1. En chuny mane maber ma jotich Jehova nigago?

MUMA nokoro chon ni jo Jehova ne dhi “chiwore” tiyone ka Yesu tayogi. (Zab. 110:3) Wach ma nokorno timore e ndalowagi. Higa ka higa, jotich Jehova lendoga gi kinda kuom seche mang’eny ahinya. Gitimo tijno ma onge achune nikech gihero tijno. Bende, gitiyoga gi thuologi e konyo Jokristo wetegi e yor ringruok, hoyogi, kendo jiwogi mondo gidhi nyime makore gi Jehova. Jodongo gi jokony-tich tiyoga gi thuolo mang’eny e iko migepe mag puonjo e chokruok kendo e timo limbe mag kwath. Ang’o ma chwaloga jotich Jehova mondo gichiwre kamano? En hera ma giherogo Jehova kod dhano wetegi.​—Mat. 22:37-39.

2. En ranyisi mane maber ma Yesu noketonwa kaka iwachonwa e Jo-Rumi 15:1-3?

² Yesu noketonwa ranyisi maber ahinya mar keto dwach jomamoko motelo ne mage. Watemoga kar mwanyalo mondo waluw ondamo mage. (Som Jo-Rumi 15:1-3.) Sama watimo mano, wayudoga ber mathoth. Yesu nowacho niya: “Chiwo kelo mor mang’eny moloyo kawo.”​—Tich 20:35.

3. Ang’o ma wadwaro nono e sulani?

³ E sulani, wadwaro nono moko kuom yore ma Yesu nochiworego mondo okony jomamoko kod kaka wanyalo luwo ranyisine. Bende, wabiro nono moko kuom gik mwanyalo  timo mondo wamed bedo gi gombo mar konyo jomamoko.

4. Ere kaka Yesu nonyiso ni noketo dwach jomamoko obed motelo ne mage?

⁴Yesu ne chiworega konyo jomamoko kata sama nool. Par ane gima notimo kinde moro ka ne oganda maduong’ odhi ire e bath got moro ma nyalo bedo ni ne ni machiegni gi Kapernaum. Noyudo oselemo otieno mangima, kendo nyaka bed ni koro nool ahinya. Kata kamano, pod nokecho ogandano. Moko kuomgi ne gin joma odhier kod joma tuore. Nochangogi kendo nogolonegi twak ma rahuma ahinya e wi got. Twagno nojiwogi ahinya.​—Luka 6:12-20.

5. Ere kaka wiye udi luwoga ranyisi mar Yesu sama giol?

⁵Kaka wiye udi luwoga ranyisi mar Yesu. Par ane ranyisini: Dichwo ma nigi joot ochopo e ode godhiambo kojony ahinya bang’ tiyo matek odiechieng’ mangima. Chunye moro nyise ni gibare ne lamogi mar joot odhiambono. Kata kamano, osayo Jehova mondo omiye teko mar tayo lamono. Jehova dwoko lamone kendo gitimo lamo mar joot kaka pile. Sama nyithinde neno kaka otimo kinda mondo kik gibare ne lamo mar joot kata obedo ni ool, nyithindego puonjore wach moro maduong’, ma en ni, jonyuolgi oketo weche Nyasaye motelo ne gik mamoko duto.

6. Chiw ane ranyisi ma nyiso kaka Yesu noikore konyo jomamoko kata sama nodwaro ni obed kende.

⁶Yesu noikore konyo jomamoko kata mana e seche ma nodwaro ni obed kende. Tem ane paro kaka Yesu ne winjo e chunye sama noyudo wach ni nong’ad ng’ut Johana Jabatiso ma ne en osiepne? Onge kiawa ni nokuyo ahinya. Muma nyisowa kama: “Ka Yesu nowinjo [wach tho Johana], noidho yie modhi mabor mondo obed kar kende.” (Mat. 14:10-13) Wanyalo ng’eyo gimomiyo nodwaro ni obed kar kende. Nitie joma oheroga bedo kar kendgi sama gikuyo. Kata kamano, Yesu ne ok oyudo thuolo ma nodwarono. Oganda mang’ongo nochopo kama nodwaro bedoe kendeno kata ka en owuon ne pok ochopo kuno. Yesu notimo nang’o?  Noparo kaka joma ne ni e ogandano ne chandore malit mi “nokechogi.” Noneno maler ni jogo ne dwaro ni okonygi kendo ohogi, omiyo, ne ok odigni timo kamano. Muma wacho ni, “nochako puonjogi [ok gik matin, to] gik mang’eny.”​—Mar. 6:31-34; Luka 9:10, 11.

7-8. Chiw ane ranyisi ma nyiso kaka jodongo luwo ranyisi mar Yesu sama Jakristo wadgi moro dwaro kony.

