1-2. En ranyisi mane ma nyalo konyowa ng’eyo kaka Jehova winjoga sama iketho nyinge?

 TEMIE paro wachni: Wawach ni ng’at moro mihero ahinya wacho weche maricho kuomi. Ing’eyo ni wechego gin miriambo, kata kamano, jomoko to oyie gi miriambogo. To marachie moloyo, gichako lando miriambogo kendo ji mang’eny yie kodgi. Ibiro winjo nade e chunyi? Ka po ni in ng’at mohero ji kendo ihero bedo gi nying maber, miriambogo biro miyo iwinj marach, donge?—Nge. 22:1.

² Ranyisino konyowa ng’eyo kaka Jehova nowinjo ka noketh nyinge. Achiel kuom malaikene nonyiso Hawa miriambo maduong’ ahinya e wi Jehova. Hawa noyie gi miriambono. Miriambono e ma nomiyo jonyuolwa mokwongo ong’anyo ne Jehova. Mano nokelo richo kod tho ne dhano duto. (Cha. 3:1-6; Rumi 5:12) Chandruoge duto manie pinyni moriwo nyaka tho, lwenje, kod masiche nobiro nikech miriambo ma Satan nochako lando e puodho mar Eden. Be Jehova winjo lit nikech wach ma nohangneno kod chandruoge ma wachno osekelo? En kamano. Kata kamano, Jehova ok makga sadha. Mopogore gi mano, Muma luonge ni “Nyasaye mamor.”—1 Tim. 1:11.

3. En thuolo mane maber ma wan-go?

³ Wan gi thuolo maber ahinya mar miyo nying Jehova obed maler kuom luwo chik ma wacho ni: “Pakuru  nying Jehova.” (Zab. 113:1) Watimo kamano sama wanyiso jomamoko gik mabeyo e wi Jehova. Be ibiro timo kamano? We wanon ane weche moko adek madongo ma biro konyowa pako nying Jehova gi chunywa duto.

WAMORO JEHOVA SAMA WAPAKO NYINGE

4. Ang’o momiyo Jehova mor sama wapake? Chiw ane ranyisi. (Ne picha bende.)

⁴ Wamoro Wuonwa manie polo sama wapako nyinge. (Zab. 119:108) Be mano nyiso ni Nyasachwa Manyalo Duto dwaro ni opake mana kaka dhano morem ma gombo ni ji opakgi mondo giwinj e chunygi ni gitimo maber? Ooyo. Par ane ranyisini: Nyako moro matin nyalo kwako wuon-gi to onyise kama: “In e wuoro maberie moloyo wuone duto e piny ngima!” Wuorono bwonjo kendo omor ahinya gi nyareno. Nikech ang’o? Be wanyalo wacho ni omor nikech odwaro ni nyathineno opake? Ooyo. Kar mano, omor nikech ohero nyareno kendo omor neno kaka nyareno nyiso hera kod chuny mar goyo erokamano. Ong’eyo ni kidogo biro konyo nyareno bedo ng’at mamor e ngimane. E yo ma kamano bende, Jehova ma e Wuonwa maberie mogik mor ahinya sama wapake.

5. En miriambo mane ma wakwedo sama wapako nying Nyasaye?

⁵ Sama wapako Wuonwa manie polo, wakwedo miriambo moro ma ne Satan owacho ma mulowa. Satan nowacho ni onge dhano moro amora ma biro makore gi Jehova kendo kedo ne nyinge maler. Owachoga ni onge ng’ato ang’ata ma nyalo makore gi timne makare, kendo ni waduto wabiro weyo tiyo ne Nyasaye ka po ni timo kamano nyalo kelonwa ber moko. (Ayub 1:9-11; 2:4) Kata kamano, Ayub nonyiso ni Satan en jamiriambo. To nade in? Waduto wan gi thuolo makende mar kedo ne nying Wuonwa kendo more kuom makore gi timwa makare. (Nge. 27:11) To mano kaka odhialwa!

