SULA MAR PUONJRUOK 49
WER 147 Ngima ma Nyaka Chieng’ Osing
Ang’o ma Dwarore ni Itim Mondo Idag Nyaka Chieng’?
“Ng’ato ka ng’ato mong’eyo Wuod Nyasaye kendo ma nyiso yie kuome, [biro bedo] gi ngima ma nyaka chieng’.”—JOH. 6:40.
GIMA SULANI WUOYE
Sulani biro lero ber ma Jokristo mowal kod Jokristo ma gin rombe mamoko yudo nikech misango mar Yesu Kristo.
1. Ang’o momiyo ji mathoth paro ni dak nyaka chieng’ ok nyalre?
JI MANG’ENY yieroga kit chiemo ma gichamo kendo rieyo dendgi pile nikech gidwaro ni gibed gi ngima maber. To ging’eyo ni kata gitim mago duto pod gibiro mana bedo moti kae to githo. Giparo ni dak nyaka chieng’ en gima ok nyalre nikech chandruoge ma giyudo kod bedo moti. Kata kamano, Yesu nowacho ni “ngima ma nyaka chieng’” en gima nyalore mana kaka Johana 3:16 gi 5:24 nyiso.
2. Ang’o ma Johana sula mar 6 wacho e wi ngima ma nyaka chieng’? (Johana 6:39, 40)
2 Chieng’ moro, Yesu nopidho ji mang’eny gi makate kod rech e yor hono. a Mano ne en wach miwuoro. Kata kamano, weche ma nowacho odiechieng’ ma noluwo nomako dhogi ahinya. Kinyne, ogandano noluwo Yesu Kapernaum machiegni gi dho wath ma Galili, kendo Yesu nonyisogi ni e kinde mabiro ne idhi chier ji mondo giyud ngima ma nyaka chieng’. (Som Johana 6:39, 40.) Temie paro kaka wachno biro mulo wedeni kod osiepeni mosetho! Weche ma Yesu nowacho miyo wabedo gadier ni ji mang’eny mosetho ibiro chier, kendo in kaachiel gi wedeni kod osiepeni unyalo dak nyaka chieng’. Kata kamano, weche ma Yesu nowacho ma yudore e Johana sula mar 6 osebedo matek ne jomoko winjo. We wane ane wechego e yo matut.
3. Ka luwore gi Johana 6:51, ang’o ma Yesu nowacho kuome owuon?
3 Ka ne oganda ma ne ni Kapernaum oneno kaka Yesu nomiyogi makate, mano noparonegi kaka Jehova nosebedo ka pidho Jo-Israel ka ne gin e thim. Nomiyogi manna ma Ndiko luongo bende ni “makate moa e polo.” (Zab. 105:40; Joh. 6:31) Yesu nowuoyo kuom manna mondo opuonjgo ogandano wach moro. Kata obedo ni Nyasaye nochiwo manna e yor hono, joma nochame gikone notho mana kaka jomamoko. (Joh. 6:49) Mopogore gi mano, Yesu nowacho ni en e “makate madier moa e polo,” “makate mar Nyasaye,” kendo “makate mar ngima.” (Joh. 6:32, 33, 35) Yesu nomedo lero pogruok moro maduong’ ma ne nitie e kind manna kod en owuon. Nowacho kama: “An e makate ma ne olor koa e polo. Ka ng’ato ochamo makateno, obiro dak nyaka chieng’.” (Som Johana 6:51.) Wachno nomako dho Jo-Yahudi. Ere kaka Yesu ne nyalo wacho ni en e “makate ma ne olor koa e polo,” kendo ni noloyo manna ma Nyasaye nomiyo kweregi e yor hono? Yesu nowacho weche ma ne nyalo konyogi winjo tiend makate ma nowuoye. Nonyisogi niya: “Makate ma abiro chiwo . . . en ringra.” Tiend wechego ne gin ang’o? Dwarore ni wawinj tiend wechego nikech mano biro miyo wayud ngima ma nyaka chieng’ wan kaachiel gi wedewa kod osiepewa. We wanon ane tiend weche ma Yesu nowachogo.
