1. Mondo wabed Jokristo motegno, gin ang’o monego watim?

 WAWUOROGA ahinya kaka nyathi dongoga mapiyo mi obed ng’ama duong’. Dongruok ma kamano timorega kende. Kata kamano, dongruok ma ng’ato timo mondo obed Jakristo motegno ok biga abiya kende. b (1 Kor. 13:11; Hib. 6:1) Mondo wabed Jokristo motegno, nyaka wabed gi winjruok maber gi Jehova. Bende, dwarore ni wabed gi rohone maler ma biro konyowa nyago kido mabeyo, bedo gi lony moko, kendo ikowa ne ting’ ma wanyalo bedogo kinde mabiro.—Nge. 1:5.

2. Ang’o ma wapuonjore e Chakruok 1:27, to ang’o ma wabiro nono e sulani?

² Jehova e ma nochueyo dichwo gi dhako mokwongo. (Som Chakruok 1:27.) Mopogore mana gi nenruokgi ma oko, nitie gik mamoko ma bende chwo gi mon opogoree. Kuom ranyisi, Jehova nochueyo dichwo gi dhako mondo ng’ato ka ng’ato kuomgi ochop migepe moko sie. Omiyo, dwarore ni ng’ato ka ng’ato kuomgi obed gi kido kod lony ma biro konye chopo migepego. (Cha. 2:18) E sulani, wabiro nono gima nyimine ma rowere nyalo timo mondo gibed Jokristo motegno. Kae to e sula ma luwo, wabiro nono gima owete ma rowere bende nyalo timo mondo gibed Jokristo motegno.

3-4. Ere kama nyimine ma rowere nyalo yudoe ranyisi mabeyo ma ginyalo luwo? (Ne picha bende.)

³ Muma wuoyo e wi mon mang’eny ma nohero Jehova  kendo ma notiyone. (Ne sula ma wiye wacho ni, “Ang’o ma Wanyalo Puonjore Kuom Mon Miwuoye e Muma?” e jw.org/luo) Mana kaka ndiko ma tayo sulani nyiso, mon-go ne gin joma ‘ok kal tong’ e timbegi’ kendo ne gin joma ‘igeno e weche duto.’ E wi mano, nyimine ma rowere nyalo luwo ranyisi mabeyo ma nyimine motegno oseketo e kanyakla.

⁴ Un nyimine ma rowere, be ung’eyo nyaminwa moro amora moseketo ranyisi maber munyalo luwo? Tem ane fwenyo kido mabeyo ma gin-go, kae to inon ane kaka inyalo nyiso kidogo. E paragraf ma luwo, wabiro nono kido moko adek ma nyiminewa ma Jokristo motegno onego obedgo.

5. Ang’o momiyo bolruok en kido ma nyimine ma Jokristo onego obedgo?

⁵ Bolruok en kido ma Jokristo motegno onego obedgo. Ka po ni nyaminwa moro obolore, obiro bedo gi winjruok maber gi Jehova kod jomamoko. (Jak. 4:6) Kuom ranyisi, nyaminwa mohero Jehova bolorega kendo oriwo lwedo chenro mar wich ma Wuon-gi manie polo oseketo. (1 Kor. 11:3) Chenro mar wichno nyalo konyo e kanyakla kod e ngima mar joot. c

6. Ang’o ma nyimine ma rowere nyalo puonjore kuom ranyisi mar Rebeka mar bolruok?

⁶ Par ane ranyisi mar Rebeka. Ne en dhako mariek kendo ma jachir ma nong’eyo kinde ma nonego okawie okang’ ma dwarore. (Cha. 24:58; 27:5-17) Kata kamano, nomiyoga jomamoko luor kendo nobolore. (Cha. 24:17, 18, 65) Ka ibolori kendo iriwo lwedo chenro mag Jehova mana kaka Rebeka notimo, ibiro jiwo kuwe e odu kod e kanyakla.

