Nyaka bed ni ihero mich mopogore opogore ma Jehova osemiyowa, to mano oriwo nyaka thuolo ma in-go mar yiero kaka ibiro tiyo gi michgo. Gima iwuoro en ni Muma wacho ni kong’o en mich moa kuom Nyasaye, kendo omedo wacho kama: “Chiemo miyo ji bedo mamor, kendo kong’o miyo ji winjo maber.” (Ekl. 10:19; Zab. 104:15) Kata kamano, samoro iseneno kaka madho kong’o mokalo tong’ osekelo ne jomoko chandruok. E wi mano, nitie paro kod chike mopogore opogore e wi kong’o ka luwore gi oganda ma ng’ato wuokie. Kuom mano, en paro mane ma Jakristo onego obedgo e wi madho kong’o?

Bed ni wadak kanye kata wapon e oganda mane, ka wayie mondo paro ma Nyasaye nigo e wi kong’o e ma otawa, mano biro kelonwa ber mosiko.

Samoro isefwenyo ni thoth ji e pinyni ohero madho kong’o asasa kendo gitimo kamano nyading’eny. Nitie joma madho kong’o mondo gikuwe wigi. To jomamoko to madhe mondo ginyagre gi chandruoge ma gin-go. To kuonde moko, madho kong’o mang’eny nyiso ni ng’ato osebedo ng’ama duong’, kendo koro ok en nyathi.

Jokristo to luwoga paro ma Jachuechgi ma jahera osemiyogi. Kuom ranyisi, osemiyogi siem e wi rach ma madho kong’o asasa nyalo kelonegi. Samoro wasesomo e Ngeche 23:29-35 e wi masiche kod chandruoge ma ng’at momer yudoga. a Daniel, ma en jaduong’-kanyakla e pinje mag Europe, paro kaka ngimane ne chal ka pok nobedo Jakristo madier. Owacho kama: “Madho kong’o asasa nomiyo atimo yiero moko maricho kendo ma nokelona lit mang’eny ma pod anyagorago nyaka sani.”

Ere kaka Jokristo nyalo tiyo maber gi mich ma gin-go mar timo yiero mondo gigeng’ masiche ma madho kong’o asasa nyalo kelonegi? Dwoko en mana yie mondo pach Nyasaye e ma ota pachwa kod timbewa.

We wanon ane gima Muma wacho e wi kong’o kod gimomiyo jomoko madhoga kong’o.

Muma ok kwed madho kong’o. Owacho ni divai nyalo miyo ng’ato mor. Owacho kama: “Dhi icham chiembi gi mor, kendo imadh divai gi chuny mamor.” (Ekl. 9:7) Nitie kinde moko ma Yesu nomadho divai, kendo kata mana jotich Jehova mamoko machon ne madhoga divai.—Mat. 26:27-29; Luka 7:34; 1 Tim. 5:23.

Kata kamano, Muma nyisowa maler pogruok manie kind madho kong’o kod mer. Owacho kama achiel kachiel: “Kik umer gi divai.” (Efe. 5:18) Bende owacho ni “jomer . . . ok noyud pok e Pinyruodh Nyasaye.” (1 Kor. 6:10) Ee, Jehova kwedo matek madho kong’o asasa kod mer. Kar luwo paro ma joma olworowa nigo e wi madho kong’o, dwarore ni waluw pach Nyasaye.

Jomoko nenoga ni ginyalo madho kong’o mang’eny ma ok gimer. Kata kamano, mano ok en paro maber kata matin. Muma nyisowa maler ni dichwo kata dhako ma en ‘misumba mar divai mang’eny’ nyalo donjo e timbe maricho kata ketho winjruokne gi Nyasaye. (Tito 2:3; Nge. 20:1) Bende, Yesu nosiemowa ni tim mar “metho ahinya” nyalo mono ng’ato donjo e piny manyien. (Luka 21:34-36) Kuom mano, ang’o ma nyalo konyo Jakristo mondo kik oyud chandruoge ma joma madhoga kong’o yudoga?

Ka wayie mondo chike mag oganda ma ne waponie e ma ota paro ma wan-go e wi kong’o, mano nyalo hinyowa. Jokristo nyisoga rieko sama ging’ado paro ka luwore gi dwach Jehova e weche mag chiemo kod metho. Muma paronwa kama: “Bed ni uchiemo, kata umetho, kata utimo gimoro amora, timuru gik moko duto ne duong’ mar Nyasaye.” (1 Kor. 10:31) Ma luwogi gin penjo kod puonj mag Muma ma nyalo konyowa ahinya:

Be amadhoga kong’o mana ni mondo ji ohera? Wuok 23:2 wacho kama: “Kik itim gima rach mana nikech ji mang’eny timo.” Jehova nosiemo Jo-Israel ni kik giluw timbe joma ne ok tim dwache. Siemno pod konyo Jokristo e ndalowagi. Ka wayie mondo osiepewa e ma ota gik ma waparo kata yiero ma watimo e wi kong’o, mano nyalo miyo waketh chike Jehova kendo ketho winjruok maber ma wan-go kode.—Rumi 12:2.

Be amadhoga kong’o mondo anyis jomamoko kaka an ng’at ma ratego? E ogendni moko, madho kong’o ding’eny kendo madhe asasa en gima ji mang’eny oyiego. (1 Pet. 4:3) Kata kamano, ne ane gima inyisowa e 1 Jo-Korintho 16:13. Owacho kama: “Sikuru ka uneno, chung’uru matek e yie, beduru jochir, kendo ubed motegno.” Be kong’o nyalo konyo ng’ato bedo motegno? Ooyo. Kong’o nyalo lalo pach ng’ato mochak timo timbe moko ma ok owinjore. Kuom mano, madho kong’o asasa ok nyis ni ng’ato en ratego, kar mano, onyiso ni ng’atno en ng’ama nyap. Isaya 28:7 wuoyo kuom ng’at mobayo yo nikech kong’o. Ng’atno kwang’ kendo chwanyore.

