1. Ang’o ma owadwa ma Jakristo nyaka tim mondo weche odhi ne maber?

 RUOTH Daudi nonyiso Solomon kama: “Bed motegno kendo bed dichwo ma jachir.” (1 Ru. 2:1-3) Chwo duto ma Jokristo e kindewagi dwarore ni oti gi puonjno. Mondo weche odhinegi maber, nyaka gipuonjre chike Jehova kendo giti gi puonj mag Muma e ngimagi duto. (Luka 2:52) Ang’o momiyo dwarore ni owetewa ma rowere otim kinda mondo gibed Jokristo motegno?

2-3. Ang’o momiyo en gima dwarore mondo owadwa ma rawera otim kinda mondo obed Jakristo motegno?

² Owete ma Jokristo timoga migepe madongo e utegi kod e kanyakla. Un owetewa ma rowere, onge kiawa ni usebedo ka uparo e wi migepe munyalo bedogo e kinde mabiro. Samoro in gi chenro mar tiyo ne Nyasaye kuom thuoloni duto, bedo jakony-tich, kata bang’e bedo jaduong’-kanyakla. Samoro chieng’ moro inyalo dwaro kendo mi ibed gi nyithindo. (Efe. 6:4; 1 Tim. 3:1) Mondo idhi maber e chenrogo duto, dwarore ni ibed Jakristo motegno. b

³ Ang’o ma nyalo konyi mondo ibed Jakristo motegno? Nitie lony mopogore opogore ma dwarore ni ibedgo. Omiyo, ang’o minyalo timo sani mondo iikri ne migepe ma kinde mabiro kendo ibi itimgi e yo maber?

4. En kanye minyalo yudoe ranyisi mabeyo mag jotich Nyasaye motegno minyalo luwo? (Ne picha bende.)

⁴ Luw ranyisi mar jotich Nyasaye motegno. Nitie chwo mang’eny ma Muma wuoyo kuomgi ma rowere nyalo luwo ranyisigi. Chwogo nohero Nyasaye, kendo ne girito joge e yore mopogore opogore. Ranyisi mamoko mabeyo nyalo yudore kuom Jokristo motegno manie odu kod e kanyaklau. (Hib. 13:7) To ranyisi maberie mogik en mar Yesu Kristo. (1 Pet. 2:21) Sama inono ranyisi mar joma kamago, tem ane nono kido mabeyo ma ne gin-go. (Hib. 12:1, 2) Kae to ine ane yore minyalo luwogo ranyisigi.

5. Ere kaka inyalo bedo gi nyalo mar paro, to ang’o momiyo timo kamano dwarore? (Zaburi 119:9)

⁵ Bed gi ‘nyalo mar paro’ kendo irite. (Nge. 3:21) Dichwo ma nigi nyalo mar paro nonoga weche e yo matut ka pok okawo okang’ moro amora. Omiyo, tim kinda mondo ibed gi nyalo mar paro kendo irite. Nikech ang’o? En nikech pinyni opong’ gi chwo ma rowere ma luwo mana pachgi giwegi kod chunygi. (Nge. 7:7; 29:11) Gige fwambo gi keyo bende nyaloga chiko yo ma inenogo gik moko. Kata kamano, ang’o minyalo timo mondo ibed gi nyalo mar paro? Gima okwongo minyalo timo en ng’eyo puonj mag Muma kendo paro kaka puonjgo konyo. Kae to, ti gi puonjgo e timo yiero ma biro moro Jehova. (Som Zaburi 119:9.) Ka itimo kinda mondo ibed gi nyalo mar paro, mano biro miyo ibed Jakristo motegno. (Nge. 2:11, 12; Hib. 5:14) Ne ane kaka nyalo mar paro nyalo konyi e weche moko ariyo: (1) e tudruok gi nyimine kod (2) e rwakruok gi bidhruok.

