DIANA en jahigni 80 gi wiye. Chwore ne nigi tuo mar Alzheimer, ma en tuo ma chocho obwongo kendo miyo ng’ato wiye wil marach kendo pache lal kinde ka kinde. Chworeno nodak kama miritoe jomoti kuom higni moko ka pok otho. E wi mano, yawuot Diana ariyo notho kendo en bende kansa mar thuno nomake. To e ma pod sa asaya ma jo kanyaklagi onene e Od Romo kata e tij lendo, gineno ka omor seche te.

John nobedo jarit malworo kuom higni mokalo 43. Nohero migawono gi chunye duto. Kata kamano, nochopo kama ne nyaka owe migawono mondo orit watne moro ma ne tuore, kendo sani en e kanyaklagi ma dala. Sama joma nong’eyo John chon oromo kode e chokruoge madongo, giwacho ni pod en aena John ma ne ging’eyoga. Pod omor mana kaka chon.

En ang’o ma miyo Diana gi John siko ka mor? Ere kaka ng’at ma joge otho kendo ma tuore nyalo bedo ma mor? To ere kaka ng’at ma noweyo migawo ma nohero e tij Jehova nyalo siko ka mor? Muma konyowa fwenyo gimomiyo, kowacho kama: ‘Joma tir nomor kuom Jehova.’ (Zab. 64:10) Wanyalo winjo tiend wachno maler ka wafwenyo gima kelo mor ma siko kod ma ok kel mor ma kamano.

Nitie gik ma nyaka kelga akela mor. Kuom ranyisi, par ane joma oherore ma koro timo arus. To nade sama joma okendore onyuolo nyathi ma ne gisebedo ka gigombo? To nade ng’ama omi migawo moro makende e tij Nyasaye? Gigo duto kelo mor nikech giduto gin mich mowuok kuom Jehova. En e ma nochako chenro mar kend, en e ma nomiyo dhano nyalo mar nyuol, kendo en e momiyowa migepe e kanyakla mar Jokristo.​—Cha. 2:18, 22; Zab. 127:3; 1 Tim. 3:1.

Kata kamano, moko kuom gik ma kelonwa mor gin gik ma nyalo rumo sa asaya. Kuom ranyisi, jaod ng’ato nyalo donjo e chode kata onyalo tho. (Eze. 24:18; Hos. 3:1) Nyithindo moko nyalo weyo winjo jonyuolgi kod Nyasaye bende, kendo seche moko inyalo kata golgi e kanyakla. Yawuot Samuel ne ok otiyo ne Jehova e yo ma Jehova oyiego, to Daudi bende notimo gima nokelo chandruok ne  joode duto. (1 Sa. 8:1-3; 2 Sa. 12:11) Gik ma kamago keloga lit kod kuyo. Gin gik ma ok kelnwa mor kata matin.

Migepe makende ma wan-go e tij Nyasaye bende nyalo rumo samoro nikech midekre, ting’ momedore e ot, kata lokruok moko motim e riwruokwa. Joma lokruok ma kamago oseyudo wacho ni pod giparoga mor ma ne gijayudo chon e migepe ma ne gintie.

Nenore maler ni moko kuom gik ma kelonwa mor nyaloga rumo sa asaya. Kuom mano, be nitie gimachielo ma nyalo kelonwa mor ma ok rum kata bed ni chal marwa olokore? Nyaka bedie, nikech ji kaka Samuel, Daudi, kod jomamoko nodhi nyime bedo ma mor kata sama ne gikalo e chandruok kod tembe.

Yesu nong’eyo tiend bedo ma mor. E kinde ma ne en e polo ka pok obiro e piny kendo weche ne beyo, ne omor e nyim Jehova ndalo duto. (Nge. 8:30) Ka ne en e piny ka, ne ojaromo gi pek moko. Kata kamano, timo dwach Wuon-gi pod ne kelone mor. (Joh. 4:34) To nade sama ne isande malit kochiegni tho? Muma wacho niya: “Nikech mor maduong’ ma ne oket e nyime, ne onano e yadh-sand.” (Hib. 12:2) Kare ber ka wanono ane weche moko ariyo ma Yesu nowacho e wi mor ma ok rum.

Nitie chieng’ moro ma jopuonjre 70 nodhi ir Yesu ka gimor bang’ a e tij lendo. Ne gimor nikech ne gitimo honni madongo moriwo nyaka golo jochiende. Kae to Yesu nonyisogi niya: “Kik ubed mamor mana nikech jochiende luwo kaka uchikogi, to moruru nikech nyingeu osendik e polo.” (Luka 10:1-9, 17, 20) Wechego nyiso maler ni bedo ng’at ma Jehova oyiego e gima duong’ moloyo migawo makende ma ng’ato nyalo bedogo. Jehova ne dhi paro jopuonjre Yesugo nyaka chieng’, to mano ne dhi kelonegi mor mogundho.

