SULA MAR PUONJRUOK 51
WER 3 Jehova e Tekowa Kendo e Genowa
Jehova Ogeno Pi Wang’wa Ahinya
“Kan pi wang’a e chupani, donge isendikogi piny e bugi?”—ZAB. 56:8.
GIMA SULANI WUOYE
Wabiro nono okang’ ma Jehova ong’eyogo lit ma wakaloe, kod kaka ohoyoga chunywa.
1-2. Gin chal kaka mage ma nyalo miyo wachuer pi wang’wa?
WADUTO wasegachuero pi wang’wa. Sama wamor ahinya, pi wang’wa nyaloga chuer. Nyalo bedo ni pi wang’i nochuer ka ne gimoro makende otimoreni, kuom ranyisi, ka ne inyuolo nyathini mokwongo, ka ne iparo wach moro ma nosetimoreni, kata ka niromo gi osiepni moro ma nisebudho ahinya ka pok ineno.
2 Kata kamano, kinde mang’eny, pi wang’wa nyisoga lit ma wan-go e chunywa. Kuom ranyisi, wanyalo ywak sama ng’at ma wageno otimonwa gimoro ma ok kare. Pi wang’wa nyalo chuer sama wan gi rem nikech tuo, kata sama osiepwa kata watwa moro ma wahero otho. E kinde kaka mago, wanyalo winjo mana kaka janabi Jeremia nowinjo ka ne Jo-Babulon oketho Jerusalem. Nondiko kama: “Pi wengena mol ka aora . . . Pi wang’a biro chuer ma ok chogi.”—Ywa. 3:48, 49.
3. Jehova winjoga nade sama oneno ka jotichne chandore? (Isaya 63:9)
3 Jehova ong’eyo okang’ ma waseywakie nikech gik ma chandowa. Muma nyisowa ni Jehova ong’eyo maber gik malit ma jotichne kaloe, kendo owinjowa sama waywakne mondo okonywa. (Zab. 34:15) Kata kamano, Jehova timoga mathoth moloyo mana winjowa. En e Wuonwa kendo oherowa ahinya. Mano e momiyo sama onenowa ka waywak, owinjoga malit ahinya kendo okawo okang’ mar konyowa.—Som Isaya 63:9.
4. Wadwaro nono ranyisi mag jomage, to ang’o ma ranyisigi biro puonjowa e wi Jehova?
4 Muma nyiso kaka Jehova nowinjo malit ka ne jotichne ywak kod okenge ma nokawo mondo okonygi. Wanyalo neno mano ka wanono ranyisi mar Hana, Daudi, kod Ruoth Hezekia. Ang’o momiyo ne gichuero pi wengegi? Ere kaka Jehova nokonyogi? To ere kaka ranyisigi nyalo hoyowa sama pi wang’wa chuer nikech wan gi lit, ondhogwa, kata waneno ni waonge geno moro amora?
SAMA PI WANG’WA CHUER NIKECH LIT MA WAN-GO
5. Chandruoge ma Hana noromogo nomiyo owinjo nade?
5 Hana noromo gi chandruoge mopogore opogore ma nomiyo oywak malit. Ne en e kend mar doho kendo nyieke ma niluongo ni Penina nochaye ahinya. E wi mano, Hana ne onge nyathi, to Penina ne nigi nyithindo mang’eny. (1 Sa. 1:1, 2) Penina ne siko ka chwoyo chuny Hana gi weche malit nikech ne oonge nyathi. Ka dine in e chal ma kamano, dine iwinjo nade? Hana ne “[ywakga] malit ma kata chiemo ok nochiem” nikech ‘chunye ne lit.’—1 Sa. 1:6, 7, 10.
6. Ang’o ma Hana notimo ma nohoyo chunye?
6 Ang’o ma Hana notimo ma nohoyo chunye? Achiel kuom gik ma nokonye ne en dhi e tabernakel kama nilamoe Jehova. Nyalo bedo ni ka nochiegni gi ranga laru mar tabernakel, nochako ‘lemo koywak malit ne Jehova.’ Nosayo Jehova niya: “[Ne] chandruokna kendo ipara an jatichni.” (1 Sa. 1:10b, 11) Hana nonyiso Jehova weche duto ma ne chande. Onge kiawa ni Jehova nowinjo marach ahinya ka noneno pi wang’ nyare ma nogenono ka chuer nikech lit ma ne en-go e chunye!
