1-2. (a) Ang’o momiyo ok kawwa gi wuoro ni Yesu nomiyowa yo mayot mar paro thone? (b) Gin kido mage ma Yesu nigo ma wadwaro nono?

KONYISI ni iler ane gik ma timorega e Rapar mar tho Kristo ma watimoga higa ka higa, inyalo wacho ang’o? Thothwa nyalo lero gigo te. Nikech ang’o? En nikech en-ga nyasi ma ok olichore. Kata kamano, en gima duong’ ahinya e ngima Jokristo madier. Omiyo, wanyalo penjore ni, ‘Ang’o momiyo ok timga nyasino e yo molichore?’

² Ka ne Yesu yalo e piny ka, nohero puonjo adiera madongo e yo ma ok ogajore kendo ma yot winjo. (Mat. 7:28, 29) Kamano bende, ka nonyiso jolupne mondo otim Rapar * mar thone, nomiyogi yo mayot mar timo kamano. We wanon ane Chiemo Modhiambo mar Ruodhwa e yo matut kaachiel gi gik ma Yesu nowacho kendo timo e nyasino. Mano biro konyowa ng’eyo e yo maber kaka Yesu obolore, ojachir, kendo ojahera. Bende, wabiro puonjore kaka wan be wanyalo bedo gi kidogo.

3. Mana kaka waneno e Mathayo 26:26-28, Yesu notiyo gang’o ka nochako nyasi mar paro thone, to gigo ochung’ ne ang’o?

³ E kinde ma Yesu nochako nyasi mar paro thone, ne en kanyachiel gi jootene 11 ma nomakore kode. Notiyo mana gi gik ma nodong’ bang’ ka ne gisetimo Pasaka mondo  otimgo nyasino. (Som Mathayo 26:26-28.) Notiyo gi makate ma ok oketie thowi kod divai. Yesu nonyiso jootenego ni makate nochung’ ne ringrene ma ne idhi chiw kaka misango, to divai nochung’ ne rembe ma ne dhi chuer. Bedo ni Yesu ne ok otiyo gi gik mang’eny e nyasi manyien kendo makendeno ne ok omako dho jootego. Nikech ang’o?

4. Ere kaka weche ma Yesu nonyiso Maritha konyowa ng’eyo gimomiyo notiyo gi gik matin e timo nyasi mar paro thone?

⁴ Par ane gima notimore dweche moko motelo ka ne Yesu olimo Lazaro, Maritha, gi Maria ma ne gin osiepene ahinya. E seche ma ne giyueyo, Yesu nochako puonjo joma ne ni kanyo. Maritha to nogalore gi tedo chiemo mang’eny ne wendogi modhial. Ka ne Yesu ofwenyo mano, norieye konyise ni ne ok ochuno ni oted gik mang’eny. Chiemo matin noromo aroma. (Luka 10:40-42) Ka nodong’ seche manok to Yesu tho, en be notimo mana gima nonyiso Maritha. Notiyo mana gi gik matin e timo nyasi mar paro thone. Mano puonjowa ang’o kuom Yesu?

5. Yo mayot ma Yesu nowacho ni jopuojrene otimgo Rapar mar thone puonjowa ang’o kuom Yesu, to mano winjore nade gi weche ma ni e Jo-Filipi 2:5-8?

⁵ Yesu nobolore ahinya e gik moko duto ma notimo kod ma nowacho. Mano e momiyo nonyiso bolruok maduong’ ahinya e otienone mogik e piny ka. (Mat. 11:29) Nong’eyo ni nochiegni chiwo misango maduong’ mogik, kendo ni Jehova ne dhi chiere mi bang’e obed ruoth e polo. To e ma pod ne ok olichore kodwaro ni ji opar thone ka gitimo nyasi mogajore gi gik mathoth. Kar mano, nonyiso jopuonjrene ni gitim Rapar mar thone higa ka higa kokalo kuom nyasi mayot. (Joh. 13:15; 1 Kor. 11:23-25) Mano nyiso ni Yesu ne ok en ng’at ma ng’awore. Wamor ahinya ni achiel kuom kido madongo ma Ruodhwa ma ni e polo nigo en bolruok.​—Som Jo-Filipi 2:5-8.

6. Ere kaka wanyalo bedo joma obolore kaka Yesu sama waromo gi tembe?

⁶ Ere kaka wanyalo bedo joma obolore kaka Yesu? En kuom keto dwach jomamoko e ma obed motelo. (Fil. 2:3, 4) Wadog ane kendo e otieno mogik ma Yesu ni e piny ka. Kata obedo ni Yesu nong’eyo ni nochiegni tho tho malit, nodewo ahinya jootene ma ne chiegni bedo gi kuyo mathoth nikech thone. Nikech mano, nobedo kodgi  e otienono kopuonjogi, kojiwogi, kendo kohoyo chunygi. (Joh. 14:25-31) Nikech Yesu nobolore, nodich gi gik ma ne konyo jomamoko, to ok mana en owuon kende. To mano doko ranyisi ma jaber ma noketonwa!

