1. Gin gueth mage ma wanyalo yudo nikech rawar?

RAWAR ma Jehova nochiwo miyo wayudo gueth mang’eny. Rawar noyawo yo ne nyithind Adam duto mohero tim makare mondo gikone obed nyithind Nyasaye. Nikech rawar, sani koro nyalore mondo dhano obi odag nyaka chieng’ ka gimor. Kata obedo ni rawar nomiyowa thuolo mar yudo guethgo, rawarno nokonyo e yore mamoko mathoth. Bedo ni Yesu notho komakore gi chike makare mag Jehova, nochiwo dwoko e wi wach ma nomako malaike kod dhano duto.—Hib. 1:8, 9.

2. (a) Gin weche mage madongo ma Yesu nowacho e lamo ma nopuonjo jopuonjrene? (Ne picha man malo.) (b) Ang’o ma wadwaro nono e sulani?

² Ka nodong’ higni ariyo to Yesu tho mondo ochiw ngimane kaka misango, nopuonjo jopuonjrene ni mondo olem kama: “Wuonwa manie polo, nyingi mondo obed maler. Pinyruodhi mondo obi. Dwaroni mondo otimre bende e piny, kaka e polo.” (Mat. 6:9, 10) Mondo wane gimomiyo rawar en mich maduong’ ahinya, wanonuru ane kaka  rawarno otudore gi keto nying Nyasaye obed maler, kaka otudore gi Pinyruodh Nyasaye, kod kaka obiro miyo dwach Nyasaye otimre.

3. Nying Jehova nyiso ni en Nyasaye machal nade, to ere kaka Satan noketho nyingno?

³ Gima Yesu nokwongo wuoye e lamo ma nopuonjono ne en keto nying Nyasaye obed maler. Nying Jehova nyiso ni en e Nyasaye ma onego omi duong’, en Nyasaye ma malo chutho, kendo maler. E lamo machielo, Yesu noluongo Jehova ni ‘Wuoro Maler.’ (Joh. 17:11) Nikech Jehova ler, puonj kod chike duto momiyowa bende ler. Kata obedo ni Jehova ler kamano, Satan noketo kiawa e puodho mar Eden kabe Nyasaye nigi ratiro mar keto ne dhano chike monego giluw. Satan noketho nying Nyasaye kuom wacho miriambo ma kamano.—Cha. 3:1-5.

4. Ere kaka gik ma Yesu notimo nokonyo e keto nying Nyasaye obed maler?

⁴ Yesu nohero nying Jehova gi chunye duto. (Joh. 17:25, 26) Gik ma Yesu notimo nokonyo e keto nying Nyasaye obed maler. (Som Zaburi 40:8-10.) Yo ma Yesu nodakgo e piny ka nonyiso maler ni Jehova ne ni kare ka noketo chike ma tayo malaike kod dhano. Kata obedo ni Satan nomiyo Yesu otho malit, Yesu ne ok oweyo tiyo ne Jehova kata matin. Kuom siko komakore gi Jehova, nonyiso ayanga ni onge gimoro amora ma nyalo mono dhano makare luwo chike Jehova.

5. Ere kaka wanyalo miyo nying Nyasaye obed maler?

⁵ Wanyalo nyiso nade ni wahero nying Jehova? Wanyalo timo kamano kokalo kuom timbewa. Jehova dwaro ni wabed joma ler. (Som 1 Petro 1:15, 16.) Mano nyiso ni Jehova kende e ma onego walam kendo wawinje gi chunywa duto. Kata mana sama isandowa, onego watem matek mondo waluw puonj mag Jehova kod chikene. Timbewa mabeyo miyo ler marwa rieny e nyim ji duto, to mano miyo nying Nyasaye duong’. (Mat. 5:14-16) Kaka joma ler, kit ngimawa nyiso ni luwo chike Nyasaye en gima ber kendo ni weche ma Satan nowacho gin miriambo. Sama waboth, waloko chunywa gadier kae to waweyo timbe ma ok mi Jehova duong’.—Zab. 79:9.

6. Ang’o momiyo Jehova nyalo kwanowa kaka joma kare kata obedo ni pod wan dhano morem?

⁶ Kokalo kuom misango ma Yesu nochiwo, Jehova weyo richo ne joma keto yie kuom misangono. Orwako ji duto mochiwore obed jotichne. Jehova kwano Jokristo mowal ni gin joma kare koluongogi ni yawuote kendo okwano “rombe mamoko” ni gin joma kare koluongogi ni osiepene. (Joh. 10:16; Rumi 5:1, 2; Jak. 2:21-25) Kata mana gie sani, rawar miyowa thuolo mar bedo gi winjruok maber gi Nyasaye, kendo timo karwa e keto nying Nyasaye obed maler.

