1. Hera ma Nyasaye oherigo miyo iwinjo nade?

JAOTE JOHANA nondiko kama: “Nyasaye en hera.” (1 Joh. 4:8) Wechego paronwa adiera moro makendeni: Nyasaye e Wuon ngima, kendo en e Wuon hera. Jehova oherowa ahinya! Hera moherowago miyo wawinjo ka chunywa okue, wamor, kendo onge gimoro amora ma waremo.

2. Ka luwore gi Mathayo 22:37-40, gin chike mage ariyo madongo momiwa, to ang’o momiyo nyalo bedonwa matek luwo chik mar ariyo?

² Dwarore ni Jokristo duto onyis hera. Mano en chik ma Jehova omiyogi. (Som Mathayo 22:37-40.) Ka wang’eyo Jehova e yo maber, biro bedonwa mayot luwo chik mokwongo ma dwaro ni waher Jehova. Kuom adier, Jehova en Nyasaye makare chuth; odewowa kendo ong’won kodwa. Kata kamano, nyalo bedonwa matek luwo chik mar ariyo ma dwaro ni waher dhano wetewa. Nikech ang’o? Nikech owetewa gi nyiminewa, ma gin e joma wan-go machiegni moloyo, gin joma orem. Nitie seche ma ginyalo wacho kata timo gimoro ma chwanyowa, kendo wanyalo chako paro ni ok giherowa. Nikech Jehova nong’eyo ni gima kamano ne nyalo timore, notayo jondik Muma moko mondo onyiswa gik ma wanyalo timo sama Jakristo wadwa moro ochwanyowa. Achiel kuom joma nondiko wechego en jaote Johana.​—1 Joh. 3:11, 12.

3. En ang’o ma Johana nojiwo ahinya?

³ Johana nojiwo ahinya gimomiyo dwarore ni Jokristo onyis hera. E Injili mar Johana, jaoteno notiyo gi wach mar “hera” nyading’eny moloyo jondik Injili adek mamoko.  Nenore ni Johana ne jahigni 100 kama ka nondiko Injili mar Johana, kaachiel gi barupe mamoko adek. Buge ma nondikogo jiwo kaka hera e monego ochik gimoro amora ma Jakristo timo. (1 Joh. 4:10, 11) Kata kamano, ne okawo kinde mondo Johana bende opuonjre nyiso hera.

4. Be kinde duto Johana ne nyisoga hera?

⁴ Ka ne Johana pod en rawera, ne ok onyisga hera kinde duto. Kuom ranyisi, kinde moro ka ne Yesu ni e wuoth gi jopuonjrene ka gidhi Jerusalem, ne gikalo Samaria. Jo gweng’ moro ma ni Samaria notamore rwakogi. Ang’o ma Johana notimo? Nokwayo Yesu mondo oluong mach koa e polo mondo owang’ jo gweng’no duto! (Luka 9:52-56) E kinde moro bende, jaote Johana ne ok onyiso joote wetene hera. Nenore ni en kaachiel gi owadgi ma Jakobo ne gichuno min-gi mondo okwa Yesu omigi migepe madongo e Pinyruodhe. Mirima nomako joote mamoko bang’ fwenyo gima Jakobo gi Johana notimono. (Mat. 20:20, 21, 24) Kata obedo ni Johana notimo kethogo duto, Yesu pod nohere ahinya.​—Joh. 21:7.

5. Gin ang’o ma wadwaro nono e sulani?

⁵ E sulani, wadwaro nono ranyisi ma Johana noketonwa kod weche moko ma nondiko e wi hera. Bende, wabiro puonjore kaka wanyalo nyiso ni wahero owetewa gi nyiminewa. Kae to, wabiro puonjore yo moro makende ma wiye udi nyalo nyisogo ni gihero joutegi.