6. Ere kaka nyalo mar paro biro konyo owadwa ma rawera mondo omi nyimine luor?

⁶ Nyalo mar paro biro konyi chiwo luor ne nyimine. Ok en gima rach ka owadwa moro ma rawera gombo chako kisera gi nyaminwa moro. Kata kamano, owadwa ma rawera ma nigi nyalo mar paro, ok bi wacho, ndiko, kata timo gimoro amora ma nyalo miyo nyaminwa moro opar ni doher kende, to kare ok en kamano. (1 Tim. 5:1, 2) Ka po ni otimo  kisera gi nyaminwa moro, obiro temo matek mondo omi nyaminwano luor kuom neno ni ok gibedga kar kendgi kama jomamoko ok negie.—1 Kor. 6:18.

7. Ere kaka nyalo mar paro biro konyo owadwa ma rawera sama otimo yiero e wi rwakruok gi bidhruok?

⁷ Yo machielo ma owadwa ma rawera nyalo nyisoe ni en gi nyalo mar paro en timo yiero maber e wach rwakruok kod bidhruok. Thothne, joma keloga fason manyien ok luwga chike Jehova kendo kit ngimagi ochido. Pachgi maricho nenore e lewni ma giloso ma mako del ahinya kata ma miyo dichwo onenre ka dhako. Sama owadwa ma rawera kendo ma Jakristo motegno yiero lewni mobiro rwako, oyiega mondo puonj mag Muma e motaye kaachiel gi ranyisi mabeyo mag joma nie kanyakla. Onyalo penjore kama: ‘Be lepa nyiso ni an gi paro malong’o kendo adewo jomamoko? Be rwakruokna kod bidhruokna nyiso maler ni achiwora chuth ne Nyasaye?’ (1 Kor. 10:31-33; Tito 2:6) Sama owadwa ma rawera nigi nyalo mar paro, owete gi nyimine biro miye luor kendo Jehova bende biro miye luor.

8. Ang’o ma owadwa ma rawera nyalo timo mondo obed ng’at migeno?

⁸ Bed ng’at migeno. Rawera migeno, en rawera ma timo migepene duto e yo maber. (Luka 16:10) Ne ane ranyisi mar Yesu. Ne ok otim atima gik moko mana ni mondo otiekgi. Kar mano, noikore timo migepe duto ma Jehova nomiye, kata sama timo kamano ne ok yot. Nohero ji to ahinya-ahinya jopuonjrene, kendo noyie nyaka thonegi. (Joh. 13:1) Luw ranyisi mar Yesu kuom tiyo matek e chopo migawo moro amora momiyi. Ka po ni ok ing’eyo kaka onego itim migawo moro, bolri kendo ikwa owete motegno mondo onyisi kaka itime. Kik itim atima migawo tek ni itimo. (Rumi 12:11) Kar mano, tiek migapi e yo maber kendo itime “kaka ne Jehova to ok ne dhano.” (Kol. 3:23) To nikech in ng’ama orem, sama weche ok odhi maber e migapi, bolri kendo iyie kethoni.—Nge. 11:2.

9. Ang’o momiyo owadwa ma rawera onego opuonjre lony moko ma nyalo konye?

⁹ Mondo ibed Jakristo motegno, dwarore ni ibed gi lony moko ma nyalo konyi e ngimani ma pile. Lony ma kamago nyalo konyi timo migepe mopogore opogore e kanyakla, nwang’o tich ma nyalo siri e ngima kata ma nyalo konyi pidho joodi, kendo konyi bedo gi winjruok maber gi jomamoko. Ne ane moko kuom lony ma dwarore ni ibedgo.

10-11. Gin ber mage ma owadwa ma rawera nyalo yudo kong’eyo somo kod ndiko e yo maber, kendo ere kaka mano nyalo konyo kanyakla? (Zaburi 1:1-3) (Ne picha bende.)

¹⁰ Puonjri somo kod ndiko e yo maber.  Muma wacho ni ng’at ma mor kendo ma weche dhine maber en ng’at ma somoga Wach Nyasaye pile ka pile kendo paro matut e wi gik mosomo. (Som Zaburi 1:1-3.) Somo Muma pile konye mondo ong’e pach Jehova, to mano biro miyo one gik moko e yo makare kendo otim yiero mabeyo. (Nge. 1:3, 4) Sama owete timo kamano, mano konyo kanyakla ahinya. Nikech ang’o?