MAKATE MAR NGIMA KOD RINGRE YESU
4. Ang’o momiyo jomoko nobwok ka ne giwinjo weche ma Yesu nowacho?
4 Moko kuom joma ne winjo Yesu nobwok ka nowacho ni “abiro chiwo ringra mondo piny obed gi ngima.” Dibed ni ne giparo ni Yesu ne dwaro ni gicham ringrene? (Joh. 6:52) Ne ane weche ma Yesu nomedo wachonegi: “Ka ok uchamo ringre Wuod dhano kendo ka ok umadho rembe, uonge ngima kuomu uwegi.”—Joh. 6:53.
5. Ang’o momiyo wanyalo bedo gadier ni Yesu ne ok opuonjo ji ni gimadh rembe ma sie?
5 Chon e kinde mag Noa, Nyasaye nokwero dhano ni kik gicham remo. (Cha. 9:3, 4) Jehova nonwoyo wachno e Chike ma nomiyo Jo-Israel. Ng’ato ang’ata ma nochamo remo ne “nyaka negi.” (Lawi 7:27) Yesu bende nojiwonegi ni nonego giluw chike duto ma Nyasaye nomiyo Musa. (Mat. 5:17-19) Omiyo, onge kaka nonyalo nyiso Jo-Yahudi ni gicham ringrene ma sie kendo madho rembe. Yesu ne temo mana puonjogi kaka ne ginyalo yudo “ngima ma nyaka chieng’.”—Joh. 6:54.
6. Ere kaka onego wawinjo tiend weche ma Yesu nowacho ni nonego ji ocham ringrene kendo madho rembe?
6 Ang’o ma Yesu ne temo wacho? Nenore ni Yesu notiyo gi wechego e yor ranyisi, mana kaka nosetiyo gi pi e yor ranyisi ka nowuoyo gi Nya-Samaria moro. Nonyise niya: “Ng’at ma modho pi ma abiro miye, riyo ok bi make ngang’, to pi ma abiro miye nobedne kaka soko mar pi ma bubni ka chiwo ngima ma nyaka chieng’.” (Joh. 4:7, 14) b Yesu ne ok tem nyiso Nya-Samariano ni nonyalo yudo ngima mochwere mana kuom modho pi ma sie. Kamano bende, Yesu ne ok tem nyiso oganda ma ne wuok Kapernaum ni gicham ringrene kendo madho rembe ma sie mondo e ka giyud ngima mochwere.
KINDE MORO MACHIELO MA YESU NOTIYOE GI WECHE KAKA MAGO
7. Ang’o ma dinde moko osepuonjo e wi weche ma yudore e Johana 6:53?
7 Dinde moko puonjo ni weche ma Yesu nowacho e Johana 6:53 nyiso yo monego otimgo nyasi mar Chiemb Odhiambo mar Ruoth nikech ka ne otimo nyasino nowuoyo bende e wi chamo ringrene kod madho rembe. (Mat. 26:26-28) Giwacho ni ji duto mobiro e nyasi mar Chiemb Odhiambo mar Ruoth onego ocham makate kendo madho divai sama ikadhogi. Be mano en paro mowinjore? Ber paro wachno e yo matut nikech higa ka higa, ji mathoth chokorega kodwa e nyasino. Wadwaro neno pogruok ma nitiere e kind weche ma Yesu nowacho e Johana 6:53 kod ma nowacho e Chiemb Odhiambo mar Ruoth.
8. Gin pogruok mage ma nitie e kind weche ma Yesu nowacho e Johana 6:53 kod ma nowacho e nyasi mar Chiemb Odhiambo mar Ruoth? (Ne picha bende.)
