EE, kinde moko ne itiyo kodgi. Ne ane ranyisi moro. Rapar mar Chik 24:14, 15 wacho niya: “Kik itim marach ni jatich moro modhier machandore, kata obedo ni en ja-Israel kata en jadak . . . Ka ok itimo kamano, to onyalo ywakni kuom [Jehova], mi dibed jaketho.” (The Bible in Luo, 1976)

Nitiere wach ma nondik e higni mag 600 Ka Kristo Podi ma wuoyo e wi bura moro motudore gi weche manie ndikono. Balatago mondikie wechego noyud machiegni gi Ashdod. Nyalo bedo ni ng’at ma notero kes ne en jatich moro ma ne odonjne ni ok otero cham moromo e kar keno. Wechego ne ondik kama: “Bang’ ka jatichni ne osetieko kano cham ndalo matin mosekalo, Hoshayahu ma wuod Shobay ne obiro ma okawo law jatichni. . . . Kata mana jowetena duto ma ne wakeyogo e chieng’ mager nyalo yie . . . ni gima awachoni en adier. Aonge ketho moro amora. . . . Ka gavana neno ni ok en gi ting’ mar chiko mondo odwok ne jatichni lawe, akwayo ni yie itimna kamano nikech ng’wononi! Kik iling’ aling’a to jatichni onge gi lawe.”

Jahistori moro ma nyinge Simon Schama wacho ni burani “ok wuo mana kuom jatich ma ywagore mondo odwokne [lawe], to onyiso ayanga ni ng’at ma nodhi donjono nong’eyo maler gima chik ne wacho e wi sando joma odhier, to ahinya ahinya chike ma yudore e Tim Jo-Lawi kod Rapar mar Chik.”