1, 2. En nyasi mane makende ma biro miyo jotich Nyasaye thuolo mar nyiso ni gin gi kuwe e kindgi e higa mar 2018, to nikech ang’o? (Ne picha man malo.)

TARIK 31 Mach, 2018, sama chieng’ chako podho, Joneno mag Jehova kod jomoko ma gigwelo biro chokore mondo gitim Chiemb Odhiambo mar Ruoth ma gitimoga higa ka higa. Gibiro chokore mondo gitim Rapar mar tho Kristo. Higa ka higa, rapar miyoga jotich Nyasaye thuolo makende mar nyiso kaka gin gi kuwe e kindgi e piny mangima!

² Onge kiawa ni Jehova gi Yesu bedoga ma mor sama gineno ka owete gi nyimine kod joma gigwelo chokore e piny mangima mondo gitim nyasi makendeni. Muma nokoro ni ‘oganda moro mang’ongo ma onge ng’at ma nyalo kwano, moa e ogendni duto, gi dhoudi duto, gi ji mopogore opogore duto, kendo gi dhok duto’ ne dhi kok niya: “Warruokwa a kuom Nyasachwa mobet e kom-loch kendo kuom Nyarombo.” (Fwe. 7:9, 10) To mano kaka en gima ber ni Rapar ma watimo higa ka higa miyowa thuolo  mar miyo Jehova gi Yesu duong’ e yo ma kamano!

3. Wadwaro yudo dwoko mag penjo mage e sulani?

³ Nitie penjo moko ma wadwa yudo dwokogi e sulani. (1) Ere kaka ng’ato ka ng’ato kuomwa nyalo ikore ne Rapar kendo yudo ber kuom dhi e Raparno? (2) Ere kaka Rapar miyo jotich Nyasaye bedo gi kuwe e kindgi? (3) Ere kaka ng’ato ka ng’ato kuomwa nyalo miyo kuweno obedie? (4) Be nitie kinde ma wabiro timo Rapar mogik? Ka en kamano, to kare ibiro time karang’o?

4. Ang’o momiyo onego watem kar ma wanyalo mondo wadhi e Rapar?

⁴ Par gimomiyo dhi e Rapar en gima duong’. Ng’e ni dhi e chokruoge mag kanyakla en achiel kuom yore ma walamogo Jehova. Jehova gi Yesu mor gi joma timo kinda mondo gidhi e Rapar higa ka higa. Wadwaro ni gine ni watimo kinda duto mondo wadhi e Rapar, mak mana ka watuwo matek kata gimoro ma ok wanyal geng’o omakowa. Sama wanyiso gi timbewa ni wageno chokruogewa ahinya, wamiyo Jehova thuolo mar dhi nyime weyo nyingewa e “kitap paro,” ma bende iluongo ni “kitap ngima” ma ondikie nyinge joma biro yudo ngima mochwere.​—Mal. 3:16; Fwe. 20:15.

5. Kodong’ ndalo manok to wadhi e Rapar, wanyalo timo nang’o mondo ‘wanon kabe wan e yie’?

⁵ Kodong’ ndalo manok to wadhi e Rapar, wanyalo kawo thuolo momedore mondo walem kendo wapar matut winjruok manie kindwa gi Jehova. (Som 2 Jo-Korintho 13:5.) Ere kaka wanyalo timo mano? Wanyalo timo kamano kuom ‘nono kabe wan e yie.’ Mondo watim kamano, wanyalo penjore penjo ma luwogi: ‘Be an gadier chuth ni an e riwruok ma Jehova tiyogo mondo ochop dwache e piny? Be atimo duto ma anyalo mondo aland kendo apuonj ji wach maber mar Pinyruoth? Be gik ma atimo nyiso ni ayie ni wadak e ndalo mag giko kendo ni loch marach mar Satan chiegni chopo e gikone? Be pod an gi yie motegno kuom Jehova gi Yesu mana kaka ne an-go ka ne achiwora ne Jehova Nyasaye mobatisa?’ (Mat. 24:14; 2 Tim. 3:1; Hib. 3:14) Paro matut dwoko mag penjogo biro konyowa dhi nyime nyiso gima wan gadier.

6. (a) En yo mane kende ma wanyalo yudogo ngima mochwere? (b) Jaduong’-kanyakla moro ikorega nade ne Rapar higa ka higa, to ere kaka in bende inyalo timo kamano?