6. Ere kaka wanyalo luwo ranyisi mar Ruoth Daudi kod Jo-Lawi? (Nehemia 9:5)

⁶ Nikech jotich Nyasaye ohere, mano chwalogi mondo gipak nyinge gi chunygi duto. Ruoth Daudi nondiko kama: “Weuru apakie Jehova. Denda duto mondo opak nyinge maler.” (Zab. 103:1) Daudi nong’eyo ni sama opako nying Jehova, mano nyiso ni opako Jehova owuon. Nying Jehova paronwaga kido mabeyo ma en-go kod gik miwuoro mosetimo. Daudi ne dwaro  miyo nying Wuon-gi manie polo obed maler kendo pako nyingno. Nodwaro ni otim kamano gi ‘dende duto’ tiende ni gi chunye duto. E yo ma kamano bende, Jo-Lawi ne tayoga jomamoko e pako Jehova. Ne gibolore mi giwacho ni weche ma ne gipakogo Jehova ne ok oromo pako nyinge maler. (Som Nehemia 9:5.) Onge kiawa ni Jehova ne mor ahinya gi yo ma ne gibolorego kod pak ma ne gimiye.

7. Ere kaka wanyalo pako Jehova sama wan e tij lendo kod e dijewa?

⁷ E kindewagi, wanyalo moro Jehova sama wawuoyo gi jomamoko e wi herane kendo nyisogi gik mabeyo mosetimonwa. Sama wan e tij lendo, gima duong’ ma wadwaro en ni wakony ji mondo gisud machiegni gi Jehova kendo ginene mana kaka wanene. (Jak. 4:8) Wamorga ahinya nyiso ji kaka Muma wuoyo kuom Jehova kolero herane, yo mong’adogo bura kare, riekone, tekone, kod kido mamoko mabeyo ma en-go. Bende, wapako Jehova sama watemo matek mondo waluw ranyisine. (Efe. 5:1) Sama watimo kamano, wabedo mopogore gi joma richo manie pinyni. Jomoko nyalo fwenyo pogruokno kendo ginyalo wuoro gimomiyo wapogore kodgi. (Mat. 5:14-16) Sama wan e dijewa, wanyalo leronegi gimomiyo wapogore. Mano nyalo miyo joma chunygi ni kare osud machiegni gi Nyasachwa. Ka wapako Jehova e yoregi, wamoro chunye.—1 Tim. 2:3, 4.

WAMORO YESU SAMA WAPAKO NYING JEHOVA

8. Ere kaka Yesu oseketonwa ranyisi maber ahinya mar pako nying Jehova?

⁸ Kuom chuech duto mag Nyasaye manie polo kod manie piny, onge ng’ama ong’eyo Wuoro maber moloyo Wuoyi. (Mat. 11:27) Yesu ohero Wuon-gi kendo oketonwa ranyisi maber mar pako nying Jehova. (Joh. 14:31) E otieno mogik ka pok notho, nowuoyo gi Jehova e lamo kowacho gima duong’ ma ne okele e piny kae. Nowacho kama: “Asemiyo ging’eyo nyingi.” (Joh. 17:26) Ere kaka Yesu notimo mano?

9. Ere kaka Yesu notiyo gi ngero moro mondo okonywa ng’eyo Wuon-gi e yo maler?

⁹ Yesu notimo mathoth moloyo mana nyiso ji ni nying Nyasaye en Jehova. Jo-Yahudi ma ne Yesu opuonjo nong’eyoga nying Nyasaye. Yesu ma e ‘wuoyi ma miderma e ma noleronegi’ kido mag Wuon-gi. (Joh. 1:17, 18) Kuom ranyisi, Ndiko mag dho Hibrania nyiso ni Jehova en Nyasaye mang’won kendo ma kecho ji. (Wuok 34:5-7) Yesu nonyiso adiera mag wechego ka nogoyo ngero moro mar wuoyi ma nolal. Sama wasomo kaka wuon wuoyino noneno wuode ma noseloko chunyeno “gi kama bor,” moringo romone, mokwake, kendo weyone kethoge gi chunye duto, waneno kaka Jehova en Nyasaye mang’won kendo ma kecho ji. (Luka 15:11-32) Yesu nokonyowa ng’eyo Wuon-gi e yo maler.

10. (a) Ere kaka wang’eyo ni Yesu notiyo gi nying Wuon-gi kendo ni nodwaro ni jomoko bende otim kamano? (Mariko 5:19) (Ne picha bende.) (b) Ang’o ma Yesu dwaro ni watim e kindewagi?