¹¹ Owete gi nyimine ogeno ahinya chwo ma Jokristo motegno mondo opuonjgi Muma kendo okonygi ng’ado rieko. (Tito 1:9) King’eyo somo kod ndiko maber, mano biro konyi iko paro mabeyo michiwo e chokruok kaachiel gi twege ma jiwo jowinjo. Bende, biro bedoni mayot ndiko weche madongo sama iwinjo twege e kanyakla, e chokruoge mag alwora, kod e chokruoge madongo. Weche mindikogo biro tego yieni kendo ibiro jiwo jomamoko.

12. Ang’o ma biro konyi bedo ng’at mong’eyo wuoyo gi jomamoko e yo maber?

¹² Puonjri kaka inyalo wuoyo gi jomamoko e yo maber. Dichwo ma Jakristo nyaka puonjre wuoyo e yo maber gi jomamoko. Ng’at mong’eyo wuoyo maber chikoga ite ne paro ma jomamoko chiwo kendo oikore rwako parogo. (Nge. 20:5) Onyalo fwenyo gima ng’ato paro mana kuom winjo dwond ng’atno, rango wang’e kod ranyisi mag dende. Onge kaka dipuonjri weche kaka mago ka ok iwuoga gi ji. Ka po ni iheroga mana wuoyo gi ji kokalo kuom email kod ote machuok, mano nyalo moni wuoyo gi ji ka in thuolo sama in kodgi. Omiyo, manyga thuolo mag wuoyo gi ji wang’ gi wang’.—2 Joh. 12.

13. Gin ang’o mamoko ma owadwa ma rawera onego opuonjre? (1 Timotheo 5:8) (Ne picha bende.)

¹³ Puonjri tije moko minyalo konyorigo. Dichwo ma Jakristo motegno nyaka bed gi nyalo mar pidhore owuon kaachiel gi joode. (Som 1 Timotheo 5:8.) E pinje moko, owete ma rowere nyalo puonjore tije mopogore opogore kuom wuonegi kata wedegi mamoko. To e pinje mamoko, rowere nyalo puonjore tich sama pod gin e sekondari. Bed ni in e chal mane, dwarore ni ipuonjri lony moro minyalo konyorigo. (Tich 18:2, 3; 20:34; Efe. 4:28) Tem ahinya ibed ng’at mong’ere kaka ng’at ma tiekoga tich momiye. Kitimo kamano, biro bedo ma yotni yudo tich kendo siko e tijno. Kido kod lony ma wawuoyoego nyalo konyo dichwo ma Jakristo mondo oikre ne migepe ma kinde mabiro. Wane ane moko kuom migepego.

14. Ere kaka owadwa ma rawera nyalo ikore tiyo ne Jehova kuom thuolone duto?

¹⁴ Tiyo ne Jehova kuom thuoloni duto. Owete mang’eny ma rowere, chakoga tiyo ne Jehova kuom thuologi duto ka pod gitindo ahinya. Bedo painia miyo rawera thuolo mar tiyo kanyachiel gi ji mopogore opogore. Bende, mano konye ng’eyo goyo bajet chon. (Fil. 4:11-13) Yo maber mar chako luwo chenro mar tiyo ne Nyasaye kuom thuoloni duto en bedo painia makonyo. Rowere mang’eny bedoga jopainia makonyo kuom kinde ka giikore ne bedo jopainia mapile. Bedo painia nyalo yawoni dhoot malach mar yudo migepe momedore kaka konyo e tij gedo kata tiyo e Bethel.

15-16. En ang’o ma owadwa ma rawera nyalo timo mondo oyud migepe momedore e kanyakla?