7. Yesu nonyiso chir maduong’ e yo mane bang’ Chiemo Modhiambo mar Ruodhwa?

⁷ Mapiyo bang’ bedo gi Chiemo Modhiambo mar Ruodhwa, Yesu nonyiso chir maduong’. E yo mane? Noyie timo dwach Wuon mare kata obedo ni nong’eyo ni timo mano ne dhi miyo otho tho wich-kuot kihangone gi richo maduong’ ni ochayo Nyasaye. (Mat. 26:65, 66; Luka 22:41, 42) Yesu ne ok oweyo Jehova kata matin, kendo mano nomiyo nying Jehova duong’, nonyiso ni Jehova e jaloch e wi gik moko duto, kendo noyawo ne dhano moloko chunygi thuolo mar yudo ngima mochwere. Bende, Yesu nonyiso jolupne chon-chon gik ma ne dhi timorenegi.

8. (a) En ang’o ma Yesu nonyiso jootene? (b) Bang’ thone, ere kaka jopuonjrene noluwo ranyisine mar bedo gi chir?

⁸ Yesu nonyiso chir bende kuom weyo bedo gi parruok mathoth, to noketo pache e konyo jootene. Nyasi ma notimo bang’ riembo Judas ne dhi paro ne jolupne mowal ber mar rembe ma ne dhi chuer kod singruok ma nodhi timo kodgi. (1 Kor. 10:16, 17) Yesu nonyiso jolupne gik ma nonego gitim mondo gibed joma owinjore dhi e polo. (Joh. 15:12-15) Bende, nonyiso jootene tembe ma ne gidhi romogo. Kae to nojiwogi mondo giluw ranyisine ka ne owachonegi kama: “Beduru gi chir!” (Joh. 16:1-4a, 33) Kuom higni mang’eny, jopuonjrego noluwo ranyisi  mar Yesu mar chiwruok kod bedo jochir. Ne giyie kata timo gik ma ne nyalo hinyo ngimagi mana mondo gisir jowetegi sama ne gikalo e tembe mopogore opogore.​—Hib. 10:33, 34.

9. Ere kaka wanyalo nyiso ni wan jochir mana kaka Yesu?

⁹ E kindewagi bende, wanyiso ni wan jochir mana kaka Yesu. Kuom ranyisi, mondo wakony owetewa gi nyiminewa misando nikech yie margi, chir dwarore. Nitie seche ma inyalo tue owetewa e jela ma onge gimomiyo. Sama mano otimore, nyaka watim duto ma wanyalo mondo wasirgi, moriwo nyaka wuoyo e logi. (Fil. 1:14; Hib. 13:19) Yo machielo ma wanyisogo chir en dhi nyime gi tij yalo kata sama weche tek. (Tich 14:3) Mana kaka Yesu, wan be waramo ni nyaka wadhi nyime yalo wach Pinyruoth kata bed ni ikwedowa kendo isandowa. Kata kamano, seche moko wanyalo bet maluor. Ang’o ma wanyalo timo e seche kaka mago?

10. Kodong’ jumbe matin to watimo Rapar, ang’o monego watim, to nikech ang’o?

¹⁰ Wanyalo medo chir ma wan-go kuom paro matut e wi geno ma wan-go nikech misango ma Kristo nochiwo. (Joh. 3:16; Efe. 1:7) Kodong’ jumbe matin to watimo Rapar, wabedoga gi thuolo makende mar nyiso ni wagoyo erokamano nikech rawar. Kochopo kindeno, som ndiko moketnwa monego wasom e kinde Rapar, kendo ipar matut kuom gik ma notimore ka ne Yesu chiegni tho kod e sa thone. Mano biro miyo sama wachokore ne Rapar, wawinj matut tiend gimomiyo itiyo gi makate gi divai e Rapar kod misango makende ma gichung’ne. Sama wang’eyo malong’o gima Yesu gi Jehova  osetimonwa kod kaka mano konyowa kanyachiel gi osiepewa kod wedewa, geno ma wan-go mar kinde mabiro medo bedo motegno, to mano chwalowa mondo wanan gi chir.​—Hib. 12:3.

11-12. Nyaka chop kae, ang’o ma wasepuonjore?

¹¹ Nyaka chop kae, wasepuonjore ni Chiemo Modhiambo mar Ruodhwa paronwa kit Yesu mar bolruok kod chir. Bende, oparonwa misango mar rawar. Wamor ahinya ni Yesu dhi nyime nyiso kido mabeyogo ka en Jadolo Maduong’ ma ni e polo kendo ma sayo Nyasaye e lowa! (Hib. 7:24, 25) Mondo wanyis ni wagoyo erokamano, onego wadhi nyime paro tho Yesu mana kaka nochikowa. (Luka 22:19, 20) Watimoga Rapar e odiechieng’ ma donjore gi Nisan 14 e kalenda mar Jo-Yahudi. Mano e odiechieng’ makende moloyo odiechienge te e higa.

¹² Yo mayot ma Yesu notimogo nyasi mar Chiemo Modhiambo mar Ruodhwa konyowa fwenyo kido machielo ma en-go ma nochwale mondo othonwa. En kido ma nong’erego ahinya ka ne en e piny ka. En kido maneno?

