Be isebedo ka isomo gasede mag Ohinga mar Jarito ma higani? Ka en kamano, ne ane ka inyalo dwoko penjo ma luwogi:

‘Loko pachi obed manyien’ oriwo timo ang’o? (Rumi 12:2)

Oriwo gik mang’eny moloyo mana timo gik mabeyo. Oriwo nono chunywa kendo timo lokruoge ma dwarore mondo wamed sudo machiegni ahinya gi Jehova kendo luwo chikene.—w23.01, ite mar 8-9.

Ere kaka wanyalo bedo gi tong’ sama wanono gik ma timore e piny?

Wagomboga ng’eyo kaka gik ma nokor e Muma chopo e kindegi. Kar pong’o gi wiwa kaka weche ma nokor chopo, watiyoga gi buge ma riwruok mar oganda Jehova ogoyo sama wawuoyo gi jomamoko mondo kik waketh kuwe e riwruogwa. (1 Kor. 1:10)—w23.02, ite mar 16.

Ere kaka batiso mar Yesu opogore gi batiso mar jolupne?

Ne ok ochuno ni ochiwre ne Jehova, nikech nonyuole e oganda ma nosechiwore kendo singore ni ne gidhi tiyo ne Jehova. Yesu ne en ng’at makare chuth. Omiyo, ne ok ochuno ni okwa ng’wono kendo olok chunye.—w23.03, ite mar 5.

Ere kaka wanyalo konyo jomamoko mondo gichiw paro e chokruoge?

Wanyalo chiwo paro machuok mondo jomamoko bende oyud thuolo mar chiwo paro. Bende, ka paragraf nigi dwoko mokalo achiel, wanyalo mana wuoyo e achiel kuomgi kae to waweyo paro modong’ ne jomamoko. Mano biro miyo gin bende giyud gima ginyalo wuoye.—w23.04, ite mar 23.

“Ndara Maler” miwuoyoe e Isaya 35:8 ochung’ ne ang’o?

Ndara mar ranyisino mokwongo nochung’ ne ndara ma Jo-Yahudi noluwo ka giwuok Babulon ka gidok thurgi. To nade e kindewagi? Ndarano nochak ik ka higa mar 1919 pok ochopo ka nochak tij loko Muma, goye, kaachiel gi tije mamoko. Jotich Nyasaye osebedo ka wuotho e “Ndara Maler” ka gidonjo e paradiso mar ranyisi, kendo mano miyo giyudo gueth mag Pinyruoth.—w23.05, ite mar 15-19.

Ngeche sula mar 9 chiwo puonj mane kotiyo gi ranyisi mar mon moko ariyo?

Ngecheno wuoyo kuom “dhako mofuwo” ma gwelo ji koterogi e “Liel.” Dhako machielo miluongo ni “rieko madier” to gwelo joma oyie mondo ‘weche donjonegi’ koterogi e ngima. (Nge. 9:1, 6, 13, 18)—w23.06, ite mar 22-24.

Ere kaka kido mar Jehova mar bedo ng’at ma tur kod bolruok nonenore e yo ma norwakogo pach Lut?

Jehova nochiko Lut ni oa mapiyo Sodom kendo oring odhi e gode. Kata kamano, ka ne Lut okwayo ni odhi Zoar kar dhi e gode, Nyasaye noyie gi kwayoneno.—w23.07, ite mar 21.

En ang’o ma dhako nyalo timo ka po ni jaode ng’iyoga ponografi?

Dhakono ok onego oket ketho kuome owuon. Onego oket pache kuom tego winjruokne gi Nyasaye kendo opar matut e wi ranyisi mag mon ma Jehova nohoyo chunygi e kinde ma ne gikaloe chandruoge. Dhakono nyalo konyo jaode mondo otang’ gi kuonde ma nyalo miyo one ponografi e yo mayot.—w23.08, ite mar 14-17.

Sama ng’ato openjowa gimomiyo wamako ahinya puonj moro mar Muma, ere kaka rieko nyalo konyowa chiwo dwoko mamuol?

Wanyalo neno penjono kaka yo ma konyowa ng’eyo gima ng’atno paro kata gima chando chunye. Mano nyalo konyowa chiwo dwoko e yo mamuol.—w23.09, ite mar 17.

Ang’o ma wanyalo puonjore kuom Maria e wi yudo teko?

Bang’ fwenyo ni en e ma nodhi nyuolo Mesia, Maria noyudo teko koa kuom jomamoko. Gabriel kod Elizabeth nojiwe ka gitiyo gi Ndiko. Wan bende wanyalo yudo teko kokalo kuom Jokristo wetewa.—w23.10, ite mar 15.

Ere kaka Jehova nyalo dwoko lamowa?

Osingo ni obiro winjo lamowa, kendo nono kaka gitudore gi dwache. (Jer. 29:12) Onyalo dwoko kwayo machalre e yore mopogore opogore, kata kamano, kinde duto obiro sirowa.—w23.11, ite mar 21-22.

Bang’ ka Jo-Rumi 5:2 osewuoyo e wi “geno,” ang’o momiyo inwoyo kidono kendo e kwan matindo 4?

Sama ng’ato owinjo wach maber mar Nyasaye, onyalo bedo gi geno mar dak nyaka chieng’ e paradiso e piny kae. Kata kamano, sama oromo gi masiche, onano e masiche, kendo oneno kaka Jehova mor kode, genone medoga bedo motegno ahinya.—w23.12, ite mar 12-13.