⁷Kaka jodongo luwoga ranyisi mar Yesu. Wamor ahinya gi kinda ma jodong-kanyakla timoga kod yo ma gijatuonore gik mang’eny mondo gikonywa! Nitie gik mang’eny ma samoro gitimoga ma jo kanyakla ok ong’eyo. Kuom ranyisi, sama dwarore ni otim ne owadwa kata nyaminwa moro yeng’o, jodongo manie Komiti Matudore gi Osiptende timoga duto ma ginyalo mondo gikonye. Seche moko chunogiga ringo e osiptal gotieno! To nikech gikecho owetegi gi nyiminegi, jodongo manie komitigo kaachiel gi joutegi oyie tuonore thuolo ma onego gibedgo kanyachiel mondo gikony Jokristo wetegi manie chandruok.

⁸ Jodong-kanyakla bende chiworega mondo gikony e gero Ute Romo kod ute mamoko misirogo lamo madier, kendo gikonyoga Jokristo wetegi moyudo masira. Bende, gitiyoga matek ahinya e puonjowa, jiwowa, kendo hoyowa. Wapwoyo ahinya yo ma owetego kaachiel gi joutegi chiworego. Walamonegi Jehova mondo oguedh chuny ma ginyisono! En adier ni mana kaka iparonega Jokristo mamoko, jodongo bende ok onego osik wigi ahinya e migepe ma gitimo ma chop kama koro gijwang’o joutegi.

9. Ka luwore gi Jo-Filipi 2:4, 5, en paro mane ma Jokristo duto onego obedgo

⁹ Som Jo-Filipi 2:4, 5. Ok ni jodongo kende e ma dwarore ni obed gi chuny mar chiwruok, to waduto dwarore ni waluw ranyisi mar Yesu mar chiwruok. Muma wacho ni Yesu “nokawo kit misumba.” (Fil. 2:7) Par ane gima wachno nyalo puonjowa. Misumba maber manyoga thuolo mag moro ruodhe. Nikech wan wasumbni mag Jehova kendo waikore konyo owetewa, gombowa maduong’ en timo gik ma moro Jehova kaachiel gi Jokristo wetewa. Inyalo timo kamano kuom nono weche ma luwogi.

10. Gin penjo mage ma wanyalo penjore?

¹⁰Non paro ma in-go. Penjri penjo kaka: ‘Aikora chiwora e okang’ ma romo nade mondo akony jomamoko? Anyalo timo nang’o ka po ni okwaya mondo adhi alim owadwa moro ma hike oniang’ modak kuonde miritoe joma oti, kata ni akow nyaminwa moro moti e chokruok? Be achiworaga mapiyo sama idwaro joma nyalo timo ler e chokruok maduong’ kata e Od Romo?’ Ka ne wachiwore ne Jehova, ne wasingorene ni wabiro tiyo gi thuolowa kod mwanduwa e timo dwache. Kuom mano, omorga ahinya sama oneno ka watiyo gi gigewa e konyo jowetewa. To nade ka wafwenyo ni nitie kuonde monego watimie lokruok, ang’o ma nyalo konyowa?

11. Ere kaka lamo nyalo konyowa bedo gi chuny mar chiwruok?

¹¹Lam Jehova kowuok e chunyi. Seche moko inyalo fwenyo ni nitie lokruok ma dwarore ni itim, to samoro timo lokruogno ok yotni. Ka mano e gima timoreni, lam Jehova gi chunyi duto kikwaye mondo okonyi. Bed thuolo kode. Nyise kaka iwinjo e chunyi kendo ikwaye mondo omiyi “teko kod gombo mar timo duto mohero.”​—Fil. 2:13.

12. Ere kaka owadwa ma rawera mosebatisi nyalo konyo e kanyakla?

¹² Ka po ni in owadwa ma rawera mosebatisi, kwa Jehova mondo okonyi ibed gi gombo mar timo momedore e konyo owete gi nyimine manie kanyaklau. E pinje moko, kwan mar jodong-kanyakla ni malo moloyo mar jokony-tich kendo thoth jokony-tichgo hikgi osechako niang’. Nikech medruok ma sani wan-go e riwruokwa, wadwaro owete ma pod tindo ma nyalo konyo jo Jehova. Ibiro bedo mamor ahinya ka iikori konyo kamoro amora ma inyalo dwarie. Nikech ang’o? En nikech ibiro moro chuny Jehova, ibiro bedo gi nying maber e kind Jokristo weteni, kendo ibiro bedo gi chuny mokue nikech ing’eyo ni itimo duto minyalo e konyo jomamoko.

13-14. Gin ang’o ma wanyalo timo mondo wakony owetewa gi nyiminewa? (Ne picha manie nyim gaset.)