8 We wane ane pogruok moko ariyo mantie e kind weche ma Yesu nowachogo. Mokwongo, kinde ma Yesu nowachoe weche ma yudore e Johana 6:53-56 kod kama nowachogie. Nowacho wechego ne Jo-Yahudi ma ne ni Galili e higa mar 32 Bang’ Kristo. Mano ne en higa achiel kama, ka ne pok ochako nyasi mar Chiemb Odhiambo mar Ruoth ma notimo Jerusalem. Mar ariyo, joma nowachonegi wechego. Thoth joma ne winje ma ne ni Galili nodich mana gi dwachgi kar keto pachgi kuom puonj mag Yesu kod Pinyruodh Nyasaye. (Joh. 6:26) Mano e momiyo ka ne Yesu owuoyo e wi weche ma ok giwinj tiendgi, ne giweyo keto yie kuome. Nitie kata moko kuom jopuonjrene ma noweyo luwe. (Joh. 6:14, 36, 42, 60, 64, 66) Jogo nopogore ahinya gi joote Yesu ma ne en-go ka notimo nyasi mar Chiemb Odhiambo mar Ruoth e higa mar 33. E kindeno, jootene 11 nomakore kode kata obedo ni ne ok giwinjo tiend weche ma Yesu ne puonjogi. Mopogore gi joma ne ni Galili, joote Yesu ne ni gadier ni Yesu ne en Wuod Nyasaye ma noa e polo. (Mat. 16:16) Nopwoyogi kowachonegi niya: “Un e jo ma osemakore koda e masichena.” (Luka 22:28) Weche ariyo ma wasenonogi kwedo paro ma jomoko nigo ni weche ma Yesu nowacho e Johana 6:53 nyiso yo monego otimgo nyasi mar Chiemb Odhiambo mar Ruoth. To pod nitie pogruok mamoko momedore.
Johana sula mar 6 wuoyo kuom gima Yesu nowacho ka nowuoyo gi Jo-Yahudi ma ne ni Galili (koracham). Higa achiel bang’e nowuoyo gi grup matin mar jootene ma nomakore kode ka en Jerusalem (korachwich) (Ne paragraf mar 8)
IN BENDE WACHNO OMAKI
9. Gin jomage ma Yesu nonyiso weche ma nowacho e nyasi mar Chiemb Odhiambo mar Ruoth?
9 E nyasi mar Chiemb Odhiambo mar Ruoth, Yesu nomiyo jootene makate ma ok oketie thowi, kendo nonyisogi ni makateno ochung’ ne ringrene. Kae to nomiyogi divai monyisogi ni divaino ochung’ ne ‘rembe mar singruok.’ (Mar. 14:22-25; Luka 22:20; 1 Kor. 11:24) Mano ne en singruok maberie moloyo. Noluongo singruogno ni singruok manyien, kendo notime gi “dhood Israel [mar roho]” ma biro locho e “Pinyruodh Nyasaye.” Ne ok otimo singruogno gi dhano duto. (Hib. 8:6, 10; 9:15) Jootego ne ok owinjo tiend weche ma Yesu nowachogo. Kata kamano, bang’e ne idhi walgi gi roho kendo ketogi e singruogno mondo gibi gidag gi Yesu e polo.—Joh. 14:2, 3.
10. Ere kaka weche ma Yesu nowacho ka ne en Galili opogore gi ma nowacho e nyasi mar Chiemb Odhiambo mar Ruoth? (Ne picha bende.)
10 E nyasi mar Chiemb Odhiambo mar Ruoth, Yesu ne wuoyo gi “kueth matin.” Grup mar kueth matinno nochakore gi jootene ma ne ni kode e nyasino. (Luka 12:32) Jootenego kaachiel gi jomamoko ma ne dhi bedo e grubno nonego ocham makate kendo madho divai. Gin e joma biro locho gi Yesu e polo. Joma Yesu nowuoyogo e nyasino nopogore gi joma nowuoyogo ka ne en Galili. Weche ma nowacho odhiambono ne mulo mana ji matin, to weche ma nowacho ne oganda ma ne ni Galili ne dhi mulo ji mang’eny.
Joma chamo makate kendo madho divai gin mana grup moro matin, kata kamano, ng’ato ang’ata nyalo nyiso yie kuom Yesu kendo yudo ngima ma nyaka chieng’ (Ne paragraf mar 10)
11. En ang’o ma Yesu nowacho ka ne en Galili ma nyiso ni ne ok owuo mana kuom grup moro matin?
11 Ka ne Yesu wuoyo Galili e higa mar 32, nowuoyo ahinya-ahinya gi joma ne dwaro makate ma sie. Kata kamano, nonyisogi gima ne dwarore ahinya ma ne dhi miyogi ngima ma nyaka chieng’. Bende, Yesu nowacho ni joma notho ne idhi chier chieng’ giko mondo gidag nyaka chieng’. Ne ok owuo mana kuom grup moro matin, mana kaka notimo e nyasi mar Chiemb Odhiambo mar Ruoth. Kar mano, ka ne en Galili, nowuoyo e wi gueth ma ji duto ne dhi yudo. To mano e momiyo nowacho kama: “Ka ng’ato ochamo makateno, obiro dak nyaka chieng’; . . . Makate ma abiro chiwo mondo piny obed gi ngima, en ringra.”—Joh. 6:51. c
