1. Ang’o ma Jehova nokoro ni ne dhi timore e ndalowagi?

JEHOVA nokoro wach moro ma ne dhi timore e ndalowagi. Nowacho kama: “E kindego, ji apar moa e ogendni ma wacho dhok mopogore opogore biro mako riak law Ja-Yahudi, ee, ginimak riak lawe matek ka giwacho niya: ‘Wanadhi kodi nimar wasewinjo ni Nyasaye ni kodu.’” (Zek. 8:23) “Ja-Yahudi” miwuoyoe kae ochung’ ne ji duto mowal gi roho maler. Iluongogi bende ni “Israel mar Nyasaye.” (Gal. 6:16) “Ji apar” to ochung’ ne joma nigi geno mar dak e piny nyaka chieng’. Jogo ong’eyo ni Jehova oseguedho Jokristo mowalgo kendo gineno ni en thuolo makende lamo Jehova kanyachiel kodgi.

2. Ere kaka “ji apar” nyalo ‘dhi kod’ Jokristo mowal?

² Kata obedo ni ok wanyal ng’eyo nying Jakristo ka Jakristo mowal ma nitie e piny ka, * ere kaka joma nigi geno mar dak e piny pod nyalo ‘dhi kodgi’? Muma wacho ni “ji apar” nomak riak law Ja-Yahudi ka giwacho niya: “Wanadhi kodi nimar wasewinjo ni Nyasaye ni kodu.” Muma wuoyo e wi Ja-Yahudi achiel. Kata kamano, wach motigo ni “kodu” nyiso ni iwuoyo kuom ji mang’eny. Mano nyiso ni Ja-Yahudini ok en mana ng’ato achiel, to ochung’ ne Jokristo mowal duto. Jokristo ma nigi geno mar dak e piny kae tiyo ne Jehova kanyachiel gi Jokristo mowal.  Kata kamano, ok gikaw ni Jokristo mowalgo e jotendgi, nikech ging’eyo ni Yesu e Jatendgi.​—Mat. 23:10.

3. Gin penjo mage ma wadwaro yudo dwokogi e sulani?

³ Nikech pod nitie Jokristo moko mowal e piny sani, jomoko nyalo penjore niya: (1) Jokristo mowal onego obed gi paro mane kuomgi giwegi? (2) Onego wane nade joma chamo makate kendo madho divai e Rapar? (3) Be chunywa onego ochandre ka kwan mar joma chamo makate kendo madho divai medore? Wadwaro yudo dwoko mag penjogo e sulani.

4. En siem mane ma ni e 1 Jo-Korintho 11:27-29 ma Jokristo mowal onego opar, to nikech ang’o?

⁴ Jokristo mowal onego opar matut ahinya e wi siem ma yudore e 1 Jo-Korintho 11:27-29. (Som.) Ere kaka Jakristo mowal nyalo chamo makate kendo madho divai “e yo ma ok owinjore” chieng’ Rapar? Mano nyalore ka po ni ochamo makate kendo madho divai to koni ok odak ka luwore gi chike makare mag Jehova. (Hib. 6:4-6; 10:26-29) Jokristo mowal ong’eyo ni nyaka gichung’ motegno ka gidwaro yudo ‘mich man  malo ma Nyasaye oseluongogie kokalo kuom Kristo Yesu.’​—Fil. 3:13-16.

5. Jokristo mowal onego obed gi paro mane kuomgi giwegi?

⁵ Roho maler mar Jehova konyoga jotichne mondo obed joma obolore kar bedo jong’ayi. (Efe. 4:1-3; Kol. 3:10, 12) Kuom mano, Jokristo mowal ok kawre ni gibeyo moloyo jomamoko. Ging’eyo ni bedo ni Jehova owalogi, mano ok nyis ni gin gi roho maler mokalo ma Jehova miyoga jotichne mamoko. Ok giparga ni ging’eyo adiera matut ma ni e Muma moloyo jotich Jehova mamoko. Bende, ok ginyal nyiso ng’ato ang’ata ni en bende owale kendo ni koro ng’atno onego ochak chamo makate kendo madho divai e Rapar. Mopogore gi mano, gibolore nikech ging’eyo ni Jehova e ma gweloga ji mondo odhi odag e polo.