13. Johana 15:9 kod 1 Johana 4:8-10 lero nade hera ma Jehova gi Yesu osenyiso, to herano konyo jomage?

¹³ Gik moko duto ma Yesu notimo nonyiso hera ma Jehova oherowago. (Som Johana 15:9; 1 Johana 4:8-10.) Yo maduong’ mogik ma Yesu nonyisogo ni en be oherowa en ni noyie thonwa. Bed ni wan Jokristo mowal kata “rombe mamoko,” hera ma Jehova gi Yesu nonyisowa kokalo kuom rawar konyowa waduto. (Joh. 10:16; 1 Joh. 2:2) E wi mano, gik mitiyogo e Rapar bende nyiso kaka Yesu ohero jopuonjrene kendo odewogi. E yo mane?

14. En yo mane ma Yesu nonyisogo ni ohero jolupne?

¹⁴ Yesu nonyiso ni ohero jolupne mowal kuom chakonegi nyasi ma yot timo mar paro thone. Kaka kinde ne dhi medo kalo, Jokristo mowalgo ne dhi timo Raparno higa ka higa e chal mopogore opogore, moriwo nyaka e jela. (Fwe. 2:10) Be ne gitimo kaka Yesu nochikogi? Ee, ne gitimo kamano!

15-16. Ere kaka owete gi nyimine moko osetimo Rapar mar tho Yesu kata mana e bwo chal matek?

¹⁵ Chakre kinde Yesu nyaka sani, Jokristo madier osebedo ka temo matek mondo gitim nyasi mar paro thone. Gitemo mondo gitim nyasino ka giluwo kaka Yesu notime, kata bed ni weche tek ma chalo nade. Ne ane ranyisi ma luwogi. Ka ne otue Owadwa Harold King kar kende e jela e piny China, ne otiyo gi riekni moko mondo Rapar kik baye. Notiyo mana gi gik ma ne nyalo yudore kama ne entiereeno. Bende, nogoyoga kwano adimba mondo ong’e odiechieng’ sie mitimoe Rapar. Ka odiechieng’no nochopo, ne owerga kende, olemo kende, kendo ogolo twak kende ne en owuon.

¹⁶ Ne ane ranyisi machielo. Nyiminewa moko ma ne otue e kinde Lweny mar Ariyo mar Piny Ngima noramo ni nyaka gitim nyasi mar Chiemo Modhiambo mar Ruodhwa kata obedo ni timo mano ne nyalo kelonegi hinyruok kata tho. To nikech nyasino ok dwar gik mathoth mitiyogo, ne gitime ma ok ofwenygi. Ne giwacho niya: “Ne wachung’ ka walworo stul mopedh gi otamba ma rachar moketie makate gi divai. Ne wamoko mana msuma nikech moko sitima ne  nyalo miyo ofwenywa. . . . Ne wanwoyo singruok ma ne watimo gi Wuonwa [ma ni e polo] ni ne wadhi tiyo gi tekrewa duto e ting’o nyinge malo.” Mano doko yie motegno! To mano kaka Yesu nonyiso ni oherowa kuom ketonwa chenro mayot ma miyo watimo Rapar mar thone kata mana e bwo chal matek!

17. Gin penjo mage ma ber ka wapenjore?

¹⁷ Kaka odiechieng Rapar medo kayo machiegni, ber mondo wapenjre penjogi: ‘Ere kaka anyalo medo nyiso hera e okang’ malach ka aluwo ranyisi mar Yesu? Be aparoga ahinya gik ma nyalo konyo Jokristo wetena, koso kinde duto aketo pacha mana kuom gik ma konya awuon? Be dibed ni ageno ni owete gi nyimine otim gik mohingo tekregi, koso amor gi gik ma gitimo kar nyalogi?’ Wadhiuru nyime luwo ranyisi mar Yesu kuom kecho jowetewa.​—1 Pet. 3:8.

18-19. (a) En ang’o ma wan-go gadier? (b) Ang’o ming’ado e chunyi?

¹⁸ Ok wabi timo Rapar mar tho Kristo nyaka chieng’ nikech ochiegni chopo e gikone. Ka Yesu obiro e kinde masira maduong’, obiro choko “joge moyier” koterogi e polo. Bang’ mano, ok wanatim Rapar kendo.​—1 Kor. 11:26; Mat. 24:31.

¹⁹ To kata mana e kinde ma ok wabi timo Rapar, wan gadier ni jotich Jehova wigi ok bi wil gi kaka nyasi ma nitimo e yo mayotno ne paronwa kaka Yesu obolore, ojachir, kendo ojahera. E kindeno, ji duto ma nosegabetie e nyasino biro goyo mbak nyasi makendeno ne jowetegi ma ne ok otime, mondo gin be ging’e kaka nyasino konyogi. Kata kamano, mondo nyasino okonywa sani, nyaka wang’ad e chunywa ni wabiro timo duto ma wanyalo mondo waluw ranyisi mar Yesu kuom bedo joma bolore, jochir, kendo johera. Ka watimo kamano, wanyalo geno ni Jehova biro miyowa pok.​—2 Pet. 1:10, 11.