Teko madier wuok kuom Jehova, kendo oriwo siko ka waneno kendo chung’ motegno e yie. (Zab. 18:32) Jakristo madier nyalo nyiso ni Jehova osemiye teko kuom bedo motang’, kendo timo yiero ma ok bi ketho winjruokne gi Jehova. Ka ne Yesu nie piny, nonyiso ni en gi teko ma Jehova chiwo, kendo ji nomiye luor nikech kinde duto nojachir sama notimo gik makare.

Be amadhoga kong’o mondo anyagra gi chandruoge? Jandik-zaburi moro nowacho kama: “Ka ne parruok opong’o chunya, in [Jehova] e ma ne ihoya.” (Zab. 94:19) Sama  parruok obembi, gen Jehova mondo okonyi to ok kong’o. Yo maber minyalo nyisogo ni igeno Jehova en kuom wuoyo kode e lamo nyading’eny. Bende, thoth ji osefwenyo ni sumo rieko kuom Jokristo motegno nyalo konyogi. Kuom adier, madho kong’o mondo wanyagre gi chandruogewa nyalo mayowa teko mar chung’ motegno mondo watim gik makare. (Hos. 4:11) Daniel, ma ne wasewuoye kuome motelo nowacho kama: “Naparoraga ahinya kendo chunya ne chandaga nikech gik ma nasetimo. Kata obedo ni namethoga mondo anyagra gi parruok, chandruoge to pod nomedore ameda, kendo nalalo osiepega. E wi mago, nanenora kaka ng’at ma nono ahinya.” Gikone, ang’o ma nokonyo Daniel? Owacho kama: “Nafwenyo ni Jehova e ma ne nyalo konya to ok kong’o. Mano nomiyo anyagora maber gi chandruoge ma ne an-go kendo loyogi.” Adiera en ni Jehova oikorega kinde duto konyowa kata obedo ni wanyalo bedo e chal matek manade.—Fil. 4:6, 7; 1 Pet. 5:7.

Ka po ni seche moko imadhoga kong’o, donge inyalo nonori kitiyo gi penjo ma luwogi: ‘Be ng’ato ang’ata e odwa kata osiepna moro oseganyisa ni yo ma amadhogo kong’o ok ber?’ Ka po ni en kamano, mano nyalo nyiso ni isechako madho kong’o e yo ma nyalo keloni hinyruok to pok ifwenyo. ‘Be ametho mokalo kaka ne ametho chon?’ Ka en kamano, ng’e ni ichomo kama kong’o dhi loki misumbane. ‘Be ayudoga ka tekna riyo ma ok amadho kong’o kuom ndalo moko?’ Ka en kamano, mano nyiso ni madho kong’o osebedo tim mosegurore ahinya e chunyi kata isebedo misumba kong’o. Nyalo dwarore ni imany kony kuom joma olony mondo okonyi loyo timno.

Nikech chandruoge ma madho kong’o keloga, Jokristo moko oseyiero mar weyo ma ok gimadho kong’o kata matin. Jomoko to nyalo yiero ni ok gibi madho kong’o nikech ok omit e dhoggi. Ka po ni osiepni moro otimo yiero ma kamano, inyalo bedo mang’won kode kuom nyiso luor ne yiero mosetimo ma ok ing’adone bura.

 Samoro isefwenyo ni en gima nyiso rieko keto tong’ sama imetho. Inyalo yiero madho kong’o dichiel e juma, kata madhe matin sama ichiemo. Jomoko oseng’ado ni ok gibi madho kong’o ma tekregi ng’eny kata sama okik kong’o ma kamago gi math mamoko. Ka ng’ato oseng’ado ni obiro madho kong’o marom nade kendo ni obiro timo kamano nyadidi, mano biro konye mondo kik okal tong’. Bende, onge tiende mondo wi Jakristo motegno okuodi nikech paro moseng’ado e wi wach madho kong’o.

Sama watimo yiero e wi wach madho kong’o, onego wapar jomamoko. Jo-Rumi 14:21 wacho kama: “Ber mondo kik icham ring’o, kata madho divai, kata timo gimoro amora ma kelo chwanyruok ne owadu.” Ere kaka inyalo luwo puonjno? Nyis hera mar owete. Ka ng’at machielo nyalo chwanyore koneni kimadho kong’o, donge hera biro chwali mondo kik imadh kong’o? Timo kamano nyiso ni ichiwo luoro ne paro ma jomamoko nigo, kendo ni imanyo gik ma kelonegi ber, to ok mana gik ma keloni ber in iwuon.—1 Kor. 10:24.

E wi mano, nitie chike mag sirkal monego ta yiero ma Jakristo timo. Kuom ranyisi, nitie chike ma nyiso higni ma ng’ato onego obedgo e ka ochak madho kong’o, kata chike ma kwero madho kong’o sama ng’ato riembo mtoka, kata sama otiyo gi masinde moko.—Rumi 13:1-5.

Jehova osemiyowa mich mang’eny mabeyo kendo odwaro ni wabed mamor gi michgo. Mano oriwo mich mar yiero gima wabiro chamo kod ma wabiro madho. Mad wati gi thuolo mosemiwa mar timo yiero e nyiso ni wadwaro moro Wuonwa manie polo.