Be isebedo ka isomo gasede mag Ohinga mar Jarito ma higani? Ka en kamano, ne ane ka inyalo dwoko penjo ma luwogi:

En ranyisi mane ma Jehova oseketonwa e yo monenogo mon?

Ok obuon-gi kendo ok one ni chwo beyo moloyo mon. Nyasaye chikonegi ite kendo odewo ahinya kaka giwinjo. Ogeno mon kendo omiyogi tije mopogore opogore e riwruokne.—w24.01, ite mar 15-16.

Ere kaka wanyalo tiyo gi weche ma yudore e Jo-Efeso 5:7 ma wacho ni: “Kik utim kaka gin”?

Jaote Paulo nochiwo siem kojiwowa ni kik wariwre gi joma nyalo miyo obednwa matek makore gi puonj mag Jehova. Mago oriwo joma wanyalo tudorego aching’ kata ma wanyalo tudorego e intanet.—w24.03, ite mar 22-23.

Gin sigendni mage mag miriambo monego watang’go?

Onego watang’ gi weche ma pok wanono korgi ma wayudo ni gin adier mowuok kuom osiepewa ma wageno, ote mag email, kata weche mowuok kuom joma ong’anyo moweyo adiera.—w24.04, ite mar 12.

Gin gik mage ma wang’eyo kod ma ok wang’eyo e wi bura ma Jehova biro ng’ado ne Ruoth Solomon, joma notho Sodom gi Gomora, kod joma notho e Ataro?

Ok wang’eyo ka be Jehova noketho kargi chuth kendo ni ok bi chiergi. Kata kamano, wan gadier ni Jehova ong’eyo weche duto kendo en gi ng’wono mogundho.—w24.05, ite mar 3-4.

Wabedo gadier gi wach mane nikech Nyasaye en “Lwanda”? (Rap. 32:4)

Jehova en kar bwokwa. En Nyasaye migeno kendo kinde duto ochopoga singoge. Ok oyiengni, ok olokga kite, kendo omakore gi dwache.—w24.06, ite mar 26-28.

Ang’o ma nyalo konyi ng’iyo gi kanyakla manyien?

Gen kuom Jehova, ma biro konyi mana kaka osebedo kokonyo jotichne ma kinde mokalo. Kik ipim kanyaklani manyien gi ma niae. Bed modich e kanyakla manyien midhiye kendo item manyo osiepe manyien.—w24.07, ite mar 26-28.

Gin puonj mage ma wayudo e ngeche moko adek ma Yesu nogoyo e Mathayo sula mar 25?

Ngero mar rombe gi diek jiwonwa gimomiyo onego wamakre gi Jehova kod Yesu. Ngero mar nyiri apar ma silili mariek kod mofuwo jiwo gimomiyo onego wasik ka waikore kendo dhi nyime rito. Kae to ngero mar talanta jiwo gimomiyo ber bedo jakinda.—w24.09, ite mar 20-24.

Agola mar hekalu ma Solomon nogero borne ka dhi malo ne romo nade?

E buge moko machon ma nodol, 2 Weche mag Ndalo 3:4 otiyo gi “bede 120,” ma miyo bor mar agolano ka dhi malo bedo mita 53 (fut 175). Kata kamano, e buge moko migeno, ondike ni “bede 20” kendo mano miyo obedo mita 9 (fut 30). Nenore ni bede 20 ne nyalo romore maber gi lach mar kor od hekalu.—w24.10, ita mar 31.

Jakony-tich onego obed “chwor dhako achiel,” mano tiende ang’o? (1 Tim. 3:12)

Mano tiende ni onego obed gi dhako achiel kendo ok onego oterre gi dhako machielo. E wi mano, onego omakre gi jaode kendo kik oyie gombo maricho odong e chunye.—w24.11, ite mar 19.

Ang’o momiyo wanyalo wacho ni Johana 6:53 ok wuo kuom kaka onego otim nyasi mar Chiemb Odhiambo mar Ruoth?

Johana 6:53 wuoyo kuom chamo ringre Yesu kendo madho rembe. Yesu nowacho wechegi e higa mar 32 ne Jo-Yahudi ma ne dwarore ni oket yie kuome ka ne en Galili. Kata kamano, Yesu nochako nyasi mar Chiemb Odhiambo mar Ruoth higa achiel bang’ wacho weche ma yudore e ndikono ka ne en Jerusalem. E ndikoni, Yesu nowuoyo gi joma ne dhi locho kode e polo.—w24.12, ite mar 10-11.