⁶ Som kendo ipar matut Ndiko ma nyiso gimomiyo Rapar en gima duong’. (Som Johana 3:16; 17:3.) Wanyalo mana yudo ngima mochwere ka ‘wang’eyo’ Jehova kendo “nyiso yie” kuom Yesu, ma en Wuod Nyasaye achiel kende mohero. Mondo iikri ne Rapar, donge inyalo puonjori weche moko ma biro miyo imed sudo machiegni gi Jehova kod Yesu? Ne ane gima owadwa moro mosebedo jaduong’-kanyakla kuom kinde malach osebedo ka timo. Kuom higni mang’eny, osebedo kochoko Ohinga mar Jarito ma nigi sula ma wuoyo e wi Rapar kod hera ma Jehova gi Yesu osebedo ka nyisowa. Kodong’ jumbe matin to itimo Rapar, osomoga sulago kendo oparo matut e wi gimomiyo Rapar en gima duong’. Seche moko omedoga sula moko e wi mosechokogo. Owadwano osefwenyo ni somo sulago nyadinwoya kendo paro matut e wi ndiko moket ni wasom e kinde Rapar, miyo opuonjore gik manyien higa ka higa. To maduong’ie moloyo, oneno ni timo kamano miyo omedo hero Jehova gi Yesu higa ka higa. Puonjruok e yo matut kamano nyalo konyi mondo imed hero Jehova kod Yesu kendo neno ber mar Rapar.

7. (a) Yesu nokwayo wach mane e lamo e otieno ma ne ohang timee Chiemb Odhiambo mar Ruoth? (b) Ang’o ma nyiso ni Jehova osedwoko kwayono?

⁷ E otieno ma ne ohang timee Chiemb Odhiambo mar Ruoth, Yesu nolemo mondo jolupne obed gi winjruok achiel e kindgi mana kaka en gi Wuon mare ginie winjruok achiel. (Som Johana 17:20, 21.) Jehova nodwoko lamono kendo koro sani ji milionde modhuro oyie ni Jehova nooro Wuode e piny. Mopogore gi chokruoge mamoko, Rapar nyiso maler kaka Joneno mag Jehova nigi kuwe kod winjruok e kindgi. Ji ma wuok e ogendni mopogore opogore kendo ma pien dendgi bende opogore chokorega kuonde mopogore opogore e piny mangima. Nitie kuonde moko ma ka ji mowuok e ogendni mopogore opogore kamano ochokore mondo gilem, mano kawo ji gi wuoro ahinya kendo ichayogi. Kata kamano, winjruok kod kuwe ma kamano moro Jehova gi Yesu!

8. En fweny mane ma Jehova nomiyo Ezekiel e wi bedo gi kuwe kod winjruok e kind jotichne?

⁸ Wan jotich Jehova wang’eyo gimomiyo wan gi kuwe gi winjruok e kindwa. Jehova nosekoro wachno chon. Ne ane fweny ma ne omiyo janabi Ezekiel e wi riwo ludhe ariyo ma achiel en mar “Yuda” to machielo en mar “Yusuf.” (Som Ezekiel 37:15-17.) “Penjo Moa Kuom Josombwa” ma yudore e Ohinga mar Jarito ma Julai 2016 nowacho kama: “Jehova nokoro kokalo kuom janabi Ezekiel ni joge ne dhi duogo e Piny Manosingi kendo ni ne idhi riwgi mondo gibed oganda achiel. Wach ma nokorno bende ne nyiso kaka jotich Nyasaye ne dhi riwore e lamo achiel e kinde mag giko.”

9. Weche ma Ezekiel nokoro nenorega nade higa ka higa sama itimo Rapar?

⁹ Kochakore e higa mar 1919 ka dhi nyime, Jehova nochako chano kendo riwo Jokristo mowal mos mos, ma ne ipimo gi ludh “Yuda.” Kae to joma ne nigi geno mar dak e piny, ma ipimo gi luth mar “Yusuf,” noriwore gi Jokristo mowal ma grube ariyogo obedo “kueth achiel.” (Joh. 10:16; Zek. 8:23) Jehova nosingo mar riwo ludhe ariyogo mondo gibed luth achiel e lwete. (Eze. 37:19) E kindegi, grube ariyogo tiyo ne Jehova ka gin gi kuwe e bwo Ruoth achiel ma en Yesu Kristo, ma iluongo ni “jatichna Daudi” e bug Ezekiel. (Eze. 37:24, 25) Kuwe kod winjruok miwuoye e bug Ezekiel nenorega maler higa ka higa sama Jokristo mowal kod “rombe mamoko” chokore mondo gitim Rapar mar tho Kristo. Kata kamano, ng’ato ka ng’ato kuomwa nyalo timo ang’o mondo kuwe kod winjruok ma kamano omed dhi nyime?