7. Nyimine ma rowere nyalo nyiso nade ni ging’eyo tong’ margi mana kaka Esta?

⁷ Jokristo duto motegno bende onego ong’e tong’ margi. Muma wacho ni “rieko ni kod jo ma obolore,” to mano oriwo ng’eyo  tong’ marwa. (Nge. 11:2) Esta nong’eyo tong’ mare kendo nohero Jehova ahinya. Mano nokonye mondo kik ohedhre. Nowinjo gima owadgi ma bathe miluongo ni Mordekai nonyise ni otim. (Esta 2:10, 20, 22) In bende inyalo nyiso ni ing’eyo tong’ mari kuom sumo paro mag jomamoko kendo tiyo gi paro mabeyo ma gimiyi.—Tito 2:3-5.

8. Ka luwore gi 1 Timotheo 2:9, 10, ka nyaminwa ma Jakristo ong’eyo tong’ mare, ere kaka mano nyalo konye timo yiero mabeyo e rwakruok kod bidhruok?

⁸ Esta nonyiso ni nong’eyo tong’ mare e yo machielo. ‘Nojaber kendo nolombo wang’,’ kata kamano, ne ok otimo gik ma ne nyalo miyo ji opake kata omiye duong’. (Esta 2:7, 15) Ere kaka nyaminwa ma Jakristo nyalo luwo ranyisi mar Esta? Achiel kuom yore monyalo timogo kamano yudore e 1 Timotheo 2:9, 10. (Som.) Jaote Paulo nonyiso mon ma Jokristo ni rwakruokgi onego onyis ni ok gikal tong’ kendo ni gin joma pachgi long’o. E dho Grik, weche ma Paulo notiyogo e ndikono ne nyiso ni nyiminewa ma Jokristo onego orwak lewni ma nyiso luor kendo ma nyiso ni gidewo kaka jomamoko winjo. To mano kaka wamor ahinya ni nyiminewa ma Jokristo motegno rwakorega e yo ma ok kal tong’!

9. Ang’o ma wanyalo puonjore kuom ranyisi mar Abigail?

⁹ Nyalo mar pogo weche kare en kido machielo ma nyiminewa duto ma Jokristo motegno onego obedgo. Tiend pogo weche kare en ang’o? En nyalo mar pogo gik makare kod ma ok kare, kendo luwo gik makare. Ne ane ranyisi mar Abigail. Jaode notimo yiero moro marach ma ne dhi kelo hinyruok maduong’ ne joode duto. Abigail nokawo okang’ mapiyo. Okang’ ma nokawono noreso ngima jomamoko. (1 Sa. 25:14-23, 32-35) Nyalo mar pogo weche kare konyowa ng’eyo kinde monego wawuoye kod kinde monego waling’ie. Bende, okonyowa ng’eyo kaka wanyalo dewo jomamoko gadier ma ok wadonjore ahinya e wechegi.—1 The. 4:11.

10-11. Gin ber mage ma ibiro yudo ka ipuonjori somo kod ndiko e yo maber, to ere kaka bedo gi lonygo nyalo miyo ikony jomamoko? (Ne picha bende.)

¹⁰ Nyimine ma Jokristo onego obed gi lony moko ma biro konyogi. Nitie lony moko ma ka nyathi ma nyako opuonjore sama pod otin, to biro konye e ngimane duto. Ne ane moko kuom lonygo.

¹¹ Puonjri somo kod ndiko e yo maber. Ogendni moko nenoga ni ok ochuno ni mon ong’e somo kod ndiko. Kata kamano, mago gin lony ma Jokristo duto onego obedgo. d  (1 Tim. 4:13) Kuom mano, kik iyie mondo gimoro amora omoni ng’eyo somo kod ndiko e yo maber. Ibiro yudo ber mage kitimo kamano? Lony ma kamago nyalo konyi yudo tich kendo rito tijno e yo maber. Bende, ibiro bedo japuonjre maber mar Wach Nyasaye, kendo puonjo jomamoko Wachno biro bedoni mayot. To maduong’ie moloyo, ibiro sudo machiegni gi Jehova sama imedo somo Wachne kendo paro matut kuome.—Jos. 1:8; 1 Tim. 4:15.