Nitie chieng’ machielo bende ma Yesu ne wuoyo gi oganda maduong’. Dhako moro ma Nya-Yahudi noneno kaka Yesu nolony e puonjo mowacho ni nyaka bed ni min Yesu ne mor ahinya. Kata kamano, Yesu nokwere kama: “Ooyo, kar mano, joma mor gin jogo ma winjo wach Nyasaye  kendo timo!” (Luka 11:27, 28) Bedo janyuol ma nigi nyathi ma dhi maber en gima kelo mor, kata kamano, gima kelo mor ma ok rum en bedo gi winjruok maber gi Jehova.

Kuom adier, ng’eyo ni Jehova oyie kodwa e gima kelo mor ma ok rum. Mano en gima ok nyal lokore kata bed ni waromo gi tembe ma chalo nade. Sama wamakore gi Jehova kata mana e bwo masiche kod tembe mager, wabedo ma mor ahinya. (Rumi 5:3-5) Bende, Jehova chiwo rohone maler ne joma otenore kuome, to achiel kuom olembe ma rohono nyago en mor. (Gal. 5:22) Kare e momiyo Zaburi 64:10 wacho ni ‘joma tir nomor kuom Jehova.’

Mano konyowa ng’eyo gimomiyo Diana gi John ma ne wasewuoyo kuomgi motelo siko ka mor kata obedo ni gikalo e weche matek. Diana wacho kama: “Ageng’ora kuom Jehova mana kaka nyathi matin geng’ore kuom janyuolne.” Diana ong’eyo nade ni Jehova oyie kode? Owacho niya: “Aneno ni Jehova oseguedha kuom miya nyalo mar dhi nyime yalo wach maber ka amor.” John ma osedhi nyime timo kinda e tij lendo kata bang’ weyo migawo ma nohero lero gima osekonye kowacho kama: “Chakre higa mar 1998 ka ne ayudo migawo mar puonjo e Skul mar Tiego Owete e Tije Kanyakla (MTS), asebedo gi thuolo mathoth mag timo puonjruokna awuon moloyo kaka natimoga chon.” Kowuoyo e loye kod e lo chiege, omedo niya: “Kuom higni mosekalo, wasebedo ka wayie timo migawo moro amora e tij Jehova, to mano osemiyo timo lokruok obedonwa mayot. Ok waywag ang’e kata matin.”

Nitie jomamoko mang’eny ma bende oseneno adiera mar weche ma ni e Zaburi 64:10. Kuom ranyisi, owadwa moro gi chiege notiyo e Bethel ma Amerka kuom higni 30. Kae to bang’e ne omigi migawo mar bedo jopainia makende. Ne giwacho kama: “Kuyo en gima biro abira kende sama ng’ato oweyo migawo moro ma nohero ahinya, kata kamano, ng’ato ok nyal kuyo nyaka chieng’.” Mapiyo bang’ wuok Bethel, ne gichako lendo gi kanyakla ma ne gidhiye. Ne giwacho bende kama: “Ne wanyisoga Jehova achiel kachiel gik ma ne chandowa. Neno kaka Jehova ne dwoko lamowa ne jiwowa kendo miyo wabedo ma mor. Kinde machuok bang’ ka ne wasedhi e kanyaklawa manyien, jolendo mamoko e kanyaklano bende nobedo jopainia. Bende, ne wabedo gi jopuonjre Muma ariyo ma ne dhi maber.”

Adiera en ni ok dwabed ma mor pile ka pile; nyaka wabedie gi ndalo moko ma wakuyo matin. To e ma Jehova notayo jandik-zaburi mondo owach weche ma ni e Zaburi 64:10. Mano nyiso ni kata mana sama wan gi kuyo moko, pod wanyalo bedo gadier ni ka wasiko ka wan ‘joma tir’ kata bed ni lokruok moko oyudowa, wanyalo dhi nyime bedo ‘ma mor kuom Jehova.’ E wi mano, warito ahinya kinde ma Jehova biro loso “polo manyien kod piny manyien” kaka osingo. E kindeno, rem kod nyawo duto ma wan-go nikech bedo koth Adam ibiro tiek te. Jotich Jehova duto biro bedo “mamor kendo moil nyaka chieng’” nikech gik ma Jehova biro loso kendo chiwo ne joge.​—Isa. 65:17, 18, The Bible in Luo, 1976.

Parie kaka ngima biro chalo e kindeno ka koro tuoche kod ng’ol duto oserumo, kendo wachako odiechieng’ kodiechieng’ ka wan gi teko mang’eny! Kata bed ni ne wasekalo e gik malit ma chalo nade, ok wabi paro gigo kendo. Wan gadier chuth ni “wich nowil gi gik machon, kendo ok nochak opargi.” Chier biro miyo warom gi wedewa kod osiepewa ma nosetho. Ji tara gi tara biro mor mana kaka jonyuol nyako moro ma jahigni 12 ma ne Yesu ochiero ne mor. Ee, gibiro ‘mor ahinya gi ilo maduong’.’ (Mar. 5:42) Gikone, ji duto ma ni e piny biro bedo ‘joma tir’ chuth, kendo gibiro bedo ‘ma mor kuom Jehova’ nyaka chieng’.