Jaote Paulo nondiko ne Timotheo ma ne en jaduong’-kanyakla wadgi kowachone niya: “Achiki matek e nyim Nyasaye gi Kristo Yesu kod malaike moyier, ni iluw weche mochikgo ma ok ibuono ng’ato kata dewo wang’ ng’ato.”—1 Tim. 5:21.

Mokwongo, we wanon ane ni gin malaike mage ma ok nyal bedo ni iwuoyo kuomgi e ndikono. Nenore maler ni malaikego ok gin grup mar ji 144,000 ma biro dhi e polo. Ka ne Paulo ndiko ne Timotheo, chier mar Jokristo mowal ne pok ochakore. Joote kaachiel gi Jokristo mamoko mowal ne pok obedo chuech mag roho. Omiyo, ne ok ginyal bedo “malaike moyier” miwuoyoe e ndikono.—1 Kor. 15:50-54; 1 The. 4:13-17; 1 Joh 3:2.

Bende, “malaike moyier” miwuoyoe e ndikono ne ok nyal bedo malaike ma nong’anyo e kinde Ataro. Malaikego noriwo Satan lwedo kendo bedo jochiende. Kuom mano, ne gibedo wasik Yesu. (Cha. 6:2; Luka 8:30, 31; 2 Pet. 2:4) E kinde mabiro, ibiro tuegi ma witgi e abiso kuom higni 1,000, kae to bang’e, ibiro kethgi chuth kanyachiel gi Satan.—Juda 6; Fwe. 20:1-3, 10.

Omiyo, nyaka bed ni “malaike moyier” ma Paulo ne wuoyo kuomgi, gin malaike manie polo ma riwo lwedo “Nyasaye gi Kristo Yesu,” ma bende ndikono wuoyo kuomgi.

Nitie malaike gana gi gana momakore gi Nyasaye. (Hib. 12:22, 23) Nenore maler ni malaike duto ok omi migawo machal. (Fwe. 14:17, 18) Kuom ranyisi, Jehova notiyo gi malaika achiel kende e nego jolweny 185,000 mag Asuria. (2 Ru. 19:35) Nyalo bedo ni noor malaike mang’eny “mondo gichok kendo gigol oko gik moko duto ma kelo richo e [Pinyruodh Yesu] kod jo maricho duto.” (Mat. 13:39-41) Malaike mamoko nomi migawo mar ‘choko Jokristo moyier’ mondo gidhi e polo. (Mat. 24:31) Bende, nitie malaike momi migawo mar ‘ritowa e yorewa duto.’—Zab. 91:11; Mat. 18:10; pim gi Mathayo 4:11; Luka 22:43.

“Malaike moyier” miwuoyo kuomgi e 1 Timotheo 5:21 nyalo bedo ni nigi migawo makende ahinya mar konyo jo Nyasaye. E weche molworo ndikono, Paulo nochiwo puonj e wi kaka jodong-kanyakla onego otim migepegi, kendo ni jomamoko e kanyakla onego omigi luor. Jodong-kanyakla onego otim migepegi ‘ma ok gibuono ng’ato kata dewo wang’ ng’ato,’ kendo onego gipar matut ka pok gitimo yiero moro amora kata ng’ado paro e wi wach moro. Gima duong’ momiyo onego giluw weche ma Paulo nowachogo en nikech gitiyo e lo “Nyasaye gi Kristo Yesu kod malaike moyier.” Omiyo, en gima nenore maler ni malaike moko omi migepe motudore gi tije mag kanyakla kaka rito kanyakla, tayo tij lendo, kod miyo Jehova ripot e wi kanyakla.—Mat. 18:10; Fwe. 14:6.