6. Ka luwore gi 1 Jo-Korintho 4:7, 8, Jokristo mowal nyalo nyiso nade ni gibolore?

⁶ Kata obedo ni en thuolo makende bedo ng’at mogwel mondo odhi e polo, Jokristo mowal ok gomb ni jomoko omigi duong’ e yo makende. (Fil. 2:2, 3) Ging’eyo bende ni ka ne Jehova owalogi, ne ok olando ne ji, omiyo, ok kawgi gi wuoro ka jomoko ok yie mapiyo ni owalgi gadier. Ging’eyo ni Ndiko kwerowa ni kik wayie mapiyo gi ng’at ma wacho ni Nyasaye oyiere ne migawo moro makende. (Fwe. 2:2) Kuom mano, nikech ok gidwar nyisore e nyim jomamoko, joma owal ok bi nyiso ng’ato ang’ata ma giromogo ni owalgi. Bende, ok gibi sungore nikech pok mosingnegi.​—Som 1 Jo-Korintho 4:7, 8.

7. Ang’o ma Jokristo mowal ok onego otim, to nikech ang’o?

⁷ Jokristo mowal ok onego opar ni onego gimak mana osiep gi Jokristo wetegi mowal ka gima gin e grup moro makende. Ok gimany joma bende nigi geno ma chal gi margi mondo giwuo e wi geno ma gin-go kata loso grup ma margi giwegi mar puonjruok Muma. (Gal. 1:15-17) Timbe ma kamago nyalo kelo pogruok e kanyakla kendo kwedo roho maler ma kelo kue kod winjruok.​—Rumi 16:17, 18.

8. Ang’o momiyo ok onego wami joma chamo makate kendo madho divai e kinde Rapar luor mokalo tong’? (Ne bende weche moler piny.)

⁸ Onego wabed gi paro mane e wi owete gi nyimine mowal? Ok owinjore wang’aw ng’ato ahinya kata ka en owadgi Yesu.  (Mat. 23:8-12) Muma jiwowa ni ‘waluw yie’ mar jodong-kanyakla, kata kamano, ok onyiswa ni waket dhano moro amora obed jatendwa. (Hib. 13:7) En adier ni Muma nyisowa ni nitie “jo monego omi luor nyadiriyo.” Joma kamago owinjore omi luor nyadiriyo nikech ‘gitayowa e yo mowinjore,’ kendo ‘gitiyo matek e wuoyo gi puonjo,’ to ok en nikech owalgi. (1 Tim. 5:17) Ka wamiyo Jokristo mowal duong’ kod luor mokalo tong’ wanyalo miyo kik gibed thuolo ka gin kodwa. * To marachie moloyo, mano nyalo miyo gichak ng’awre. (Rumi 12:3) Onge ng’ato ang’ata kuomwa ma diher timo gima nyalo miyo achiel kuom Jokristo mowalgo ochwanyre mi podh nikech ng’ayi!​—Luka 17:2.

9. Ere kaka wanyalo nyiso luor mowinjore ne Jokristo mowal?

⁹ Ere kaka wanyalo nyiso luor mowinjore ne joma Jehova owalo? Ok ber penjogi kaka ne owalgi. Mano en wach ma ok otudore kodwa, omiyo, ok ochuno ni wang’e. (1 The. 4:11; 2 The. 3:11) Bende, ok onego wapar ni janyuol Jakristo mowalno, jaode, kata watne moro bende owal. Ng’ato ok wal mondo odhi e polo mana nikech oa e anyuola moro. Mani en pok ma Nyasaye miye. (1 The. 2:12) Onego watang’ bende mondo kik wapenjgi penjo ma nyalo chwanyo jomamoko. Kuom ranyisi, ok onego wapenj chi Jakristo moro mowal ni owinjoga nade sama oparo ni obiro dak e piny ka nyaka chieng’ to chwore ni e polo. Onego wabed gadier chuth ni e piny manyien, Jehova biro ‘yawo lwete kendo miyo gik mangima duto gik ma gidwaro.’​—Zab. 145:16.

10. En obadho mane ma nyalo yudowa ka wachako ng’awo jomamoko kendo neno ni gibeyo moloyo jomoko?

¹⁰ Nitie obadho moro ma wanyalo po ka wadonjoe ka wang’awo Jokristo mowal malo kata neno gi gibeyo moloyo jomamoko. En obadho mane? Muma nyisowa ni Jokristo moko mowal samoro ok bi chung’ motegno nyaka giko. (Mat. 25:10-12; 2 Pet. 2:20, 21) Omiyo, onego watang’ mondo kik waluw aluwa jomamoko mana nikech owalgi, kata gin joma ong’ere ahinya, kata nikech gisebedo ka gitiyo ne Jehova kuom kinde malach. (Juda 16) Timo kamano biro konyowa chung’ motegno kata ka joma kamago oweyo tiyo ne Jehova.

11. Ang’o mosebedo ka timore ne kwan mar joma chamo makate kendo madho divai?

¹¹ Kuom higni mang’eny, kwan mar joma chamo makate kendo madho divai e Rapar nosebedo ka dok piny. Kata kamano, higni matin mosekalo kwan-gi osebedo ka medore ameda. Be wachno onego ochandwa? Ooyo. We wane gimomiyo wachno ok onego ochandwa.