7. Rawar biro miyo wayud gueth mage e bwo Pinyruodh Nyasaye?

⁷ E lamo ma Yesu nopuonjono, ne odhi nyime kwayo Nyasaye kama: “Pinyruodhi mondo obi.” Rawar otudore nade gi Pinyruodh Nyasaye? Rawar e ma miyo ji 144,000 thuolo mar dhi e polo mondo giloch gi Kristo kaka ruodhi kendo jodolo. (Fwe. 5:9, 10; 14:1) Yesu kaachiel gi joma dhi e  pologo e ma biro locho e Pinyruodh Nyasaye, kendo gibiro kelo ne dhano duto moluoro Nyasaye gueth mag Pinyruodhno kuom higni aluf achiel. Piny biro bedo paradiso kendo dhano duto moluoro Nyasaye biro bedo joma kare kae to malaike gi dhano biro bedo mamor tiyo ne Nyasaye. (Fwe. 5:13; 20:6) Yesu biro ketho wi thuol motiek gik maricho duto ma Satan nokelo ka nong’anyo ne Nyasaye.—Cha. 3:15.

8. (a) Ere kaka Yesu nokonyo jopuonjrene mondo one ni Pinyruodh Nyasaye en gima duong’? (b) Wanyiso nade ni wariwo Pinyruoth lwedo e kindegi?

⁸ Ka ne Yesu ni e piny, nokonyo jopuonjrene mondo ong’e gimomiyo Pinyruodh Nyasaye en gima duong’. Mapiyo bang’ ka ne osebatise, nochako lando “wach maber mar Pinyruodh Nyasaye” kuonde duto. (Luka 4:43) Ka ne Yesu pok odok e polo, nonyiso jopuonjrene ni gibed jonenone “nyaka kuonde maboyo mogik e tung’ piny.” (Tich 1:6-8) Kokalo kuom tijgi mar lando wach Pinyruoth, ji mang’eny e piny mangima ne dhi yudo thuolo mar puonjore e wi rawar kendo bedo raia mag Pinyruodh Nyasaye. Wanyiso ni wariwo lwedo Pinyruoth kuom konyo owete Kristo ma pod ni e piny e lando wach maber mar Pinyruoth e piny mangima.—Mat. 24:14; 25:40.

9. Ang’o momiyo wan gadier ni Jehova biro chopo dwache ne dhano?

⁹ Ka ne Yesu owacho ni “dwaroni mondo otimre,” mano nonyiso ang’o? Nikech Jehova e Jachuech, sama owacho ni gimoro mondo otimre, to chal mana ka gima gino osetimore. (Isa. 55:11) Ok obi yie mondo ng’anyo mar Satan oketh gik ma nosechano ne dhano. Jehova ne dwaro ni mondo nyithind Adam gi Hawa opong’ piny ka gin joma kare. (Cha. 1:28) Ka dine Adam gi Hawa tho ma onge nyithindo, dwach Nyasaye mondo dhano opong’ piny ne ok dhi timore. Mano e momiyo Nyasaye ne oweyo Adam gi Hawa mondo obed gi nyithindo kata bang’ timo richo. Kokalo kuom rawar, Nyasaye biro miyo joma keto yie kuom rawarno thuolo mar dak nyaka chieng’ ka gin joma kare. Jehova ohero dhano, kendo odwaro ni joma oluore obi odag e ngima maber mana kaka nosechano.

10. Ere kaka rawar konyo joma osetho?

¹⁰ To nade dhano tara gi tara ma notho ka ok giyudo thuolo mar ng’eyo Jehova kendo tiyone? Rawar biro miyo ochier joma otho. Nyasaye biro chierogi kae to omiyogi thuolo mar ng’eyo dwache mondo giyud ngima mochwere. (Tich 24:15) Jehova ok dwar ni mondo ng’ato ang’ata otho. Nikech en e Jachiw ngima, obiro bedo wuon jogo duto ma ibiro chier. (Zab. 36:9) Mano e momiyo Yesu nopuonjowa ni walem ka wawacho kama: “Wuonwa manie polo.” (Mat. 6:9) Jehova osemiyo Yesu migawo maduong’ ahinya e chiero joma otho. (Joh. 6:40, 44) E Paradiso, Yesu biro chopo migawo ma en-go mar bedo ‘chier kod ngima.’—Joh. 11:25.

11. Dwaro mar Nyasaye ne ‘oganda mang’ongo’ en ang’o?

¹¹ Jehova biro nyiso ng’wono ne ji mathoth nimar Yesu nowacho niya: “Ng’at ma timo dwaro mar Nyasaye, mano e owadwa gi nyamera kod minwa.” (Mar. 3:35) Nyasaye dwaro ni ‘oganda mang’ongo’ mowuok e ogendni  duto, gi dhoudi duto, gi dhok duto obed jotichne. Joma keto yie kuom misango ma Kristo nochiwo kendo ma timo dwach Nyasaye biro kok gi dwol maduong’ niya: “Warruokwa a kuom Nyasachwa mobet e kom-loch kendo kuom Nyarombo.”—Fwe. 7:9, 10.