7. Hana nowinjo nade bang’ ka nosenyiso Jehova gik ma ne chande?
7 Hana nowinjo nade bang’ ka nosenyiso Jehova weche duto ma ne chando chunye, kendo bang’ ka Eli ma ne en Jadolo Maduong’ osenyise ni obed gadier ni Jehova ne dhi winjo kwayone? Muma wacho niya: “Hana nowuok kanyo modhi chiemo kendo wang’e ne nyiso ni koro ok okuyo.” (1 Sa. 1:17, 18) Kata obedo ni ne ok otiek chandruogene, nowinjo ka koro chunye okuwe. Ne en gadier ni Jehova ong’eyo kaka nowinjo kendo ni oikore konye. Jehova nowinjo ywakne kendo bang’e noguedhe momako ich.—1 Sa. 1:19, 20; 2:21.
8-9. Ka luwore gi Jo-Hibrania 10:24, 25, ang’o momiyo onego watim duto ma wanyalo mondo wadhi e chokruogewa? (Ne picha bende.)
8 Puonj ma wayudo. Dibed ni sani ikalo e chal moro matek ma miyo ichuero pi wang’i nikech lit? Samoro pod iywago osiepni, watni, kata achiel kuom joodu ma nyocha otho. E kinde kaka mago, thothwa gomboga ni wabed kar kendwa. Kata kamano, mana kaka Hana ma nodhi e tabernakel moyudo hoch, in bende kidhi e chokruoge mag Jokristo inyalo yudo jip kod hoch. (Som Jo-Hibrania 10:24, 25.) Sama wan e chokruoge, wawinjoga kisomonwa ndiko ma hoyowa, to mano achiel kuom yore ma Jehova konyowago golo lit manie chunywa. Bende, mano nyalo miyo wanyagre maber kata ka chandruogno pok orumo.
9 E chokruogewa, waromoga gi owete gi nyimine moherowa gadier, kendo wawinjoga maber ahinya sama wan kodgi. (1 The. 5:11, 14) Ne ane ranyisi mar owadwa moro ma en painia makende ma jaode notho. Owacho kama: “Pod pi wang’a chuerga ka aparo jaoda. Seche moko abedoga e kona moro kae to aywak malit. Kata kamano, chokruogewa osebedo ka jiwa ahinya. Weche ma owete gi nyimine osebedo ka nyisa jiwaga ahinya. Seche moko anyaloga bedo gi parruok, kata kamano, awinjoga ka chunya okuwe bang’ dhi e chokruogewa.” Sama wan e chokruogewa, Jehova nyalo tiyo gi owetewa gi nyiminewa e tegowa.
Jokristo wetewa nyalo hoyowa (Ne paragraf mar 8-9)
10. Ere kaka wanyalo luwo ranyisi mar Hana sama wakuyo?
10 Gimachielo ma nokonyo Hana ahinya ne en nyiso Jehova kaka nowinjo e chunye kokalo kuom lamo. In bende inyalo ‘keto parruokni duto kuom Jehova’ ka in gadier ni obiro winji. (1 Pet. 5:7) Nyaminwa moro ma jokuoge nonego jaode wacho kama: “Wachno nonyoso chunya ahinya, kendo naparo ni ne ok anyal bedo mamor kendo. To sa asaya ma nawuoyo gi Wuonwa manie polo e lamo, nawinjoga ka chunya okuwe. Nitie kinde ma kata gima nanyalo wacho ne Jehova ne tamaga. Kata kamano, en to nowinjaga. E kinde ma ne an-gi kuyo kod parruok ahinya, nakwayega mondo okonya. Bang’ lemo, nabedoga gi chuny mokuwe, kendo nanyalo dhi nyime timo tijena.” Sama ikuyo kendo iywak ne Jehova, owinjoga malit kendo ong’eyo kaka iwinjo gie sechego. Kata ka chandruogno ok orumo, Jehova nyalo hoyowa kendo miyowa chuny mokuwe. (Zab. 94:19; Fil. 4:6, 7) Oneno kinda mitimo e tije, kendo obiro guedhi ahinya.—Hib. 11:6.
