CHIENG’ Tich Adek gokinyi, Januar 24, 2018, noland ne Jo-Bethel ma Amerka kod ma Kanada wach moro makende, ni Owadwa Kenneth Cook, Jr. oket mondo obed achiel kuom owete ma ni e Bura Matayo Joneno mag Jehova.

Owadwa Cook ne onyuol Pennsylvania e piny Amerka kendo kanyo e kama nodonge. Jaklasgi moro e ma nopuonje adiera ka nochiegni tieko sekondari, kendo nobatise Jun 7, 1980. Nobedo painia mapile chakre Septemba 1, 1982. Bang’ bedo painia kuom higni 2, noluonge mondo odhi oti e Bethel ma ni Wallkill, New York, kendo nochako tiyo kuno Oktoba 12, 1984.

Higni 25 ma noluwo, Owadwa Cook notiyo e migepe mopogore opogore kama igoyoe buge kod e tije mamoko. Nokendo Jamie e higa mar 1996, kendo ne gidhi nyime tiyo e Bethel ma Wallkill. E dwe mar Desemba 2009, ne oter Owadwa Cook gi chiege e Watchtower Educational Center ma ni Patterson, New York, kama Owadwa Cook notiyo e Migawo Mochung’ ne Ndiko kokonyo e tudore gi jondiko mopogore opogore. E dwe mar April 2016 bang’ dok e Bethel ma Wallkill kuom kinde matin, ne odar Owadwa Cook gi jaode mi otergi e Bethel ma Brooklyn, New York. Dweche abich bang’e, ne gidhi e ofiswa maduong’ ma ni Warwick, New York. E dwe mar Januar 2017, ne oket Owadwa Cook mondo obed achiel kuom owete ma konyo e Komiti mar Ndiko ma tiyo e bwo Bura Matayo.