Mary kod jaode miluongo ni John, a odak e piny moro ma thoth joma tiyoga e pinyno gin joma wuok e piny Philippines. Mary gi John morga lendo ne joma kamago. E kinde tuo mar korona, Mary nochako puonjore Muma gi joma ae piny ma nodakeno kod ma ne ae pinje mamoko. Ere kaka notimo mano?

Mary ne japenjoga joma nopuonjorego Muma niya, “Be ing’eyo ng’at machielo ma diher puonjore Muma?” Ka po ni jogo nodwoko ni “ee,” nojanyisogi ni gitude gi jogo. Penjo mayotno thothne ne keloga nyak maber. Nikech ang’o? En nikech joma ohero Wach Nyasaye gomboga nyiso osiepegi kod joutegi gik ma gipuonjre e Muma nikech gidewogi. Penjo ma Mary penjogano osekelo ber mage?

Japuonjre Mary moro miluongo ni Jasmin notude gi ji ang’wen ma ne gombo puonjore Muma. Achiel kuomgi miluongo ni Kristine, ne mor ahinya gi puonjruok Muma kendo nokwayo Mary mondo gipuonjrega diriyo e juma. Ka ne Mary openje ka be nong’eyo ng’ato ang’ata ma diher puonjore Muma, Kristine nodwoke kama: “Ee, abiro tudi gi moko kuom osiepena.” Bang’ jumbe moko matin, Kristine notudo Mary gi osiepene moko ang’wen ma ne dwaro puonjore Muma. Bang’e, Kristine notude gi osiepege mamoko bende, kendo osiepe Kristine mamokogo bende notude gi osiepegi mamoko ma ne dwaro puonjore Muma.

Kristine bende ne gombo ni joode ma nodak Philippines opuonjre Muma. Omiyo, ne owuoyo gi nyare ma niluongo ni Andrea. Mokwongo okwongo, Andrea ne paro ni din mar Joneno mag Jehova en mana din moro ma gala gala, ma ok oyie kuom Yesu kendo ma tiyoga mana gi Muma Machon (Chakruok nyaka Malaki). Kata kamano, bang’ puonjruok dichiel kende, noloko paro ma ok owinjore ma ne en-go kuom Joneno. E kinde mag puonjruok, nojawacho niya: “Ka Muma e ma owacho kamano, to mano en adier.”

Bang’ kinde, Andrea notudo Mary gi osiepene moko ariyo kaachiel gi jatich wadgi moro ma bende nochako puonjore Muma. Mary ne ok ong’eyo ni Andrea ne nigi waiygi moro ma muofu ma ne jachikoga ite sama gipuonjore. Chieng’ moro, Angela nokwayo Andrea mondo otude gi Mary mondo en bende opuonje Muma. Angela ne mor gi gik ma nopuonjore kendo bang’ dwe achiel kende, nosemako ndiko mang’eny kendo koro nogombo puonjore ding’wen e juma. Andrea nokonye donjo e chokruogewa ma ne itimo e yor vidio kendo nodonjoga ma ok obare.

 Ka ne Mary ofwenyo ni jaod Kristine miluongo ni Joshua ne bedoga e ot kanyo sama Kristine ne puonjore, Mary nopenje ka en bende doher bedo kodgi sama gipuonjore Muma. Joshua nowacho niya: “Ee, abiro mana chiko ita, to kik upenja penjo moro amora. Ka upenja penjo to abiro wuok.” Dakika abich kama bang’ ka ne gisechako puonjore, Joshua nopenjo penjo mang’eny moloyo Kristine kendo nogombo dhi nyime puonjore Muma.

Penjo achiel ma Mary ne penjoga joma opuonjo Muma, nomiyo oyudo jopuonjre mang’eny mag Muma. Nikech nopuonjore gi ji mang’eny, nochano mondo jolendo mamoko opuonjre kodgi. Nikech mano, Mary nochako puonjore Muma gi ji 28 ma ne wuok e pinje ang’wen mopogore opogore.

Jasmin, japuonjre Mary mokwongo ma ne wasewuoyo kuome motelo nobatisi April 2021. Kristine nobatis e dwe mar Mei, e higa 2022, kendo sani osedok Philippines kama joode nitie. Jopuonjre moko ariyo ma Kristine notudo gi Mary bende nobatisi. Nobatis Angela bende dweche moko matin mokalo kendo sani en painia mapile. Joshua ma en jaod Kristine kod nyargi miluongo ni Andrea, kaachiel gi jopuonjre mamoko dhi nyime puonjore Muma.

E kinde Jokristo mokwongo, wach maber nolandore mapiyo ahinya e kind joot kod osiepe. (Joh. 1:41, 42a; Tich 10:24, 27, 48; 16:25-33) Donge inyalo penjo jopuonjreni mag Muma kaachiel gi jomamoko morwako wach ni, “Be ing’eyo ng’at machielo ma diher puonjore Muma?” Penjono nyalo keloni nyak mang’eny ahinya.