Be Ing’eyo?
Ang’o momiyo Jo-Israel ne nyomboga?
E NDALO ma ne indikoe Muma, dichwo ne nyomboga ka ne pok okawo nyako ma nodwaro kendo. Nonyalo tero gik ma nengogi tek kaka dhahabu kod fedha, chiaye, kata pesa ne jood gi nyako. Nitie kinde ma dichwo ne nyalo tiyo ne jonyuol nyako kaka yo monyuomogo nyakono, mana kaka Jakobo ma notiyo ne jonyuol Rahel kuom higni abiriyo ka ne pok omiye Rahel. (Cha. 29:17, 18, 20) Ang’o momiyo Jo-Israel ne nyomboga?
Carol Meyers ma en jatim nonro e weche mag Muma wacho kama: “Nyombo ne nyalo pong’o ne joodgi nyako rem ma ne gidhi bedogo nikech koro nyargi ma ne samoro konyogi e tije mag dala [kaka pur] koro ne dhi bedo ma onge.” Nyombo bende ne tego wat e kind joodgi wuoyi kod joodgi nyako. Wedego ne nyalo konyore e kinde chandruok. E wi mano, nyombo ne nyiso ni nyako koro ok ne ni e lwet wuon-gi, to ne en e lwet chwore.
Nyombo ne ok nyis ni nyako ne en ng’at ma ne inyalo ng’iew kata usi. Buk miluongo ni Ancient Israel—Its Life and Institutions wacho kama: “Kend mag Jo-Israel ma ne inyuomoe nyako pesa kata gima chielo, ne nyalo nenore ka gima ne ing’iewo nyakono. Kata kamano, nenore ni gima duong’ ne ok en pesa kata gima ne itero kor gi nyako, to ne en pong’o ne joodgi nyako rem ma ne gidhi bedogo ka koro nyargi onge.”
E kindegi, nitie pinje ma pod ji nyomboega. Jonyuol ma Jokristo temoga matek mondo ‘gibed jo matur’ sama idwaro nyuom nyargi, tiende ni, ok gikwaga gik mang’eny ahinya. (Fil. 4:5; 1 Kor. 10:32, 33) Timo kamano nyiso ni ok ‘gihero pesa’ kendo ni igi ok lach. (2 Tim. 3:2) E wi mano, ka jonyuol ma Jokristo okwayo gik matin sama inyuomo nyargi, ok bi chuno dichwo ma dwaro kendo nyargino choro kend margi nyime ka pod omanyo kaka dochop weche mag nyombo. Kata, ok bi chuno dichwono weyo bedo painia mondo omany tij andika ma nyalo konye yudo gik modwaro nyuomogo nyako modwaro kendo.
E pinje moko, nitie chike mag sirkal monego ota weche mag nyombo. E pinje kaka mago, Jokristo biro luwo chikego. Nikech ang’o? Nikech Muma chiko Jokristo ni ‘gibolre ne joloch’ kendo giwinjgi, tek mana ni chike ma giketo ok tuomre gi chike Nyasaye.—Rumi 13:1; Tich 5:29.