6. Ere kaka Jehova osenyiso ni oherowa?

⁶ Wanyaloga paro ni ka wawuoyo gi jomoko e yor ng’wono, to mano kende oromo nyiso ni waherogi. Kata kamano, hera madier nyaka nyis gi tim bende. (Pim gi Jakobo 2:17, 26.) Kuom ranyisi, Jehova oherowa ahinya. (1 Joh. 4:19) Kendo wang’eyo mano kokalo kuom weche mabeyo mondikonwa e Muma. (Zab. 25:10; Rumi 8:38, 39) Kata kamano, wan gadier ni Jehova oherowa ok nikech weche mosenyisowa kende, to bende ka luwore gi gik mosetimonwa. Jaote Johana nondiko niya: “Kuom wachni, hera ma Nyasaye oherowago ne onenore ayanga, ni Nyasaye nooro Wuode ma miderma e piny mondo wayud ngima kokalo kuome.” (1 Joh. 4:9) Jehova noyie mondo Wuode ma nohero ahinya osandre kendo othonwa. (Joh. 3:16) Donge mano miyo wabedo gadiera chuth ni Jehova oherowa?

7. En ang’o ma Yesu notimo ma nyiso ni oherowa?

 ⁷ Yesu nonyiso jopuonjrene ni oherogi ahinya. (Joh. 13:1; 15:15) Gik ma notimonegi kod ma nowachonegi nonyiso kaka noherogi. Gigo bende nyiso kaka oherowa. Nowacho niya: “Onge ng’at ma nigi hera maduong’ ma loyo ma: ni ng’ato chiwo ngimane nikech osiepene.” (Joh. 15:13) Ka waparo kaka Jehova gi Yesu oherowa, mano onego ochwalwa mondo watim ang’o?

8. Ang’o ma 1 Johana 3:18 wacho ni onego watim?

⁸ Wanyiso ni wahero Jehova gi Yesu sama waluwo chike ma gimiyowa. (Joh. 14:15; 1 Joh. 5:3) Yesu nonyisowa achiel kachiel ni waherre. (Joh. 13:34, 35) Ok onego wawach awacha ne owetewa gi nyiminewa ni waherogi kae to waweyo gi kanyo, to onego wanyis herano kokalo kuom timbewa bende. (Som 1 Johana 3:18.) Gin ang’o ma wanyalo timo mondo wanyis ni waherogi gadier?

9. Hera nochwalo Johana mondo otim ang’o?

⁹ Johana ne nyalo yiero dhi nyime tiyo tij lupo gi wuon-gi kendo loso pesa mang’eny. Kata kamano, noyiero tiyo gi ngimane e konyo jomoko mondo ging’e adiera kuom Jehova kod Yesu. Ngima ma Johana noyierono ne ok en ngima mayot. Ne osande, kendo ka ne ojaduong’ ma hike 100 kama, ne otere e tuech. (Tich 3:1; 4:1-3; 5:18; Fwe. 1:9) Kata sama ne en e tuech nikech yalo wach e wi Yesu, pod nonyiso ni nohero jomamoko. Kuom ranyisi, ka notueye e chula mar Patmo, nondiko weche ma noneno e fweny kendo oro wechego ne kanyakla mopogore opogore mondo onyisgi ‘gik ma nyaka ne timre e kinde ma nokayo.’ (Fwe. 1:1) Nenore ni bang’ ka nosegonye moa e chula mar Patmo e ka nondiko bug Injili mar Johana ma wuoyo kuom ngima Yesu kod tije mar lendo. Bende, nondiko barupe moko adek mondo ojiw owetene gi nyiminene kendo oho chunygi. Ere kaka inyalo luwo ranyisi maber ma Johana noketo?

10. Ere kaka inyalo nyiso ni ihero dhano weteni?

¹⁰ Inyalo nyiso ni ihero dhano weteni ka luwore gi yo mitiyogo gi ngimani. Piny Satanni dwaro ni iti gi thuoloni kod tekoni duto e loso pesa mang’eny, kata e loso nyingi mondo ibed ng’at ma rahuma. Kata kamano, Jokristo madier e piny mangima timo duto ma ginyalo mondo giland wach maber, kendo gikonyo jomamoko mondo osud machiegni gi Jehova. Moko kuomgi oseyiero timo tij yalo wach maber kuom thuologi duto.