12. Ang’o ma Ngeche 31:26 puonjowa?

¹² Puonjri kaka inyalo wuoyo gi jomamoko e yo maber. Jokristo onego ochik ne jomamoko itgi kendo giwuo kodgi e yo mang’won. Kowuoyo kuom wachno, japuonjre Jakobo nowacho kama: “Ng’ato ka ng’ato nyaka bed ng’at ma winjo wach piyo, ma ok rikni e wuoyo.” (Jak. 1:19) Sama ichiko ne jomamoko iti ka giwuoyo, mano nyiso ni ‘ikechogi.’ (1 Pet. 3:8) Ka po ni ok iwinj tiend gik ma ng’ato nyisi kata ok ing’eyo maber kaka owinjo e chunye, inyalo penje penjo moko mondo okonyi ng’eyo kaka owinjo. Kae to par matut ka pok ichiwo dwoko. (Nge. 15:28.) Inyalo penjori kama: ‘Be gima adwaro wachoni en adier kendo onyalo gero jomamoko? Be gin weche ma nyiso luor kendo mang’won?’ Inyalo puonjori kuom nyimine motegno ma chikonega jomamoko itgi kendo ma wuoyoga e yo mang’won. (Som Ngeche 31:26.) Non maber gik ma giwachoga kod kaka giwachogi. Kaka imedo puonjori chiko iti ne jomamoko, e kaka biro bedoni mayot bedo gi winjruok kodgi.

13. Ere kaka inyalo puonjori timo tije mag ot? (Ne picha bende.)

¹³ Puonjri tije mag ot. E pinje mang’eny, thoth tije mag ot itimoga gi joma mine. Minu kata nyimine motegno manie kanyakla nyalo puonji kaka irito ot e yo maber. Nyaminwa moro ma nyinge Cindy wacho kama: “Achiel kuom gik mabeyo ahinya ma napuonjora kuom minwa en ni ka an jakinda, to abiro bedo mamor. Nikech napuonjora tedo, timo ler, twang’o lewni, kendo tiyo maber gi pesa sama ang’iepo, mano nomiyo ngimana obedo mayot kendo nomiya thuolo mar timo momedore e tij Jehova. Bende, minwa nopuonja bedo jarwak welo, kendo mano nomiyo aromo gi owete gi nyimine ma noketona ranyisi maber.” (Nge. 31:15, 21, 22) Dhako ma jakinda, mohero rwako welo, kendo mong’eyo rito ode en gueth ne joode kod kanyakla.—Nge. 31:13, 17, 27; Tich 16:15.

14. Ranyisi mar Crystal puonji ang’o, to en ang’o monego iketie pachi?

¹⁴ Puonjri tije moko minyalo konyorigo. Jokristo duto motegno onego opuonjre tije moko ma ginyalo sirogo ngimagi. (Fil. 4:11) Nyaminwa moro ma nyinge Crystal wacho kama: “Ka ne an e sekondari, jonyuolna  nokonya yiero kos ma ne nyalo konya yudo tich bang’ tieko skul. Wuonwa nojiwa mondo atim kos mar akaunts kendo mano osekonya ahinya.” Mopogore gi puonjruok tich moro, puonjri bende loso bajet kendo luwo bajedno. (Nge. 31:16, 18) Ket pachi e chenro ma in-go mar tiyo ne Jehova. Inyalo timo kamano ka gik ma in-go oromi kendo ka ok idonjo e gope ma ok ochuno.—1 Tim. 6:8.

15-16. Ere kaka nyimine ma ok nie kend nyalo jiwo jomamoko? (Mariko 10:29, 30)

¹⁵ Sama inyago kido mabeyo ma moro Jehova kendo ipuonjori lony moko, mano biro konyi e kinde mabiro. Ne ane moko kuom ting’ minyalo bedogo e kinde mabiro.

¹⁶ Inyalo yiero ni ok ibi donjo e kend kuom kinde moro. Ka luwore gi weche ma ne Yesu owacho, nyimine moko nyalo weyo ma ok gidonjo e kend kata ka po ni mano ok en gima ijiwo ahinya e ogendni ma giaye. (Mat. 19:10-12) Nyimine moko to nyalo weyo ma ok okendgi nikech chal moko mopogore opogore. Inyalo bedo gadier ni Jehova kod Yesu ok ne ni joma ok odonjo e kend gin joma nono. Kar mano, gigenogi ahinya. E piny ngima, nyimine ma ok nie kend ketoga ranyisi maber ne kanyakla. Nikech gihero Jokristo wetegi kendo gidewogi, mano miyo gibedo kaka nyiminegi kod minegi.—Som Mariko 10:29, 30; 1 Tim. 5:2.

