1, 2. Owadwa moro nofwenyo ang’o e wi winjruokne gi Nyasaye, to nokawo okang’ mane?

NE OBATIS Robert ka en rawera, mak mana ni ne ok okawo adiera gi pek ma dwarore. Owacho niya: “Onge gimoro marach ma ne atimo, mak mana ni natimo gik motudore gi lamo mana mar kamano. Nanenora gi oko kaka ng’at ma nigi winjruok maber gi Nyasaye nikech nadhiga e chokruoge duto kendo ne ajabedo painia ma konyo kinde ka kinde. To nitie gima ne aremo.”

² Robert ne ok ong’eyo gima ne rach kode mochopo kinde ma ne okendo. Ne gihero goyo mbaka gi jaode ka ng’ato ka ng’ato penjo nyawadgi penjo mag Muma. Nikech chiege ne en Jakristo motegno, dwoko penjogo ne ok chande kata matin, Robert to ne yudo wich kuot nikech ne ok onyal dwoko penjogo. Robert wacho kama: “Ne chal mana ka gima onge gima nang’eyo. Nawacho e chunya ni, ‘Ka adwa tayo jaoda maber e weche Nyasaye, nyaka atim lokruok.’” To mano e gima notimo. Owacho niya: “Nachako puonjora Muma gi kinda kendo mos mos weche nochako donjona. Nachako ng’eyo puonj mag Muma kendo maduong’ie moloyo nabedo gi winjruok maber gi Jehova.”

3. (a) Gima notimore ne Robert nyalo puonjowa ang’o? (b) Gin weche mage ma wadwaro nono?

³ Gima notimore ne Robert nyalo puonjowa weche moko  madongo. Ng’eyo puonj mag Muma kod dhi e chokruoge mag kanyakla kende ok e ma mi ng’ato obed gi winjruok motegno gi Nyasaye. Nyalo bedo ni wasetimo dongruok, to ka wanonore maber, wafwenyo ni pod nitie gik monego watimie dongruok. (Fil. 3:16) Wadwaro nono dwoko mag penjo moko adek ma biro konyowa ng’eyo gima onego watim mondo wadhi nyime timo dongruok: (1) Ang’o ma nyalo konyowa nono okang’ ma wasetimogo dongruok? (2) Wanyalo timo ang’o mondo wabed gi winjruok motegno gi Nyasaye? (3) Bedo gi winjruok motegno gi Nyasaye nyalo konyowa nade e ngimawa mapile?

4. Gin ng’a gini monego oti gi weche manie Jo-Efeso 4:23, 24?

⁴ Nitie lokruoge ma ne watimo mondo wabed jotich Nyasaye. Ne waloko kit ngimawa. To timo lokruok ne ok orumo bang’ batiso. Muma wacho ni ‘wadhi nyime doko manyien e paro ma chikowa.’ (Efe. 4:23, 24) Nikech wan dhano morem, dwarore ni wadhi nyime timo dongruok. Kata mana joma osetiyo ne Jehova kuom kinde malach nyaka dhi nyime bedo gi winjruok motegno kode.—Fil. 3:12, 13.

5. Gin penjo mage ma nyalo konyowa nonore wawegi?

⁵ Mondo wadhi nyime timo dongruok e winjruokwa gi Nyasaye, nyaka wanonre wawegi. Waduto onego wapenjre penjo ma luwogi bed ni wan joma dongo kata jomoti: ‘Be asetimo lokruok moko e ngimana ma konya ng’eyo ka winjruokna gi Nyasaye otegno? Be amedo bedo gi kido kaka mag Kristo? Be pacha kod timbena sama an e chokruoge nyiso ni winjruokna gi Nyasaye otegno? Mbekni ma ahero goyo nyiso nade gik ma agombo e chunya? Yo ma apuonjorago Muma, kaka arwakora kod kaka abidhora, kod kaka atimo sama omiya siem nyiso ang’o kuoma? Atimoga nang’o sama aromo gi tembe? Be asetimo dongruok ma abedo Jakristo motegno, to ok mana makruok gi puonj mag mise?’ (Efe. 4:13) Paro dwoko mag penjogo nyalo konyowa ng’eyo ni wasetimo dongruok e winjruokwa gi Nyasaye e okang’ ma romo nade.