11. Ere kaka owete gi nyimine mang’eny osenyiso ni gihero Jehova kod Jokristo wetegi?

¹¹ Nitie owete gi nyimine momakore gi Jehova ma tiyo gi thuologi mang’eny e tije mag andika mondo giyud kaka ginyalo konyore kaachiel gi joutegi. To pod gitemoga matek mondo giriw riwruok mar oganda Nyasaye lwedo kar ma ginyalo. Kuom ranyisi, moko osechiwore mondo gikony e kinde masiche, moko konyoga e tije mag gero utewa mag lamo, kendo ng’ato ka ng’ato nigi thuolo mar golo chiwo misirogo tij piny ngima. Gitimoga mago duto nikech gihero Nyasaye kod dhano wetegi. E juma ka juma, wanyisoga ni wahero jowetewa kuom dhi e chokruoge mag kanyakla kendo chiwo paro e chokruok. Kata obedo ni seche moko wanyaloga ol ahinya, ok wabarega ne chokruok. Kata obedo ni seche moko wanyaloga bedo maluor, pod wachiwoga paro e  chokruoge. Kendo kata obedo ni wan gi chandruoge kod pek moko, pod watemoga matek mondo wajiw jowetewa ka pok chokruok ochakore kod bang’ chokruok. (Hib. 10:24, 25) To mano kaka wamor gi kinda ma Jokristo wetewa timo!

12. En yo mane machielo ma Johana nonyisogo ni nohero owetene gi nyiminene?

¹² Jaote Johana nonyiso ni nohero owetene gi nyiminene, ok mana kuom pwoyogi kende, to bende norieyogi sama mano ne dwarore. Kuom ranyisi, e barupe ma nondikonegi, Johana nopwoyo owetene gi nyiminene nikech yiegi kod timbegi mabeyo. To bende nonyisogi ni onego gitang’ gi richo. (1 Joh. 1:8–2:1, 13, 14) Kamano bende, dwarore ni wapwo owetewa gi nyiminewa kuom gik mabeyo ma gitimo. Sama achiel kuomgi ochako bedo gi timbe moko ma ok beyo, wanyalo nyiso ni wahere kuom rieye e yor ng’wono. En adier ni chir dwarore mondo ng’ato orie osiepne, kata kamano, Muma wacho ni osiep madier piago nyawadgi kata rieye.​—Nge. 27:17.

13. En ang’o ma ok onego watim?

¹³ Nitie seche ma wanyalo nyiso ni wahero owetewa gi nyiminewa kokalo kuom gik ma ok watim. Kuom ranyisi, iwa ok onego owang’ piyo sama giwachonwa gimoro ma nyalo chwanyowa. Par ane gima Yesu notimo ka nochiegni tieko tije mar yalo e piny ka. Nonyiso jopuonjrene ni mondo ne giyud ngima, ne nyaka gicham ringrene kendo gimadh rembe. (Joh. 6:53-57) Wachno nobwogo jopuonjrene mang’eny mi ng’enygi noweyo luwe. Kata kamano, osiepene madier moriwo nyaka Johana to ne ok oweyo makore kode. Ne ok giwinjo tiend gima Yesu ne wacho, kendo nyalo bedo ni gin bende wachno nokawogi gi wuoro. Kata kamano, ne ok gichwanyore nikech wechego, to ne gigeno kuome nikech ne ging’eyo ni nowachoga adiera. (Joh. 6:60, 66-69) Dwarore ahinya ni kik wawe gik ma jomoko wacho kata timo owang’ iwa. Kar mano, onego wamigi thuolo mondo gilernwa maber tiend gima giwacho kata ma gitimo.​—Nge. 18:13; Ekl. 7:9.

14. Ang’o momiyo ok onego wabed gi sigu gi owetewa gi nyiminewa?

¹⁴ Johana nowacho bende ni kik wabed gi sigu gi owetewa gi nyiminewa. Ka  watimo sigu gi Jokristo wetewa, wabiro miyo Satan thuolo mar chiko ngimawa. (1 Joh. 2:11; 3:15) Gima kamano notimore ne Jokristo moko machon. Satan notemo matek mondo oket sigu e kind jotich Nyasaye. E kinde ma Johana nondikoe barupege, nitie owete moko ma nosechako timo dwach Satan. Kuom ranyisi, Diotrefe nokelo pogruok e kind owete gi nyimine e kanyakla moro. (3 Joh. 9, 10) Nochayo owete ma bura matayo nooro mondo olim kanyakla mopogore opogore. Bende, notemo riembo owete gi nyimine ma ne rwako owetego. To mano kaka Diotrefe ne wiye tek! E kindewagi bende, Satan pod temo matek mondo opog jotich Nyasaye. Watemuru ahinya mondo kik wayie ne Satan opogwa mi wawe konyo Jokristo wetewa.