10. Wanyalo timo ang’o mondo kuwe obed e kindwa?

¹⁰ Achiel kuom gik ma wanyalo timo mondo kuwe kod winjruok omed dhi nyime e kindwa en bedo gi kido mar bolruok. Ka Yesu ne nie piny, nojiwo jopuonjrene mondo gibed joma bolore. (Mat. 23:12) Ka wan joma obolore, ok wabi bedo joma ng’awore. Kar mano, bedo gi bolruok biro miyo waluw kaka itayowa, to chuny ma kamano e ma dwarore mondo kuwe obed e kanyakla. Moloyo duto, bedo gi kido mar bolruok miyo wamoro Nyasaye nimar ‘okwedo jong’ayi, to ochiwo ng’wono mogundho ne joma bolore.’​—1 Pet. 5:5.

11. Ere kaka paro matut gima makate kod divai ochung’ne konyowa mondo wabed gi kuwe e kindwa?

¹¹ Gimachielo ma wanyalo timo mondo kuwe obedie en paro matut gima makate  kod divai ochung’ne. Kapok ochopo odiechieng’ mitimee Rapar kod odhiambo ma koro itimee, onego wapar matut gimomiyo watiyo gi makate ma onge thowi kod divai makwar. (1 Kor. 11:23-25) Makate ochung’ ne ringre Yesu ma onge richo ma nogolo kaka misango, to divai ochung’ ne rembe ma nochuer. Kata kamano, ng’eyo ang’eya gik ma gigo ochung’ne kende ok oromo. Par ni misango ma Kristo nogolo nyiso hera e tieng’ diriyo. Onyiso kaka Jehova noherowa momiyo nochiwonwa Wuode, kod hera ma Yesu noherowago momiyo noyie chiwonwa ngimane. Paro hera ma ne giherowagono onego omi wan bende wahergi. Hera ma waherogo Jehova chalo mana gi tol ma tueyowa kanyachiel kendo ma miyo wamedo bedo gi kuwe kod winjruok e kindwa.

12. E ngero ma Yesu nogoyo mar ruoth ma ne dwaro nono kwan pesa gi wasumbnine, nonyiso nade ni Jehova dwaro ni wang’won ne jowetewa?

¹² Ng’wono ne jowetewa en gimachielo ma wanyalo jiwogo kuwe kod winjruok. Sama wang’wono ne jowetewa, wanyiso ni wagoyo erokamano nikech misango ma Kristo nochiwo mondo owenwa richowa. Ne ane ngero moro ma Yesu nogoyo ma yudore e Mathayo 18:23-34. Penjri ane kama: ‘Be atemo mondo aluw gima Yesu nopuonjono? Be ahora gi Jokristo wetena kendo atemo ng’eyo gimomiyo gitimo gik moko e yo ma gitimogigo? Be aikora ng’wono ne jomoko sama gichwanya?’ En adier ni nitie richo moko madongo, kendo nitie richo moko ma ka ng’ato otimo ne nyawadgi to ng’wonone bedo matek. Kata kamano, ngero ma Yesu nogoyono nyiso gima Jehova dwaro ni watim. (Som Mathayo 18:35.) Yesu nowacho maler ni Jehova ok bi ng’wononwa ka watamore ng’wono ne jowetewa, to ahinya ahinya ka nitie gima nyiso ni onego wang’wonnegi. Mano wach monego wapar ahinya! Sama wang’wono ne jowetewa mana kaka Yesu nonyisowa ni watim, mano miyo warito kuwe kod winjruok manie kindwa.

