SULA MAR PUONJRUOK 6
WER 18 Wagoyo Erokamano Kuom Rawar
Onego Wabed Mamor Nikech Jehova Weyonwa Richowa
“Nyasaye nohero piny ahinya mi nochiwo Wuode ma miderma.”—JOH. 3:16.
GIMA SULANI WUOYE
Wabiro nono kaka wanyalo nyiso ni wamor gi yo ma Jehova weyonwago richo. Mondo watim mano, wabiro nono gik ma Jehova notimo mondo owenwa richowa.
1-2. Ere kaka chal ma wantie inyalo pim gi chal mar rawera miwuoye e paragraf mokwongo?
TEM ane paro wuoyi moro modongo e ot ma ji omewoe. Chieng’ moro jonyuolne yudo aksident kendo githo. Wachno litne ahinya. Kata kamano, gima litne moloyo en ni ofwenyo ni jonyuolne notiyo marach gi pesa kendo ne gin-gi gope mang’eny. Koro parie ni kar mondo odong’ gi mwandu mag jonyuolne, to odong’ mana gi gope, kendo weg gopego bandhe. To gopego bende ng’eny ma ok onyal chulo.
2 Chal ma wantie inyalo pim gi mar rawerano. Jonyuolwa mokwongo ma gin Adam gi Hawa ne gin joma kare kendo ne gidak e paradiso ma jaber. (Cha. 1:27; 2:7-9) Ne gin gi thuolo mar dak gi mor nyaka chieng’ e piny kae. Kata kamano, apoya nono weche nolokore. Ne gilalo Paradiso ma jaber kod geno mar dak nyaka chieng’. En mwandu mane ma koro ne giweyo ne nyithindgi? Muma wacho kama: “Richo nodonjo e piny kokalo kuom ng’ato achiel, [Adam] kendo tho nobiro kokalo kuom richo, tho nolandore kuom ji duto nikech giduto ne gisetimo richo.” (Rumi 5:12) Mwandu ma ne Adam oweyonwa en richo ma kelo tho. Richono inyalo pim gi gowi maduong’ ma onge dhano ma jaricho ma ne nyalo chulo.—Zab. 49:8.
3. Ang’o momiyo richo inyalo pim gi ‘gowi’?
3 Yesu nopimo richo gi ‘gope.’ (Mat. 6:12; Luka 11:4) Sama watimo richo, wabedo gi gop Jehova kendo dwarore ni wachul gowino. Ka ok wachulo gowino, to ibiro ruche mana ka watho.—Rumi 6:7, 23.
4. (a) Ka dine Jehova ok okonyowa, ang’o ma dine otimore ne dhano duto ma gin joricho? (Zaburi 49:7-9) (b) Tiend “richo” en ang’o ka luwore gi kaka oti kode e Muma? (Ne sanduk ma wiye wacho ni “ Richo.”)
4 Ok wanyal yudo gik moko duto ma Adam gi Hawa nolalo kendwa. (Som Zaburi 49:7-9.) Ka dine Jehova ok okonyowa, di koro waonge gi geno mar dak nyaka chieng’ kata mar chier. Mano nyiso ni dine watho ma onge geno mar chier mana kaka le.—Ekl. 3:19; 2 Pet. 2:12.
5. Ang’o ma Wuonwa ma jahera osetimo mondo okonywa chulo gowi mar richo? (Ne bende picha .)
5 Par ane kendo wuoyi ma ne wasewuoyo kuome e chak sulani. Onyalo winjo nade ka ng’at moro ma jamwandu oyie chulone gopego? Onge kiawa ni rawerano nyalo bedo mamor ahinya gi wachno. E yo ma kamano, Jehova Wuonwa ma jahera osemiyowa mich ma nyalo chulonwa gowi mar richo ma ne wayudo kuom Adam. Yesu nolero wachno kama: “Nyasaye nohero piny ahinya mi nochiwo Wuode ma miderma, mondo ng’at ma nyiso yie kuome kik kethi, to obed gi ngima ma nyaka chieng’.” (Joh. 3:16) E wi mano, michno miyo wabedo gi winjruok maber gi Jehova kendo.
