1-2. (a) Ere kaka weche ma ni e Isaiah 41:10 nojiwo Nyaminwa Yoshiko? (b) Ang’o momiyo Jehova noneno ni ber mondo ondik wechego e Muma?

NYAMINWA moro ma nyinge Yoshiko noyudo ripot moro marach. Laktar nonyise ni ne odong’ mana gi dweche moko manok to otho. Notimo nang’o bang’ winjo ripodno? Noparo ndiko moro mohero ahinya e Muma. Ne en ndiko mar Isaiah 41:10 ma wacho niya: “Kik iluor, nimar an kodi. Kik iparri, nimar an e Nyasachi. Abiro tegi, ee, abiro konyi, Anamaki motegno gi bada ma korachwich ka atayi e yo makare.” * Kae to nonyiso laktar ni ne ok oluor nikech Jehova nomako lwete. * Weche ma ni e ndikono nojiwo nyaminwano mondo osik kotenore kuom Jehova. Wan be ndikono nyalo konyowa mondo wabed gi chuny mokue sama wakalo e tembe kod chandruok. Mondo wang’e maber kaka mano nyalore, we wakwong wanon ane gimomiyo Nyasaye nonyiso Isaya wechego.

² E kinde ma ne Jehova otayo Isaya mondo ondik wechego, nodwaro hoyo chuny Jo-Yahudi ma ne ochiegni ter e tuech Babilon. Kata kamano, Jehova noneno ni ber mondo wechego ondik mondo oho, ok mana Jo-Yahudigo kende, to nyaka joma ne dhi tiyone bang’e. (Isa. 40:8; Rumi 15:4) Sani wadak e “kinde matek ahinya” kendo magi e ndalo ma weche ma ni e bug Isaiah nyalo jiwowae moloyo kinde moro amora mosekalo.​—2 Tim. 3:1.

3. (a) Gin singo mage ma yudore e Isaiah 41:10, ma be e kama ogole ndiko mar higa 2019? (b) Ang’o momiyo singogo konyowa wan bende?

 ³ E sulani, wadwa wuoyo e wi gik moko adek ma Jehova osingo e Isaiah 41:10 ma nyalo tego yiewa: (1) Jehova biro bedo kodwa, (2) en Nyasachwa, kod (3) obiro konyowa. Singogo * konyowa ahinya nikech wan bende waromo gi tembe mang’eny mana kaka Yoshiko. Gik ma timore e piny bende miyo ngima bedo matek. Moko kuomwa bende sikrande ma pinjegi sando. We wanon ane moro ka moro kuom singogo.

4. (a) Wach mokwongo ma Jehova singonwa en mane? (Ne bende weche momedore.) (b) Jehova tiyo gi weche mage e nyiso ni odewowa kendo oherowa? (c) Weche ma Jehova tiyogo e nyiso ni odewowa kendo oherowa miyo iwinjo nade?

⁴ Wach mokwongo ma Jehova singonwa en ma: “Kik iluor, nimar an kodi.” * Jehova nyiso ni en kodwa kuom dewowa kendo herowa. Ne ane kaka onyiso ni odewowa kendo oherowa ahinya. Owacho kama: ‘Aseheri nikech isebedo ng’at maberna ahinya, kendo man gi duong’.’ (Isa. 43:4) Onge gimoro amora e piny gi polo ma dimi Jehova owe hero jotichne; omakore kodwa ma ti ma ta. (Isa. 54:10) Hera ma oherowago kod osiep ma ni e kindwa kode miyowa chir. Obiro ritowa e kindegi mana kaka notimo ne Abram (Ibrahim) osiepne. Jehova nonyise niya: “Kik iluor, Abram: an kuodi.”​—Cha. 15:1.

5-6. (a) Wang’eyo nade ni Jehova oikore konyowa sama waromo gi tembe? (b) Ranyisi mar Yoshiko puonjowa ang’o?

