Jehova nonyiso Jo-Israel ni ne dwarore ni gibed joma ler. Mondo ojiwnegi wachno, nonyisogi niya: “Kik iwuoth koni gi koni kiketho nying ng’ato. Kik ihang ne wadu wach kidwaro ni onege. An Jehova.”​—Lawi 19:2, 16.

Ere kaka onego wawinj tiend weche motigo ni “kik ihang ne wadu wach kidwaro ni onege”? Buk moro mar Jo-Yahudi ma wuoyo e bug Tim Jo-Lawi wacho kama: “E Dho-Hibrania, weche molok ni ‘kik ihang ne wadu wach kidwaro ni onege,’ kolok aching’ to gin, ‘kik ichung’ e wi nyawadu, kata machiegni kode.’ Omiyo, ok yotga winjo tiendgi.”

Josomo moko to tudoga wechego gi wes mar 15 ma wacho ni: “Kik ing’ad bura e yo ma ok kare. Kik idog ne jachan e bura mana nikech ojachan, kata dok ne jamwandu mana nikech ojamwandu. Ng’ad ne wadu bura kare kichung’ e adiera.” (Lawi 19:15) Ka en kamano, to kare chik ma yudore e wes mar 16 nyalo nyiso ni jotich Nyasaye ne ok onego oyal bura marach, bed ni en bura miyalo e kot, e weche ohala, kata e weche mag joot, kendo ne ok onego gigueny weche mana ni mondo giyud ber. En adier ni wan bende ok onego watim kamano. Kata kamano, nitie weche ma nyalo konyowa winjo tiend wes mar 16 e yo momedore.

Ne ane kendo weche ma ochakgo wesno. Nyasaye nokwero joge ni kik giwuoth koni gi koni ka giketho nying jowetegi. En adier ni kuoth nyalo kelo chandruoge moko. Kata kamano, ketho nying ng’ato to nyalo kelo chandruoge madongo moloyo. (Nge. 10:19; Ekl. 10:12-14; 1 Tim. 5:11-15; Jak. 3:6) Ng’ama ketho nying nyawadgi wachoga miriambo kod weche maricho mondo nyawadgino onenre ka ng’ama rach. Ng’at ma kamano nyalo chiwo neno mag miriambo ma ok odewo ni wechego nyalo miyo oneg nyawadgi. Inyalo paro kaka joneno mag miriambo noketho nying Naboth, kendo mano nomiyo ochiele gi kite motho. (1 Ru. 21:8-13) Omiyo, mana kaka iwachonwa e bug Tim Jo-Lawi 19:16, ng’at ma ketho nying nyawadgi nyalo miyo oneg nyawadgino.

E wi mano, ng’at ma ketho nying nyawadgi goyiem nyalo nyiso ni en gi sigu gi nyawadgino. Ndiko mar 1 Johana 3:15 wacho kama: “Ng’at ma timo sigu gi owadgi en janek, kendo ung’eyo ni ngima ma nyaka chieng’ ok sik e iye.” Bende, ber ng’eyo ni bang’ ka Nyasaye nosenyiso Jo-Israel ni kik gihang ne jowetegi wach, nonyisogi kama: “Kik isin gi owadu e chunyi.”​—Lawi 19:17.

Kuom mano, weche motigo e Tim Jo-Lawi 19:16 ni “kik ihang ne wadu wach kidwaro ni onege,” miyo Jokristo siem moro motegno. Onego wakwed paro moro amora marach ma wanyalo bedogo e wi nyawadwa, kendo ok onego waketh nying ng’ato. Omiyo, ka ‘wahango ne nyawadwa wach’ mana nikech ok wahere kata nikech wan gi nyiego kode, mano nyalo nyiso ni wan gi sigu gi ng’atno. Jokristo ok onego otim gima kamano kata matin.​—Mat. 12:36, 37.