Yesu nolando wach maber e wi yo ma Jehova weyonego ji richogi kokalo kuom misango ma nochiwo. (Joh. 3:16) Bang’e, nochiwo ngimane mondo obed rawar (Ne paragraf mar 5)
6. Ang’o ma wadwaro nono e sulani, to nikech ang’o?
6 Ere kaka tho mar Yesu nyalo miyo owenwa richowa, kata “gopewa”? Mondo wayud dwoko mar penjono, e sulani, wadwaro nono weche moko motigo e Muma kod tiendgi. Nono wechego biro konyowa dhi nyime bedo mamor gi yo ma Jehova weyonwago richowa.
JEHOVA DWARO NI WABED GI WINJRUOK MABER KODE
7. (a) En ang’o machielo ma Adam gi Hawa nolalo? (b) Nikech wan nyikwa Adam gi Hawa, ang’o ma dwarore ni watim? (Jo-Rumi 5:10, 11)
7 Mopogore gi ngima mochwere ma Adam gi Hawa nolalo, ne gilalo bende winjruok maber ma ne gin-go gi Jehova Wuon-gi. Ka ne Adam gi Hawa pok otimo richo, ne gin jood Jehova. (Luka 3:38) Kata kamano, ka ne gitamore winje, noriembogi e ode ka ne pok ginyuolo nyithindo. (Cha. 3:23, 24; 4:1) Nikech wan nyikwa Adam gi Hawa, dwarore ni walos winjruok maber gi Jehova kendo. (Som Jo-Rumi 5:10, 11.) Mano tiende ni onego watem matek mondo osiep manie kindwa gi Jehova obed motegno. Ka luwore gi buk moro ma lero Muma e dho Grik, loso “winjruok maber” tiende bende nyalo bedo “loso osiep gi jasiki.” Gima iwuoro en ni Jehova e ma nokawo okang’ mokwongo mar dwoko osiep ma ne nie kindwa kode. Notimo kamano e yo mane?
CHENRO MA JEHOVA NOTIMO MONDO WABED GI WINJRUOK MABER KODE
8. Pwodhruok tiende en ang’o?
8 Pwodhruok en chenro ma Jehova noketo mondo odwokgo winjruok maber e kinde gi dhano ma joricho. Mano noriwo chiwo gima nengone rom gi gima nolal. Chenro ma kamano miyo inyalo yud gima nolalno. E Ndiko mag Dho-Grik, wachni itiyogo e nyiso gima Jehova timoga mondo ng’ato obed gi winjruok maber kode kendo.—Rumi 3:25.
9. En chenro mane ma Jehova noketo ma ne nyalo miyo owene Jo-Israel richogi?
9 Jehova nochako chenro moro mar weyo ne Jo-Israel richogi mondo gibed gi winjruok maber kode. E piny Israel machon, odiechieng pwodhruok ne bedoga higa ka higa. E odiechiengno, jadolo maduong’ ne chiwoga misango mag le e lo Jo-Israel. En adier ni misango mag le ne ok nyal golo richo mag dhano chuth nikech le gin chuech ma piny ka opimgi gi dhano. Kata kamano, ka Jo-Israel ma noyie loko chunygi nochiwo misango ma ne dwarore, Jehova noikore ng’wononegi. (Hib. 10:1-4) E wi mano, chenro mar chiwo misango kinde ka kinde ne paronegi ni gin joricho kendo ne paronegi ni ne dwarore ni omany yo moro machielo ma ninyalo resgigo chuth.
10. En chenro mane ma Jehova notimo mondo ores dhano chuth?
10 Jehova ne nigi chenro moro maber ma ne nyalo miyo ores dhano chuth ma ok ochuno ni gichiw misengni mag le kinde ka kinde. Nochano mondo ochiw Wuode ma nohero “dichiel ma ok bi nwo kendo, mondo oting’ richo mag ji mang’eny.” (Hib. 9:28) Yesu nochiwo “ngimane mondo owar ji mang’eny.” (Mat. 20:28) Ere kaka nodhi waro ji?