⁵ Wang’eyo maber ni Jehova oikore konyowa sama waromo gi tembe nikech weche mosingo ne joge niya: ‘Ka ikadho e pi, nabed kodi; kata e aore, ok giniimi: kiwuotho e dier mach, ok nowang’i; kendo ligek mach ok nomok kuomi.’ (Isa. 43:2) Wechegi tiendgi ang’o?

⁶ Jehova ok sing ni obiro golonwa  chandruok sani, kar mano, osingo ni ok obi yie mondo chandruoge ma mol matek ka “aore” oimwa kata tembe mager ka “mach” otiekwa chuth. Omiyo wabedo gadier ni obiro bedo kodwa ka okonyowa ‘kadho’ e chandruogego. Ang’o ma Jehova biro timo? Obiro konyowa dwoko luoro ma wan-go piny mondo wasik ka wamakore kode kata mana sama tho ochomowa. (Isa. 41:13) Mano e gima notimore ne Yoshiko. Nyare wacho kama: “Bedo ni Mama ne onge gi parruok mang’eny nojiwowa. Ne waneno maler kaka Jehova nokonye mobedo gi chuny mokue. Mama ne wuoyoga ni nas kod jotuo wetene e wi Jehova kod singone nyaka e dakika mogik ma ne othoe.” Ranyisi mar Yoshiko puonjowa ang’o? Sama wayie gi weche ma Jehova singonwa ni “Nabed kodi,” wan bende wabiro nano e tembe ka wan gi chir.

7-8. (a) Wach mar ariyo ma Jehova singonwa en mane, to tiende en ang’o? (b) Ang’o momiyo Jehova nonyiso Jo-Yahudi ma ne ni Babilon ni ‘kik giparre’? (c) Gin weche mage ma yudore e Isaiah 46:3, 4 ma nyaka bed ni nojiwo jotich Nyasaye?

⁷ Wach mar ariyo ma Jehova singonwa en ma: “Kik iparri, nimar an e Nyasachi.” Mano tiende nang’o? E dhok ma notigo ka nindiko wesni, wach molok ni “iparri” ne itiyogo kiwuoyo kuom ng’ama “siko ka ng’iyo chien nikech oluor ni gimoro nyalo a kang’eye ma hinye” kata ng’ama “go wang’e koni gi koni sama oluor ni gimoro marach nyalo timorene.”

⁸ Ang’o momiyo Jehova nonyiso Jo-Yahudi ma ne ni e tuech Babilon ni ‘kik giparre’? Nikech nong’eyo ni Jo-Babilon ne dhi bedo maluor. Ang’o momiyo ne gidhi bedo maluor? Jo Medo-Persia ne dhi monjo Jo-Babilon ka higni 70 mag tuech ne dhi ka rumo. Jehova ne dhi tiyo gi jolweny mag Medo-Persia mondo ogony joge e tuech e piny Babilon. (Isa. 41:2-4) Ka ne Jo-Babilon kod jo ogendni mamoko ma nodak e kindeno nong’eyo ni jowasikgi ne chiegni monjogi, ne gijiwore ka giwacho: “Tim chir.” Bende, ne gimedo loso sanamu mang’eny ka giparo ni sanamugo ne dhi ritogi. (Isa. 41:5-7) Jehova to nohoyo chuny Jo-Yahudi ma ne ni e tuech konyisogi niya: “To in Israel, [mopogore gi ogendni mamoko] in e jatichna . . . Kik iparri, nimar an e Nyasachi.” (Isa. 41:8-10, NW) Ne ni Jehova nowacho ni: “An e Nyasachi.” Kokalo kuom wechego, Jehova nomiyo jotichne ma nomakore kode obedo gadier ni wiye pok nowil kodgi. Ee, pod ne en Nyasachgi kendo pod ne gin joge. Nonyisogi kama: “Anating’u . . . anaresu.” Nyaka bed ni wechego nojiwo Jo-Yahudigo.​—Som Isaiah 46:3, 4.

