Yesu nopuonjore kido mabeyo ka ne en e polo, kendo mano nomiyo obedo jatich maber ka notiyo gi jowetene e piny kae. Ere kaka wanyalo luwo ranyisi mar Yesu? Nono ranyisine e yo matut nyalo fwenyonwa puonj moko adek ma nyalo konyowa tiyo maber gi jowetewa. Puonjgo biro konyowa mondo wati kanyachiel e winjruok maber gi jowetewa.

Jatich maber bolorega, ogenoga jotich wetene, kendo ok ochagiga e yo moro amora. Bolruok ma kamano e ma Yesu nopuonjore kuom Wuon-gi. Kata obedo ni Jehova kende e ma owinjore oluong ni Jachuech, nonyiso jomamoko tich maduong’ ma Wuode notimo e chuech. Wachno nenore maler e weche ma Nyasaye nowachone niya: “Wachue dhano e kido machal kodwa.” (Cha. 1:26) Nyaka bed ni Yesu ne mor ahinya ka noneno kaka Jehova nobolore e kindeno.​—Zab. 18:35.

Ka ne Yesu nie piny, en bende nobolore. Sama ji ne pake nikech gik ma notimo, nowacho ni Nyasaye e ma nowinjore omi pak. (Mar. 10:17, 18; Joh. 7:15, 16) Yesu notemo matek mondo obed gi winjruok maber gi jopuonjrene, kendo nonenogi kaka osiepege, to ok wasumbnige. (Joh. 15:15) Nolwoko  nyaka tiendegi mondo opuonjgi gimomiyo ne dwarore ni gibolre. (Joh. 13:5, 12-14) Wan bende dwarore ni wagen jotich wetewa, kendo waket dwachgi obed motelo ne mekwa. Wanyalo timo gik mang’eny ahinya ka ‘wamiyo jomamoko duong’,’ kendo ka ok wamany pak.​—Rumi 12:10.

Ng’at mobolore ong’eyoga bende ni “chenro chopo ka nitie jong’ad rieko mang’eny.” (Nge. 15:22) Kata ka wan gi lony kod teko, nyaka wapar ni onge dhano mong’eyoga gik moko duto. Kata mana Yesu nowacho ni nitie gik ma ne ok ong’eyo. (Mat. 24:36) Bende, nodwaro ahinya ng’eyo gik ma jopuonjrene ma norem nong’eyo kata ne paro. (Mat. 16:13-16) Mano e momiyo jotich wetene ne winjoga ka gimor sama ne gin kode! Kamano bende, ka wabolore kendo wayie ni ok wang’eyo gik moko duto, mano biro miyo wawinj pach jowetewa, wabed gi winjruok maber kodgi, kendo ‘chenrowa biro chopo.’

Dwarore ahinya ni jodong-kanyakla oluw ranyisi mar Yesu mar bolruok sama gitiyo kanyachiel gi jodongo wetegi. Onego ging’e ni roho maler nyalo tayo jaduong’ moro amora mondo ochiw paro maber e buchgi. Sama jodongo ni e romo margi kendo gitemo matek mondo ng’ato ka ng’ato kuomgi obed thuolo chiwo paro, mano biro konyogi timo yiero ma biro konyo kanyakla mangima.

Jatich maber turga sama otiyo gi jotich wetene. Oikorega timo lokruok kendo rwako paro manyien. Wang’eyo ni Yesu noneno nyading’eny kaka Wuon-gi ne jaturga. Kuom ranyisi, Jehova noore mondo obi owar dhano kuom tho, kata obedo ni dhano ne owinjore gi kumno.​—Joh. 3:16.

Yesu ne jaturga ka mano ne dwarore. Kuom ranyisi, kata obedo ni noore ir rombe mag dhood Israel, pod noyie konyo dhako moro ma Nya-Foinike. (Mat. 15:22-28) Bende, ne ok ogen ni jopuonjrene ne dhi timo gik makare chuth. Ka ne Petro okwede e lela, noweyone kethono. Kendo bang’e nomiyo Petro migepe moko madongo. (Luka 22:32; Joh. 21:17; Tich 2:14; 8:14-17; 10:44, 45) Ranyisi mar Yesu nyiso maler ni dwarore ni ‘timwa mar bedo jo matur ong’ere ne ji duto.’​—Fil. 4:5.