SAMA PI WANG’WA CHUER NIKECH ONDHOGWA
11. Gik maricho ma Daudi noromogo nomiyo owinjo nade?
11 Daudi noromo gi chandruoge mang’eny ahinya ma nomiyo oywakga nyading’eny. Jowasike ne ng’eny, kendo osiepene ma nogeno nondhoge. (1 Sa. 19:10, 11; 2 Sa. 15:10-14, 30) Kinde moro nowacho niya: “Chur ma achurgo osejonya; pi wang’a pong’o kitandana otieno mangima. Adier, pi wang’a mol e piendena.” Ang’o momiyo Daudi ne winjo kamano? En nikech ‘nisande.’ (Zab. 6:6, 7) Gik maricho ma ji ne timo ne Daudi nomiyo okuyo ahinya kendo noywakga malit.
12. Ka luwore gi Zaburi 56:8, en wach mane ma Daudi ne nigo gadier?
12 Kata obedo ni Daudi noromo gi chandruoge mang’eny, pod ne en gadier ni Jehova ohere. Nondiko kama: “Jehova biro winjo ywagruokna.” (Zab. 6:8) Kinde moro Daudi nowacho weche ma yudore e Zaburi 56:8. (Som.) Wechego nyiso kaka Jehova oherowa kendo odewowa ahinya. Daudi nowacho ni ne chal ka gima Jehova ne kano pi wengene e chupa, kata ndikogi e buk. Ne oonge kiawa ni Jehova ne neno gik moko duto ma nokale, kendo ni nodhi konye. Ne en gadier ni Wuon-gi manie polo nong’eyo maber chandruoge ma nokale kod kaka chandruogego ne nyoso chunye.
13. Sama jomoko ochwanyowa, en wach mane ma nyalo hoyowa? (Ne picha bende.)
13 Puonj ma wayudo. Dibed ni sani chunyi onyosore ahinya nikech ng’at ma nigeno nondhogi? Nyalo bedo ni samoro chunyi onyosore nikech chenro ma ne in-go mar donjo e kend nokethore apoya, kata nikech kendni nokethore, kata samoro osiepni ma nigeno noweyo tiyo ne Jehova. Owadwa moro ma jaode noterore kae to oweye nowacho niya: “Wachno nomako dhoga. Ne ok ang’eyo gima datim. Nakuyo ahinya kendo naneno ni an ng’at ma nono. Ne an gi mirima mang’eny.” Ka po ni sani inyagori gi kuyo nikech ng’at ma nigeno nondhogi, bed gadier ni Jehova to ok nyal jwang’i. Owadwano wacho niya: “Asepuonjora ni osiep manie kindwa gi dhano wetewa nyalo rumo. Kata kamano, Jehova en Lwandawa ma kata ang’o ma timre, obiro siko kodwa kendo ok obi weyo joge momakore kode.” (Zab. 37:28) Par bende ni hera mar Jehova tut moloyo hera mar dhano. Lit minyalo bedogo sama ng’at migeno ondhogi, ok nyal pim gi hera ma Jehova oherigo. (Rumi 8:38, 39) Mae e wach maduong’: Kata ng’ato timni mana ang’o, bed gadier ni Wuonu manie polo oheri ahinya.
Bug Zaburi konyowa bedo gadier ni Jehova ni machiegni gi joma chunygi ool (Ne paragraf mar 13)
14. En adiera mane ma wan-go ka luwore gi Zaburi 34:18?
14 Sama ng’ato ondhogowa, weche ma Daudi nowacho e Zaburi 34:18 nyalo jiwowa ahinya. (Som.) Buk moro ma lero Muma nowacho ni “jo ma chunygi ool” miwuoye e ndikono, nyalo bedo joma paro ni “gionge geno moro amora.” Jehova konyoga nade joma nigi paro kaka mago? Mana kaka janyuol ma jahera ma hoyo nyathine sama en gi chandruok, Jehova ni machiegni kodwa kendo kinde duto oikore konyowa sama chunywa onyosore, kata sama ondhogwa. Ogombo ahinya hoyowa sama wakuyo. Osesingonwa gik mang’eny kendo mano miyo wanano sama waromo gi chandruoge.—Isa. 65:17.