12. Lamo ma Yesu nopuonjo nyiso nade dwach Jehova ne dhano moluore?

¹² Dwach Jehova ne ji duto ma timo dwache onyis maler e lamo ma Yesu nopuonjo jopuonjrene. Wan bende wadwaro timo duto ma wanyalo mondo waket nying Jehova obed maler. (Isa. 8:13) Tiend nying Yesu en ni “Jehova en Warruok,” omiyo wabiro yudo warruok nikech misango ma Yesu nochiwo to mano biro miyo nying Jehova duong’. Kokalo kuom Pinyruoth, Nyasaye, biro kelo gueth ne ji duto moluore, to mano biro nyalore nikech rawar. Kuom adier, lamo ma Yesu nopuonjono nyiso ni onge gimoro amora ma nyalo geng’o dwach Nyasaye mondo kik timre.—Zab. 135:6; Isa. 46:9, 10.

13. Sama obatiswa mano nyiso ang’o?

¹³ Wanyalo nyiso ni wagoyo erokamano nikech rawar ka wabedo gi yie motegno kendo chiwore ne Jehova mondo obatiswa. Sama obatiswa, wanyiso ni “wan mag Jehova.” (Rumi 14:8) Batiso nyiso ni wakwayo Nyasaye mondo omiwa chuny ma onge bura. (1 Pet. 3:21) Jehova biro dwoko kwayono ka oketowa wabedo maler kotiyo gi remb Kristo ma nochuernwa. Wan gadier ni obiro miyowa gik moko duto mosingonwa.—Rumi 8:32.

14. Ang’o momiyo onego waher jowetewa?

 ¹⁴ En yo mane machielo ma wanyisogo ni wagoyo erokamano nikech rawar? Nikech gik moko duto ma Jehova timo itayo gi kido mar hera, odwaro ni jotichne duto bende obed gi kidono. (1 Joh. 4:8-11) Wanyiso ni wagombo bedo ‘nyithind Wuonwa manie polo’ sama watemo matek mondo waher jowetewa. (Mat. 5:43-48) Ka ne Yesu osewacho ni onego waher Jehova, nowacho ni chik mar ariyo en hero jowetewa. (Mat. 22:37-40) Yo maduong’ ma wanyisogo ni wahero jowetewa, en kuom luwo chik ma nomiwa mar lando wach maber mar Pinyruodh Nyasaye. Ka wahero dhano wetewa, wamiyo Nyasaye duong’. Adier, hero Nyasaye “bedo moromo chuth e iwa” ka waluwo chik mar hero jomamoko moriwo nyaka owete gi nyiminewa.—1 Joh. 4:12, 20.

15. (a) Gin gueth mage ma Jehova miyowa e kindegi? (b) Gin gueth mage ma wabiro yudo e kinde ma biro?

¹⁵ Ka waketo yie kuom rawar, mano miyo Jehova weyonwa richowa chuth. Muma singonwa ni richowa inyalo ruchi. (Som Tich Joote 3:19-21.) Mana kaka ne waseneno motelo, kokalo kuom rawar Jehova kwano Jokristo mowal kaka nyithinde. (Rumi 8:15-17) Jehova bende ogwelo “rombe mamoko” mondo obed jotichne e piny ka. Bang’ bedo joma kare chuth, gibiro yudo tem mogik. Kapo ni gibiro makore gi Jehova, gin bende gibiro bedo nyithinde. (Rumi 8:20, 21; Fwe. 20:7-9) Hera ma Jehova oherogo nyithinde en hera ma siko nyaka chieng’. Gueth ma wabiro yudo nikech rawar nosik nyaka chieng’. (Hib. 9:12) Onge ng’ato ang’ata kata loch moro amora ma nyalo mayowa mich ma jaberno.

16. Ere kaka rawar miyo wabedo thuolo gadier?

¹⁶ Onge gimoro amora ma Jachien nyalo timo mondo ogeng’ joma oloko chunygi gadier kik obed nyithind Jehova. Yesu nobiro e piny kendo notho “dichiel ma ok bi nwo kendo.” Omiyo, rawar nochul dichiel. (Hib. 9:24-26) Rawar notieko chuth kum ma ne wayudo kuom Adam. Mano kaka wamor ni rawar nogonyowa e tuech mar bedo wasumbni e piny Satan omiyo koro ok wabi dak ka waluoro tho kendo.—Hib. 2:14, 15.

17. Hera ma Jehova oherigo chwali mondo itim ang’o?

¹⁷ Singo mag Jehova gin singo migeno. Mana kaka chike ma Jehova noketo ma tayo chuech ok lokre, e kaka Jehova bende ok lokre. Wan gadier ni gik moko duto mosingo nyaka timre. (Mal. 3:6) Kata obedo ni Jehova biro miyowa ngima mochwere, gima duong’ mamorowa ahinya en ni oherowa gadier. Ndiko wacho kama: “Waseng’eyo kendo wan gi yie kuom hera ma Nyasaye oherowago. Nyasaye en hera.” (1 Joh. 4:16) Piny duto ibiro los mondo obed paradiso kama wabiro dakie gi mor kendo ji duto ma biro dak e piny e kindego nonyis hera kaka mar Nyasaye. Wariwreuru kanyachiel gi chuech duto manie polo ka wapako Nyasaye gi dwol maduong’ niya: “Pak, gi duong’, gi rieko, gi erokamano, gi luor, gi teko, kod nyalo mondo obed ne Nyasachwa, mochwere nyaka chieng’. Amin.”—Fwe. 7:12.