6. Mondo wang’e ka be winjruokwa gi Nyasaye otegno, ang’o kendo ma dwarore?

⁶ Mondo wang’e ka be winjruokwa gi Nyasaye otegno, samoro nyalo dwarore ni jomamoko okonywa. Jaote Paulo nowacho ni dhand ringruok ok nyal fwenyo ni kit ngimane ok mor Nyasaye. To ng’at ma winjruokne gi Nyasaye ber neno gik moko kaka Nyasaye nenogi kendo ong’eyo rach ma yudo ng’ato ka obedo dhand ringruok. (1 Kor. 2:14-16; 3:1-3) Jodongo ma nigi paro kaka mar Kristo fwenyoga mapiyo gik ma nyiso ni ng’ato osechako bedo gi paro mag dhand ringruok. Sama gibiro nyisowa gigo, be warwakoga siem ma gimiyowa? Ka wayie rwako siem, wanyiso maler ni wadwaro bedo gi winjruok motegno gi Nyasaye.—Ekl. 7:5, 9.

7. Ang’o momiyo ng’eyo puonj mag Muma kende ok mi ng’ato obed gi winjruok motegno gi Nyasaye?

⁷ Ng’e maler ni ng’eyo puonj mag Muma kende ok mi ng’ato obed gi winjruok motegno gi Nyasaye. Ruoth Solomon nong’eyo gik mathoth e wi Jehova. Weche ma Solomon nowacho nondik nyaka e Muma. Kata kamano, winjruokne gi Jehova nokethore nikech ne ok odhi nyime makore kode. (1 Ru. 4:29, 30; 11:4-6) Omiyo, kata bed ni wang’eyo puonj mag Muma, ang’o kendo ma dwarore ni watim? Nyaka wadhi nyime timo dongruok e winjruokwa gi Jehova. (Kol. 2:6, 7) To ere kaka wanyalo timo kamano?

8, 9. (a) Ang’o ma biro konyowa mondo wateg winjruokwa gi Jehova? (b) Gima duong’ momiyo wapuonjore Muma kendo paro matut en ang’o? (Ne picha manie chak sulani.)

 ⁸ Paulo nojiwo Jokristo mokwongo ni ‘giked matek mondo gibed joma otegno.’ (Hib. 6:1) Wanyalo kawo okenge mage mondo waluw gima Paulo nowachono? Okang’ maduong’ ma nyaka wakaw en puonjruok bug “Ritreuru e Hera mar Nyasaye.” Tieko puonjruok bugno biro konyi ng’eyo kaka inyalo tiyo gi puonj mag Muma e ngimani. Ka ne isepuonjori bugno mitieko, donge inyalo puonjori buge mamoko ma nyalo konyi bedo motegno e yie? (Kol. 1:23) Be iparoga matut gik misepuonjori kendo kwayo Jehova mondo okonyi ng’eyo kaka inyalo tiyo kodgi e ngimani?

⁹ Par bende ni gimomiyo wapuonjore Muma kendo paro matut en ni mondo wabed gi chuny mar timo gima moro Jehova kendo luwo chikene. (Zab. 40:8; 119:97) E wi mano, nyaka watim kinda mondo wakwed gik ma nyalo monowa timo dongruok e winjruokwa gi Jehova.—Tito 2:11, 12.

10. En ang’o ma rowere nyalo timo mondo gibed gi winjruok motegno gi Nyasaye?

¹⁰ Ka po ni in rawera, be in gi gik midwaro timo e tij Nyasaye? Owadwa moro ma tiyo e Bethel wuoyoga gi joma idhi batisi ka chokruok pok ochakore sama odhi e chokruoge mag alwora. Thoth joma itiso gin-ga rowere. Owadwano penjogiga chenro ma gin-go mag tiyo ne Nyasaye. Dwoko ma thothgi chiwoga nyiso ni gin gi chenro maber mar tiyo ne Jehova. Giwachoga ni digiher tiyo ne Nyasaye gi thuologi duto, kata dhi lendo kuonde ma jolendo mag Pinyruoth dwaroree ahinya. Kata kamano, nitiega rowere moko ma okiya gima ginyalo wacho. Dibed ni mano nyiso ni rowerego pok ong’ado e chunygi ni onego gibed gi chenro mag tiyo ne Nyasaye? Ka in rawera, penjri ane penjo ma luwogi: ‘Be atimoga gik motudore gi lamo Jehova mana nikech jonyuolna dwaro ni atim kamano? Be atimo gik ma miyo asudo machiegni gi Nyasaye mondo abed osiepne?’ En adier ni jotich Jehova duto onego obed gi gik ma gidwaro timo e tij Nyasaye. Timo kamano biro konyowa waduto kaka jotich Jehova mondo wamed bedo gi winjruok motegno gi Jehova.—Ekl. 12:1, 13.