15. En ang’o ma wiye udi onego opar kinde duto?

¹⁵ Achiel kuom yore ma wiye udi nyalo nyisogo ni gihero joutegi en miyogi gige ringruok. (1 Tim. 5:8) Kata kamano, wi ot ok onego opar ni chiwo gige ringruok kende oromo loso winjruok maber e kind joode gi Nyasaye. (Mat. 5:3) Ne ane ranyisi ma Yesu noketo ne wiye udi. Bug Injili mar Johana nyiso ni ka ne Yesu ni e yadh-sand, pod noparo joodgi. Noyudo Johana ochung’ but Maria min Yesu kama ne inegoe Yesu. Kata obedo ni Yesu ne nigi lit mang’eny, pod notimo chenro mondo Johana orit min-gi. (Joh. 19:26, 27) Yesu ne nigi nyithindgi mamoko ma ne nyalo rito min-gi, kata kamano, nenore ni pok ne gibedo jopuonjrene e kindeno. To Yesu ne dwaro ni Maria odhi nyime yudo gige ringruok kod chiemb chuny bende.

16. Gin migepe mage ma Johana ne nigo?

¹⁶ Johana ne nigi migepe mang’eny. Nikech ne en achiel kuom joote, ne en gi ting’ mar tayo tij lendo. Nenore ni ne en gi dhako, omiyo, ne nyaka omi joode gige ringruok kaachiel gi chiemb chuny. (1 Kor. 9:5) En ang’o ma wiye udi nyalo puonjore kuom ranyisi mar Johana?

17. Ang’o momiyo dwarore ni wi ot one ni joode oyudo chiemb chuny?

¹⁷ Owadwa ma en wi ot nyalo bedo gi ting’ mang’eny. Kuom ranyisi, dwarore  ni obed jakinda kama otiye mondo timbene omi nying Jehova duong’. (Efe. 6:5, 6; Tito 2:9, 10) Onyalo bedo gi ting’ mamoko e kanyakla kaka bedo jaduong’-kanyakla kaachiel gi tayo tij lendo. Bende, dwarore ni opuonjre Wach Nyasaye gi kinda kaachiel gi chiege kod nyithinde. Joode biro bedo ma mor ahinya ka gineno kinda motimo mondo omigi gige ringruok kod chiemb chuny.​—Efe. 5:28, 29; 6:4.

18. En wach mane ma Johana ne nigo gadier?

¹⁸ Johana nodak kuom higni mang’eny, kendo noromo gi weche mathoth. Noromo gi chandruoge mang’eny ma ne nyalo ketho yiene. Kata kamano, notimo duto monyalo mondo oluw chik mar Yesu ma noriwo hero owetene gi nyiminene. Kendo mano nomiyo Johana obedo gadier ni Jehova gi Yesu nohere kendo ni ne gidhi tege mondo onan e chandruok moro amora ma nodhi romogo. (Joh. 14:15-17; 15:10; 1 Joh. 4:16) Onge gimoro amora ma ni e piny Satanni ma ne nyalo mono Johana nyiso hera.

19. Ndiko mar 1 Johana 4:7 jiwowa ni watim ang’o, to nikech ang’o?

¹⁹ Mana kaka Johana, wadak e piny ma Satan ma en nyasach pinyni chiko. (1 Joh. 3:1, 10) Satan dwaro ni kik waher owete gi nyiminewa, to oonge gi teko mar timo mano, mak mana ka wamiye thuolo. Omiyo, wang’aduru e chunywa ni wabiro dhi nyime nyiso owete gi nyiminewa hera kokalo kuom timbewa kod wechewa. Ka watimo kamano, wabiro bedo ma mor tiyo kanyachiel gi jotich Jehova.​—Som 1 Johana 4:7.