GIMA JEHOVA NOCHULO MONDO WABED GI WINJRUOK MABER KODE
11. (a) Ang’o momiyo ne dwarore ni ochul rawar? (b) En ng’ano ma ne nyalo chulo rawar?
11 Ka luwore gi Muma, Jehova ne dwaro ni ochul nengo mar rawar mondo dhano obed gi winjruok maber kode kendo. a En ang’o ma nonego ochul ma ne nyalo miyo dhano oyud gima Adam nolalo? Par ni Adam gi Hawa nolalo thuolo mar dak e piny ka nyaka chieng’ ka gin joma kare chuth. Omiyo, nengo mar rawar ma nonego ochul nonego oromre gi ma nolal. (1 Tim. 2:6) Ne inyalo chule gi (1) ng’at makare chuth; (2) ng’at ma ne nyalo dak e piny ka nyaka chieng’; kod (3) ng’at ma noyie chiwo ngimane nikech wan. Mano e momiyo ngima ma nochiw, ne nyalo dwoko ngima ma nolal.
12. Ang’o momiyo Yesu e ma nowinjore chiwo nengo mar rawar ma ne dwarore ni ochul?
12 Ne ane weche moko adek momiyo Yesu e ma nowinjore chulo rawar. (1) Ne en ng’at makare chuth, tiende ni “ne ok otimo richo moro amora.” (1 Pet. 2:22) (2) Nikech mano, ne en gi nyalo mar dak nyaka chieng’ e piny. (3) Noyie tho kendo chiwo ngimane ne dhano. (Hib. 10:9, 10) Nikech Yesu ne en dhano makare chuth, ngimane ne romre gi ngima mar Adam ma bende ne en ng’at makare ka ne pok otimo richo. (1 Kor. 15:45) Kokalo kuom thone, Yesu nochiwo gima nengone romre gi ma Adam nolalo. (Rumi 5:19) Mano nomiyo Yesu obedo “Adam mogik.” Onge tiende mondo ng’at machielo makare ochak obi mondo ochul gima Adam nolalo. Yesu ne “ochiwo misango dichiel ma ok bi nwo kendo.”—Hib. 7:27; 10:12.
13. En pogruok mane mantie e kind pwodhruok kod rawar?
13 En pogruok mane mantie e kind pwodhruok kod rawar? Nyasaye pwodhowa sama okawo okang’ mar dwoko winjruok maber ma ne wan-go kode. To rawar en nengo ma nochul mondo opwodhgo dhano kuom richo. Nengono en remb Yesu ma nochwer nikech wan.—Efe. 1:7; Hib. 9:14.
JEHOVA KWANOWA KAKA JOMA KARE NIKECH WAN GI WINJRUOK MABER KODE
14. Ang’o ma koro wadwaro nono, to nikech ang’o?
14 Gin ber mage ma wayudo nikech chenro mar pwodhruok? Mondo wayud dwoko mar penjono, wadwaro nono tiend weche mamoko motigo e Muma. Nono tiend wechego biro konyowa ng’eyo ber ma wayudo nikech Jehova weyonwa richowa.
15-16. (a) E Muma “waro ng’ato” tiende en ang’o? (b) Iwinjo nade nikech chenro ma Jehova notimo mondo owarwa e richo?
15 E Muma, iwaro ng’ato sama ogonye e tuech nikech osechul nengo mar rawar ma dwarore. Jaote Petro nolero wachno kama: “Ung’eyo ni ne ogonyu [kata ne owaru] e yor ngima manono ma kwereu noweyonu, to ne ok en kokalo kuom gik ma tow kaka fedha kata dhahabu. Kar mano, ne en kokalo kuom remo ma nengone tek kaka remb nyarombo ma onge mbala kendo maler chuth tiende ni mar Kristo.”—1 Pet. 1:18, 19.