11. (a) Ang’o monego watim mondo winjruokwa gi Nyasaye obed motegno? (b) Ranyisi mane manie Muma ma wanyalo luwo?

¹¹ Ka wasefwenyo kuonde ma onego watimie dongruok, dwarore ni wakaw okenge ma biro konyowa timo dongruok. Bedo gi winjruok maber gi Nyasaye en gima duong’ ahinya. En gima nyalo miyo ng’ato oyud ngima kata kik oyud. (Rumi 8:6-8) Kata kamano, bedo gi winjruok motegno gi Nyasaye ok nyis ni koro nyaka wabed joma kare. Roho maler biro konyowa mondo watim dongruok ma dwarore. En mana ni nyaka watim kinda. Owadwa John Barr ma ne nie mar Bura Matayo nowuoyo e wi ndiko mar Luka 13:24, kowacho kama: “Ji mang’eny ok nyal donjo e dhoot madiny nikech ok gitim kinda ma dwarore.” Onego wabed kaka Jakobo ma ne okedo gi malaika nyaka malaika noguedhe. (Cha. 32:26-28) Kata obedo ni somo Muma nyalo bedo mamit, ok onego wasome mana kaka bug sigana ma ondik mondo omor ng’ato. Onego wasome ka wamanyo puonj ma biro konyowa.

12, 13. (a) Ang’o ma biro konyowa tiyo gi weche manie Jo-Rumi 15:5? (b) Ranyisi mar jaote Petro kod siem ma nochiwo nyalo konyowa nade? (c) Inyalo timo ang’o mondo ibed gi winjruok maber gi Nyasaye? (Ne sanduku  ma wiye wacho ni, “Okenge ma Nyalo Konyi Timo Dongruok.”)

¹² Sama watimo kinda mondo wabed gi winjruok maber gi Nyasaye, roho maler biro miyowa teko mar loko pachwa. Roho maler biro konyowa mos mos mondo wachak paro kaka Kristo. (Rumi 15:5) E wi mano, rohono biro konyowa golo  gombo mag ringruok kae to wanyago kido ma moro Nyasaye. (Gal. 5:16, 22, 23) Kapo ni isiko iparo mwandu mag ringruok, kik iwe parogo oloyi. Dhi nyime kwayo Jehova mondo omiyi rohone mondo okonyi isik kiparo gik ma owinjore. (Luka 11:13) Par ane jaote Petro. Nitie kinde ma ne ok otim gik moko kaka ng’at ma nigi winjruok motegno gi Nyasaye onego otim. (Mat. 16:22, 23; Luka 22:34, 54-62; Gal. 2:11-14) Kata kamano, chunye ne ok onyosore. Mos mos, Jehova ne okonyo Petro ma ochako bedo gi paro kaka mar Kristo. Wan bende wanyalo bedo gi paro kaka mar Kristo.

¹³ Higni moko bang’e, Petro nowuoyo e wi gik monego watimie dongruok. (Som 2 Petro 1:5-8.) Ka ‘watimo kinda duto’ mondo wabed gi kido kaka ritruok, sinani, kod hera, mano biro konyowa dhi nyime bedo gi winjruok maber gi Nyasaye. Odiechieng’ kodiechieng’ penjri ane kama: ‘En ang’o monego atimie dongruok mondo amed bedo gi winjruok maber gi Nyasaye?’

14. Bedo joma nigi winjruok motegno gi Nyasaye miyo watimo yiero e yo mane?

¹⁴ Ka wabedo gi paro kaka mar Kristo, mano biro nenore e wechewa, e yiero ma watimo, kod e timbewa sama wan e tich kata skul. Yiero ma watimo biro nyiso ka be watimo kinda mondo wabed jolup Kristo. Nikech wan gi winjruok maber gi Nyasaye, watang’ gi gimoro amora ma nyalo ketho winjruokwa kode. Winjruok maber ma wan-go gi Jehova biro konyowa kwedo tem moro amora ma waromogo. Sama wadwaro timo yiero moro amora onego wapar matut e wi penjo ma luwogi: ‘Gin puonj mage mag Muma ma biro konya timo yiero? Ka dine bed ni gima oyudani oyudo Kristo, dine otimo nang’o? En yiero mane ma biro moro Jehova?’ Wane ane weche moko ma biro konyowa penjore penjo kaka mago kapok watimo yiero. E moro ka moro kuom wechego, wabiro neno puonj manie Ndiko ma biro konyowa timo yiero makare.