¹⁰ Be Yesu ne dwaro ni jomamoko bende oti gi nying Wuon-gi? En kamano. Moko kuom jotend dinde ma kindego ne puonjo ni nying Nyasaye ne ler ahinya ma ok onego otigo. Kata kamano, Yesu ne ok oweyo mondo chike ma kamago omone miyo nying Wuon-gi duong’. Kuom ranyisi, par ane kinde ma ne ogolo ne ng’at moro jochiende  e gweng’ mar Gerasi. Jogweng’no nobedo maluor ahinya kendo ne gikwayo Yesu mondo oa e alworagino. Mano nomiyo Yesu ok obudho kanyo. (Mar. 5:16, 17) Kata kamano, Yesu ne pod dwaro ni nying Jehova ong’ere e alworano. Omiyo, nochiko ng’at ma nochangono ni onyis jomamoko gima Jehova nosetimone to ok gima Yesu nosetimone. (Som Mariko 5:19.) a Mano e gima Yesu dwaro ni watim e kindewagi. Odwaro ni waland nying Jehova e piny mangima! (Mat. 24:14; 28:19, 20) Sama watimo kamano, wamoro Ruodhwa Yesu Kristo.

11. Ang’o ma Yesu nopuonjo jopuonjrene mondo okwa e lamo, to ang’o momiyo mano en wach maduong’? (Ezekiel 36:23)

¹¹ Yesu nong’eyo ni dwach Jehova en miyo nyinge obed maler, kendo golo miriambo duto mosewach e wi Jehova. Mano e momiyo nopuonjowa ni walem kama: “Wuonwa manie polo, nyingi mondo obed maler.” (Mat. 6:9) Yesu nong’eyo ni ma e wach maduong’ ma mulo chuech duto. (Som Ezekiel 36:23.) Onge chuech moro amora e piny kata e polo mosemiyo nying Jehova obedo maler kaka Yesu osetimo. Kata kamano, parie wachni: Ka nomak Yesu, en richo mane ma nodonjnego? Nohangne ni noyanyo Nyasaye. Yesu nong’eyo ni yanyo nying maler mar Wuon-gi e richo maduong’ie mogik. Nowinjo malit ahinya ni ne idhi donjne gi ketho ma kamano. To mano e momiyo e seche matin ka pok nomake, “chunye nochandore malit ahinya.”—Luka 22:41-44.

12. Ere kaka Yesu nomiyo nying Wuon-gi obedo maler e yo maduong’ie moloyo?

¹² Mondo Yesu omi nying Wuon-gi obed maler, nonano e bwo sand mager, ayany, kod weche ma nohangne. Nong’eyo maber ni nowinjo Wuon-gi kendo ni onge gimoro amora ma notimo ma ne nyalo kelo ne Wuon-gi wich-kuot. (Hib. 12:2) Bende, nong’eyo ni Satan e ma ne monje achiel kachiel e kinde matekgo. (Luka 22:2-4; 23:33, 34) Satan ne dwaro ni Yesu owe makore gi timne matir, kata kamano, mano ok e gima  notimore! Yesu nonyiso maler kendo ma onge kiawa ni Satan en jamiriambo kendo ni Jehova nigi jotichne ma makore gi timgi matir kata e bwo tembe mager!

13. Ere kaka inyalo miyo Yesu obed mamor?

¹³ Be diher miyo Yesu obed mamor? Ka en kamano, to dhi nyime pako nying Jehova kendo ikony jomamoko ng’eyo kido mabeyo ma en-go. Sama itimo kamano, iluwo ondamo mag Yesu. (1 Pet. 2:21) Mana kaka Yesu, imiyo Jehova bedo mamor kendo inyiso maler ni Satan en jamiriambo!

WARESO NGIMA JI SAMA WAPAKO NYING JEHOVA

14-15. Gin gik mage mabeyo ma nyalo timore sama wapuonjo ji e wi Jehova?

