gomer noterore gi chwo mamoko nyading’eny, to Hosea nong’wonone mi odhi nyime kwane kaka chiege. Ka po ni Jakristo moro oterore, jaode nyalo yiero mar ng’wonone. Ka Jakristo ma jaode oterore onindo kendo gi jaode moteroreno, mano maye ratiro mar ketho kendno chuth.​—w18.12, ite mar 13.