13. Ere kaka bedo joma ohero loso kuwe miyo jotich Nyasaye bedo gi winjruok?

¹³ Sama wang’wono ne jowetewa, wanyiso  maler ni wan joma ohero kuwe. Jaote Paulo nowacho ni onego ‘watem matek mondo warit winjruok achiel ma roho miyowa e kuwe ma tueyowa kanyachiel.’ (Efe. 4:3) E kinde mag Rapar kod e odhiambo ma ibiro timee Raparno, onego ipar matut gik ma in iwuon itimo ne jomoko. Penjri ane kama: ‘Be ang’era kaka ng’at ma ok makga sadha? Be ji ong’eyaga kaka ng’at ma timo duto ma nyalore mondo alos kuwe?’ Magi gin penjo madongo monego wapar ahinya kinde mag Rapar.

14. Ere kaka wanyalo nyiso ni ‘wanano e kindwa kuom hera’?

¹⁴ Hero jowetewa mana kaka Jehova ma Nyasach hera oherowago bende jiwo kuwe kod winjruok. (1 Joh. 4:8) Ok dwaher ni wawach e chunywa kama e wi Jokristo wetewa, “Aherogi mana nikech gin Jokristo wetena, ka ok mano to ok apar ka anyalo herogi.” Bedo gi paro ma kamano opogore ahinya gi gima Paulo nowacho ni ‘wanan e kindwa kuom hera.’ (Efe. 4:2) Ne ni ne ok owacho ni onego wanan anana gi jowetewa, to onego watim kamano nikech waherogi. Nitie pogruok maduong’ e kind gik moko ariyogo. Kanyakla oting’o ji mopogore opogore ma Jehova oywayo ire. (Joh. 6:44) Jehova ong’eyo ni gin joma inyalo her to mano e momiyo oywayogi ire. Omiyo onge ng’ato ang’ata monego owach ni nitie owete gi nyimine moko ma ok owinjore waher. Nyaka waher jowetewa mana kaka Jehova onyisowa ni watim!—1 Joh. 4:20, 21.

15. Wang’eyo nade ni wabiro bedo gi Rapar mogik?

¹⁵ Nitie chieng’ ma wabiro timo Rapar mogik. Wang’eyo mano nade? E barua mokwongo ma Paulo nondiko ne Jo-Korintho, nowachonegi ni kuom paro tho Yesu higa ka higa, ‘gimedo dhi nyime lando tho mar Ruodhwa nyaka chop obi.’ (1 Kor. 11:26) Wach motigo e ndikono ni “obi” chalre gi wach ma Yesu notiyogo e weche ma nokoro e wi giko mar ndalo ka nowuoyo kuom ‘biro’ mare. Ka ne Yesu wuoyo e wi masira maduong’ ma koro okayo machiegni, nowacho niya: “Ranyisi mar Wuod dhano nonenre e polo, kendo dhoudi duto mag piny nogo korgi gi kuyo maduong’, mi ginine Wuod dhano ka biro e boche polo ka en gi teko kod duong’ mang’ongo. Eka [Yesu biro] oro malaikene gi dwol maduong’ mar turmbeta kendo ginichok joge moyier kanyachiel ka giwuok e tunge ang’wen mag piny, a e tung’ polo konchiel nyaka e tung’ machielo.” (Mat. 24:29-31) Tij ‘choko joma oyier’ ma iwuoye kae ochung’ ne kinde ma ibiro chokee Jokristo duto mowal ma pod biro bedo e piny e kindeno mondo omigi pokgi mar dhi e polo. Mano biro timore ka masira maduong’ osechakore to lweny mar Har–Magedon podi. Bang’ mano, Jokristo mowal 144,000 biro riwore gi Yesu e ketho ruodhi duto mag piny. (Fwe. 17:12-14) Rapar ma wabiro timo kae to Yesu choko Jokristo mowal ma pod nie piny e ma biro bedo mogik.

16. Ang’o momiyo onego itim duto minyalo mondo idhi e Rapar ma higani?

¹⁶ Watimuru duto ma wanyalo mondo wadhi e Rapar ma wabiro timo Mach 31, 2018. E wi mano, wakwauru Jehova okonywa mondo wadhi nyime rito kuwe kod winjruok ma nitie e kind jotichne! (Som Zaburi 133:1.) Par ni nitie e odiechieng’ ma wabiro timee Rapar mogik. Ka pod warito odiechiengno, watim duto ma wanyalo mondo wachop e Rapar kendo wadhi nyime nyiso ni wageno ahinya kuwe ma wabedogago chieng’ Rapar.