¹⁴ Sama wapako nying Jehova, wakonyo e reso ngima ji. E yo mane? Satan “osedino pach jo ma ok oyie.” (2 Kor. 4:4) Mano osemiyo joma kamago oyie gi miriambo ma Satan landoga. Miriambogo gin kaka ma luwogi: Nyasaye onge, en mabor gi dhano, ok odew ji, okwiny, kendo osando joricho nyaka chieng’. Miriambogo duto ketho nying Nyasaye, to mano miyo ji bedo mabor kode. Kata kamano, sama walendo, wakwedoga miriambogo. Wapuonjo ji adiera e wi Wuonwa kendo wapako nyinge maler. Mano osekelo ber mage?

¹⁵ Adiera mag Wach Nyasaye nigi teko mang’eny. Sama wapuonjo ji e wi Jehova kod kido mabeyo ma en-go, nitie gik mabeyo ma timorega. Waeloga miriambo mag Satan e lela kendo mano miyo ji chako neno Wuonwa manie polo kaka wanene. Gimorga ahinya ng’eyo ni en Nyasaye ma nigi teko mang’eny. (Isa. 40:26) Gibedo gadier ni ong’adoga bura kare. (Rap. 32:4) Gipuonjore weche mathoth kuom riekone matut. (Isa. 55:9; Rumi 11:33) Bende, giyudo hoch bang’ ng’eyo ni Jehova en hera. (1 Joh. 4:8) Kaka gimedo sudo machiegni gi Jehova, e kaka gimedo tego geno ma gin-go mar bedo nyithinde nyaka chieng’. To mano kaka odhialwa gi migawo makende mar konyo ji osud machiegni gi Wuonwa! Sama watimo kamano, Jehova nenowa  kaka ‘jotich ma tiyo kanyachiel kode.’—1 Kor. 3:5, 9.

16. Ere kaka ng’eyo nying Nyasaye oseloko ngima ji? Chiw ane ranyisi.

¹⁶ Seche moko wanyaloga chako mana gi puonjo ng’ato nying Jehova, to kare wachno dhi mulo chuny ng’atno ahinya. Kuom ranyisi, nyako moro miluongo ni Aaliyah b nopon e ot moro ma ji ok lem e dinde mag Jokristo. Din ma ne olemee ne ok lone riyo ma ne en-go mar ng’eyo Wach Nyasaye. Kata kamano, ngimane nolokore ka nochako puonjore gi Joneno mag Jehova. Nochako neno Nyasaye kaka osiepne. Nowuoro ahinya ka nofwenyo ni nying Nyasaye osegol e Mumbni mang’eny mowil gi nyinge mag telo kaka Ruoth. Ng’eyo nying Jehova noloko ngimane. Owacho kama: “Osiepna maberie mogik nigi nyinge!” Mano osekelone ber mage? Owacho kama: “Awinjo ka an gi chuny mokuwe kendo ok achara.” Ng’at moro miluongo ni Steve ne en-ga jathum ma nomakore matek ahinya gi din mar Jo-Yahudi. Bang’e, nowere gi weche din nikech wuondruok ma nonenoga. Kata kamano, kinde moro ka nokuyo nikech min-gi notho, noyie bet e puonjruok moro mar Muma ma nitayo gi achiel kuom Joneno mag Jehova. Ng’eyo nying Nyasaye nomulo chunye ahinya. Owacho kama: “Ne ok ang’eyoga nying Nyasaye.” Omedo kama: “Kanyo e kama nang’eyoe ni Nyasaye nitie! Nachako nene kaka ng’ato sie kendo nang’eyo ni aseyudo osiep madier.”

17. Ang’o momiyo ing’ado e chunyi ni ibiro dhi nyime pako nying Jehova? (Ne picha bende.)

¹⁷ Sama iyalo wach maber kendo puonjo ji, be inyisoga ji nying Jehova? Be ikonyogi ng’eyo kido mabeyo ma Jehova nigo? Sama itimo kamano, ipako nying Nyasaye. Omiyo, dhi nyime pako nying Jehova maler kuom konyo ji ng’eyo kido mabeyo ma en-go. Kitimo kamano, ibiro reso ngima ji. Ibiro luwo ranyisi mar Ruodhi Yesu Kristo. To maduong’ie moloyo, ibiro moro Jehova, Wuonu ma jahera. Mad idhi nyime “pako [nyinge] nyaka chieng’”!—Zab. 145:2.