 Bedo joma tur biro konyowa bende tiyo maber gi ji mopogore opogore. Yesu ne ok ochayo joma ne ni bute, kendo mano nomiyo jowasike ochako wacho ni ne en “osiep josol osuru gi joricho.” (Mat. 11:19) Be wanyalo tiyo maber gi jowetewa ma samoro chalgi opogore kodwa? Owadwa moro miluongo ni Louis ma ne en jarit-alwora, kendo mosetiyo e Bethel gi owete gi nyimine mopogore opogore wacho kama: “Tiyo kanyachiel gi Jokristo wetewa morem inyalo pim gi gero kor ot kitiyo gi kite ma ok romre. Nikech kitego opogore opogre, dwarore ni ng’ato otim kinda mondo kor odno kik bam. Asebedo ka atimo lokruoge ma dwarore sama atiyo gi jowetena mondo watiek tich ma watimo e yo maber.” Donge mano en chuny maber ma owadwano nyiso?

En kinde mane ma wanyalo nyiso ni wan gi chuny mar tiyo kanyachiel gi jowetewa e kanyaklawa? En sama wan e grubewa mag lendo. Wanyalo lendo gi jolendo ma nigi ting’ mag rito joutegi kaachiel gi jolendo ma hikgi opogore opogore. Ka watimo lokruoge mondo chenrowa ochalre gi margi, kata lendo kodgi e yo ma digiher lendogo, wanyalo miyo gilend gi mor.

Jatich maber ‘oikore pogo ne jomamoko gigene.’ (1 Tim. 6:18) Sama Yesu ne tiyo gi Wuon-gi, nyaka bed ni nofwenyo ni Jehova ne ok en ng’at ma pando weche. Ka ne Jehova ‘loso polo’ Yesu ne nitie kanyo, kendo nopuonjre kuome. (Nge. 8:27) Bang’e, Yesu ne mor ka nonyiso jopuonjrene ‘gik moko duto ma nosewinjo kuom Wuon-gi.’ (Joh. 15:15) Wan bende wanyalo luwo ranyisi mar Jehova kuom pogo ne joma watiyogo rieko kod lony ma wan-go. Jatich maber ok bi pando ne jowetene weche ma nyalo konyogi, mana ni mondo ochikgi. Kar mano, obiro bedo mamor nyiso jomamoko gik mosepuonjore.

Bende, wanyalo jiwo jowetewa sama watiyo kodgi. Donge wawinjoga maber sama ng’ato oneno kinda ma watimo mi opwoyowa? Yesu nokawo thuolone monyiso jotich wetene gik mabeyo ma ne gitimo. (Pim gi Mathayo 25:19-23; Luka 10:17-20.) Nonyisogi ni ne gidhi “timo tije madongo moloyo” ma notimo. (Joh. 14:12) E otieno mogik ka ne pok onege, ne opwoyo jootene konyisogi niya: “Un e jo ma osemakore koda e masichena.” (Luka 22:28) Parie kaka wechego nomulo chuny jootenego mi gimedo kindagi e tij Nyasaye! Ka wakawo thuolowa ma wapwoyo jotich wetewa, gibiro bedo mamor kendo gibiro medo kindagi.

Owadwa moro miluongo ni Kayode wacho kama: “Ok ochuno ni ng’ato obed makare chuth e ka oti maber gi jowetene, to gima dwarore en neno ni joma otiyogo mor kendo ok gine ni tijno peknegi ahinya.” Be jotich weteni neniga kamano sama itiyo kodgi? Donge inyalo penjo Jokristo weteni mondo ginyisi ni in jatich ma chalo nade? Ka gimor tiyo kodi mana kaka jopuonjre Yesu ne mor tiyo kode, in bende inyalo wacho kaka jaote Paulo nowacho niya: “Wan jotich kanyachiel kodu mondo ubed gi mor.”​—2 Kor. 1:24.