9-10. Ang’o momiyo ok onego wabed maluor? Chiw ane ranyisi.

⁹ E kinde mwadakiegi, ji nigi parruok ahinya nikech gik ma timore medo mana bedo maricho. Wan bende gik marichogo yudowa. Kata kamano, wan ok onego wabed maluor. Jehova nyiso ng’ato ka ng’ato kuomwa ni: “An e Nyasachi.” Ang’o momiyo wechego onego omi wabed gi chuny mokue?

¹⁰ Ne ane ranyisini: Jim gi Ben ni e safar gi ndege. Yamo mager yuko ndegeno. Sama ndege yukni e kor polo kodhi malo kendo koduogo piny, giwinjo dwol moro e spikni mag ndegeno ka wacho ni, “Riduru misibe mag kombeu. Weche richo matin, to mana kuom kinde.”  Jim winjo ka iye ludore. Dwolno medo wacho niya: “Kik uluor. An jariemb ndege e ma awuoyo koduni.” Jim kino wiye, kae to owacho ni, “Owacho nade ni kik waluor! Be ong’eyo gima owacho adier?” Kong’iyo wang’ Ben, oyudo ka Ben ok chalne ng’ama parore kata matin. Jim penjo Ben kama: “Ang’o momiyo in chunyi ng’ich kamano to weche richo?” Ben bwonjo kode ka nyise ni, “Ok aluor nikech ang’eyo jariemb ndegeni maber. En babawa!” Kae to Ben nyise kama: “We apimnie kaka babawa chalo. An gadier ni kiseng’eye maber kod kaka olony e riembo ndege, in be ibiro kue mos.”

11. Ranyisi mar Ben gi Jim puonjowa ang’o?

¹¹ Ranyisini puonjowa ang’o? Mana kaka Ben, wan be wakue mos nikech wang’eyo Jehova Wuonwa ma ni e polo e yo maber. Wang’eyo ni obiro tayowa maber ma wakal chandruoge madongo ma yukowa ka yamo mager e ndalo matek mag gikogi. (Isa. 35:4) Nikech watenore kuom Jehova, wasiko ka wan gi chuny mokue sama jopiny to luoro omako. (Isa. 30:15) E wi mano, waluwo ranyisi mar Ben ka wanyiso joma wadakgo e alworawa gimomiyo waketo genowa kuom Jehova. Timo kamano nyalo miyo gin be gibed gadier ni kata bed ni gikalo e tem mane, Jehova biro konyogi.

12. (a) Wach mar adek ma Jehova singonwa en mane? (b) Sama Muma wuoyo kuom ‘bad Jehova,’ mano paronwa wach mane?

¹² Wach mar adek ma Jehova singonwa en ma: “Abiro tegi, ee, abiro konyi.” Isaya nosewacho motelo kaka Jehova ne dhi miyo joge teko kowacho niya: ‘Jehova Nyasaye nobi ka ng’a man gi teko, mi bade nobed gi loch.’ (Isa. 40:10) Kinde mang’eny, Muma tiyo gi  ‘bat’ e nyiso teko ma ng’ato nigo. Omiyo, sama ndikoni wacho ni ‘bad Jehova nobed gi loch,’ mano paronwa kaka Jehova en Ruoth ma nigi teko mang’eny. Notiyo gi tekone e siro jotichne machon kendo ritogi, kendo odhi nyime timo kamano ne jotichne mogeno kuome e kindegi.​—Rap. 1:30, 31; Isa. 43:10.

13. (a) Gin kinde mage ma Jehova tegowae ahinya-ahinya? (b) En singo mane ma miyo wabedo gi teko kod chir?