¹⁵ Bedo jakony-tich kata jaduong’-kanyakla. Chwo ma Jokristo onego obed gi gombo mar bedo jodong-kanyakla mondo gikony owetegi gi nyiminegi. Muma wacho ni chwo ma timo kinda mondo gibed jodong-kanyakla “dwaro tich maber.” (1 Tim. 3:1) Ka pok owadwa obedo jaduong’-kanyakla, nyaka okwong obed jakony-tich. Jokony-tich konyoga jodongo e yore mang’eny. Jodong-kanyakla kod jokony-tich konyo owetegi gi nyiminegi ka gibolore kendo gitimo kinda e tij lendo. Owete ma rowere nyalo bedo jokony-tich kata ka pok gichopo johigni 20. Jokony-tich inyalo ket obed jodongo kata ka pok gichopo johigni 25.

¹⁶ Ere kaka inyalo chopo e migepego? Muma wacho gik ma onego itim. Kata kamano, ng’e ni gik ma dwarorego otenore kuom puonj mag Muma, hera miherogo Jehova, kaachiel gi hera miherogo joodu kod kanyakla. (1 Tim. 3:1-13; Tito 1:6-9; 1 Pet. 5:2, 3) Tem mondo ing’e moro ka moro kuom gik ma dwarorego e yo maber. Kwa Jehova mondo okonyi chopo gik ma dwarorego. c

17. Ere kaka owadwa ma rawera nyalo ikore bedo dichwo maber kendo wi ot maber? (Ne picha bende.)

¹⁷ Bedo wi ot. Mana kaka Yesu nowacho, moko kuom chwo ma Jokristo nyalo yiero ni ok gibi kendo. (Mat. 19:12) Kata kamano, ka iyiero kendo, ibiro bedo gi migawo momedore kaka wi ot. (1 Kor. 11:3) Jehova dwaro ni dichwo oher chiege, kendo orite e yor ringruok kod e yor chuny. (Efe. 5:28, 29) Kido kod lony ma wasewuoye e sulani, kuom ranyisi, bedo gi nyalo mar paro, miyo nyimine luor, kendo bedo ng’at migeno,  biro konyi ka koro in wi ot. Ibiro bedo dichwo maber kod wi ot maber.

18. Ere kaka owadwa ma rawera nyalo ikore bedo wuoro maber?

¹⁸ Bedo wuoro. Bang’ kisekendo, inyalo yudo nyithindo. Ranyisi mar Jehova nyalo puonji ang’o e wi bedo wuoro maber? Nitie puonj mang’eny. (Efe. 6:4) Jehova nonyiso Yesu Wuode ayanga ni nohere kendo oyie kode. (Mat. 3:17) Ka ibedo wuoro, ne ni kinde ka kinde inyiso nyithindi ni iherogi. Pwogi kuom gik mabeyo ma gitimo. Wuone ma luwo ranyisi mar Jehova konyoga nyithindgi mondo gibed Jokristo motegno. Inyalo chako ikori ne migawo ma kamano sani kuom dewo jomamoko e odu kod e kanyaklau, kendo timo gik ma nyiso ni iherogi kendo imor kodgi. (Joh. 15:9) Mano biro konyi e kinde mabiro ka koro in wi ot kendo wuoro. Ka kindeno pok ochopo, bed ng’at minyalo gen e wang’ Jehova, e odu, kod e kanyaklau.

19-20. Gin ang’o ma owete ma rowere nyalo timo mondo gibed Jokristo motegno? (Ne picha manie nyim gaset.)

¹⁹ Un owetewa ma rowere, ng’euru ni bedo Jokristo motegno ok en gima biroga abira kende. Nyaka iyier joma ibiro luwo ranyisigi, ibed gi nyalo mar paro, ibed ng’at migeno, ipuonjri lony moko ma biro konyi e ngimani mapile, kendo iikri ne migepe ma kinde mabiro.

²⁰ Samoro kichako paro e wi migepe mibiro bedogo e kinde mabiro, inyalo winjo kiluor matin. Kata kamano, inyalo dhi maber e migepego. Ng’e ni Jehova oikore konyi. (Isa. 41:10, 13) Owete gi nyimine manie kanyaklau bende oikore konyi. Kitimo dongruok mibedo Jakristo motegno, ibiro bedo mamor ahinya. Waherou ahinya un owetewa ma rowere! Mad Jehova guedh kinda mutimo sani mondo ubed Jokristo motegno!—Nge. 22:4.