Satan ne ok onyiso Hawa ni kochamo olemo ma ne Nyasaye okwerogi to ni nodhi mana nenore ka gima otho to kare nitie gimoro e dende (ma jomoko luongo e ndalowagi ni chuny ma ok tho) ma pod ne dhi dhi nyime bedo mangima kamoro. Kotiyo gi thuol, nonyiso Hawa ni kochamo olemb yadhno, ‘ok nodhi tho ngang’.’ Notemo wacho ni Hawa ne dhi siko kodak e ngima maber e piny, ka koro Nyasaye ok chike.​—Cha. 2:17; 3:3-5.

Ka puonj mar miriambo ma wacho ni dhano nigi chuny ma ok tho ne ok ochakore e puodho mar Eden, kare nochakore kanye? Ok dwadimb ahinya. Gima wang’eyo en ni lamo duto mag miriambo ne otiek e Ataro ma ndalo Noa. Nikech Noa gi joode kende e ma notony e Ataro to ne gilamo mana Jehova kende, wanyalo bedo gadier ni bang’ Atarono koro ne onge puonj mag dinde mag miriambo.

Nyaka bed ni puonj mar chuny ma ok tho nochakore higni moko bang’e ka Ataro nosekalo. Ka ne Nyasaye ochocho dhok ma ne ji wacho e Babel mi ji okere “e wang’ piny duto,” nenore ni ne gikeyo puonj mar miriambono kuonde ma ne gidhiye. (Cha. 11:8, 9) Bed ni puonjno nochakore kanye kata e kinde mane, gima wang’eyo en ni Satan Jachien ma e “wuon miriambo” e ma nokelo puonjno, kendo nomor ahinya koneno ka puonjno landore e piny duto.​—Joh. 8:44.