¹³Tem fwenyo sama jomamoko dwaro kony. Jaote Paulo nonyiso Jo-Hibrania ma nodak Judea kama: “Wiu kik wil gi timo maber kendo pogo gik ma un-go ne jomamoko, nikech Nyasaye mor ahinya gi misengni ma kamago.” (Hib. 13:16) Mano ne en paro maber! Mapiyo bang’ yudo baruano, Jokristo ma ne ni Judea ne nyaka dar ma we utegi, ohelnigi, kod wedegi ma ne ok gin Jokristo, mondo ‘giring ka gidhi e gode.’ (Mat. 24:16) Sama mano ne timore, ne dwarore ahinya ni gikony jowetegi. Joma nosechako tiyo gi puonj ma Paulo nochiwono ne dhi yudo ka yotnegi ng’iyo gi ngima manyienno.

¹⁴ Kinde moko owetewa gi nyiminewa ok  bi nyisowa gik ma gichando. Kuom ranyisi, jaod owadwa moro nyalo tho. Owadwano nyalo dwaro ng’ama konye tedo chiemo, kowe kamoro, kata konye e tije mag ot. Samoro onyalo luor kwayo kony koparo ni obiro miyo Jokristo wetene ting’ mapek. Kata kamano, onyalo mor ahinya ka wakawo okang’ mar konye ma ok okwayowa. Kik walung’ alung’a wiwa ka waparo ni samoro ng’at machielo biro dhi konye kata ni obiro wacho owuon sama odwaro kony. Penjri ane kama: ‘Ka di ne bed ni an e ma an e chal ma kamano, ang’o ma daher ni jomamoko otimna?’

15. Ka wadwaro ni wakony jomamoko, en kido mane monego watem matek mondo wabedgo?

¹⁵Bed ng’at ma chopo ire yot. Onge kiawa ni ing’eyo owete gi nyimine moko e kanyaklau ma kinde duto oikorega konyo jowetegi. Gikonyowaga gi chuny maler ma ok gimi wapar kata matin ni wachandogi. Wan gadier ni giikore konyowa kinde duto kendo wan bende dwaher luwo ranyisi margi! Alan, jaduong’-kanyakla ma jahigni 40 gi wiye temoga mondo obed ng’at ma chopo ire yot. Owacho kama kowuoyo e wi ranyisi mar Yesu: “Kata obedo ni Yesu ne en ng’at modich ahinya, joma tindo kod joma hikgi ng’eny ne ni thuolo dhi ire kendo ne ok giluor kwaye kony. Ne gin gadier ni nodewogi ahinya. An bende daher luwo ranyisi mar Yesu mar kecho ji kendo dewogi.”

16. Ere kaka tiyo gi puonj manie Zaburi 119:59, 60 nyalo konyowa luwo ranyisi mar Yesu?

¹⁶ Chunywa ok onego onyosre sama wafwenyo ni ok wanyal luwo ranyisi mar Yesu e yo makare chuth. (Jak. 3:2) Japuonjre ok nyalga chalo gi japuonjne e gik moko duto. Kata kamano, ka odhi nyime puonjore  kendo otimo lokruok ma dwarore sama oboth, kae to oluwo ranyisi mar japuonjne, obiro dhi nyime timo dongruok. E yo ma kamano bende, ka watemo matek mondo wati gi gik ma wapuonjore e Muma kendo wasiko ka warieyo kuonde ma wabothiega, wanyalo medo timo dongruok e yo ma waluwogo ranyisi mar Yesu.​—Som Zaburi 119:59, 60.

17-18. Gin ber mage ma wayudo sama waluwo ranyisi mar Yesu mar chiwruok?

¹⁷ Sama wachiwore konyo jomamoko, mano nyalo jiwo jowetewa mondo gin bende gitim kamano. Jaduong’-kanyakla moro miluongo ni Tim wacho kama: “Nitie rowere ma osegatimo dongruok ma gibedo jokony-tich ka pod gitindo ahinya. Achiel kuom gik ma osekonyogi en luwo ranyisi mag jomamoko ma chiworega. Chuny ma rowerego nyiso konyo kanyaklawa ahinya kendo miyo jodong-kanyakla bedo gi tich mayot.”

¹⁸ Wadak e piny ma ji oherore giwegi. Jotich Jehova to ok chal kamano. Wamor ahinya gi chuny mar chiwruok ma Yesu ne nigo kendo wagombo ahinya dhi nyime luwo ranyisine. En adier ni ok wanyal luwo ranyisi mar Yesu e yo makare chuth, kata kamano, wanyalo ‘luwo ondamo mage machiegni.’ (1 Pet. 2:21) Sama watimo duto ma wanyalo mondo waluw ranyisi mar Yesu, wan bende wabiro bedo mamor nikech wamiyo chuny Jehova mor.