Kata kamano, pod Jehova dwaro ni wahore ka warite nyaka kinde ma en owuon oketo ochopi. Ang’o momiyo odwaro ni watim kamano? Ang’o ma nyalo konyowa dhi nyime bedo mamor sama pod wahore ka warito Jehova?

ANG’O MOMIYO JEHOVA DWARO NI WAHORE KA WARITE?

Muma wacho kama: “Jehova pod ohore mondo onyisu ng’wono, obiro a malo mondo okechu. Nimar Jehova en Nyasaye ma ng’ado bura kare. Jo ma ogene duto nobed mamor.” (Isa. 30:18) Weche Isayago ne ondik ne Jo-Yahudi ma nong’anyo ne Nyasaye. (Isa. 30:1) Kata kamano, pod ne nitie Jo-Yahudi moko ma nomakore gi Jehova kendo wechego nomiyogi geno ahinya. Wechego pod jiwowa kata e kindewagi bende.

Omiyo, nyaka warit ka wahore nikech Jehova bende rito ka hore. En gi kinde moseketo mobiro tiekoe piny marachni, kendo orito kohore mondo odiechieng’no kod sano ochopi. (Mat. 24:36) E kindeno, biro nenore ayanga ni gik ma Satan gi lange wacho e wi Jehova gin miriambo. Bang’ mano, obiro golo Satan kod ji duto ma riwe lwedo. Kata kamano, wan to obiro ‘nyisowa ng’wono.’

Ka kindeno pok ochopo, samoro Jehova ok bi golonwa tembe ma waromogo. Kata kamano, okonyowa bedo gadier ni wanyalo bedo mamor sama warito kinde ma obiro goloe chandruogego. Mana kaka Isaya nowacho, wanyalo dhi nyime bedo mamor ka wageno ni gik ma warito gin gik mabeyo. (Isa. 30:18) Ang’o ma nyalo konyowa bedo mamor? Okenge ang’wen ma luwogi nyalo konyowa.

KAKA WANYALO BEDO MAMOR SAMA WADHI NYIME HORE KA WARITO

Ket pachi kuom gik mabeyo. Ruoth Daudi noneno gik maricho ahinya e ngimane. (Zab. 37:35) To e ma pod nondiko kama: “Ling’ thi e nyim Jehova kendo irite kihori mos. Kik chunyi chandre ka ng’ato chano gik maricho.” (Zab. 37:7) Daudi owuon norwako parono kendo noketo pache kuom weche ma Jehova nosingone ni nodhi rese. Wiye bende ne ok owil gi yore ma Jehova nosebedo ka guedhego.  (Zab. 40:5) Wan bende ka waketo pachwa kuom gik mabeyo ma timore e ngimawa, wabiro bedo mamor sama warito Jehova, kar weyo pachwa oged e gik maricho ma timorenwa.

Ti gi thuolo moro amora moneno e pako Jehova. Jandik Zaburi 71, ma nenore ni ne en Daudi nowacho kama e wi Jehova: “Abiro riti ka an gi geno; abiro medo mana paki.” (Zab. 71:14) Ere kaka nopako Jehova? Nojanyisoga ji e wi Jehova kendo pake gi wende. (Zab. 71:16, 23) Mana kaka Daudi, wanyalo dhi nyime bedo mamor sama warito Jehova. Wanyalo pake sama wan e tij lendo, e mbekniwa mapile, kata kokalo kuom wendewa mag lamo. Chieng’ machielo kiwero wer moro mar Pinyruoth, donge inyalo paro matut kuom weche ma nyalo jiwi e wendno?

Yie mondo owete gi nyimine ojiwi. E kinde ma Daudi ne romoga gi chandruoge, nowacho kama e wi Jehova: “Abiro nyiso ni nyingi e ma ageno nikech ober, anatim kamano e nyim jogi.” (Zab. 52:9) Wan bende wanyalo yudo jip kokalo kuom owetewa gi nyiminewa ma walamogo Jehova sama wan e chokruok, e tij lendo, kod sama wan e budho moro kodgi.—Rumi 1:11, 12.

Teg geno mari. Zaburi 62:5 wacho kama: “Anarit Nyasaye ka ahora mos, nikech en e ma ageno kuome.” Yie motegno oriwo bedo gadier ni gik ma wageno biro chopo kare, kata ka gigo nyalo deko moloyo kaka ne waparo. Kuom adier, singo mag Jehova ok bi bare! Wanyalo tego geno marwa kuom nono Wach Nyasaye moriwo weche ma nokor, nono kaka weche Muma otudore, kendo puonjore weche ma Muma wachonwa e wi Jehova owuon. (Zab. 1:2, 3) Bende, dwarore ni wadhi nyime lamo “ka roho maler tayowa” mondo wasik ka wan gi winjruok maber gi Jehova sama wadhi nyime rito singone mar ngima ma nyaka chieng’.—Juda 20, 21.

Mana kaka Ruoth Daudi, bed gadier ni Jehova rango jogo duto ma rito ka hore kendo onyisogi herane mosiko. (Zab. 33:18, 22) Dhi nyime hori kirito Jehova kuom keto pachi e gik mabeyo ma timore e ngimani, pako Jehova, yie mondo oweteni gi nyimineni ojiwi, kendo siko kitego geno mari.