12. Ang’o momiyo kwan mar joma chamo makate kendo madho divai e Rapar ok onego ochandwa?

¹² “Jehova ong’eyo joge.” (2 Tim. 2:19) Owete ma kwanoga joma chamo makate kendo madho divai ok ong’eyo joma owal gadier. Jehova kende e ma ong’eyogi. Omiyo, kwanno oriwo nyaka joma paro ni owalgi to kare ok owalgi. Kuom ranyisi, nitie joma ne chamoga makate kendo madho divai to sani giseweyo timo kamano.  Nitie jomoko bende ma nyalo chamo makate kendo madho divai nikech gin gi tuoche ma chocho obwongogi, kata gin gi parruok mokalo tong’ ma nyalo wilo pachgi mi gichak paro ni gibiro locho gi Yesu e polo. Adiera en ni ok wang’eyo kwan sie mar Jokristo mowal ma pod ni e piny ka.

13. Be Muma nyisowa kwan mar Jokristo mowal ma biro bedo e piny e kinde ma masira maduong’ biro chakore?

¹³ Joma owal biro betie kuonde mang’eny e piny kinde ma Yesu nobie mondo ochokgi koterogi e polo. (Mat. 24:31) Muma wacho adimba ni mana Jokristo mowal manok e ma ne dhi bedoe e piny e ndalo mag giko. (Fwe. 12:17) Kata kamano, Muma ok wach kwan mar Jokristo mowal ma biro bedo e piny e kinde ma masira maduong’ chakore.

14. Ka luwore gi Jo-Rumi 9:11, 16, en wach mane ma wapuonjore e wi kaka Jehova yieroga Jokristo mowal?

¹⁴ Jehova e ma yiero kinde ma owaloe ng’ato. (Rumi 8:28-30) Jehova nochako yiero joma biro dhi e polo bang’ ka Yesu nosechier. Nenore ni Jokristo mokwongo duto ne gin joma owal. Higni moko mang’eny bang’e, joma nochako luongore ni Jokristo ne ok luw Kristo gadier. Kata kamano, Jehova pod nodhi nyime walo Jokristo madier e kindego. Ne gichalo ka ngano ma Yesu nowacho ni ne dhi dongo kanyachiel gi ogolo. (Mat. 13:24-30) E kinde mag gikogi, Jehova osedhi nyime yiero joma biro loso kwan mar ji 144,000 * ma biro locho e polo. Omiyo, ka Nyasaye  oyiero ng’ato e kinde mag gikogi, ok onego wang’ur ka waparo ni otimo gima rach. (Som Jo-Rumi 9:11, 16.) * Onego watang’ mondo kik wabed kaka jotich moko ma Yesu nolero timbegi e ngero moro. Ne ging’ur nikech wuon puodho nochulogi pesa ma romre gi ma ne ochulo joma nochako tiyo e seche mag odhiambo.​—Mat. 20:8-15.

15. Be Jokristo mowal duto ni e grup mar “jatich mogen kendo mariek” miwuoyoe e Mathayo 24:45-47? Ler ane.

¹⁵ Nitie Jokristo moko mowal ma ok ni e grup mar “jatich mogen kendo mariek.” (Som Mathayo 24:45-47.) Mana kaka e kinde Jokristo mokwongo, Jehova gi Yesu tiyo gi owete manok e pidho ji mang’eny. Jokristo mowal manok ahinya e ma notigo e ndiko buge mag Mathayo nyaka Fweny. E kindewagi bende, Jokristo mowal manok kende e ma omi migawo miyo jo Nyasaye ‘chiemo e kinde mowinjore.’

16. Gin puonj mage ma iyudo e sulani?

¹⁶ Gin puonj mage ma wayudo e sulani? Jehova oseyiero mondo omi ji mang’eny ngima mochwere e piny, to ji manok kende e ma omiyo ngima e polo mondo gidhi giloch gi Yesu. Jehova guedho jotichne duto, bed ni gin e grup mar “Ja-Yahudi” kata mar “ji apar,” kendo odwaro ni giduto giluw chike machal kendo gisik ka gichung’ motegno. Giduto nyaka gibolre. Giduto nyaka giti ne Jehova ka gin e achiel. Kendo giduto nyaka gitem matek mondo gine ni kue obedo e kanyakla. Kaka giko medo kayo machiegni, weuru waduto wadhi nyime tiyo ne Jehova kendo luwo Kristo ka wan “kueth achiel.”​—Joh. 10:16.