Be Ing’eyo?
Ang’o momiyo ne en gima ber ni Jehova noyie ne Jo-Israel mondo ochiw kit akuche moko ariyo kaka misango?
E BWO chik ma nomi Jo-Israel, Jehova noyie mondo gichiw kit akuche moko ariyo kaka misango, tiende ni, akuche matindo kod akuche madongo. Akuche ariyogo nojawuo kuom-gi giduto sama nichiwo chik motudore gi misengni, kendo ninyalo chiw moro kaka misango kar machielo. (Lawi 1:14; 12:8; 14:30) Ang’o momiyo chikno ne ber? En nikech akuche madongo ne ok yudrega mayot. Ang’o momiyo yudo akuche madongogo ne ok yot?
Akuru maduong’
Akuche madongo gin winy ma darga kendo gidakga e piny Israel mana e dweche ma piny liet. Higa ka higa e dwe mar Oktoba, akuche madongogo ne darga ka dhi yo milambo e pinje maliet kendo ne giduogoga e piny Israel ka ndalo mag koyo oserumo. (Wer 2:11, 12; Jer. 8:7) Mano nyiso ni e piny Israel machon, ne ok yot ahinya chiwo akuchego kaka misango e kinde mag koyo.
Akuru matin modak e lwanda
Akuche matindo to ne ok darga e piny Israel, omiyo, ne giyudore kinde duto. E wi mano, ji ne pidhoga akuche matindogo e miechgi. (Pim gi Johana 2:14, 16.) Buk moro miluongo ni Plants and Animals wacho ni “nipidho akuche matindogo e gwenge duto mag Palestina. Dala ka dala ne nitie od akuru kata bur moro ma nokuny e kor ot kama ne akuchego nyalo dakie.”—Pim gi Isaya 60:8.
Akuru manie ode
Jehova nonyiso ni odewo joge kendo ni oherogi ka noyie mondo Jo-Israel ochiw winy ma ne yudore mayot higa ka higa kaka misango.