15, 16. Chiw ane ranyisi ma nyiso kaka bedo gi paro kaka mar Kristo nyalo konyowa yiero (a) ng’at ma wakendorego. (b) osiepewa.

¹⁵ Yiero ng’at ma ikendorigo. Puonj ma tayo Jokristo yudore e 2 Jo-Korintho 6:14, 15. (Som.) Paulo ne onyiso maler ni ng’at ma nigi winjruok maber gi Nyasaye ok nyal bedo gi winjruok maber gi dhand ringruok. Ere kaka mano nyalo konyi sama iyiero ng’at ma ibiro kendorigo?

¹⁶ Osiepe. Ne ane puonj ma yudore e 1 Jo-Korintho 15:33. (Som.) Ng’at ma ohero Nyasaye ok bi mako osiep gi joma nyalo miyo winjruokne gi Nyasaye okethre. Gin penjo mage ma biro konyowa tiyo gi puonjno? Kuom ranyisi, ere kaka mano konyowa yiero joma watudorego e intanet? Ibiro timo nang’o ka joma ikiya ogweli mondo itug kodgi tuke mag intanet?

17-19. Ere kaka bedo gi winjruok maber gi Nyasaye biro konyi mondo (a) iwe gik ma nyalo moni timo dongruok? (b) ibed gi chenro mag tiyo ne Nyasaye? (c) itiek chwanyruok manie kindi gi jomoko?

¹⁷ Gik ma nyalo mono ng’ato timo dongruok. Paulo nomiyo Jokristo wetene siem ma  nyalo konyogi. (Som Jo-Hibrania 6:1.) “Timbe ma kelo tho” monego watang’go gin mage? Mago gin timbe ma mono ng’ato bedo gi winjruok maber gi Nyasaye. Puonjno nyalo miyo wabed gi penjo kaka: ‘Be gima adwaro timoni en achiel kuom timbe mag ringruok? Be onego adonj e riwruok moro mar ohala mana nikech abiro loso pesa mang’eny? Ang’o momiyo ok onego adonjra gi riwruoge mag pinyni?’

¹⁸ Bedo gi chenro mag tiyo ne Nyasaye. Weche ma Yesu nowacho e twak ma nogolo e wi got nyisowa maler gimomiyo onego wati ne Nyasaye. (Mat. 6:33) Ng’at ma ohero Nyasaye bedo gi chenro mag tiyo ne Nyasaye. Paro puonj manie ndikoni nyalo konyowa yudo dwoko mag penjo kaka: ‘Be onego aluw wach somo ma malo? Be onego ayie gi tich ma idwa miyani?’

¹⁹ Chwanyruok gi jomamoko. Ere kaka puonj ma Paulo nonyiso kanyakla ma ne ni Rumi nyalo konyowa tieko chwanyruok e kindwa? (Rumi 12:18) Nikech wan jolup Kristo, watemo matek mondo wabed ‘gi kuwe gi ji duto.’ Watimoga nang’o sama chwanyruok oneno e kindwa? Be wanwang’o ka bedo joma tur teknwa, koso wang’ere kaka joma ohero “loso kuwe”?—Jak. 3:18.

20. Ang’o momiyo idwaro dhi nyime bedo gi winjruok maber gi Nyasaye?

²⁰ Mago gin mana ranyisi matin ma nyiso kaka paro matut kuom puonj manie Muma nyalo konyowa timo yiero ma nyiso ni wan gi winjruok maber gi Nyasaye. Bedo gi winjruokno nyalo miyo wabed mamor e ngimawa. Robert, ma ne owuo kuome e chak sulani wacho niya: “Ka ne asetego winjruokna gi Jehova, nabedo dichwo maber kendo wuoro maber. Ne amor kendo chunya ne okuwe.” Wan bende wanyalo yudo gueth kaka mago ka watimo kinda mondo wabed gi winjruok maber gi Jehova. Ka wabedo gi winjruok maber gi Jehova, ngimawa bedo maber e kindegi, kendo wabiro yudo “ngima madier” e kinde ma biro.—1 Tim. 6:19.