Muma nyiso maler ni Jehova nyalo ng’eyo gik ma biro timore e kinde mabiro. (Isa. 45:21) Ok owach gik moko duto e wi kaka Jehova nyalo chopo weche mokoro, kod sa mobiro chopogie. Bende, ok owach gik ma Jehova nyalo yiero mondo ong’e e wi kinde mabiro. Omiyo, wan bende ok wanyal ng’eyo weche duto e wi nyalo ma Jehova nigo mar ng’eyo gik ma biro timore e kinde mabiro. Kata kamano, nitie weche moko ma wang’eyo.

Jehova nyalo timo gimoro amora modwaro, kata kamano, nitie gik moseyiero ni ok obi timo. Nikech en gi rieko mang’eny, onyalo ng’eyo gimoro amora ma biro timore e kinde mabiro koyiero timo kamano. (Rumi 11:33) Nikech en gi kido mar ritruok, onyalo yiero weyo ma ok ong’eyo moko kuom gik ma nyalo timore e kinde mabiro.—Pim gi Isaya 42:14.

Jehova miyoga dwache timore. Ere kaka mano otudore gi nyalone mar ng’eyo gik ma biro timore e kinde mabiro? Isaya 46:10 wacho kama: “Awacho giko mar gimoro ka pok otimore, kendo chakre chon, asekoro gik ma pok otimore. Asewacho ni, ‘Gima ang’ado ok nyal lokore, abiro timo gimoro amora ma adwaro.’”

Achiel kuom gik momiyo Jehova nyalo ng’eyo gik ma biro timore e kinde mabiro en nikech en gi teko mar miyo gik moko otimre. Ok ochuno ni Jehova onon weche e ka ong’e gik ma biro timore bang’e. Opogore gi wan dhano morem ma nyaka nyiswa rach kata ber ma gik ma watimo nyalo kelo. Jehova nyalo ng’ado ni gimoro biro timore e sa moro sie, kendo onyalo miyo gino otimre mana kaka oseng’adono.—Wuok 9:5, 6; Mat. 24:36; Tich 17:31.

Mano e momiyo Muma tiyoga gi weche kaka “iko” kata “chano” sama owuoyo e wi gik ma Jehova biro timo e kinde mabiro. (2 Ru. 19:25; Isa. 46:11) E dhok ma nokwong ndikgo Muma, wechego otudore gi weche ma bende otigo e Muma ni ‘jachue agulni.’ (Jer. 18:4) Mana kaka jachue agulni nyalo tiyo gi lowo molos mayom mondo olosgo gimoro maber, e kaka Jehova bende nyalo chiko weche mondo ochop dwarone.—Efe. 1:11.

Jehova oweyo dhano mondo gitim yierogi giwegi. Ok ochik gik ma timore e ngima ng’ato ka ng’ato. Bende, ok onyal miyo jo mabeyo otim gimoro ma biro miyo gikone okethgi. Oweyo ng’ato ka ng’ato mondo otim yierone owuon, kendo ojiwogi ni gitim yiero mabeyo.

Ne ane ranyisi moko ariyo. Ranyisi mokwongo en mar joma nodak Nineve. Jehova nowacho ni dalano ne idhi kethi nikech nopong’ gi richo. Kata kamano, ka ne jodalano oyiero loko chunygi bang’ yudo siem, Jehova “ne ok okelonegi masira ma ne owacho ni odhi kelonegi.” (Jona 3:1-10) Ee, Jehova noloko pache e wi wach ma nosewacho ni ne dhi timorenegi.

Ranyisi machielo en motudore gi weche ma nowacho e wi jaloch moro ma niluongo ni Kuros, ma nonego ogony Jo-Yahudi e tuech kendo ogol chik mondo oger hekalu mar Jehova kendo. (Isa. 44:26–45:4) Kuros ma ne en ruodh Persia nochopo weche ma nokorgo. (Ezra 1:1-4) Kata kamano, Kuros ne ok lam Nyasaye madier. Jehova notiyo gi Kuros e chopo weche ma nokorgo kendo ne ok ochuno Kuros mondo olame e ka oti kode e chopo wechego.—Nge. 21:1.

Weche ma wasenonogo ok e weche kende ma nyiso kaka Jehova tiyo gi nyalo ma en-go mar ng’eyo gik ma biro timore e kinde mabiro. Adiera makende en ni onge dhano moro amora ma nyalo ng’eyo yore mag Jehova. (Isa. 55:8, 9) Kata kamano, gik ma wang’eyo e wi Jehova miyo wabedo gi yie ni kinde duto otimoga gik makare, moriwo nyaka gik mokoro ni biro timore e kinde mabiro.