12. Ang’o ma dwarore ni watim mondo wayud gueth ma Yesu nowuoyoe?
12 Be Yesu ne temo wacho ni ng’ato ang’ata ma nodak e piny ne dhi yudo ngima ma nyaka chieng’? Ooyo. Mana joma ne dhi chamo makateno, tiende ni joma ne dhi ‘nyiso yie kuome.’ Thoth joma luongore ni Jokristo paroga ni ibiro wargi mana ka giyie kuom Yesu kendo nene kaka jawargi. (Joh. 6:29) Kata kamano, gima iwuoro en ni oganda maduong’ ma noyie kuom Yesu noduogo ojwang’e bang’e. Ang’o momiyo ne gitimo kamano?
13. Ang’o ma dwarore ni ng’ato otim mondo obed jalup Yesu madier?
13 Thoth joma Yesu nomiyo makate, noyie luwe tek mana ni nomiyogi gige ringruok ma ne gidwaro. Ne gidwaro mana ni Yesu ochanggi e yor hono, omigi chiemo, kendo opuonjgi gik ma ne gidwaro winjo. Kata kamano, Yesu nonyiso maler ni gima nokele e piny kae ne ok en chopo dwachgi, to nobiro mondo opuonjgi gima ne dwarore ni gitim mondo gibed jolupne. Ne dwarore ni giyie gi puonjge kendo giluw weche duto ma nopuonjogi.—Joh. 5:40; 6:44.
14. En ang’o ma nyaka watim mondo wayud ngima ma nyaka chieng’?
14 Yesu nojiwo oganda ma nowuoyogo ni ne dwarore ni ginyis yie. Nonego ginyis yie kuom ang’o? Ne dwarore ni ginyis yie kuom teko ma ringrene kod rembe ne nigo mar reso dhano. Mano e yie ma Jo-Yahudi ne dwarore ni obedgo, kendo mano e yie monego wabedgo. (Joh. 6:40) Omiyo, weche ma Yesu nowacho e Johana 6:53, nyiso ni dwarore ni wanyis yie kuom misango mar rawar mondo wayud ngima ma nyaka chieng’. Mano thuolo moyaw ne ji mang’eny.—Efe. 1:7.
15-16. Gin ang’o ma wasepuonjore e Johana sula mar 6?
15 Weche ma yudore e Johana sula mar auchiel nigi puonj madongo ahinya ma nyalo konyowa e kindegi. Ginyiso maler kaka Yesu dewowa. Ka ne en Galili, nochango jotuo, nopuonjo ji e wi Pinyruoth, kendo nomiyo ji chiemo. (Luka 9:11; Joh. 6:2, 11, 12) To maduong’ie moloyo, nopuonjo ji ni en e “makate mar ngima.”—Joh. 6:35, 48.
16 Joma noluongo ni “rombe mamoko” ok onego ocham makate kendo madho divai e nyasi mitimoga higa ka higa mar Chiemb Odhiambo mar Ruoth. (Joh. 10:16) Kata kamano, pod gichamoga ringre Yesu kendo madho rembe e yor ranyisi. Gitimoga kamano sama ginyiso yie kuom misango ma Yesu nochiwo mondo owargo dhano. (Joh. 6:53) Mopogore gi mano, joma chamo makate kendo madho divai nyiso ni gin e singruok manyien kendo gin gi pok e Pinyruodh polo. Kuom mano, bed ni wan Jokristo mowal kata rombe mamoko, weche ma yudore e Johana sula mar 6 nyalo konyowa waduto. Wechego jiwonwa gimomiyo dwarore ni wabed gi yie mondo wayud ngima ma nyaka chieng’.
WER 150 Dwaruru Jehova Mondo Uyud Warruok
a Johana 6:5-35 nowuoye e sula motelo ne mae.
b Pi ma Yesu ne wuoyoe ochung’ ne gik moko duto ma Jehova timonwa mondo wayud ngima ma nyaka chieng’.
c Johana sula mar 6 tiyo gi weche kaka “ng’ato” kata “ng’ato ang’ata” kowuoyo kuom joma nyalo dak nyaka chieng’.—Joh. 6:35, 40, 47, 54, 56-58.
