BE IGOYOGA erokamano? Mano en penjo ma ng’ato ka ng’ato kuomwa onego openjre. Muma nowacho chon ni e kindewagi, ji ne dhi bedo “jo ma ok go erokamano.” (2 Tim. 3:2) Samoro isegaromo gi jomoko ma paro ni gin gi ratiro mar yudo gik moko duto. Kuom mano, gineno ni onge tiende goyo erokamano sama omigi gimoro kata otimnegi gimoro. Nyaka bed ni joma kamago ok moriga kata matin!

Mopogore gi jopiny, jotich Jehova to ijiwo ni ginyis chuny mar ‘goyo erokamano’ kendo ni ‘gigo erokamano kuom gik moko duto.’ (Kol. 3:15; 1 The. 5:18) Kuom adier, bedo gi chuny mar goyo erokamano konyowa. Nitie gik mang’eny ma nyiso mano.

Achiel kuom gik momiyo onego wago erokamano en ni timo mano miyo wawinjo maber e chunywa. Ng’at mohero goyo erokamano bedoga ma mor kuom gima otimo, kendo ng’at migoyone erokamano be morga. Ang’o momiyo? Par ane: Ka ifwenyo ni jomoko oikore timoni gimoro, donge mano nyiso ni gigeni kendo gidewi ahinya? Donge ng’eyo mano miyo iwinjo maber? Nyaka bed ni mano e kaka Ruth nowinjo. Boaz nokecho Ruth ahinya. Onge kiawa ni Ruth ne mor ahinya ng’eyo ni nitie ng’ama ne dewe.​—Ruth 2:10-13.

Dwarore moloyo ni wago ne Nyasaye erokamano. Nyaka bed ni seche moko ijaparo gik ma Jehova osemiyi kendo ma odhi nyime miyi, gibed mag ringruok kata mag chuny. (Rap. 8:17, 18; Tich 14:17) Kata kamano, kar paro wechego mana seche moko, donge ber kikawo thuolo malach mondo ipar matut kuom gueth ma Nyasaye osemiyi kaachiel gi momiyo joma ni machiegni kodi. Timo kamano biro miyo imed here kendo imed bedo gadier ni en be oheri.​—1 Joh. 4:9.

To paro matut kuom gik ma Jehova osemiyi kende ok oromo; onego igone erokamano kuom berne duto. (Zab. 100:4, 5) Ng’at ma goyoga erokamano bedoga ma mor.

Yo machielo ma goyo erokamano konyowago en ni omiyo winjruok ma ni e kindwa gi ji medo bedo motegno. Waduto dwaher ni ji onyis ni gimor kodwa. Sama igoyo ne ng’ato erokamano nikech gima ber motimoni, winjruok ma ni e kindi kode medo bedo motegno. (Rumi 16:3, 4) Bende, yot ahinya mondo joma ohero goyo erokamano okony jomamoko. Joma kamago fwenyoga sama ng’ato onyisogi ng’wono, kendo gin be ginyiso ng’atno ng’wono. Kuom adier, konyo jomamoko miyo wabedo ma mor. Kare e gin Yesu nowacho ni “chiwo kelo mor mang’eny moloyo kawo.”​—Tich 20:35.

Robert Emmons ma en achiel kuom josomo ma notimo nonro e University of California e wach goyo erokamano nowacho kama: “Mondo wabed gi chuny mar goyo erokamano, nyaka wafweny ni nitie kinde ma nyaka wachiw, kod kinde ma wan bende nyaka miwae gimoro.” Adiera en ni mondo wadhi nyime bedo mangima kendo ma mor, nitie gik ma jomamoko e ma nyaka timnwa. Kuom ranyisi, ginyalo miyowa chiemo kata thiedhowa sama watuo. (1 Kor. 12:21) Ng’at ma nigi chuny mar goyo erokamano morga gi gik ma jomamoko timone. Ka en kamano, be isetemo mondo ibed gi tim mar goyo ne jomamoko erokamano kuom gik mabeyo ma gitimoni?

Gima chielo momiyo onego wago erokamano en ni timo mano miyo waketo pachwa kuom gik mabeyo ma ji timo, kar keto pachwa kuom gik maricho. Nitie kaka obwongo chaloga gi rachungi. Onyalo konyi keto pachi e weche moko moloyo mamoko. Onyalo miyo iketo pachi kuom gik mabeyo, to igol pachi kuom gik maricho. Kaka imedo bedo gi chuny mar goyo erokamano, e kaka ibiro medo neno mana gik mabeyo, to mano biro miyo imed mana goyo erokamano. Kiketo pachi kuom gik mabeyo e ngima, mano biro miyo itim gima jaote Paulo nojiwo ni watim. Nowacho niya: “Beduru mamor kuom Ruoth kinde duto.”​—Fil. 4:4.

Goyo erokamano biro miyo ibed gi chuny mokue kata mana sama ji timo gik maricho. Kuom adier, be yot mondo ibed ng’at ma goyo erokamano to e sechegogogo in gi nyiego, ikuyo, kendo imako sadha? Bende, joma ohero goyo erokamano ok lawrega gi mwandu mang’eny. Gimor gi matin ma gin-go, kendo ok giket pachgi e yudo mang’eny.​—Fil. 4:12.

Nikech in Jakristo, ing’eyo ni Satan diher ni chandruok miromogo e ndalo mag gikogi onyos chunyi. Onyalo bedo ma mor ahinya kibedo ng’at ma siko ka ng’ur kendo ywagore sa te. Chuny ma kamano nyalo moni lando wach maber e yo ma dwarore. Bedo ng’ama goyo erokamano nyiso ni ng’ato nigi olembe ma roho nyago. Kuom ranyisi, wabedoga gi mor sama waneno gik ma Jehova timonwa, kendo wan gi yie ni obiro timonwa gik mosingo.​—Gal. 5:22, 23.

Kaka jatich Jehova, nyaka bed ni iyie gi gik mowuoye e sulani. Kata kamano, ing’eyo bende ni bedo gi chuny mar goyo erokamano ok bi abiya kende. To kik mano nyos chunyi. Inyalo bedo gi chuny mar goyo erokamano kendo siko kode. E yo mane? Pile ka pile, kaw thuolo mondo ipar kuom gik minyalo goyoe erokamano e ngimani. Kaka imedo timo kamano, e kaka ibiro medo bedo gi chuny mar goyo erokamano. Mano biro miyo ibed ma mor moloyo joma keto pachgi mana kuom chandruok mag ngima. Ket pachi kuom gik mabeyo ma Jehova kod jomamoko osetimoni ma miyi mor. Inyalo kata ndiko gigo piny. Ee, inyalo ndiko gik moko ariyo kata adek pile ka pile monego igoyee erokamano.

Jotim nonro osefwenyo ni ka wahero goyo erokamano, mano nyalo loko yo ma obwongowa tiyogo mondo wasik ka wamor gi gik ma dhi nyime e ngimawa. Ng’at ma nigi chuny mar goyo erokamano morga. Omiyo, kwan gueth magi, bed ma mor gi gik ma dhi nyime e ngimani, kendo igo ne ji erokamano kuom gik mabeyo ma gitimo! ‘Wagouru ne Jehova erokamano, nimar ober.’ Ee, ‘wagoneuru erokamano kuom gik moko duto.’​—1 We. 16:34; 1 The. 5:18.