¹³ Jehova timonwa kaka nosingo niya: “Abiro tegi.” Otimo mano ahinya-ahinya sama jowasigu sandowa. E pinje moko, jowasikwa temoga chungo tijwa mar lendo kata goyo riwruogwa marfuk. To mano ok mi waparre mokalo tong’. Jehova omiyowa singo ma miyo wabedo gi teko kod chir. Owachonwa kama: “Onge gir lueny mothedh mar kedo kodi ma dinyal timo gi moro.” (Isa. 54:17) Ndikono paronwa weche adek madongo.

14. Ang’o momiyo ok en gima kawowa gi wuoro sama jowasik Nyasaye omonjowa?

¹⁴ Mokwongo, nikech wan jolup Kristo, wang’eyo ni jopiny biro sin kodwa. (Mat. 10:22) Yesu nokoro ni jopuonjrene ne dhi yudo sand mager e ndalo mag giko. (Mat. 24:9; Joh. 15:20) Mar ariyo, weche ma Isaya nokoro siemowa motelo ni jowasikwa ok bi chayowa achaya kae to giweyo gi kanyo, to gibiro tiyo gi gige lweny kata ligengni e kedo kodwa. Gige lwenygo oriwo miriambo ma giwacho kuomwa kod sand ma gisandowago. (Mat. 5:11) Jehova ok bi geng’o jowasikwa mondo kik ti gi gige lwenygo e kedo kodwa. (Efe. 6:12; Fwe. 12:17) Kata kamano, ok onego wabed maluor. Nikech ang’o?

15-16. (a) Wach mar adek monego wapar en mane, to ere kaka Isaiah 25:4, 5 jiwo wachno? (b) Ndiko mar Isaiah 41:11, 12 lero nade gima biro timore ne joma kedo kodwa?

¹⁵ Ne ane wach mar adek monego wapar. Jehova nowacho ni ‘onge gir lweny’  ma jowasigu biro kedogo kodwa ‘ma dinyal timowa gimoro.’ Mana kaka ohinga motegno nyalo geng’owa sama kodh yamo mager chue, e kaka Jehova bende geng’owa kuom “jo mager.” (Som Isaiah 25:4, 5.) Jowasikwa ok bi nyalo kelonwa hinyruok mosiko.​—Isa. 65:17.

¹⁶ Jehova miyo wamedo gene kuom leronwa e yo matut gik ma biro timore ne joma “igi owang’” kodwa. (Som Isaiah 41:11, 12.) Kata bed ni jowasikwa kedo kodwa matek machalo nade, gikone giduto ‘ginilal kendo ginitho.’

17-18. (a) Ere kaka somo Muma miyo wamedo tenore kuom Jehova? Chiw ane ranyisi. (b) Paro matut kuom ndiko mar higa ma 2019 nyalo konyowa nade?

¹⁷ Wamedo tenore kuom Jehova ka wamedo ng’eye maber. To yo ma wanyalo ng’eyogo Jehova maber en ka wasomo Muma kendo paro matut kuom gik ma wasomo. Muma oting’o weche migeno ma nyiso kaka Jehova norito joge e kinde machon. Mano miyo wabedo gadier ni wan bende obiro ritowa.

¹⁸ Ne ane ranyisi maber ma Isaya tiyogo e nyiso kaka Jehova ritowa. Oluongo Jehova ni jakwath to jotichne oluongo ni rombe. Owacho kama kowuoyo kuom Jehova: “Nokwa kwedhe kaka jakwath, noting’ nyirombe e bade, kendo noketgi e kore.” (Isa. 40:11) Sama wang’eyo ni Jehova omakowa gi bade ma ratego, mano miyo wabedo gi chuny mokue nikech wang’eyo ni oritowa. Mondo wadhi nyime bedo gi chuny mokue kata bed ni wayudo chandruok, jatich mogen kendo mariek oyiero Isaiah 41:10 mondo e ma obed ndiko mar higa 2019. Ndikono wacho kama e New World Translation: “Kik iparri, nimar an e Nyasachi.”  Par matut ahinya kuom weche ma tegowago. Wechego biro jiwi sama iromo gi chandruok.