17. Ere kaka nyaminwa ma pod tin nyalo ikore sani ne tiyo ne Jehova kuom thuolone duto?

¹⁷ Inyalo yiero tiyo ne Jehova kuom thuoloni duto. Nyimine ma Jokristo tiyo matek ahinya e tij lendo mitimo e piny ngima. (Zab. 68:11) Be inyalo tiyo ne Jehova kuom thuoloni duto? Inyalo bedo painia, inyalo konyo e tij gedo, kata inyalo tiyo e Bethel. Wuo gi Jehova e lamo e wi chenro ma in-go mar tiyone. Bende, wuo gi jomamoko mosetiyo ne Jehova kuom thuologi duto. Gibiro konyi ng’eyo gik monego itim mondo ichop chenro ma in-go. Kae to kaw okenge ma biro konyi chopo chenroni. Ka iyiero tiyo ne Jehova kuom thuoloni duto, mano biro yawoni thuolo mag tiyone e okang’ momedore.

18. Ang’o momiyo nyaminwa ma dwaro donjo e kend onego onon maber ng’at ma dwaro kende? (Ne picha bende.)

¹⁸ Inyalo yiero donjo e kend. Kido kod lony ma wasewuoye e sulani biro konyi bedo dhako maber. En adier ni ka iparo donjo e kend,  dwarore ni itim yiero maber. Mae en achiel kuom yiero madongo ma ibiro timo e ngimani. Par ni ka idonjo e kend, ibiro bedo e bwo chik mar ng’at mokendino. (Rumi 7:2; Efe. 5:23, 33) Kuom mano, penjri ane kama: ‘Be ng’at ma dwaro kendani en Jakristo motegno? Be tiyo ne Jehova e gima duong’ e ngimane? Be otimoga yiero mabeyo? Be oyiega kethoge? Be omiyoga mon luor? Be en gi lony ma nyalo konye rita e yor ringruok kod e yor chuny? Be otimoga migepene e yo maber? Kuom ranyisi, gin migepe mage ma en-go e kanyakla, to ere kaka otimogiga?’ (Luka 16:10; 1 Tim. 5:8) En adier ni ka idwaro ni okendi gi dichwo maber, in bende nyaka iikri bedo dhako maber.

19. Ang’o momiyo bedo “jakony” en ting’ ma miyo dhako duong’?

¹⁹ Muma wacho ni dhako maber en “jakony mowinjore” ne jaode. (Cha. 2:18) Be mano nyiso ni en ng’at ma piny ahinya? Ooyo! Ting’ momiye kaka jakony en ting’ ma miye duong’. Par ni kata mana Jehova iluongoga nyading’eny ni ‘jakony’ e Muma. (Zab. 54:4; Hib. 13:6) Dhako ma en jakony madier riwo jaode lwedo e yiero motimo kendo okonye timo gik moko mondo weche odhi maber. Nikech ohero Jehova, otemo matek mondo jomamoko one kido mabeyo mag jaode. (Nge. 31:11, 12; 1 Tim. 3:11) Inyalo ikori bedo dhako maber kuom tego hera miherogo Jehova kendo konyo jomamoko e odu kod e kanyakla.

20. Miyo maber konyoga joode nade?

²⁰ Inyalo yiero bedo gi nyithindo. Bang’ ka usekendoru, in gi jaodi unyalo bedo gi nyithindo. (Zab. 127:3) Omiyo, ber kiparo chon gima biro dwarore ni itim mondo ibed miyo maber. Kido kod lony ma wasewuoye e sulani biro konyi bedo dhako malong’o kendo miyo maber. Ka ihero jaodi kod nyithindi, ing’won kodgi, kendo ihori kodgi, ibiro bedo mamor kendo nyithindi biro winjo ni oritgi maber.—Nge. 24:3.

21. Nyimine ma tiyo matek ne Jehova kod joge miyo wawinjo nade, to nikech ang’o? (Ne picha manie nyim gaset.)

²¹ Waherou ahinya un nyimine ma tiyo matek ne Jehova kod joge. (Hib. 6:10) Utemo ahinya mondo unyag kido mabeyo kod lony moko ma biro miyo ngimau kod ngima jomamoko obed maber. Bende, uikoruga maber ne ting’ munyalo romogo e kinde mabiro. Riwruok mar oganda Jehova oherou ahinya!