16 Nikech misango mar rawar, inyalo gonywa kuom richo kod tho. (Rumi 5:21) Kuom adier, wamor nikech Jehova gi Yesu notimo chenro mondo owarwa e richo kokalo kuom remb Yesu ma nochwer nikech wan.—1 Kor. 15:22.
17-18. (a) En yo mane ma ikwanowago kaka joma kare? (b) Gin ber mage ma wayudo nikech chenro ma Jehova notimo mar pwodhruok?
17 Ikwanowa kaka joma kare sama oruchnwa gope ma wan-go kendo koro ok bi chunwa ni wachul gopego. Kuom timo kamano, Jehova ok nyis ni koro okadho chike moketo mag ng’ado bura e yo makare. Ok okwanwa kaka joma kare mana nikech mano en ratiro ma wan-go. To bende, mano koro ok nyis ni obiro yie ayieya kodwa kata obedo ni wan joricho. Kata kamano, nikech wasenyiso yie kuom chenro mar pwodhruok kod nengo mar rawar ma nochul, Jehova nyalo rucho gopewa kata richowa.—Rumi 3:24; Gal. 2:16.
18 Chenrono miyo wayudo ber mage? Joma oseyier mondo obi oloch gi Yesu e polo osekwan kaka joma kare nikech koro gin nyithind Nyasaye. (Tito 3:7; 1 Joh. 3:1) Osewenegi richogi. Chal ka gima pok ne gitimo richo nyaka nene, kendo koro giwinjore bedo e Pinyruodh Nyasaye. (Rumi 8:1, 2, 30) Joma nigi geno mar dak e piny ka osekwan kaka joma kare nikech koro gin osiepe Nyasaye kendo osewenegi richogi. (Jak. 2:21-23) Oganda mang’ongo ma biro tony e Har–Magedon nigi geno mar dak nyaka chieng’. (Joh. 11:26) ‘Joma kare’ kod ‘joma ok kare’ ma notho ibiro chier. (Tich 24:15; Joh. 5:28, 29) Gikone, jotich Jehova manie piny ma biro makore kode biro yudo “thuolo ma nigi duong’ mar bedo nyithind Nyasaye.” (Rumi 8:21) To mano doko gueth makende ma wan-go nikech chenro mar pwodhruok ma dwokonwa winjruok maber ma ne wan-go gi Jehova Wuonwa!
19. Ere kaka chal ma wantie koro oselokore? (Ne sanduk ma wiye wacho ni “ Jehova Weyonwa Richowa.”)
19 Kuom adier, nitie kinde ma ne wachal gi rawera ma ne wawuoye e chak sulani ma nolalo gimoro amora to odong’ gi gope mang’eny ma ne ok onyal chulo. Kata kamano, wamor ni Jehova nokonyowa. Chalwa oselokore nikech chenro mar pwodhruok kendo nikech osechul nengo mar rawar ma ne dwarore. Sama waketo yie kuom Yesu Kristo, iwarowa kata igonyowa kuom richo kod tho. Irucho richowa ma wadong’ ka joma ne pok otimoga richo. To maduong’ie moloyo, sani wan gi winjruok maber gi Jehova Wuonwa ma jahera kendo modak e polo.
20. Ang’o ma wabiro nono e sula ma luwo?
20 Ka waparo matut e wi gima Jehova gi Yesu osetimonwa, wabedo mamor kendo mano miyo wagoyonegi erokamano. (2 Kor. 5:15) Ka dine ok gikonyowa, dikoro waonge geno moro amora. Kata kamano, ere kaka yo ma Jehova weyonwago richo mulowa ng’ato ka ng’ato? Wabiro nono wachno e sula ma luwo.
WER 10 Pakuru Jehova Nyasachwa!
a E dhok mamoko, “rawar” iloko kitiyo gi weche ma tiendgi sie gin “nengo mar ngima,” kata “nengo michulo.”