SAMA PI WANG’WA CHUER NIKECH WANENO NI WAONGE GENO
15. En chal mane ma nomiyo Hezekia oywak malit?
15 Ka ne ruodh Juda ma niluongo ni Hezekia jahigni 39, tuo moro marach nogoye. Janabi Isaya nonyiso Hezekia ni Jehova nowacho ni tuono ne dhi nege. (2 Ru. 20:1) Ne nenore maler ni Hezekia ne ok dhi chango. Wachno nochande ahinya kendo noywak malit. Nolemo kosayo Jehova mondo okonye.—2 Ru. 20:2, 3.
16. Ere kaka Jehova nodwoko kwayo mar Hezekia?
16 Jehova noneno pi wang’ Hezekia, kendo nokeche monyise niya: “Asewinjo kwayoni kendo aseneno pi wang’i. Abiro changi.” Kokalo kuom janabi Isaya, Jehova nonyiso Hezekia ni nodhi mede ndalo mag ngimane, kendo ni nodhi reso Jerusalem e lwet Jo-Asuria.—2 Ru. 20:4-6.
17. Ere kaka Jehova tegowaga sama wan gi tuoche moko ma ok nyal thiedhi? (Zaburi 41:3) (Ne picha bende.)
17 Puonj ma wayudo. Dibed ni in-gi tuo moro ma ok nyal thiedhi? Wuo gi Jehova e lamo kata sama pi wang’i chuer. Muma nyisowa ni “Wuoro ma kecho ji kendo Nyasach hoch duto” biro hoyowa e masiche duto ma waromogo. (2 Kor. 1:3, 4) En adier ni ok wanyal geno ni Jehova biro golonwa chandruogewa duto e kindegi. Kata kamano, wan gadier ni obiro konyowa nano. (Som Zaburi 41:3.) Kokalo kuom roho maler, Jehova miyowa teko, rieko, kod chuny mokuwe ma konyowa nano. (Nge. 18:14; Fil. 4:13) Bende, otegowa kokalo kuom geno ma wan-go ni machiegnini, tuoche duto biro rumo.—Isa. 33:24.
Jehova biro dwoko lamowa kendo obiro miyowa teko, rieko, kod chuny mokuwe (Ne paragraf mar 17)
18. En ndiko mane ma jiwiga sama ikalo e chal moro matek? (Ne sanduk ma wiye wacho ni, “ Weche ma Hoyowa Sama Pi Wang’wa Chuer.”)
18 Weche ma Jehova nowacho nohoyo Hezekia ahinya. Wach Nyasaye bende nyalo hoyowa ahinya e kindewagi. Sama wan gi parruok, weche Jehova nyalo tegowa kendo hoyowa. (Rumi 15:4) Ka ne nyaminwa moro ma wuok West Africa noyud gi tuo mar kansa, noywakga nyading’eny. Owacho kama: “Ndiko achiel mosebedo ka hoya ahinya en Isaya 26:3. Kata obedo ni ok wanyal tieko chandruogewa, ndikono konyowa bedo gadier ni Jehova nyalo miyowa chuny mokuwe kod teko mar nano e tem moro amora ma waromogo.” Be nitie ndiko moro amora ma jiwiga sama ikalo e chal moro matek, kata sama ineno ni ionge geno moro amora?
19. Ang’o ma wageno kinde ma biro?
19 Wadak e giko mar ndalo mag giko, kendo gik mamiyo waywak biro mana medore. Kata kamano, mana kaka waseneno e ranyisi mar Hana, Daudi, kod Ruoth Hezekia, Jehova neno pi wang’wa kendo owinjoga malit ahinya sama waywak. Ogeno pi wang’wa ahinya. Omiyo, sama wakalo e chal moro matek, dwaher ni wanyis Jehova weche duto ma chando chunywa. Mad wang’ad e chunywa ni ok wabi bedo mabor gi owetewa gi nyiminewa e kanyakla. Weuru mondo weche manie Muma odhi nyime hoyo chunywa. Wan gadier ni ka wadhi nyime nano, Jehova biro guedhowa. Guethgo oriwo singo ma jaber mosemiyowa ni machiegnini obiro yweyo pi wengewa ma chuer sama wan-gi lit, sama ondhogwa, kod sama waneno ni waonge geno. (Fwe. 21:4) E kindego, wabiro chuero mana pi wang’ mag mor.
WER 4 “Jehova e Jakwadha”
